(الجزء الاول) _مش هتجوز كرم ابو شنب يا بابا ابو مناخير شبه هرم خفرع _بنت يا متنمره بطلى تنمر واتأدبي ده هيبقا جوزيك _برضو هتقولي جوزي ده لو كان اتجوز كان خلف خمسه قدي وعشره قدك يا بابا _بت انتي غلباويه ومفيش منك فايده بس كلمتي هتتسمع هتتجوزي المعلم كرم يعني هتتجوزيه ادخلي جهزي نفسك يلا زمانو على وصول هو والمأذون _ما تقولي حاجه يا ماما هتجوزي بنتك المزه القمر دي للبومه اللي قد جدي ده؟
_كلمة ابوكي هتمشي يا ليلى وما اسموش بومه اسمه جوزيك دخلت الاوضه بعد مانفخت ورزعت الباب ورايا وفضلت رايحه جايه مش عارفه اعمل اي افكر ازاي لحد ما قرارت اني ههرب خدت فلوس من شنطة ماما وبطاقتي وشنطتي وخرجت من الباب الخلفي للعماره بعد ما كتبت ليهم رساله بقول فيها:
“ماما حبيبتي وبابا حبيبي انا هربت .. ااه والله هربت ومتدوريش عليا ولا انتي ولا بابا عشان سافرت بره البلد اصلآ مش قصدي اكسر كلمتك يا بابا بس لو كرم اخر واحد في الكون مش هتجوزه واه صحيح يا ماما انا سرقت فلوس من شنطتك والفلوس اللي انتي شايلها فوق الدولاب وقولتيلي مقولش ل بابا عليهم بس كان لازم اعمل كدا عشان اصرف على نفسي وااه يا حج بنتك متربتش لاء وكمان حراميه انتو مني وعليا مش هتكسف منكم يعني يلا سلام طولت عليكم هتوحشوني اوي”
قطع حبل ذكرياتي صوت الظابط اللي بيمر في تفتيش القطر بيسألني على التذكره وريته التذكره ورجعت قعدت في مكاني تاني وانا محتاره هعمل اي في اسكندريه وانا معرفش حد هناك بس مش مهم المهم اني هربت من ابو شنب بعد شويه كنت وصلت لأسكندريه قعدت في كافيه فطرت وشربت قهوتي وروحت أقف عند البحر ساعه ورا ساعه وانا واقفه سرحانه لحد ما لفت انتباهي واحد بيتكلم في التيلفون
_ودي اجيبها ازاي مش فاهم هروح اقول ل واحده اتجوزيني ل مدة اسبوع بعدين اطلقك ده اي العبط ده اقفل .. اقفل وانا هتصرف كان طول بعرض حلو بس مش اوي يعني مهتمتش ورجعت ل سرحاني تاني وفي نفس المكان اللي واقفين فيه ظهر كلب وطبعآ خوفت منو بعدت شويه في شويه لحد ما خبط في كتف الشاب اللي واقف تيلفونو وقع في البحر .. _احيييه انا اسفه
_يا خربيت سنينك انتي عارفه ان الموبيل ده عليه شغل وأرقام مهمه _ما قولنا انا اسفه يا نجم محصلش حاجه قولي حقو كام وانا اجبلك غيرو _انتي تسكتي خالص كنت ناقص مصايب ياربي _انا مصيبه؟ تصدق إنك قليل الادب _انا!! هو انتي مش ملاحظه انك لسانك طويل وبجحه _طب إحمد ربنا انها جت في موبيلك عشان متحصلوش وانت اللي ستين بجح
قولتها وسبته ومشيت وهو متغاظ مني قعدت في كافيه وبعد شويه شوفت إعلان شغل في شركه قريبه من المكان اللي انا فيه حسيتها فرصه ليا اول حاجه الاقي شغل بعدين الاقي سكن وكدا يبقا كله تمام روحت للشركه وقالو من المفروض إن الانترفيو مع المدير استاذ سامي اتجهت ل مكتب المدير وكانت الصدمه إن اللي اتخانقت معاه من شويه هو المدير ده اي شغل الروايات ده؟ في الاول خوفت بس بعدين اطمنت دي حاجه عاديه في الاول خناقه بعدين هنحب بعض ونتجوز كل الروايات والمسلسلات التركي مأكدين على الكلام ده
