– حرام عليكي يعمتو ارحميني = ارحمك من ايه يبت انتي هو انتي عملتي حاجه مكنش شغل بيت ده اللي بتقوليلي عليه ارحميني – يعمتو انا عندي مذاكره كتير وامتحاناتي فاضل عليها اسبوع واخر سنه يعني يدوب اللحق = طيب يروح عمتك اعملي بلقمتك يختي مش اكله شاربه ومصاريف جامعه وزعلانه عشان غسلتيلي شويه مواعين – يووووه انا داخله اذاكر = خدي يبت ايه يوه دي مانتي قليله الادب وامك معرفتش تربيكي صحيح
*وقفت رهف بضيق ونفاذ صبر* *كملت عمتها* =لما اشوفه ابوكي سبع البرمبه اللي سايبك ليا ولا همه حاجه غير شويه الملاليم اللي بيبعتهم كل شهر عشان يرضي ضميره طب خلي عندك دم وشوفيلك شغلانه ساعديني ف المصاريف بدل مانا شايله همك فوق هم بناتي يختي *اتنهدت رهف بعيون حزينه كالعاده و ملياها الدموع* -حاضر يعمتو اوعدك اتخرج بس وهنزل ادور ع اشغل واريحك.. عن اذنك مشيت رهف بأنكسار وهي بتحسبن ع *ابوها اللي كان السبب ف موت امها وتعب حياتها هي كمان*
*مسحت دموعها واخدت القرار اول ما تخلص وتستلم شهادتها هتنزل تدور ع شغل وتحاول تستقل بعيد عنهم وتبني حياتها زي ماهي عايزاها* بعد ايام كتير م الضغط من عمتها وكلامها وتعبها النفسي كل ماتفتكر ابوها واللي عمله واللي كان السبب ف تدمير حياتها وخوف من امتحانتها ومكنش ليها حضن تلجأ ليه غير ربنا اللي استجاب دعواتها ودلوقتي شهادتها بين ايديها فرحانه انها اخيرا افرااااج *رهف وهي بتكلم صاحبتها الوحيده*
-انا بجد فرحانه اوي يفريده مش مصدقه نفسي اخيرا خلصت وهبدأ ارتب لحياتي وامشيها زي مانا عايزه بقولك ايه انا من بكره نازله ادور ع شغل واهو اخلص من زن عمتي وكلامها اللي يسم البدن *فريده بحزن ع صحبتها و ف نفس الوقت فرحه انها هتتشغل عن البيت شويه وتبعد عن عمتها* =الف مبروك يحبيبتي ربنا معاكي ويوفقك ف اللي جاي يارب وانا دايما جنبك هشجعك -يخليكي ليا يفرودتي يلا تصبحي ع خير
=وانتي م اهله يحبيبتي *اتنهدت رهف بشغف كبير للي جاي واستعداد لمهمه بكره الشركه اللي هي حاطه عينها عليها بقالها سنه طالبه موظفين سكرتاريه ولان رهف الحاجه الوحيده الحلوه ف حياتها حظها الحلو وان ربنا دايما بيراضيها عن كل اللي شافته اتقبلت ف الوظيفه وبكره اول يوم ليها* *رهف وهي غارقه ف تفكيرها اللي كله حماس وشغف لبكره وبتفكر ف مليون حاجه تعملها لما تاخد المرتب بس طبعا عمتها مش هتسيبها ف فرحتها كتير ودخلتلها اوضتها*
-والنبي يختي ماعارفه قبلوكي ع ايه بس يلا بتيجي مع الهُبل دوبل .. قومي اذا كنتي هتتعشي = مش هطفح يعمتو مش هطفح – يختي عنك ماطفحتي وفرتي *اتحولت ملامح رهف من حماس لألم كبير حاسه بيه ف قلبها وبيتجدد مع كل كلمه تطلع من بوق عمتها* – لما هي مش طيقاني كده بس ياربي قبلت تربيني ليه من الاول كانوا رموني ف الشارع احسن *غطت وشها وهي بتدعي ربنا يرحمها ونامت من كتر العياط*
*فاقت ع صوت المنبه 7 صباحاً وهي بتجدد شغفها وبتحاول تطنش اي حاجه تعكنن عليها وبعد ماخلصت صلاتها راحت تلبس* – قدام مرايتها عادي بتدلع براحتها بستناها وبستعجلهااا تندهلي ابصلها.. خلاثو ع القمر يناس *افتكرت عمتها وهي بتقولها يقبلوكي ع ايه* – والنبي عمتي دي مابتفهمش هو حد يشوفني ويقول لا *خلصت واتجهت للشركه بحماس شدييييد وصلت وابتدت شغلها* *سكرتيره خاصه لشركه استيراد وتصدير يملكها امجد الصاوي يبلغ من العمر 60 عام ووريثه وحفيده الوحيد فارس الصاوي عمره 27 الذي مات اباه وامه منذ عامان اثر حادث اليم وكان اباه الابن الوحيد لأمجد*
*مر ع شغلها ف الشركه سنه ونص *رهف كانت متوقعه انها لما تبتدي تشتغل عمتها هتبطل تجرحها بالكلام لكن حصل عكس توقعها تماما حاجه تانيه تقرفها بيها وهييي* رهف – هو انتي مش بتحبي تشوفيني مرتاحه ابدا يعمتو =انتي يبت عبيطه.. عشان تطفشي الواد تقوليله انا بشرب سجاير ومش ناويه ابطلها – يعني اعملكوا ايه نازلين صغط عليا كبرتي كبرتي ولازم تتجوزوي قعدتك دي مش هتنفع الست ملهاش الا بيت جوزها خلصنا م الشغل مسكتولي ف الجواز ماترحموني بقا يجدعان
