الجزء الاول بداخل حاره شعبيه _ابن عمو بتاع الكتب بيعاكسني يا بابا _يا خبر قالك اي ؟ _قالي بنبونايه ملبسايه حلوه من كل الزوايا _يا خبر تعالي معايا نشكي ل باباه مسك إيدي وروحنا للمحل عند عمو _جرا اي يا ابو زين ابنك هيفضل يعاكس بنتي كدا في الرايحه والجايه _بنتك اللي حلوه نعمل اي بقا _ااه واحنا هنجيبو من بره ما ابن الوز عوام
_بظبط كدا يا ابو الحلوه قالها وبص ليا وابتسم اتكسفت استخبيت ورا بابا _اهو زين جيه اهو .. تعالى يالي جايبلنا الكلام _اي يا بابا انا عملت اي _سلم على عمك ابو حور الاول _ازيك يا عمو _كويس يا زين .. بس زعلان منك ينفع تعاكس حور بنتي ؟ _معاكستهاش انا بس متعود لما يكون في حاجه حلوه اقولها انها حلوه
خرجت من ورا بابا وانا مبتسمه ببرأه _يعني انا حلوه؟ _طبعآ حلوه اوي كمان _زاي سندريلا؟ _احلى من ١٠٠ سندريلا _خلاص سيبو يا بابا ضحك بابا هو وعمو على كلامي انا وزين _اهو قالتلك سيبو يا بابا يعني سماح المره دي _خلاص نعديها المره دي _وراك حاجه انهارده؟ _لاء ليه _اي رايك تيجي نتغدا سوا ام زين عامله محشي على الغدا والاكله الحلوه دي مش هتكمل غير بيكو
_خلاص عزومتك مقبوله _هستانكم _هنيجي “١ نوفمبر ٢٠٢٢” _انتي فين يا حور _اهو في الموقف الميكروباص اللي انتو فيه فين بظبط _جنب الجامع _خلاص شفتكو جايه عليكو اهو قولتها وقفلت معاها وروحت للمكروباص بصيت قبل ما اركب كانو تلات شباب قاعدين في الكنبه اللي ورا اتنين نايمين وواحد صاحي وصحابي قاعدين في الكنبه الي قدمهم _قعدوني جنب الشباك يا اما مش هركب معاكو
_طفله _خلاص يا سلمى انزلي خليها تركب جنب الشباك لا تتقمص وتركب ميكروباص تاني نزلو الاتنين من الميكروباص وطلعت انا قعدت جنب الشباك بعدين هما طلعو قعدو جنبي كل ده كان تحت نظرات الشاب اللي ورا _مش هتكبري بقا يا بت انتي _لاء _عملتي اي طيب طمنينا _كله تحت السيطره فضلنا قاعدين شويه لحد ما الميكروباص حمل والسواق بداء يسوق كان شويه ووصلت انا عشان انا بيتي قبل بيت صحابي سلمت عليهم ونزلت ونزل معايا الشاب اللي كان معايا في الميكروباص
مشيت وهو ماشي ورايا كذا شارع امشي منو والاقيه ورايا خوفت أكيد هيخفطني اتجرات ولفيت ليه _انت عايز اي ماشي ورايا ليه يا بادر _افندم _ماشي ورايا ليه؟ _مش ماشي وراكي أنا مروح بيتي _من ساعت مانزلت من الميكروباص وانت ورايا بيتك ده عندنا في البيت مثلآ؟؟ _ما قولت مش ماشي وراكي اكيد صدفه _تمام قولتها ووقفت استنيتو يمشي هو بعدين مشيت انا
دخلت الحاره بتاعتنا وكالعادة خوفت من الكلاب والأطفال عدوني منهم شوفت محل عمو ابو زين مفتوح رجعو! من ساعت ما سافرو المحل متفتحش اكيد رجعو جريت عليه _عمو يا عمو انتو جيتو خرج عمو من المحل _حور صح؟ _ايوا انا حور وحشتني اوي يا عمو _كبرتي يا عفريته وانتي كمان وحشتيني اوي _ده بابا هيفرح اوي لما يعرف انكم رجعتو هروح اقولو ولا اقولك تعالى معايا
_عارف عارف من الصبح وفطرنا سوا وشربنا الشاي ومامتك وام زين نزلو السوق وبيحضروا الغدا ولسه فاتح انا وابوكي المحل _يااه يعني انا اخر من يعلم _بظبط كدا _مش مهم المهم انكم رجعتو نورتو المنطقه كلها قولتها وانا بدور ب عيني عليه مش شايفاه ليه مجاش معاهم ولا اي عايزه اشوفو شكله بقا عامل ازاي اكيد اتغير ياترى لسه بيعاكس بنات والله اقتله..