ودخلت مكتبو كان في إيده ورق مركز فيه قطعت تركيزه وانا بقول: _من فضلك جايه اعمل إنترفيو بخصوص الإعلان! ساب اللي في إيده وبصلي وقال بصوته العالي: _هو انتي !! بره اطلعي بره _بره بره ياخويا هو انا خارجه من الجنه خرجت من الشركه بعد ما طردني وانا في دماغي الترند بتاع اي ده يا جدعان؟ اي ده؟ حد يقولي اي ده مش المفروض كنا نعيش قصة حب اي ده بقا؟؟؟
رجعت وقفت على البحر تاني وحسيت بقلة الحيله وقرارت اني ارجع القاهره هو اه هتجوز كرم ابو شنب بس احسن من اني اكون معنديش بيت واه هاخد علقه ماخدهاش حمار بس مش مشكله علقه تفوت ولا حد يموت خدتها مشي ل محطة القطر عشان الفلوس مش هتكفي اخد تاكسي ومستحيل اركب أتوبيس ولا مكروباص جربعه مش هتجربع انا هانم وهفضل طول عمري هانم قطع كلامي مع نفسي صوت كلاكس عربيه ورايا وبما إني بارده فضلت ماشيه ببطئ عشان السواق ينزل يهزقني واتخانق معاه خلينا نتسلى لحد ما نوصل
وبالفعل نزل يشتمني بس الصوت ده انا عارفاه بصيت ورايا وكان هو _يوه هو انتي .. انتي ورايا ورايا؟ _صدقني كان نفسي اتخانق معاك بس مش قادره فا امشي وانت ساكت متصدعناش _انتي لا يمكن تكوني بني ادمه _خناقه جايه معاك بخناقه صح؟ _ياستي ولا خناقه ولا نيله بس اركبي انا كنت بدور عليكي اصلآ _ليه غيرت رايك وهتشغلني في شركتك مش عايزه اشتغل جتك ستين نيله انت وشركتك
_مش هرد عليكي عشان بما اني ليا حاجه عند الكلب هقولو ياسيدي _نهارك اسود انا كلب!! اهو انت اللي ستين كلب _هو اللي ربنا خدو من طولك ادهولك في لسانك اركبي يا ستي وانا هعرف اربيكي كويس _تربيني ليه وانا ناقصه تربيه انت عمال تغلط وانا الغلطه معايا بفوره _طب اركبي _مش راكبه _اركبي بقولك _مش راكبه وأمور السهوكه دي مبتاكلش معايا
_يعني اي اسكتشي انتشي؟؟ ضحكت واتفجأت في نفس الوقت ازاي ممكن يكون عارف الترندات والمميز والحاجات دي ده شكله عميق جدآ _اركبي بقا .. هنتكلم لو كلامي معجبكيش هوصلك مكان ما انتي عايزه وولا كأني اتكلمت من اصلو _طيب أمري ل الله ركبت معاه وفضل سايق في صمت لحد ما وصلنا قدام كافيه ركن ونزلنا قعدنا في الكافيه طلب اسبريسو دبل شكله راجل عميق زاي ما قولت وانا طلبت كافيه لاتيه
_ها قول عايز اي بقا _بصي الحكايه ومافيها اني عايز اتجوزك يا ليلي!! يتبع… “الجزء التاني” _لاء واحده واحده عليا كدا وفهمني تتجوزني ازاي وليه؟ _شوفي مش هحكي اي حاجه غير لما اعرف ردك _مش موافقه طبعآ مبقاش غيرك انت اللي هتبقا جوزي _ااه عندك حق انتي اللي زايك ميلقش عليه غير كرم ابو شنب _انت عرفت منين؟؟ _من الموظفه اللي قعدتي معاها عقابل مايجي دورك في الانترفيو وحكيتي ليها على قصة حياتك