= يقليله الربايه مهما تعملي نهايتك ف بيت جوزك ف يختي متتحمقيش اوي كده وتعمليلي فيها الوزيره وبصراحه بقا قعدتك مكلفانا اكل وشرب وكهربا وغاز ومايه واوضه كمان = كهربا.. ليه يعمتو هو انا واخده كابل عمومي موصلاه ع الاوضه ع طول وبعدين والله انا قولتلك اني عايزه استقل واخد شقه لوحدي انتوا اللي عملتوا فيها خايفين عليا – تصدقي يبت انتي الكلام والذوق معاكي مش جايب فايده العافيه انسب ليكي
بصي يبنت حازم اول عريس هيدق الباب ده هتكوني مخطوباله وحركاتك القرعه دي متعمليهاش عشان هعرف واديكي شوفتي وساعتها قسما بالله ماهنزلك من باب البيت والشغل اللي فرحانه بيه ده مش هتعتبيه تاني اللهم بلغت اللهم فاأشهد *سابتها ومشيت وهي غرقانه ف افكارها وحزنها و مش عارفه تعمل ايه .. دخلت اوضتها طلعت النوته اللي بقت صاحبتها الوحيده من ساعة ما فريده اتجوزت وخلفت وانشغلت عنها وكتبت* -هما ليه بيلوموني اني برفض ليه بيلوموني ع خوفي م فكرة الجواز
انا مليش ذنب ان ابويا سببلي عُقد كرهت كل الرجاله وسيرة الجواز بسببه قهر قلب امي وطول عشرتها معاه مبلش ريقها بكلمه حلوه خانها مع طوب الأرض وشايل ايده من مسوؤلية البيت ومن كتر قهرتها والحِمل اللي عليها جالها القلب وماتت ف سكته من سكتاته وهي عمر 30 متهنتش بشبابها هو السبب ف مرضها وموتها معملش حاجه تفرحها كل يوم ينيمها حزينه ودموعها ع خدها وهي بتحاول تداريها عني ذنبي ايه ف كل ده وف اللي شوفته حسبي الله ونعم الوكيل مش مسمحاك يبابا مهما حصل
____________________________ *اتكلم امجد وهو بيحاول يمسك اعصابه* -يحبيبي افهمني بقولك سألت عليها طوب الارض وراقبتها وكل حاجه بتقول انها مش كويسه ومش مناسباك يبني متخليش الحب يعميك =يجدو محدش بيسيب حد ف حاله اكيد كلامهم مش صح *اتكلم امجد بنفاذ صبر* -ازاااي مش صح بقولك خليت حد يراقبها وتصرفاتها مش عجباااني =يجدو مايمكن انت ترجمت تصرفها غلط -بقولك ايه ي فارس ع جثتي تتجوز البت دي انت الوريث الوحيد ليا معنديش استعداد اخسر كل ده بعد مابنيته ومعنديش استعداد اخسرك انت كمان
نهايته البت دي مش كويسه وهماك بالحب عشان فلوسك الكتير وانت زي الأهبل مصدق مع انك لو شغلت دماغك هتفهم او حتى راقبتها بنفسك *اتنهد امجد وسكت للحظات* *قام وخده لحضنه وطبطب ع ضهره وهو بيقول* يحبيبي انا خايف عليك مش اكتر فوق من وهمك ده وبص حواليك وفكر .. اقعد بقا عشان عايز اكلمك ف حاجه =خير يجدو – بصراحه كده و ع بلاطه شايفلك عروسه مظنش ف حد انسب ليك زيها
=تاني .. تاني ايه ده عاشر يجدو انت مزهقتش *بصله بضيقه وحده وهو بيزعق بعلو صوته* – لا يفارس مزهقتش انا كل مره بطاوعك وبقول بكره يفهم بس شكلك معمي ع الاخر المرادي يفارس مش هطاوعك واعتبر نفسك شوفتها ووافقت وهتتخطبوا عشان ده اللي هيحصل حتى لو غصب عنك انت سامع *بدأ امجد يكح جامد لدرجه مبقاش قادر ياخد نفسه فك زراير قميصه ولسه بيكح ونفسه بيهرب منه لحد مااغمى عليه*
*انتفض فارس وهو بينادي عليه ومبيردش كلم الاسعاف وجم اخدوه للمستشفى* -طمني يدكتور ارجوك = متقلقش هو مفيهوش حاجه اللي حصل ده بس بسبب ان ضغطه ارتفع فجأه اكيد نتيجه زعل وتوتر اعصاب هو سنه كبير واللي بيتعاملوا معاه لازم يبقوا متفهمين ده مينفعش تعرضوه لزعل او توتر او خنقه كتيره ياريت تبعدوا عنه كل ده وعموما هو هيشرفنا هنا كام يوم نعمل الفحوصات والاشاعات اللازمه عشان نطمن بردو -طيب يدكتور شكرا هعمل كل اللي حضرتك قولته
– العفو عن اذنك *جري فارس ع غرفه جده قعد جنبه وهو بيتنهد وبيقول* -كده بردو يجدو تقلقني عليك = حقك عليا يبني.. شكل الصحه بقت ف النازل استعد بقا عشان هتاخد مكاني ف الشركه – بعد الشر عليك يجدو متقولش كده ربنا يخليك ليا انت عارف اني مليش غيرك من بعد موت ابويا وامي = ويخليك ليا يحبيبي بس انت لو تريح قلبي وتوافقني *فارس كان لسه هيعترض بس افتكر كلام الدكتور وان مفيش اغلي من جده عنده وممكن يضحي بنفسه لاجل راحته*