_اللي بتدوري عليه زمانو جاي يا حور _انا .. انا مش بدور على حد انا هطلع بقا سلام قولتها ولقيت الشاب اللي كان معايا في الميكروباص داخل المحل _اما انت شخص بجح صحيح جاي ورايا لحد هنا يا قليل الادب _انتي تعبانه في دماغك؟ انتي اللي بتعملي اي هنا وهمشي وراكي ليه يعني من سواد عيونك مين دي يا بابا تعرفها؟ _بابا !! _يظهر انكم شفتو بعض وحصل سوء تفاهم
_ده زين يا عمو؟؟ _بظبط _وانتي تعرفيني منين ؟ مين دي _دي سندريلا بتاعتك ياخويا _حور!! _بظبط _وهو البنات لما بتكبر لسانها بيطول وبتبقا قليلت الادب ؟ _انا قليلت الادب؟ اهو انت _خلاص بقا انتو هتتخانقوا قدامي _عن اذنك يا عمو قولتها وطلعت البيت كانت مامته عندنا سلمت عليها وغيرت هدومي ووقفت اعمل معاهم الاكل شويه وخلصنا واتجمعنا كلنا على الغدا
قاعدين بناكل وبنهزر بيتكلمو على ايام زمان وانا ساكته باكل في صمت بقا ده زين اللي كنت بحلم انه يرجع القاهره عشان تبتدي قصة حبنا عملت الف سيناريو ل لقائنا بعد الفراق ده في الاخر يكون ده إلقاء ده حتى مقاليش إزيك.. _بس لازم لازم تتعرفو على نوران خطيبة زين ده انتو هتحبوها اوي قالتها مامته الاكل كان في بوقي وقف في زوري لما سمعت اللي قالته
كحيت عيني دمعت شربت مياه _هو زين خطب؟ _ااه بنت زاي القمر كانت جارتنا في دبي جميله ومؤدبه زايك يا حور هبقا اعرفك عليها _فعلآ .. الف مبروك يا زين عن اذنكم انا كلت _فين اللي كلتي ده يا بنتي _معلش يا بابا بس يدوب الحق اخلص البحث وانام انت عارف بقا امتحانات وكدا _ربنا معاكي يا حبيبتي سيبتهم ودخلت اوضتي مسكت المخده صوتت فيها صرخت عيطت كان انهيار مكتوم ب المخده عشان محدش يحس ولا يسمع
عيطت كتير اوي اوي افضل انا مستنياه كل السنين اللي فاتت دي والبيه يرجع خاطب سنين ولا عايزه احب ولا اتحب سنين مش بدي فرصه لحد سنين برفض كل الناس عشانه .. بس اللي رفضت كل الناس عشانه مختارنيش في الاخر خرجت وقفت في البلكونه بحاول اخد نفسي بحاول استوعب اللي حصل بحاول انظم أفكاري عشان اعرف هتصرف ازاي قطع شرودي صوته .. _صاحيه لحد دلوقتي ليه
كان واقف في شباك اوضته ب فلنه حملات _عادي مش جيلي نوم _اي اخبارك متكلمناش لما رجعت _كله تمام الحمدلله _بقيتي كاتبه؟ _ااه وليا أعمال في معرض الكتب _دخلتي كلية التجاره؟ _ااه كلها سنه واتخرج _برافو حققتي كل أحلامك _ألحمد الله .. عن اذنك قولتها وقفلت باب البلكونه ودخلت عدت الايام وانا بتجنبه بتجاهله بهرب من الكلام معاه ردي على قد السؤال بقيت مطفيه دبلانه ممله .. الحزن بيعمل مننا أشخاص ممله
وانهارده كنت راجعه من الكليه تعبانه وهلكانه اتفجأت بيهم كلهم عندنا في البيت ومعاهم بنت جميله يظهر انها خطيبته .. _مسائكم سعيد _اهي حور جت اهي تعالي يا حور اتعرفي على نوران _إزيك _انتي حور !! طلعتي جميله زاي ما حكولي عنك _تسلميلي يا حبيبتي انتي اجمل طبعآ .. كان نفسي اقعد معاكم شويه بس جايه على اخري من الجامعه عن اذنكم هدخل انام
قولتها ومستنتش رد دخلت اوضتي وكالعادة بصرخ في المخده قلبي كان بيعيط انا سامعه صوتو .. حزني كان هادي ومكتوم صريخ في مخده عياط في صمت مقطعتش اي حاجه تخصه مرميتش السلسه اللي ادهالي في عيد ميلادي معملتش كاتنج مقصتش شعري محاولتش انتحر مكسرتش اي حاجه حواليا لأول مره اكون هاديه حتى لما كسرلي قلبي مشيت في هدوء قطع عياطي صوت خبط على شباك اوضتي مسحت دموعي وفتحت الشباك كان هو
واقف بنفس الفلنه الحملات شعره متبعتر لابس هاند فري _في حاجه يا زين؟ _ااه كنت جايبلك ده قالها وطلع علبه صغيره من وراه _اي ده ؟ _افتحي وشوفي فتحتها كانت علبه فيها ماكرون ملون _ياااه انت لسه فاكر _عمري ما نسيت حاجه تخصك يا حور _بس مكنتش كلفت نفسك _ولا تكليف ولا حاجه نوران بتحبه برضو فا جبتلك وجبتلها
_ااه ربنا يخليكم لبعض عن اذنك _حور !! قالها بعد ما اديته ضهري رجعت لفيت ليه تاني _ايوا .. _هو انتي معيطه ؟ _لاء خالص _متكدبيش عينك منفخه من العياط _لاء ده من كتر النوم _متأكده؟ _ايوا قولتها ولفيت كنت هدخل واقفل الشباك وقفني صوته وهو بيقول: _هو انتي مرتبطيش لحد دلوقتي ..