_انا حكيت فعلآ بس مش فاكره اني حكيت على كرم! _لاء حكيتي على كرم وعلى هروبك من أهلك والفلوس اللي فوق الدولاب وام عبير جارتكم تحبي اقولك باسورد الواي فاي بتاعكم؟؟ _بس خلاص خلاص انا مني ل الله مبيتبلش في بوقي فوله _حصل انتي انسانه متعرفش حاجه عن كلمة البيوت أسرار _جايه معاك ب اي ؟؟ _مش جايه معايا ب حاجه دلوقتي انتي محتاجني هنتجوز اسبوع وهديكي نص مليون جنيه ترجعي ل اهلك بيهم بقا او تجيبي هنا شقه وتعملي شغل خاص بيكي وتجيبي اهلك هنا اللي يعجبك قولتي اي؟
_وليه ده كله بقا يا نجم فهمني انت هتستفاد اي؟ _بصي المفروض إن ليا ورث ومش هاخد الورث ده غير لما اتجوز الوصيه بتقول كدا فا هتجوزك لحد ما اخد ورثي بعدين اطلقك وتاخدي المبلغ اللي اتفقنا عليه قولتي اي؟ _جواز مصلحه يعني _بظبط كدا _واشمعنا انا يعني ما في بنات كتير _عشان انتي ظروفك شبه ظروفي وأهلك مش معاكي ومفيش اهل هيوافقو ان بنتهم تتجوز اسبوع وتطلق
_ااه انت عايز تستفرد بيا يعني _استفرد بيكي اي يا هاطله انتي _اهو انت _يا صبر أيوب ماعلينا قولتي اي ؟ _افكر وارد عليك سيبلي رقمك _انتي هتتأمري يا ست سعاد حسني قالها وساب كارت عليه رقمه وحاسب قبل ما يمشي وبعد تفكير كتير قرارت اني أوافق كدا كدا ده جواز مصلحه واسبوع واموري ترجع كويسه تاني رنيت على رقمه قولتله اني موافقه وقال انه جاي ياخدني ومفيش دقايق ولقيته قدامي ب عربيته
_اركبي .. ركبت جنبه ورزعت الباب بقصد _متعرفيش تقفليه براحه _لاء مبعرفش _بعد ما تجوزك هعلمك ازاي تعرفي يا حلوه _لاء اوعا انا مبخافش _ماهو واضح ياختي واضح بعد شويه ركن عربيته قدام برج فخم اتضح انه واخد شقه في البرج ده طلعنا .. البيت كان كبير باين إنها كذا شقه ومفتوحه على بعض كان فيه خدم والمأذون _جاهزه نكتب الكتاب ولا عايزه تحطي حاجه؟
_حاجه ازاي يعني _يعني ميكب شوية روج شوية اخضر واحمر والحاجات بتاعتكم دي _واحط ليه هيتكتب كتابي على امير كراره مثلآ؟ _انا غلطان اني سألتك اتفضلي قدامي قعدنا والمأذون بدأ يكتب الكتاب وانا في دماغي الف سيناريو مش ممكن يكون رئيس عصابه وعايز يخطفني وممكن برضو نحب بعض ومنطلقش وتبقا حكايتنا زاي الروايات فوقت من سرحاني على جملة المأذون الشهيره “بارك الله لكم وبارك عليكم وجمع بينكم في خير ”
وقام يوصل المأذون ودخلت انا البلكونه وانا بفكر في اهم يوم في حياتي عدا عليا من غير زغروطه ولا فستان فرح حتى .. قطع شرودي دخوله _بصي يا بنت الناس انتي دلوقتي مراتي هو اه على الورق بس ده ميمنعش اني جوزيك وحاكم امرك قلة أدب مش عايز لسان طويل مش عايز وابقا عارف رايحه فين وجايه منين واي راجل غريب يجي وانا مش هنا متفتحيش ومتقابليش حد تخلي الخدم هما اللي يفتحو
والبيت زاي مانتي شايفه كل حاجه فيه هتبقا تحت امرك وروحي وتعالي براحتك معاده اوضتي متدخليهاش واي حاجه عايزها قوليلي وانا اجيبها عندك اي اعتراض؟ مردتش عليه مكنش فيه في بالي غير ان لو بابا كان موجود كان قالو خلي بالك منها كان هيوصيه عليا عيني خانتني ودمعه نزلت مني غصب عني _إي ده انتي بتحسي زاينا؟ طب انا اسف حقك عليا لو كانت طريقتي قاسيه شويه انا كنت مستني تتخانقي معايا اصلآ متوقعتش تعيطي حقك عليا..