– حاضر يجدو اوعدك هفكر ف الموضوع واعملك اللي عايزه بس خف انت بس يعم ___________________________ *انتشر ف الشركه خبر مرض امجد الصاوي ولان رهف بتحبه جدا وطول فترة الشغل كان بيعاملها بطريقه خلاها تقول ياريته كان بابا وقررت انها تروح تزوره بعد ماتخلص شغلها* *عدى وقت وكانت رهف خلصت شغل وبتلم حاجتها ومتجهه للمستشفى* *وصلت واستفسرت عن رقم الغرفه وطلعت خبطت* *رد فارس بصوت عالي نسبيا* -اتفضل *دخلت رهف ف ايديها بوكيه ورد وعلبه شوكولاته صغيره و ع وشها التوتر دخلت بهدوء وهي بتبلع ريقها وقالت*
-السلام عليكم *ردوا الاتنين* وعليكم السلام ورحمة الله وبركاته امجد- تعالي يرهف اتفضلي يبنتي .. هات كرسي ي فارس *قام فارس يجيب كرسي وحطه مكان وقوفها اللي كان تجاه امجد* رهف-انا سمعت ف الشركه ان حضرتك تعبان ف قولت اجي اطمن عليك امجد- تسلمي يبنتي محصلتش م اللي بقالهم سنين شغالين معايا -هما كلهم قلقانين بس حضرتك عارف ضغط الشغل الايام دي *بص امجد ع ايد رهف وهي بتحط الحاجات اللي جابتها ع الترابيزه*
-مكنتيش تعبتي نفسك يبنتي =ولا تعب ولا حاجه حضرتك اغلي م كده بكتير والله *بص امجد ع فارس اللي من ساعة مارهف دخلت معايرهاش اي اهتمام كأنها مش موجوده يدوبك بس رد السلام وكان مركز ف فونه وبس* -فارس يبني سلم ع رهف بنت جدعه وجميلة وقلبها طيب متعينه عندنا من سنتين بس ماشاء الله عليها حصل كذا موقف اثبتولي هي ازاي بنت محترمه وبنت أصول وكويسه
*بص فارس لرهف بعدم اهتمام اهلا وسهلا نورتي الشركه.. بصت رهف لامجد بنظرة شكر من كلامه بس ف ثواني اتغيرت ملامحها لقرف من كلام فارس وتون صوته اللي حمل تكبر ولا مبالاه وقلة ذوق بصتله باستهتار ومردتش عليه* -طيب ي استاذ امجد انا هضطر امشي عشان الوقت ميتاخرش وحضرتك كمان متتاخرش علينا ف الشركه ربنا يقومك بالف سلامه = تسلميلي يبنتي زيارتك دي بالدنيا والله خلي بالك ع نفسك *رمت رهف نظرها ع فارس الغير مبالِ وقالت*
عن اذننننك يا استاذ امجد *مشيت رهف وهي مستغربه ازاي الاتنين دول دم واحد وقالت* – اكيد ده حفيده بالتبني ومخبي علينا ____________________________ *ف المستشفى* امجد-يبني انت عايز تموتني ايه الطريقه اللي عاملت بيها البنت دي دي طريقه تعامل بيها ضيوفك هي جايه تشحت منك *بدأ امجد يكح تاني .. بس المرادي كانت تمثيل وقرر ان هيستغل تعبه عشان يقربهم من بعض* = اهدى بس يجدو انا سف والله اول مااشوفها هعتذرلها اهدى بس انت تعبان
-مانت اللي تاعبني بعمايلك هتكبر امتى = طيب متزعلش انا هصلح الموضوع اهدى بس ____________________________ – اتاخرتي كده ليه يهاانم *رهف بنفخ* = مديري تعب وف المستشفى وروحت ازوره ايه معملش الواجب .. لا يختي اعمليه ماهو ده الواجب اللي تعرفيه وبس *مشيت رهف وسابتها ودخلت ع اوضتها تنام *تاني يوم راحت رهف الشركه وهي بتحاول تجدد نشاطها اللي بتاخده عمتها كل يوم بكلامها وع وشك دخول مكتب المدير تاخد ملف مهم وهي بتندن اغنيه من ضمن الاغاني اللي سمعتها ف الطريق كالعاده*
-حبيتك من اول نظره وقلبي شاورلك بضحكه اتمنيت انك تشوفها *سكتت فاجاه لما لقت فارس قاعد مكان جده والواضح انه بيمشي الشغل لحد جده مايقوم* *قالت ف سرها* فارس بيه قليل الزوق باشا اهلا يخويا *حمحت رهف بسرعه وهي بتقول* – معلش معرفش ان حضرتك هنا =ولا يهمك حلوه الاغنيه .. عموما كنت عايزك -عايزني انا! خير ف حاجه =والله كنت حابب اقولك معلش ع المعامله بتاعت انبارح يعني بس انتي عارفه تعب جدو والضغوط وكده
-ولا يهمك حصل خير كنت داخله اخد ملف واخدته .. عن اذنك ____________________________ اليوم خلص اتجهت رهف لبيتها اما فارس راح لجده يطمن عليه ويبلغه انه عمل زي ماوعده -ايه يجدو اخبارك ايه يحبيبي النهارده =ع حسب الاخبار اللي جايلي بيها -حلوه يحبيبي حلوه والله =اشجيني -الشغل ماشي تمام الحمد لله =ها -ها ايه يجدو =اللي بعده.. هي دي الاخبار بس! -لا يسيدي عملت اللي وعدتك بيه وكلمت سكرتيرتك واعتذرتلها لو مش مصدقني كلمها اسالها