لفيت ليه مش عارفه اقول اي اعمل اي اقولو اني كنت مستنياه يرجع وابان اني لسه بحبو ولا اقول ان فيه حد في حياتي وابان اني خاينه للوعد بس انا هبقا بكدب لاكن هو خان الوعد بجد محستش بنفسي غير وانا بقولو: _لاء ازاي مرتبطه طبعآ قولتها وانا بطلع السلسه اللي عليها حرف سلمى صحبتي من رقبتي _اسمه سليم لابسه حرفو كمان _امم وهيجي يتقدم امتا؟
_لما اخلص امتحانات الترم ده _امم بتحبيه ؟ _اكيد طبعآ لو مش بحبو اي اللي هيخليني ارتبط بيه اربع سنين _بقالكم اربع سنين سوا؟ _ااه اخر الترم هنكمل خمس سنين قطع كلامي معاه صوت رن تيلفوني _عن اذنك بقا عشان بيتصل قولتها وسيبتو ودخلت الموبيل مكنش بيرن كان المنبه بس انا ليه كدبت ليه قولت كدا يمكن عشان أوجع قلبه زاي ما وجع قلبي
فوقي يا حور انتي مش في دماغه عشان توجعي قلبه قعدت احاول اذاكر ومعرفتش فضلت رايحه جايه مش عارفه اللي انا عملتو ده صح ولا غلط لحد ما عيني جت على علبة الماكرون فتحتها ولسه هاكل اول واحده منها لقيت رساله منو بيقول فيها: “انا عايز اقابل سليم حبيبك ده انا في مقام اخوكي وحقي اعرفو واعرف نيته اي حددي معاد اقابلو فيه” يا خبر يا نهار ابيض اعمل اي اعمل اي
يتبع.. “الجزء التاني بداخل حاره شعبيه” مردتش على المسدج بتاعته ورنيت على صحابي حكتلهم واحده قالت اكمل في الكدبه ونجيب واحد نخليه سليم والتانيه قالت الكدبه هتكبر وممكن تيجي على دماغي مش عارفه احدد هعمل اي مش عارفه بس ما ممكن اقولو مالكش دعوه دي حياتي انا مش عارفه .. نمت وصحيت تاني يوم بدري عشان الجامعه لبست بنطلون جينز اسود على هاي كول اسود وجاكت جلد اسود وشوز اسود مع شعري وميكب صباحي سيمبل
كنت عامله زاي فتيات المافيا افتكرت سندريلا وفستانها وبصيت ل لبسي وضحكت قبل ما انزل قولت افتح شباك اوضتي الشمس تدخل الاوضه ولما فتحت الشباك لقيت .. لقيتهم قاعدين في بلكونة اوضته مع كوبايتين شاي ب النعناع وبيهزرو حلوين اوي مع بعض باين جدآ انهم بيحبو بعض
كنت ببص عليهم بصت واحده محرومه عمري ما بصيت على حاجه في إيد حد ولا حاجه مع حد بس انهارده بصيت .. بصيت على حبيبي اللي بقا حبيب غيري انا اللي حبيته الاول ده مكاني انا .. بس في الاول والاخر انا مش انانيه مش هخرب بينهم عشان سعادتي ربنا يسعدهم قولت كدا لنفسي ولبست نضارة الشمس وخرجت من اوضتي _صباح الفل على احلى البنات _يسعد صباحك يا ماما
_متتأخريش انهارده بقا عشان عازمين نوران خطيبة زين على الغدا _فعلآ!! اوكي يا ماما مش هتأخر يلا باي باي بقا قولتها ورميت بوسه ليها في الهوا ونزلت من البيت روحت الجامعه مش مركزه في المحاضرات دماغي مش معايا اعمل اي ولا اي هيحصل طب هل هستحمل لما اشوفهم مع بعض كتير ؟ مكنتش اتخيل ان دبلته تبقا في إيد واحده تانيه لاء فوقي يا حور دبلته بقت في إيد واحده تانيه بالفعل وهتبقا مراتو وام عيالو فوقي بقا فوقي فوقي
_بس كفاااايه قولتها بصوت عالي قدام المدرج كله كلهم بصو عليا محستش بنفسي غير وانا بعيط وسبتهم كلهم وطلعت اجري روحت الكافتيريا ضميت نفسي وانا بعيط ليه كل حاجه وحشه وكل حاجه مش عايزه تتعدل ليه ميطلعش ليا الساحره الطيبه زاي سندريلا وتحقق كل امنياتي قطع عياطي صوت صحابي _بطلي عياط بقا قومي نضرب اتنين بطاطس سوري ونقولك تعملي اي مسحت دموعي فعلآ وفضلو يضحكوني واتفقوا معايا إننا نجيب ياسين اخو سلمى نعملو سليم ونخليه يقابل زين لاكن موفقتش طبعآ
سبتهم عشان اروح الحق الغدا زاي ما ماما قالت .. دخلت الحاره وشفته كان واقف بيلعب هو وهي ب الكوره مع أطفال الحاره كنت واقفه خايفه اعدي من الكلب شافني وضحك وجيه عندي _لسه بتخافي من الكلاب مش هتكبري بقا قالها وهو ماسك إيدي وبيعديني من الكلاب _ازيك يا حور _ازيك انتي يا نوران جيت بدري عشان الحق اقعد معاكي اهو _تسلميلي يا حبيبتي