_انا مش زعلانه منك _امال بتعيطي ليه؟ _عشان معرفتش ارد لما المأذون سألني مين موكلك _ياستي ماهو كدا كدا جواز مصلحه اسبوع واطلقك وتعيشي حياتك وتحبي وتتحبي وابوكي يحط إيده في إيد اللي اختارو قلبك روقي بقا قالها وهو بيطبط عليا محستش بنفسي غير وانا بزعق وبقولو: _إيدك لا توحشك يا شبح _ايوا كدا ارجعي ل اصلك .. انا نازل خدي راحتك في البيت وإياكي حاجه من اللي قولتها متتعملش يا ليلى
_اوكييه قولتها وهو دخل غير هدومه ونزل واول حاجه حبيت اعملها اوضته اللي منعني ادخلها جيت ادخلها بس لقيته قافلها ب المفتاح دخلت المطبخ كلت كان كل الاكل اللي بحبو موجود واتعرفت على الخدم وداده سميحه وبما اني مبعرفش اقعد من غير مشاكل قرارت اني هخرج من غير ما اقولو خليه يتخانق معايا خدت فلوس وقولت للداده اني نازله اشتري هدوم عشان معنديش ونزلت وانا بفكر فيه ساعات بحسه حنين وساعات مجنون وعصبي ولو جينا للحق فا هو احلى من أمير كراره اللي شبهته بيه
دخلت كذا مول جبت فستاين ستان وفستاين قطيفه وشوزات وميكاب وبعد ساعتين ونص في الشارع قرارت اروح وكنت مستعده للخناقه اكتشفت اني بحب اعصبو طلعت البيت ومكنش معايا نسخه من المفتاح رنيت الجرز وثواني وكان هو اللي فتح الغضب كان على وشه عروق وشه بارزه من الغضب _ادخلي يا هانم دخلت وانا بلعن نفسي على الي عملته شكي كدا انا مش قده _كنتي فين؟
_كنت بشتري لبس مكنش عندي هدوم _ومقولتيش ليه؟ _مش معايا رقمك _كان ممكن تطلبي من اي حد من الخدم _مجاش في بالي _لاء جيه في بالك بس انتي اللي بتحبي متسمعيش الكلام _طب ما انت عارف اهو بتسأل ليه بقا؟ _ليلى انا لو قلبت عليكي هزعلك مني جامد اوي احسنلك متحاوليش تستفزيني عشان انا جوايا نار لو خرجت هتحرق كل الناس _على نفسك يا بابا
_جوه خشي جوه في اوضتك يلا قالها بزعيق خوفت منو ودخلت الاوضه وقفلت عليا الباب وقرارت اني مش هعصبه تاني عدا اليوم الأول وانا حبسه نفسي في الاوضه ماليش دعوه بيه واليوم التاني كنت عارفه انه هيبات في الشغل فا كنت واخده راحتي في البيت شويه كنت لابسه بيجامه قصيره وعامله شعري قطتين وواقفه بمثل مشهد شفته على النت _حبيبي انطونيو ها قد اتيه لك حبيبتك كيلوبترا ها قد قادمه
قولتها وانا بشرب من الكوبايه اللي في إيدي كأنو سم واترميت على الأرض كأني موت قطع تمثيلي اللي مفيش زيه وجوده كان واقف حاطت إيده في جيبو بيتفرج عليا وبيضحك قومت مفزوعه من مكاني _انت هنا من امتا _لاء من بدري بعدين كيلوبترا انتحرت ب قرصة التعبان مش سم _اهو كدا انتحار وكدا انتحار اجبلك تعبان منين انا _المهم ادئك كان تحفه _بجد ولا بتتريق؟
_بجد والله .. المهم تيجي نتعشا بره؟ _اجي استنى خمس دقايق هغير هدومي _طب ما تغيري _ماشي اطلع بره _مانا جوزيك عادي يعني _ولااااا انت شكلك وحشك الخناق معايا اقولك حاجه مش هتعشي وغور بره يلا _خلاص خلاص بضايقك والله يلا مستنيكي بره قالها بضحك وخرج قفلت الباب وانا بضحك على نفسي ولبست دريس قطيفه ازرق وميكب خفيف وغيرت تسريحة شعري وخرجت كان واقف ماسك التيلفون ولما شافني انتبه