=لا يحبيبي مصدقك طبعا..حاسس اني ابتديت اتحسن بس عارف بقا هخف امتى =امتى -لما تروح تتقدملها *بصله بصدمه وعدم فهم* =اتقدم لمين يجدو ________________ رممت حطامي .♥️ بارت 1 مُنيره سيف اول كتاباتي اتمنى تشجعوني وتقولولي رأيكم♥️✨ بعتذر ع اي خطأ لغوي او كتابي❤️ #رواياترممت حطامي .♥️ بارت 2 مُنيره سيف 🤍 ✨ *بصله بصدمه وعدم فهم* =اتقدم لمين يجدو -لرهف يحبيب جدو والله بت جدعه وطيبه وحنينه وعينيها مليانه مش هتلاقي زيها وحاسسها مناسبه ليك
=هتجوز السكرتيره يجدو -ومالها السكرتيره ماكلنا بدانا صغيرين وبعدين هي ميعبهاش حاجه دي ف الاول والاخر بنت يعني تتكرم ع اللي بتعمله وانها بتشتغل مش يتقال عليها هتجوز سكرتيره يجدو جتك القرف عيل غبي = مش قصدي يجدو.. بس ومريم -هيقولي تاني مريم وزفت البت دي سيرتها بتحرقلي دمي *بدا جده يكح جامد وطبعا كلنا عارفين انه بيمثل بردو المره دي عشان يستعطف فارس ويأثر ع قراره* =طب اهدي بس يجدو اهدى نتنقاش براحه طيب
*جده وهو بيكح* – مفيش نقاش ف الموضوع ده انا قولت البت دي لا يعني لا انت عايز تموتني صح = بعد الشر عليك يجدو طيب خلاص هعملك كل اللي عايزه والله اهدى بس راح فارس يجبله مايه و ف نفس الوقت امجد بصله وهو بيضحك ضحكه خبيثه وبيقول ف سره انا مش هسيبكوا غير لما تبقوا ف بيت واحد. ____________________________ *تاني يوم امجد قدر يبعت حد يراقب رهف وهي مروحه م الشركه عشان يعرف مكان بيتها ويسال عن أحوالهم وكمان ياخد رقم ولي امرها*
*بعدها بيوم فارس راح الشركه بعد ما عدى ع جده واطمن عليه ورهف وصلت وابتدت شغلها وكانت حاسه انها دايخه شويه وده طبعا نتيجة قلة اكلها واهتمامها بصحتها* *ف المستشفى* امجد – ها ي أدهم هات اللي عندك ادهم = عرفت ان مامتها ماتت من سنين وكانت عيله ف ابتدائي وابوها اداها لاخته تربيها وكمان ابوها مبيسالش فيها وكأنه خلص منها عمتها بقا عايزه تجوزها عشان تخلص منها ومن مصاريفها وبردو عرفت يعني ان هي مش بتعاملها احسن معامله وده رقم باباها والتاني رقم عمتها
-بس كده.. ومسالتش عن اخلاقها =لا يباشا طبعا سالت.. الشهاده لله مسمعتش حد قال كلمه وحشه ف حقها غير يعني بنتين مشكروش فيها.. بس لو حضرتك تسمحلي اقول رأيي يعني – قول ي ادهم انت زي فارس يحبيبي =بقول ان البنت فعلا كويسه طول مراقبتي ليها مشوفتش حاجه تدينها وبالنسبه للبنتين اظن يعني انه نفسنة بنات مش اكتر – تمام ي ادهم شكرا ي ابني اتفضل =عن اذنك يباشا ____________________________
*اتجهت رهف بقلة حيله غصب عنها لمكتب المدير اللي محتله فارس حاليا* – مساء الخير = مساء النور -كنت محتاجه من حضرتك تمضي ع الورق ده عشان واقف ع الامضاء =تمام.. هاتي *حطت رهف الملف قدامه بص فارس فيه وعرف مضمونه وابدتى يمضى خلص ورفع نظره ع رهف يديها الملف.. لكن شافها سانده ع الكرسي بإيديها مش قادره تقف* – انسه رهف انتي كويس =……. – انسه رهف *وهنا رخت رهف اعصابها اللي حاولت تمسكها وسلمت نفسها للارض*
*انتفض فارس وهو بيجري عليها بيحاول يفوقها لكن منجحش.. شالها بسرعه وحطها بخفه ع الكنبه وجري يشوف دكتور – ادهم ادهم =ايوه يفارس – بالله عليك شوفلي دكتور بسرعه رهف مغمى عليها ف المكتب ومش عارف اعمل ايه = 10 دقايق ويكون عندك *جري ادهم يشوف دكتور اما فارس رجع للمكتب بسرعه بعيون قلقانه نزل لمستواها وحاول يفوقها من تاني لكن مفيش فايده بصلها ولاول مره يركز ف ملامحها وصدق ع كلام جده واعترف انها فعلا جميله وتخطف نظر اي حد لكن قاطع تفكيره دخول ادهم عليه بالدكتور*