_طيب عن اذنكم بقا هستانكم على الغدا قولتها وسيبتهم ودخلت العماره بتاعتنا وقبل ما اطلع بصيت عليهم نفس بصت الحرمان بتاعت الصبح طلعت البيت غيرت هدومي قولت هنام عشان اريح دماغي من التفكير شويه سمعت صوت ماما وهي بتسأل طنط مامت زين عن قصة حب نوران وزين دخلت المطبخ بحجة اني عايزه اساعدهم عشان اسمع _بس ياستي يومها بقا زين هو اللي نقذها من الحادثه وحبو بعض وخدها شغلها معاه وبقو كل حاجه بيعملوها سوا ويوم عيد ميلادها اعترفلها ب حبو
كويس اني اختارت اقطع البصل عشان ميعرفوش يفرقو بين دموعي الحقيقيه ودموع البصل .. _ولا يوم الخطوبه بقا كتبلها في السما ب الألعاب الناريه بحبك وفستانها هو اللي فضل يفصل فيه وغنلها انا تاجك وسلطانك وتحت امر ما عليكي مكنش فيه في بالي غير اصاله وهي بتقول كان نفسي اهرب من كلامهم خوفت امشي ياخدو بالهم ولو مشيت هيبان عليا واخاف لا ضعفي يبان في عيني يا أرض انشقي وابلعيني قبل مايبان اللي بيا
فوقت على صوت ماما وهي بتقول: _إيدك يا بنتي عورتي نفسك بصيت ل إيدي اللي سايحه في دمها عورت نفسي من غير ما اخد بالي دموعي عمت عيني _ده جرح بسيط يا ماما هروح انا اعالجه وكملوا انتو الاكل دخلت اوضتي عالجت الجرح بس أكتشفت انها حاجه لذيذه لما نتعور الوجع بتاع التعويره بيداري وبيلهي عن وجع القلب بصيت عليهم من البلكونه لسه واقفين بيلعبوا ب الكوره
ولسه اصاله مكمله في خيالي وهي بتقول وتعدي كل الذكريات قدام عنيا معقول خلاص كل اللي كان بينا انتهى!! صريخ في المخده،عياط،ترزيع إيدي في الحيطه فوقي بقا حور فوقي هو مش ليكي مينفعش نحب حاجه مش بتاعتنا مينفعش اهدي .. اهدي وقولي اللهم ديم عليها هذه النعمه وارزقني كما رزقتها .. اهدي بعد وقت مش طويل جيه وقت الغدا قومت عدلت نفسي خبيت سواد عيوني ب الكونسيلر وخرجت ليهم كانو متجمعين على السفره
قعدت في صمت باكل ماليش دعوه بحد ماليش دعوه ب كلامهم خلصت اكل وقومت اغسل إيدي اتقابلنا في الطرقه بتاعت البيت _اي مردتيش يعني على حوار سليم ولا هو مفيش سليم من اصله؟ _لاء ازاي بقا فيه وهاخد منو ميعاد حاضر عن اذنك بقا الحق اكلمو قولتها وسبتو ودخلت اوضتي رنيت على صحابي قولتلهم اني موافقه على الخطه قطع كلامي معاهم صوت خبط الباب كانت ماما
_تخرجي مع زين ونوران رايحين دكان قورص ولا دونتس باين _دكان اي بس يا ماما وقورص اي دنكن دونتس _يا اختي وانا ايش عرفني تروحي ولا لاء؟ _لاء انا براجع مع صحابي البحث وهنام _طيب على راحتك قالتها وخرجت وقفلت وراها الباب ورجعت ل كلامي مع أصحابي وشويه وقفلت معاهم رجعت افكر تاني هل اللي انا بعملو ده صح؟ اكيد لاء مش صح بس مش مهم
ساعه ورا ساعه وانا صاحيه شويه بعيط وشويه بصرخ في المخده اللي زهقت مني وشويه اتفرج على صورنا القديمه طلعت السلسه اللي كان جيباهلي في عيد ميلادي مسكتها وغنيت بصوتي المكسور الضعيف |.. حبيب عنيا حبيب أحلامي حبيب دموعي وهنا ايامي اهون عليك اسهر ب ألمي .. ااه مني ااه منك كل ده وقلبي اللي حبك لسه بيسميك حبيب لسه بيسميك حبيب..| ||.. يا حب اقولو .. اقولو .. اقولو اي اسامحه .. اسامحه .. اسامحه ليه ده العذاب هو اللي يسامحو والسهر هو الي يسامحو والدموع هي اللي تسامحو..||
قطع غنايا صوت مسدج كانت سلمى صحبتي بتقولي انها اتفقت مع اخوها والمعاد بكرا الساعه ٦ في كافيه في المعادي لسه هرد عليها سمعت صوت خبط على شباك اوضتي عرفت ان هو مسحت دموعي حطيت روج عدلت نفسي وخرجت _هو كل يوم بقا؟ _معلش جبتلك دي _دونتس صح؟ _ااه مجتيش معانا فا جبتلك وانا جاي _ميرسي يا زين واه صحيح سليم هيقابلك بكرا الساعه ٦ فاضي؟
_ااه تمام _طيب عن اذنك بقا قولتها ومستنتش رد دخلت على طول فتحت العلبه لقيت فيها تلات قطع دونتس واحده فيهم على شكل قلب كلتها او افترستها زاي ما هو عمل في قلبي حضرت الطقم اللي هلبسو بكرا ونمت وانا بردد ااه مني ااه منك كل ده وقلبي اللي حبك لسه بيسميك حبيب يتبع… “الجزء التالت بداخل حاره شعبيه” صحيت الصبح روحت الجامعه واتفقت مع سلمى تكون موجوده في الكافيه حتى لو هتقعد في مكان بعيد عني المهم تكون موجوده وروحت البيت بدري عشان الحق اجهز