_اووه لقد لعن الله المتشبهين ب النساء .. _طب مش خارجه _خلاص خلاص والله بهزر _دمك تقيل _حقك عليا بعدين انتي مش من المتشبهين ب النساء انتي سيدة كل النساء اصلآ ابتسمت من كلمته ونزلت معاه ركبنا العربيه واتجهنا ل مطعم مشهور اتعشينا وروحنا كان لذيذ ولطيف غير كل مره ولا كأني اول مره اشوفو روحنا البيت وكل واحد راح على اوضته وعدا اليوم التالت بخناق وزعيق عشان فصلت اللاب توب بتاعه واديني اهو في اليوم الرابع من الأسبوع ومش عارفه اي هيحصل انهارده
قطع تفكيري رن الجرز قومت افتح كان شاب استنتجت انه صحبو عشان ليهم صور كتير سوا _اا احم انتي المدام صح؟ استغربت انه عارف اني مراتو هو كان مفهمني انه مش قايل لحد غير المحامي _ااه انا مين حضرتك؟ _انا خالد صحبو هو بعتني اخد ليه حاجه من هنا وامشي _ااه تمام اتفضل دخل على اوضته على طول وخد هدوم من دولابه وتيلفونو رن رد عليه وقال
_ايوا ايوا انا بجيب هدوم وجاي اهو خلي بالك منو ونبي يا عبدالله .. عدا مرحلة الخطر .. طب الحمدلله انا جاي اهو جاي استنتجت انه حصله حاجه وسألتو _هو حصلو حاجه؟ _لاء هو كويس _متكدبش عليا الله يخليك _حادثه بسيطه _خدني ليه _مينفعش _لاء ينفع ارجوك خدني ليه مش هسيبو لوحده في وقت زاي ده ارجوك .. _طيب أمري ل الله تعالي معايا
يتبع… “الحلقه التالته والاخيره” روحت معاه المستشفى وانا خايفه عليه ملهوفه قلقانه حسيت اني ام وخايفه على ابنها مكنتش بعمل حاجه غير اني بدعي طول الطريق انه يكون كويس لحد ما وصلنا قدام المستشفى ونزلت مع صحبو ل مكان الاوضه اللي هو فيها _فاضل كتير؟ _لاء خلاص هي الاوضه الجايه دي محستش بنفسي غير وانا بجري على الاوضه وبفتح الباب وشفته .. كان قاعد على السرير قالع التيشيرت إيده مكسوره وراسه ملفوف حواليها شاش ورجله متجرحه وكان فيه ممرضه واقفه بتدهن حاجه على ضهره وفجأه لقيتني بجري عليها ببعدها عنه
_اوعي يا حبيبتي انا اللي هدهن ل جوزي المرهم _جوزيك هو استاذ سامي متجوز؟؟ _ااه يا عنيا وروحي بقا هاتي عصير لحسن انا والبيبي اللي في بطني كنا هنموت من القلق على سمسم .. مردتش عليا سابتنا ومشيت وهو فضل يضحك على كلامي صحبو شافنا سوا مدخلش _سمسم؟ وبيبي في بطنك؟ _اي يا نجم اليالي عجباك انادهالك؟ _ياستي لاء بس اي اللي جابك
_هو اي اي اللي جابني لو مكنتش معاك في وقت زاي ده هكون معاك امتا _اتخضيتي عليا؟ _ااه طبعآ ااحم اتخضيت على النص مليون يعني _ااه قولي كدا _المهم حصل كل ده ازاي؟ _عادي متحطيش في دماغك المهم انا خلاص خدت الورث يعني لو حابه تطلقي انهارده مفيش مانع _تمام يا سامي اخرج من هنا واطمن انك كويس وبعدين كل واحد يروح ل حالو
_تمام دهنت ليه المرهم وساعدته يلبس التيشيرت وخرجت وسبت صحبو يدخلو وروحت انا الحمام وانا بعيط إني خلاص هطلق طب وانا زعلانه ليه ما ده كان اتفقنا من الاول معقول اكون حبيته؟ غسلت وشي وخرجت كان صحبو خلص إجرات الخروج وساند عليه ركبو جنبو في العربيه وانا ركبت ورا وصحبو بداء يسوق واتحركنا للبيت _مكنش ليه لزوم تيجي على فكره _خلاص لو حصل كدا تاني مش هاجي ارتحت؟