فارس – اتفضل يدكتور بسرعه بس عشان مش راضيه تفوق *بعد شويه اتكلم الدكتور* الدكتور = طيب يجماعه انا هكتب ع محاليل وعلاج لازم يتجاب حالا عشان يتعلق -طيب هي مالها يدكتور =متقلقش هبوط بس وضغطها واطي وده غالبا سببه قلة غذى *كتب الدكتور الروشته* فارس -معلش ي ادهم هتعبك هات الروشته دي بس ادهم = ولا يهمك يفارس احنا اخوات مش اصحاب .. عن اذنكم *الدكتور لفارس* -لازم تهتم بصحتها اكتر وتخلي بالها من نفسها المرادي الحمد لله جت بسيطه المره الجايه الله اعلم
=حاضر يدكتور *بعد شويه جه ادهم بالعلاج* *ابتدي الدكتور يركب المحاليل* فارس – طيب هي هتفوق امتى = يعدي وقت بس ع المحاليل وجسمها يستجيب ليها هتفوق إن شاء الله .. عموما انا خلصت.. المحاليل تخلص وهتكون كويسه إن شاء الله .. عن اذنكم – وصله ي ادهم *خرج ادهم والدكتور ورجع فارس لمكانه قبل مجئ الدكتور واتكلم بخفوت هو مركز ف ملامحها* – مش عارف ليه قلقان وقلبي خايف عليكي.. يمكن م كتر كلام جدو انك قد ايه كويسه ولا عشان عرفت قصتك من ادهم وصعبتي جدا عليا
*قاطعه دخول ادهم اللي نشر التوتر ف وش فارس* – ايه الاخبار فاقت =لسه – طيب يحبيبي انا هروح اكمل شغلي وبإذن الله هتفوق لو احتاجت حاجه نادي عليا = شكرا ي ادهم – ع ايه يالا دانت اخويا *شد ادهم كرسي وقعد قصادها مستنيها تفوق وهو شارد ف تفكيره مش عارف ليه خايف وقلقان بالشكل ده عليها* اقتحم ع تفكيره كلام جده ع مريم “يبني دي وهماك مش بتحبك ولا انت بتحبها فوق يفارس وبص حواليك وافهم”
معقوله فعلا كل اللي انا فيه ده وهم اكيد لا طبعا جدي بيقول كده عشان مبيحبهاش بس شكله عنده حق لازم افوق *قاطع مناقشته لنفسه رهف وهي بتفتح عينيها* – انتي كويسه = هو ايه اللي حصل – اغمى عليكي فاجاه ولما جبت الدكتور قال انه هبوط والضغط وطي بسبب قلة الاكل *رهف وهي بتحاول تقوم لكن لحقها فارس وسندها* – لالا رايحه فين خليكي مرتاحه لحد ما المحلول يخلص
=انا اسفه تعبتك.. هو انا فعلا بقالي يومين مكلتش يعتبر – لا مينفعش الدكتور قال ان المرادي ربنا سترها الله اعلم المره الجايه هيحصل ايه لازم تهتمي بصحتك واكلك *بلعت رهف ريقها واستغربت من طريقته اللطيفه اللي اتبدلت فاجاه* – مش عارفه اقولك ايه بس حاضر واسفه تاني مره عشان تعبتك =العفو انا معملتش حاجه.. طيب انا هخرج بس ربع ساعه وجاي -اتفضل *مسحت رهف ع وشها وهي مش عارفه هتفضل كده لامتى وافتكرت طريقه فارس وخوفه اللي باينين ف كلامه وعيونه اللي اطمنت لما شافتها فاقت وقالت*
– غريبه سبحانه مغير الاحوال اخر حاجه اتوقعها الشقلبه اللي حصلتله دي بس يارب يفضل ع كده *رن تيليفونها ف خرجته من جيبها ولقت عمتها* – مش وقتك خالص.. الو يعمتو =فينك – ف الشركه يعمتو اظن يعني لسه ساعتين ع ميعاد رجوعي = يختي ولا مترجعيش.. انا بس رنيت اقولك ان بكره جايلك عريس ف اكيد مفيش نزول الشغل ف خدي اجازه وانتي عندك واعملي حسابك -يادي الغم افرضي انا مش جاهزه اقابل حد بتاخدي قرار بلساني ليه
=بت بقولك ايه بطلي زعيق اللي قولته هو اللي هيتنفذ والا انتي عارفه نتيجة زعلي يلا ف داهيه *قفلت عمتها وسابتها ف حزنها وحيرتها ومش عارفه هتطفشه ازاي المرادي خصوصا بعد تهديد عمتها ليها هربت منها دموعها ومقدرتش توقفهم* *فارس وهو بيقفل باب المكتب* – جبتلك مايه وعصير وطلبت اكل ربع ساعه بالكتير ويوصل وناكل سوا عشان متتكسفيش تاكلي لوحدك *فضلت رهف حاطه وشها ف الارض ومش عارف تبصله ومش عارفه توقف دموعها*
– انسه رهف – انسه رهف انتي كويسه *ردت رهف بصوت مبحوح* =انا تمام – انتي بتعيطي ولا ايه *رهف وهي بتمسح دموعها وفاكره انه مش شايفها* =لا مفيش حاجه .. شكرا ع اللي جبته مكنش ليه لزوم والله – لا ازاي لازم تاكلي زي ما الدكتور قال اتفضلي *مد ايده بالعصير والمايه اخدتهم رهف منه* =شكرا جدا والله مش عارفه اقولك ايه – لو عايزه تقولي فعلا.. فهميني سبب عياطك ومتقولش مش بعيط