روحت البيت فضلت ربع ساعه واقفه قدام المرايا مش عارفه انا بعمل اي ولا اي وصلني ل هنا طب احارب عشان حبي؟ ولا استسلم بس انا مش مستعده اتهزم في الحرب الساعه بقت خمسه ونص ولسه معملتش اي حاجه لبست بنطلون ابيض على بلوفر ابيض فيه فراوله رجعت في كلامي وغيرت هدومي انهارده هكون سندريلا مش هبقا فتاة مافيا غيرت هدومي ولبست دريس نبيتي قطيفه مع هيلز ابيض وشنطه بيضه ميكب سيمبل درجة الروج بس هي اللي جريئه وتسريحه سمبل في شعري مع السلسه اللي عليها حرف سلمى كنت قاصده اني ابينها
حطيت البرفيوم وبصيت بصه اخيره لنفسي في المرايا وخرجت عرفت ماما انا رايحه فين ونزلت من البيت وكالعاده في نص الحاره الكلاب كانت واقفه فضلت مستنيه عيل من العيال يجي يعديني لحد ما سمعت صوته من ورا _يلا امشي انا معاكي اهو متخافيش بصيت ليه ومشيت جنبه لحد ما خرجنا من الحاره _بما اننا رايحين نفس المكان فا تعالي نروح سوا عربيتي مركونه هناك اهي استني هجيبها واجي
_لاء عشان سليم ميزعلش اني جيت معاك وكدا .. _بس انا اخوكي ومش هتمشي لوحدك استني هنا قالها وراح جاب العربيه وجيه وقف قدامي وشاورلي اني اركب فعلآ ركبت طول الطريق ساكته عنينا بتتقابل في المرايا بتاعت العربيه في صمت كل شويه ابص على الدبله اللي في إيده شويه وكنا وصلنا الكافيه ياسين كان قاعد مستنينا وسلمى كانت قاعده في تربيزه تانيه بعيد عنو ابتسمت ليه سبت زين وروحت ل ياسين سلمت عليه باس إيدي
ودي حركه انا اتفجأت منها بس حاولت اعديها جيه علينا زين _زين ده سليم .. وسليم ده زين _اهلآ سلمو على بعض وانا قعدة جنب ياسين سيبت شنطتي البيضه على التربيزه وطلبت كافيه لاتيه وهما طلبو قهوه فرنساوي زين مكنش بيتكلم مع ياسين بطريقه عاديه كأنو بيتسجاوبو بيحقق معاه بس ياسين كان شاطر بيعرف يرد على كل الأسأله _وناوي تاخد خطوه رسميه امتا بقا؟
_إن شاء الله بعد ما تخلص الترم ده _عندك شقه؟ هتعيشو فين ؟ هتعرف تصرف عليها _استاذ زين انا مش عيل صغير انا صاحب معرض عربيات عندي بدال الشقه عماره ومش هتوصيني عليها او هتخاف عليها اكتر مني دي حته من قلبي _ااه عندك حق بس احساس الاخويه زياده عندي _حقك اختك وخايف عليها فضلوا يتكلمو ويتكلمو وانا مراقبهم في صمت اتوترت حاسه نفسي بيضيق هعيط ..
استأذنت اني اروح الحمام دخلت الحمام باخد نفسي ب العافيه نقط العرق الصغيره كانت مليه وشي مسحتها ووقفت اهدي نفسي اي اللي وصلني ل كدا مين البنت الضعيفه دي انا مش مجبوره اعمل كدا بعد شوية تفكير عدلت نفسي وخرجت كان زين بس هو اللي قاعد ياسين مكنش معاه _الاستاذ جاله تيلفون مهم في الشغل فا استأذن ومشي _ااه ماهو رن عليا قالي _ والله؟
_ااه جاله شغل مهم اصل المعرض سايبو لوحده _بقيتي كدابه محترفه يا حور _قصدك اي؟ _قصدي ان الحوار اللي حصل ده مش داخل عليا _حوار اي انت مش عايز تصدق دي مشكلتك _كفايه كدب بقا هو انتي فاكرني اهبل السلسله حرف سلمى صحبتك مش حرفو هو وكمان البيه اسمه ياسين اصله اداني كارت المعرض واسمه الحقيقي كان فيه ده غير سلمى صحبتك اللي قاعده على التربيزه التانيه بتكدبي ليه؟
_اي اللي انت بتقولو ده قولتها وسبته وخرجت من الكافيه جيه ورايا شدني من إيدي في نص الشارع _مش هتمشي قولي بتكدبي ليه _مش بكدب _لاء بتكدبي .. بتكدبي ليه قالها بزعيق اتشنج عليا داس على إيدي جامد لدرجة ان الجرح بتاع امبارح رجع اتفتح تاني _ااه بكدب انا كدابه خلاص ارتاحت؟ _ليه بتكدبي ليه عايزه توصلي ل اي انتي لسه بتحبيني يا حور صح؟
_انا عايزه اروح روحني _ردي عليا لسه بتحبيني؟ _معرفش _امال مين اللي يعرف انتي بقيتي شخصيه تقرف بتكدبي وبتحوري والرد على قد السؤال وبتتجنبيني انتي مش حور بتاعت زمان لاء _انت بتلومني انا؟ الحقيقه انت اللي شخصيه تقرف عارف ليه عشان انت خاين للوعد من ساعت ما كنت في حضانه لحد ما بقيت ١٦ سنه وانت كنت كل يوم توعدني اننا لما نكبر هنكون لبعض وقبل ما تسافر وعدتني انك لما ترجع هتكون كبرت وهنعمل قصة حبنا