كنت مضايقه من نفسي اني اصريت اني اروحله بس قرارت اني مش هزعل منو انهارده اخر يوم معاه مش هخليه يوم حزين خالص خالص شويه ووصلنا صحبو وصلو لحد الشقه ونزل تاني ومن ساعاتها وهو في اوضته ومش سامعه ليه صوت غيرت هدومي لبست دريس ابيض لحد الركبه رسمت ايلينر وحطيت روج احمر وقرارت اشوفه لو عايز حاجه خبط على الباب ودخلت لما سمعت صوته بيديني الأذن بالدخول
_اا احم انت كويس محتاج حاجه؟ _هكون شاكر ليكي لو جيتي قفلتيلي زراير القميص _طبعآ عنيا قولتها ودخلت اوضته وقفت قدامه وعدلت الياقه بتاعت قميصه وبدأت اقفل الزراير اول مره اكون قريبه منو كدا اول مره ادخل اوضته كانت فخمه لذيذه مرتب ومنظم ولأول مره اخد بالي من ريحة البرفيوم بتاعته اللي جننتني خلصت وعيني جت في عينه وقولت: _برضو مش هتحكيلي حصلك كدا إزاي؟
_لاء مش هحكي وروحي قولي للخدم يجهزو الغدا عشان اتغدا واخد العلاج وانزل _هتنزل فين وانت تعبان كدا؟ _شغل _الشغل يستنى انت تعبان يا سامي مفيش نزول _انتي فكرتي نفسك مراتي بجد ولا اي _لاء فكرت نفسي انك لو تعبت مره انا بتعب بدالها الف مره اقولك حاجه روح مكان ما يعجبك انت حر قولتها ونزلت دمعه من عيني سبته وجريت على البلكونه ودقايق وكان جيه ورايا
_حقك عليا .. بس حقيقي شغل مهم _حصل خير في الاول والاخر انا ماليش دعوه بحياتك _طيب الاكل جهز مش هتساعديني وانا باكل وتديني علاجي؟ بصيت ليه وبعد تفكير خدته من إيده للسفره وبدأت اساعده في الاكل في صمت كان بيحاول يضحكني بينكشني عشان اتخانق معاه بس كنت متحكمه في مشاعري كنت بارده وشويه وخلص اكل واديته العلاج وخد مفاتيحو ونزل وخدت انا كتاب من الكتب الكتير الي موجوده في المكتب ودخلت اقراه في البلكونه وانا منتظره رجوعه ب المأذون عشان نطلق
مفيش ربع ساعه من خروجه ولقيته رجع تاني _ليلي _نعم _في ناس قرايبي جايين دلوقتي عشان يطمنو عليا _تمام وبعدين ؟ _عايزك تمثلي اننا بنحب بعض _إزاي يعني _اتسهوكي يا ليلى مبتعرفيش تتسهوكي زاي ما عملتي مع الممرضه كدا _لاء ماليش نفس _عشان خاطري وحياتي عندك _قولي اي السبب وانا اعمل اللي انت عايزو _خلاص مش عايز
قالها وخرج يستنى قرايبو في الصالون وكملت انا قراة الكتاب وشويه والجرز رن قومت استقبل اهلو معاه كانو كلهم ناس كبيره معاده واحده كان باين عليها انها انسه صغيره لبسها ضيق وحطه ميكب اوفر في خصل موف في شعرها _اهلآ اهلآ اتفضلو .. العصير يا داده سميحه دخلو قعدو في الصالون مع نظرات البنت ليا انا وسامي _ماشاءالله عروستك حلوه يا سامي _ميرسي يا طنط انتي احلى طبعآ
_حلوه اي بس يا ماما انتي مش شايفه تخينه إزاي! البنت هي اللي قالت كدا بصوت مسرسع غريب لا يمكن ده يكون صوت بني ادمين _بالونة هيليوم بتتكلم انا اول مره اشوف بالونة هيليوم بتتكلم ههه اسمها كيرفي ياروحي وبيبقا فيه فرق بين الكيرفي وبين التخن _اممم وواخدين بعض عن حب بقا على كدا _ااه يا حبيبتي عن حب طبعآ انا وسامي فضلنا اربع سنين مرتبطين والحمدلله حب اربع سنين مراحش على الفاضي