=….. – طيب يستي ع راحتك متقوليش السبب.. بس انتي تعبانه دلوقتي هوني عليكي وحاولي متضغطيش ع نفسك اكتر واشربي العصير بقا *ابتسمتله رهف ابتسامه لطيفه وهي ممنونه ليه عشان اللي عمله معاها.. ردلها ابتسامتها بواحده الطف وكأنه بيطبطب عليها* *الباب خبط* فارس – اتفضل =الاكل اللي حضرتك طلبته يابيه – شكرا يعم ابراهيم *اخد منه الاكل وخرج عم إبراهيم وسابهم* فارس لرهف يلا بقا عشان ناكل لقمه مع بعض
– صدقني مش عايزه والله انا كفايه عليا العصير.. المحلول يخلص بس وهقوم اكمل شغلي = لا شغل ايه.. المحلول يخلص وتروحي ترتاحي وكمان بكره متجيش ريحي يوم انتي اجازه بكره – لالا اجازه ايه انا كويسه *قاطعها فارس وهو بيصطنع الحزم* = هتقولي لا ع قرار اخده مديرك ولا ايه قولت اجازه يعني اجازه *ردهت عليه رهف وهي بتضحك* – حاضر يفندم.. بس مش لايق عليك الصرامه دي =اهو ادينا بنحاول.. يلا بقا قبل ما السندوتشات تبرد
*انتهوا م الاكل مع انتهاء المحلول* فارس – طيب المحلول خلص انا هروح اجيب الدكتور يطمنا عليكي ويفك الكانيولا – معلش تعبتك =تعبك راحه والله متقوليش كده *سابها وطلع يجيب الدكتور 10 دقايق ورجع* – اتفضل يدكتور الدكتور= الف سلامه عليكي .. ها بقيتي احسن شويه – الله يسلمك يدكتور.. الحمد لله احسن بكتير شكرا لحضرتك = العفو ده واجبي.. طيب انا حاليا هشيل الكانه من ايدك بس الفتره الجايه تهتمي بنفسك وبأكلك كويس جدا الحمد لله المرادي عدت وربنا ستر المره الجايه متعرفيش ايه اللي ممكن يحصل
*هزت رهف راسها بإيجاب ورفعت نظرها ع فارس اللي ابتسامته زينت وشه بعد سماع كلام الدكتور وانها كويسه* *وصل فارس الدكتور ورجع لرهف* – يلا يستي قومي ع مهلك =اقوم فين – هوصلك =اي ده لا طبعا شكرا جدا انا تعبتك معايا النهارده – يستي والله ماتعبت وبعدين مينفعش تروحي لوحدك وانتي كده اعتبريني اوبر يلا بقا = لا متقلقش انا بقيت كويسه هعرف اروح لوحدي مش عايزه اتعبك زياده وبعدين مشواري بعيد شويه
– يستي ولا يهمك حتي لو ف اخر الدنيا بصي لا مفر انا مش هتنازل عن كلامي *اتنهدت رهف بقلة حيله واستسلمت* =طيب هروح الم حاجتي *بعد شويه طلع فارس م مكتبه وراح لرهف* – ها خلصتي =ايوه خلاص – طيب يلا *نزلوا سوا وهو حريص انه يحافظ ع خطواته الهاديه ع عكس طبيعة مشيته* *وصلوا للعربيه وركبوا* – قوليلي بقا العنوان =************* *فضلوا طول الطريق ساكتين عدى ساعه وكل واحد منهم غرقان ف افكاره
فارس بيفكر ف حالها وانها صعبانه عليه جدا ومتعاطف معاها عشان كده بيعمل معاها كل ده وهو اتعود لما بيعوز حاجه بيعملها بس بردو مش قادر يستوعب ان ممكن بعد كل حبه ووقته لمريم كلام جده عنها يطلع صح وقرر انه هيتأكد من ده *اما رهف طول الطريق كانت مكسوفه وهاديه ع عكس طبيعتها وبتفكر ف حاله اللي اتبدل ومستغربه تعابير وشه اللي كانت قلقانه وعيونه الخايفه عليها بس كمان بتفكر هتعمل ايه بكره وانها داخله ع مشاكل هي مش فيقالها وانها حتى لو طفشت ده هييجي غيره وعمتها مش هتسيبها*
*قطع تفكيرهم قربهم من بيت رهف* – بس بس نزلني هنا بقا =فين بيتك – لا هو بصراحه جوه شويه بس انا نزلت هنا عشان ناس المنطقه يعني كلامهم كتير ومش هيفهموا وكده ومش عايزه حد يقول كلمه مش حلوه عليا = امممم فهمتك .. خلاص ع راحتك بس خلي بالك م نفسك اتعدلت عشان تنزل بس هو كان بيفكر يطمن ازاي انها وصلت بيتها – طيب رهف ممكن اطلب طلب بس
=اكيد طبعا اتفضل – يعني لو ممكن رقمك اطمن بس انك وصلتي بيتك وكده *زهلت رهف من طلبه وزاد استغربها ليه وعشان هي دايما ظانه شر ف اي راجل تقابله قالت بحده* = لا متتعبش نفسك متشكره اوي ع كده مفيش حاجه تقلق انا كل يوم بروح لوحدي *استغرب فارس من قلبتها فاجاه لكنه محبش يضغط عليها* – طيب ع راحتك.. توصلي بالف سلامه =الله يسلم عمرك *نزلت رهف واتجهت لطريقها وقالت ف سرها*
– مفيش راجل يعمل خير لله كلهم يعملوا اللالي عشان مصلحتهم قال ايه هاتي رقمك رقم ف زورك يسدلك التنفس يبعيد *اما فارس فضل رامي نظره عليها لحد مااختفت رؤيتها وابتدي يتحرك* ____________________________ – اهلا بالهانم =……. -ماتردي يبت ردت المايه ف زورك = ارد اقول ايه يعني يعمتو -خدتي اجازه يختي = اه يعمتو خدت خدت.. عن اذنك بقا عشان تعبانه وهروح انام – روحي يختي بس جهزي نفسك عشان العريس جاي بكره الساعه 5