فين الوعود دي؟؟ غيبت سنين ولما رجعت رجعت خاطب يا بيه لاء وجايبها معاك انا افضل مستنيه سنين وفي الاخر حضرتك تبقا عايش حياتك اصلآ بقيت صاحبة لقب العانس البايره بسببك وتقولي شخصيتي انا اللي تقرف؟ شخصيتك انت اللي زاي الزفت على الاقل انا فضلت مخلصه للوعد وصونته الدور والباقي عليك معرفتش تعمل اي حاجه من اللي وعدت بيها وحوار سليم عملته عشان اوريك ان انا كمان عملت زايك ونسيتك زاي ما نستني اشمعنا انت يعني
_بس انا منستكيش.. _ولا كلمه _انا لسه بحك.. _زين ولا كلمه متتكلمش انت خاين ووحش وقاسي وانا كرهتك ولو انت اخر راجل في الكون مش عايزك انت سامع مش عايزك ياريتني ما عرفتك ياريتك ما دخلت حياتي قولتها وسيبته ومشيت جريت منو موقفنيش غير صوت خبط عربيه بصيت ورايا .. كان هو اللي العربيه خبطتو.. صويت عياط صوت إسعاف بنجري في المستشفى
اي اللي بيحصل ده ؟ ولا كأني في فيلم في روايه دي مش قصه عاديه دخلت الحمام غسلت وشي من الكحل اللي ساح في عيني وخرجت كان الدكتور خرج من عنده وطمني عليه دخلتلو .. _انت كويس؟ _هبقا كويس لو سمعتيني _زين بلاش كلام في اللي فات اللي حصل حصل مسك إيدي او انا اللي مسكت إيده اه مقهوره منو بس مستنيه اسمع مبرر مستنيه يقول انه مش بيحبها استسلمت وقعدت جنبه اسمعو
_نوران اخت صاحبي من فتره طويله اهلها عملوا حادثه كلهم ماتو صحبي ومامته وابوه الوصيه الاخيره هي اخته اخلي بالي منها عشان مبقاش ليها حد كان ممكن اهتم بيها من بعيد ل بعيد لحد ماتقابل ابن الحلال واجوزها بدال ما اتجوزها انا لحد ما بعد وفات اهلها ب فتره عرفنا انها مريضة سرطان .. مكنتش اقدر اسيبها كان لازم ابقا معاها خطبتها وعملت كل اللي كانت بتحلم بيه
صدقيني عمري ما نسيتك عمري ما بطلت احبك بس حطي نفسك مكاني كنتي هتعملي اي؟ عندي صوره كبيره ليا انا وانتي في اوضتي اللي في دوبي كل يوم اول ما اصحى بكلم الصوره واوعدها اني هرجع ونرجع سوا القدر كان أقوى مني يا حور ولما قرارنا نرجع القاهره مكنش ينفع نسيبها لوحدها .. جبنا شقه ليها في القاهره واحنا رجعنا شقتنا لحد ما .. لحد ما نتجوز بس انا عندي حل للمشكلة دي تقبلي تبقي زوجه تانيه؟
قالها ودخلت نوران من باب الاوضه وهي بتقول: _مفيش داعي تبقا زوجه تانيه يا زين انا كنت عارفه اني واخده مكان مش مكاني هو بيحبك انتي يا حور .. انا مكنتش بشوف نفسي في عينو كنت بشوفك انتي شكرآ على كل حاجه عملتها معايا انت وأهلك بس مش هقدر افرق بينكم اكتر من كدا قالتها وقلعت دبلتها وسابتها ومشيت قام شال المحليل اللي متعلقه في إيده وجري وراها
وانا لسه قاعده في مكاني لحد ما لفت انتباهي خيال حد ورايا كانو اهلي واهلو قومت حضنت بابا وعيطت _احنا السبب احنا اللي فضلنا نقول حور ل زين وزين ل حور لحد ما اتعلقتو ببعض من صغركم _بابا انا عايزه اسافر عايزه ابعد بعيد عن المشاكل دي شويه خدني من وسطهم ومشينا شفتو وانا نازله مع بابا كان قاعد جنبها على السلم بيمسح دموعها
روحت البيت حضرت شنطتي واتفقت مع بابا ميقولش لحد انا هسافر فين _قوليلي يا حور قلبك بيقولك اي وعقلك بيقولك اي _معرفش يا بابا مش عارفه احدد مش عارفه اقرر كلنا مظلومين إذا كنت أنا ولا وهو ولا نوران محدش فينا ليه ذنب قولتها وخدني في حضنه طبطب عليا وصلني ل العربيه كان عايز يوصلني بس اصريت عليه يفضل عشان لما يرجعو اتصلت ب صحابي حكتلهم اللي حصل وعرفتهم اني مسافره اسكندرية اقعد يومين وقالو انهم هيحصلوني يقعدو معايا يومين هناك
يمكن لما ابقا لوحدي اعرف احدد انا عايزه اي ولا هعمل اي يمكن اقنع نفسي اني اكون زوجه تانيه شويه ووصلت للسوبر جيت ركبت وقفلت موبايلي حاولت انام وفعلآ نمت بس دماغي هي اللي كانت صاحيه والمشهد اللي حصل في المستشفى عمال يتقرار قدامي ولا كأن حياتي مسلسل تركي اي اللي بيحصل ده انا أصغر من كدا والله ليه متجوزش الانسان اللي بحبو من غير اي مشاكل ونعيش في تبات ونبات ليه الحياه مش سهله وبسيطه زاي الحواديت والروايات ليه حياتي مصممه متبقاش حياه عاديه