_بجد والله ومعملتوش فرح ليه وعزمتونا حتى كنت جيت رقصتلكم _حبيبتي تسلمي انا قومت ب الواجب في حكاية الرقص وبنسبه ل حكاية الفرح فا حبيبي سمسم هيسفرني نعمل شهر عسل بدال الفرح والعادات والتقليد القديمه نحن مختلفين عن الآخرين يا انسه .. اسمك اي؟ _جومانه _اوكي يا انسه دبانه اا قصدي يا جومانه وكملت كلام مع اهلو وهو مبسوط مني ومن تمثيلي وفي كل مره كنت بكسف فيها جومانه كان بيمسك نفسو من الضحك ب العافيه وبعد شويه كانو خلاص هيمشو
_هستنى اشوف صور شهر العسل يا لولو _اكيد يا صفرا يا حبيبتي قصدي يا جومانه يا حبيبتي سلمو عليا كلهم والحقد والصفار باين عليهم ومشيو ومبقاش غيري انا وهو في البيت _اي الحلاوه دي يابت يا ليلو _بقولك اي متدلعنيش جتك نيله انت وقرايبك صحيح رن عليهم رن بسرعه _ليه حصل اي؟؟ قالها بخضه _اصل شفت واحد صيني تحت احتمال يفكرهم عقارب وياخدهم يعمل عليهم شوربه
ضحك بصوته كله عكس ما كنت متوقعه _عارفه انا اكتشفت انك كذا شخصيه في بعض ام لسان طويل والحنينه وام دم خفيف عندك شخصايات تاني غير دول يا ليلو _متدلعنيش قولتها وسبته ودخلت البلكونه اكمل قرايه في الكتاب وجيه ورايا _بتقرائي اي ؟ _كتاب عن أغرب حيله عشان تتحق الامنيات _امم واي أغرب حيله قريتيها لحد دلوقتي _إنك لو قولت الحاجه ٤٠ مره بتتحق وتبقا حقيقه
_امم طيب انا نازل عايزه حاجه اجباهللك وانا جاي يا ليلو؟ _متدلعنيش قولتلك _اوكي يا لوليتي قالها وحدفلي بوسه في الهوا ونزل كملت انا قراية الكتاب وقولت اعمل جوله في البيت قبل ما امشي وبعد ما ودعت كل حاجه دخلت ل اهم حاجه في البيت اوضته .. مسكت التيشيرت اللي كان لبسو وشميت ريحته فيه..صورو برفاناته نظام اوضته كل الحاجات دي هتوحشني قطع سرحاني وانا ماسكه التيشيرت بتاعه في إيدي دخوله
_انتي بتعملي اي في اوضتي مكنش ساند طوله وصوته كان تقيل مكنش حاسس بنفسه _انت شارب؟ _ااه _ياربي منك دي مش تصرفات انسان عاقل ده غير انه حرام انت تعبان يا بيه وده هيزود تعبك _مالك احلويتي كدا ليه؟ _تعالى يا سامي تعالى سندته وخدته للحمام وجيت عشان افتح المياه عشان يفوق اتفجأت انا بيه وهو بيفتح المياه واتغرقنا احنا الاتنين
_ياخربيتك انا كنت هغسلك وشك بس _انتي فكرتيني سكران بجد ولا اي؟ _ولما انت مش متزفت عملت كدا ليه قولتها وانا بضربه في صدره _ااه قلبي _حبيبي انت كويس سلامتك حقك عليا _ااه انا كويس ياقلب حبيبك وعملت كدا كنت حابب اشوف ردة فعلك _وشوفتها ياخويا .. ابعد بقا _لاء مش هبعد قالها وشالني قعدني على رف جنب الحوض ولسه المياه مغرقاني انا وهو
_سبب الحادثه ان اهلي اللي شوفتيهم جايين يطمنو عليا دول هما اللي كانو مدبرينها _يا خبر إزاي وليه قولتها بشهق حتى إيده على شفايفي وقال: _متقطعنيش.. هزيت ب راسي بمعنى ماشي وكمل كلام وقال: _كانو عايزني اموت عشان مخدش الورث وخصوصآ اني نفذت الوصيه واتجوزت فا كانو عايزين حصتهم تزيد ويخلصو مني بس الحمدلله ربنا ستر .. بنسبه اني كنت بقولك اعملي نفسنا بنحب بعض قدامهم ده كان عشان جومانه ..