*مردتش عليها ودخلت اوضتها بتفكر هتعمل ايه بكره لحد ماوصلت لحل ولمعت عيونها و قالت بصوت خافت* -طب مانا ممكن اقوله الصراحه واحكيله مش يمكن يتعاطف معايا والموضوع يتحل.. ماشي يعمتو هوريكي فاكره انك هتغلبيني *ارتاحت رهف نسبيا ونامت م كتر التعب* ____________________________ *ف المستشفى* فارس -الدكتور كتبلك ع خروج وقال ان الفحوصات كلها بتقول انك تمام بس تبعد عن الزعل والعصبيه وتهتم بصحتك اكتر ويبقا ف راحه امجد = اسمعني انت بس ف اللي هقوله وطاوعني ومش هتعب باقي عمري
– يسلام ده عيوني.. خير يجدو =انا كلمت عمت رهف. – اي ده انت عرفت انها تعبت =هي مين – رهف ف الشركه = اي ده هي تعبت ليه كده -لا عادي قلة اكل وهي كويسه دلوقتي لما جبتلها الدكتور.. المهم قولي كلمت عمتها ليه لما انت مش عارف بتعبها =خدت منها ميعاد بكره الساعه 5 عشان نروح نتقدم لرهف *اتصدم فارس من كلامه وقال بنبره عاليه شويه* – طب ينفع يعني يجدو من غير مانا اعرف طب حتى استنى عليا كام يوم
=واستنى ليه مفيش حاجه تخلينا نستنى وبعدين انت قولتلي انك هتريحني ولا عاوز تتعبني تاني ي فارس – يجدو مش قصدي بس متاخدنيش فجأه كده قولي طيب قبلها يمكن مش مستعد =معلش يحبيبي المره الجايه هقولك – بتتريق يجدو =قوم بس يلا روحني عشان اتخنقت م القاعده هنا وعشان نلحق نرتاح شويه لمشوار بكره هتبقا عريس يواد *سرح فارس لوهله واستغرب انه مش متضايق زي المرات اللي فاتت يمكن عشان مش عايز يتعب جده اكتر بس الاكيد انه لازم يسرع ف موضوع مريم ويطمن قلبه*
____________________________ كل يوم هنزل بارت وشكراااا جدا لتشجعيكم القمر ده♥️ #رواياترممت حطامي .♥️ بارت 3 *تاني يوم نزل امجد وفارس من ڨلتهم متجهين لعنوان مشوارهم* *اما رهف ف كانت صاحيه من بدري قلقانه بترتب الكلام اللي هتقوله وبتصلي وتدعي ربنا يعديها ع خير ومخرجتش من اوضتها* *بعد ساعات كان وصل فارس وامجد تحت بيت رهف اللي كان بسيط* *جريت عمتها عليها تبلغها وصول العريس عشان تجهز بس اللي مقلتلهاش عليه ان ابوها جه وهو اللي هيستقبل الضيوف*
حازم- اهلا اهلا اتفضلوا البيت نور والله امجد= البيت منور بأهله *سمعت رهف صوت باباها وفهمت ان عمتها كلمته عشان ييجي ضحكت رهف بسخريه وقالت* – عامل فيها ابويا اوي مش لايق عليك الدور *بعد شويه دخلتلها عمتها بالصينيه عشان رهف تطلع تضايفهم* *خدت نفس كبير وهي بتردد الكلام اللي هتقوله ف دماغها واخدت الصينيه ودخلت* *دخلت وشها ف الارض حطت الصينيه ع الترابيزه وسمعت صوت باباها وهو بيقولها سلمي ع الضيوف يرهف*
*رفعت عيونها لقت امجد وفارس* *شهقت بصدمه والتوتر احتل ملامحها* فارس بسخريه = مفاجأه مش كده رهف وهي باصه لامجد- هو حضرتك جاي تتقدملي عليت ضحكة امجد= اكيد لا يبنتي متتفرجيش ع مسلسلات هندي كتير – فارس هو اللي شاريكي وجاي طالب ايدك من باباكي *سكن القلق والتوتر ملامحها وف نفس الوقت مستغربه من اللي بيحصل* عمتها- تعالي يرهوفه اقعدي تعالي يحبيبتي *رهف ف سرها* رهوفه دانتي عمرك مانادتيني باسمي حتى دلوقتي بقيت رهوفه اه يناس منافقه
اتكلم امجد – زي ماسمعت كده يحازم جايين نطلب ايد رهف لفارس البنت مؤدبه ماشاء الله عليها وطيبه ومش هلاقي احسن منها = الله يخليك ي امجد بيه.. والله لو علينا ( كمل وهو بيبص لاخته) احنا طبعا موافقين مش هنلاقي احسن منكوا نناسبه اكيد فارس بضيقه من ابوها- لا مش كفايه رايكوا الاهم هو راي رهف ده قرارها وحياتها هي امجد = طيب انا بقول تشربوني قهوه ف البلكونه كده ونسيب الولاد مع بعض شويه