ياريت لو ياخده حياتي دي ويدوني واحده غيرها عشان دي باظت مني . . يتبع… “الجزء الرابع والاخير بداخل حاره شعبيه” ايام عدت في اسكندرية صحابي وأهلي على اتصال بيا بابا مش بيخلص من خناق مع ماما عشان وافق اني اسافر ومش راضي يقول انا سافرت فين وزين اللي اتجنن ونفسه يعرف انا روحت فين قالو سأل كل اللي يعرفوني عليا قالو حزين في غيابي مش بينام باس إيد بابا عشان يقولو انا فين
طب مصعبش على بابا؟ ليه مقالوش على مكاني رغم ان الامور اتصلحت نوران اتفقت معاهم انها تاخد شقه عندنا في العماره ونبقا جيران وحبايب يا هي عندنا يا احنا عندها لحد ما تقابل اللي تحبه ويحبها طلبت منهم انها تكون من العيله بس مش اكتر كل حاجه اتحلت مش ناقص غير اني انا وزين نرجع لبعض انا مش عايزه ارجع ليه بقا؟ معرفش أفكاري لسه متلغبطه مش عارفه احدد حاسه اني طفله صغيره تايها وعايزه حد يشاورلها على الطريق الصح عايزه حد يقولي اعمل اي وانا والله هسمع الكلام
او هيحصل اي لو فضلت هنا ومرجعتش ليهم تاني افضل عايشه لوحدي محدش يعرف عني حاجه ولا اعرف حاجه عن حد بطلي عبط يا حور المشاكل اتحلت وحبيب عمرك وبيحبك عايزه اي تاني بقا؟ قولتها لنفسي وفتحت موبايلي وبعت ل بابا مسدج قولتلو يقول ل زين على مكاني وقفلت الموبيل قومت خدت شاور ولبست احلى حاجه عندي وميكب خفيف عملت شعري ب البيبي ليس كنت بجهز نفسي ل لقائنا باين انا واثقه انه في الطريق اصلآ
نزلت قعدت قدام البحر مستنياه ساعه ورا ساعه وهو لسه مجاش قلبي وعقلي في صراع هيجي مش هيجي مش بيحبك نظرته ليها كانت حقيقيه انتي بس صعبتي عليه ليه صعبت عليه ليه؟ هي اللي المفروض تصعب عليه مش انا صعبتي عليه لما شافك ضعيفه وهتموتي من غيابه او هو ك راجل مينفعش يبقا خاين للوعد عشان كدا بيحاول يصلح صورته محبكيش .. لو كان حبك مكنش شاف غيرك
حاولت الهي نفسي في أي حاجه بس حقيقي دماغي مش سايبني في حالي قومت طلبت قهوه من عمو اللي واقف ب عربيه جنب البحر وخدت كوبايه ورق فيها قهوتي ورجعت قعدت على الكرسي تاني شغلت الساوند كلاود على اغنية بتوحشتيني ل وائل جسار ولسه قلبي وعقلي في صراع مش مبطلين خناق القهوه قربت تخلص الوقت اتأخر ولسه مجاش معقول عقلي يكون بيتكلم صح؟ معقول مش جاي؟
الاغنيه وقفت مش عارفه حصل اي فتحت الموبيل اشوف اي حصل _ ضي عينك كان مرايتي فيهم حكايتي شفت فيهم فين بدايتي وفين نهايتي مستحيل انا ممكن انسى اي همسه اي كلمه قولتهالي في قلبي لسه مكنش الساوند كلاود .. كان هو وقفت وبصيت ورايا كان واقف ماسك الجاكت في إيده وواقف ب تيشرت نص كمُ عينو منوره مش بتلمع مربي دقنه ملامحه لسه جميله رغم أنها بهتانه ..
_انا دايمان اسأل في الغياب والسؤال مالوش جواب نفسي اعيش لحظة فرح لما احضنك من غير عتاب .. ساكته ليه اتكلمي واتعلمي ازاي تحلمي بصي في عيوني ب حنان وساعتها بس هتفهمي .. قالها وقرب للمكان اللي واقفه فيه
_وحشتيني وبحبك ومحبتش غيرك وعايزك معايا الباقي من عمري انا مش حمل اني اضيع يوم واحد تاني منكونش مع بعض فيه عايز اقولك كل الكلام الحلو اللي في الدنيا كل الكلام اللي مقولتوش السنين اللي فاتت .. عذبتيني اليومين اللي كنتي غايبه فيهم دول زاي ما يكون خدو من مني الأكسجين مبقتش عارف اتنفس ولا عارف اعيش انا بتنفسك يا حور .. صدقيني قلبي مدقش لحد غيرك اهو حبيبك قدامك وبيقولك ارجعيلو وافقي بقا قوليلو انا كمان بحبك قوليلو وحشتني
بيضحك عليكي متصدقوش هو عايز يبان البطل اللي مستسلمش ل حب عمره عشان يبقا عمل اللي عليه جربي كدا قوليلو مش عايزك شوفي ردة فعلو _بس انا مش عايزك يا زين _يعني اي؟ _يعني لو انت اخر راجل في الكون مش عايزك _امم ومعنى كلامك ده اي؟ _ارجع ل نوران عشان انا مش عايزك كلامي واضح اهو الكلمه مبينه نفسها بنفسها مش عايزك