انا وهي كنا مرتبطين زمان كنت حابب اوريها اني نسيتها وعيشت حياتي من غيرها _امم يعني انا كنت كوبري يعني _متقوليش كدا انا فعلآ نسيتها وبطلت احبها من زمان اوي انا بس كنت عايزك تغيظيها مش اكتر _احلف إنك بطلت تحبها _وحياتك عندي .. _امم واي كمان _انتي بقا اي حكاية كرم دي؟ومش عايزه تتجوزيه ليه _هو بصراحه كويس لاكن انا اللي بتلكك عشان مش عايزه اتجوز غير عن حب تكون قصه خياليه كدا زاي الروايات
_امم زاي قصتنا كدا _مين قال كدا؟ _عينك وخوفك عليا قالو انتي مش بتاعت فلوس يا ليلو انا مش عيل صغير واعرف أميز بين اللي عايز فلوس وبين اللي بيحب _متدلعنيش وبعدين قصدك اي بكلامك ده _قصدي انك بتحبيني _محصلش مش بحبك _كدابه _لاء مش بحبك _بس بطلي تقولي كدا عشان متتحقش لو قولتي كدا اربعين مره الكلام هيتحقق _طب انا بقا هقولها ٤٠ مره يا سامي
_وريني _مبحبكش مبحبكش مبحبكش .. وفضلت اقولها لحد ما جيت عند رقم ال٤٠ وقبل ما أقوله قطعني ب بوسه كانت منو معرفتش ابعد عنو كنت مبسوطه ب الوضع ده تقريبآ لحد ما استوعبت الموقف وبعدت وكنت لسه هتكلم بس حط إيده على شفايفي وقال: _هششش وشالني وخرج بيا من الحمام جابلي فوطه من دولابه حطها حواليا وجاب هدوم من اوضتي وقبل مايخرج قرب من وداني وقال:
_بكرا بإذن الله هكلم ابوكي وبكدا هيكون جوازنا رسمي ونظمي وفهميي وبالختم _قصدك اي ؟ _قصدي إني هخلي الكلام اللي قولتيه للممرضه انهارده حقيقه وبس كدا جيه بقا ل اهلي طلب إيدي وفهم اهلي اللي حصل وبابا اتخانق معانا خناقه كبيره طبعآ وكان هيضربني بس وقف قصاده وقاله دي مراتي وانا مسمحش لحد يمد أيده على مراتي حتى لو كنت انت وبعدها ب وقت مش طويل اهلي سامحوني وعملنا فرح كبير في المنطقه وفرح في اسكندريه وحط إيده في إيد بابا واتجوزنا وعيشنا في تبات ونبات اي رأيكم في حكايتي انا وجدو يا حبايبت تيته؟
_تجنن يا تيته تجنن _وانا مش طالبه غير الستر والصحه وفارس احلام زاي جدو _طب قومي ياختي منك ليها شوفي مذاكرتكم يلا قامو احفادي وقفلت ألبوم الصور بتنهيده قطع سرحاني في صورنا صوتو وهو بيقول: _مشفتيش فردة الشراب الرمادي يا ليلو _متدلعنيش.. تمت .. #