_اخر كلام يا حور؟ _ااه مش عايزك وامشي ولا اقولك انا اللي همشي قولتها وسيبته ومشيت مستنيه يجي ورايا بس مجاش طلعت الشقه وبرضو مجاش مرنش عليا يا خربيتي انا اي اللي خلاني امشي ورا عقلي اديه سوحني معنى كدا ان عقلي انتصر على قلبي مش عايزني وعايز يبان بطل هيروح يقولهم هي مش عايزه ترجع وكدا حكايتنا خلصت ما يحاول تاني هيجرا اي اتصلت ب صحابي حكتلهم واتهزقت منهم طبعآ
طب اعمل اي انزل ادور عليه واقولو انا كنت بهزر معاك ونبي يارب خليه يرجعلي مره كمان ونبي والمره دي هرجع والله غبيه يا حور غبيه ما هو مظلوم زايه زايك وجالك وقالك محبش غيرك اي خلاكي تسمعي كلام دماغك عدا اليل وانا رايحه جايه بعاتب نفسي معقوله خلاص كدا راح مني يارب مياخدش الكلام على كرامته ويرجع تاني ونبي يارب نمت وانا بعيط خوف من انه ميرجعش تاني قطع نومي صوت خبط الباب استغربت مين ممكن يجي في الوقت ده
بصيت في الساعه كانت ١٢ الصبح معقوله نمت كل ده روحت فتحت الباب كانو اهلي واهلو وصحابي ومعاهم فستان فرح ومأذون وبيزغرطو _في اي؟ _كل ده نوم يا عروسه يلا اجهزي الميكب ارتست طالعه ورانا اهي _اجهز ل اي في أي يا بابا ؟ _زين قالنا انكم اتصافيتو يا ستي وقرارتو تعملو الفرح هنا عشان يبقا على البحر مكنتش موافق عشان انتو مستعجلين بس امك وام زين قالو خلينا نفرح فا وافقت
_انا رجعت ل زين؟ واتفقت معاه يكون فرحنا هنا ونعملو على البحر؟ _ااه قالها وهو داخل من باب الشقه ومعاه بوكيه الورد والتاج بتاع الفستان _وقولتي بحبك ومقدرش اعيش من غيرك وانت حبيب قلبي الوحيد وقلبي بيحبك وعنيا بتحبك _يا كداب _متكسفهاش بقا يا زين يلا يا بنات ادخلو جهزوها _يا ماما استني استنو يا جماعه انا قولتلو امبارح اني _ان بعد الفرح عايزه نسافر شهر عسل في تركيا حاضر يا حبيبتي موافق
قالها قبل ما اقولهم اني قولتلو مش موافقه نرجع وفي ثانيه الا ثانيه لقيتني عروسه بلبس فستان فرحي بيعملولي الميكب طب زعلانه ليه مش ده اللي كنتي هتنزلي تدوري عليه امبارح وتقوليلو انا كنت بهزر بس ازاي يتعامل مع قراراتي ب الأسلوب ده هو انا ماليش رأي ولا اي شويه وكنا خلصنا وجيه وقت الفريست لوك واقفه ب فستاني اللي مفيش أجمل منو اللي مختارتهوش مديالو ضهري وصحابي واقفين بيصوور فرحانين بينا كنت متوتره مكسوفه عايزه اقولو انا لسه مش عايزك عايزه اعاتبه على صريخي في المخده وعياطي قطع تفكيري دخوله ب بوكيه الورد
كان لابس بدله سوده كلاسيك كان احلى عريس شفته في حياتي والأهم من انه عريس انه عريسي انا .. قرب مني والانبهار بان على وشه لما شافني وانا عروسه باس راسي اداني بوكيه الورد _انتي عارفه انا كنت بحلم ب لحظه دي بقالي قد اي؟ _وانت عارف انا قولتلك امبارح اي؟ _يالهوي منك حتى يوم فرحنا مش مبطله نكد انتي تسكتي خالص انتي بت هبله اصلآ وكلامك اهبل زايك
_وانا مش عايزك يا زين _اروح اشوفلي عروسه تانيه يعني؟ _اه عشان _انتي جننتيني عايزه اي دلوقتي عايزني ولا مش عايزني _هتفرق؟ _في الحالتين مش هاخد ب رايك وهتجوزك _مش هتاخد ب رأيي ليه؟ _عشان قولتلك انتي هبله وكلامك اهبل منك _واي غصبك تتجوز واحده هبله اي رماك على المُر؟ _الحب اللي رماني بعدين انتي مش مُر انتي حلويات قلبي و كل حاجه حلوه في الدنيا دي
_تقبلي ابنك يكونلك اب يا حور؟ هزيت راسي بمعنى موافقه حضني قدامهم كلهم شالني ولف بيا وفي النهايه قلبي اللي انتصر على عقلي ولبست الأبيض ل زين الرجال اللي لو مكنتش لبست الأبيض ليه كنت هلبسو برضو بس مش ل غيرو كنت هلبسو لتراب الأرض ماهو يا يتجوزني هو يا اموت وفي النهايه اتجوزت حبيب ايامي وسنيني وبقينا مع بعض خلاص وااه بنسبه ل نوران ياسين اخو سلمى حبها وهي حبته وقدرة تتعالج من المرض اللي كان عندها واتجوزه هما كمان وكلنا بقينا عايشين في تبات ونبات وعندنا صبيان وبنات و..
_الحقي يا ماما رحيم اخويا بيعاكس بنت عمو ياسين _يا خبر قالها اي؟ _قالها بونبونايه ملبسايه حلوه من كل الزوايا _انت يالي اسمك زين تعالى شوف ابنك ياخويا ماهو على رأي بابا ابن الوز عوام النهايه.. #