حازم- اكيد طبعا اتفضل *قام امجد وابوها متجهين للبلكونه وعمتها راحت تعمل القهوه.. اما فارس ف قام وقرب من مكان رهف وقعد قصادها وهو بيبصلها ف صمت.. اتوترت رهف اكتر من حركته وهي قاعده مش مستوعبه اللي بيحصل ولا فاهمه هتروح لفين* – ها يستي ايه رايك رهف ببلاهه= انا مش فاهمه حاجه – مش فاهمه ايه عريس وجايلك = بس انت كنت بتوصلني انبارح مقولتليش.. وبعدين جاي تتقدملي ليه
– يستي كنت عاملهالك مفاجأه.. اما بالنسبه لجاي اتقدملك ليه بصراحه معنديش إجابه دلوقتي *سكتت رهف للحظات بتفكر هتعمل ايه لكن ف النهايه قررت تنفذ خطتها وتحكي الصراحه* -الووو ايه روحتي فين = ها لا هنا اهو – سرحتي ف ايه =بص انا عايزه احكيلك ع حاجه – ياريت قولي *حمحمت رهف بتوتر وقلق وحكيتله باختصار شديد قصه حياتها وسط ملامح فارس الحزينه عليها والمصدومه احيانا من عمتها وابوها بس محكتلوش ان عمايل ابوها سببتلها ألم وعقد نفسيه وانها بسببه مش عايزه تتجوز.. بس فهمته انها مش جاهزه لجواز دلوقتي*
*ولأن فارس ذكي وعشان مبرراتها لرفضها وانها مش جاهزه تتجوز مأقنعتوش ووشها اللي قلق وخاف لما طلب منها رقمها ومحاربتها انها تفضل سنجل قدر يفهم حقيقه رفضها* *بلع ريقه وهو مش عارف يعمل ايه ولا هيخليها توافق ازاي لان جده شرط عليه ان مفيش مجال للرفض وانها لازم توافق* *جتله فجأه الفكره واتكلم بحماس شديد خلى رهف تنتبهله*. – طيب انا عندي حل = قول – بصي انتي عشان كنتي صريحه معايا وحكتيلي انا كمان هكون صريح معاكي
=…. – بصراحه انا كمان مش راضي عن وجودي هنا.. انا بحب بنت اسمها مريم بقالي سنتين لكن جدو مبيحبهاش ومقتنع انها مش كويسه ومش مناسبه ليا ووهماني انها بتحبني عشان فلوسي والكلام ده كله عشان كده قرر يشوفلي عروسه ولانه بيحبك جدا وع طول بيشكر فيكي شايفك انك المناسبه =طب انت ليه مدافعتش عن حبك وحاولت تفهمه او تعمل اي حاجه ضحك فارس بسخريه وقال – يعني تفتكري معملتش كده.. انا حرفيا غلبت معاه وهو مصمم ع رايه
وانا اللي ضحيت ف الاخر بسبب تعبه فجأه زي مانتي عارفه الدكتور قال انه يبعد عن اي حزن وقلق وتوتر وكل ده.. ولما بتكلم معاه ف الموضوع وضعه بيسوء ف مفيش بإيدي حاجه.. انا مليش غيره ومش هقدر اتعبه بسببي = طيب وايه الحل – بصي يستي ركزي معايا واسمعيني للاخر متقاطعنيش الحل اننا نتجوز *اتصدمت رهف من كلمته وغصب عنها قالت* = ياريتك مافكرت هو ده الحل – يستي قولتلك متقاطعنيش اهدي ع رزقك
هنتجوز اه بس مش حقيقي بمعنى بالنسبالهم احنا متجوزين لكن بيني وبينك احنا ع الورق بس فهمتي =اممم كمل – منها هترتاحي م اللي انتي فيه وتسدي بوق عمتك ومنها اريح بردو جدي لحد مايخف = اه وبعدين – ولا قبلين هما بالكتير 5 شهور ولا حاجه ونطلق والسبب مثلا اننا مش متفقين او مش عارفين نعيش مع بعض هنشوف ساعتها = وانت بقا متخيل اني هوافق ع الهبل اللي بتقوله ده
-……. = اتجوز بالطريقه دي عشان ارتاح من عمتي وزنها متاكد ان ده حل مش هلاوس – لا حل وحل حلو جدا ع فكره = حلو من انهي ناحيه قول اتجوزنا وال 5 شهور عدوا منا هرجع تاني ساعتها بقا ابقا مستحمله زن عمتو واستحمل كلام الناس اني مطلقه مش كده .. انت بتفكر ف نفسك بس – اهدي بس ووطي صوتك حد يسمعنا
يبنتي مانتي بعد مانطلق هيبقا سهل انك تشوفي شقه تقعدي فيها لوحدك مش هتقولك لا وبعدين انتي مستفاده زي مانا مستفاد ع فكره وكمان هترتاحيلك وقت كبير من الهم اللي انتي عايشه فيه فكري فيها هتلاقي حاجات كتير حلوه من الفكره ومظنش ساعتها عمتك هتقعد تزن عليكي تتجوزي تاني انتي جربتي اهو ومفلحتيش وعرسانك هيقلوا شويه وبعدين لو رفضتي يعني مانتي هتدبسي بقا ف جوازه بجد وعمتك مش هتسيبك ع حسب كلامك غير انك هتساعديني ف اننا نحاول نخفف ع جدو ويخف بسرعه انا عارف انك بتحبيه وبجد انتي لو موافقيش هو هيتعب جامد م الزعل لانه متعشم فيكي جدا وبيحبك
5 شهور مش هيأذوكي ف حاجه بس فكري *اتنهدت رهف وهي بتفكر ف كلامه اللي شبه اقنعها وقالت* = طيب سيبني افكر – براحتك بس متتاخريش يوم بالكتير = يومين وهرد عليك – تمام.. بس يعني انا بجدد طلبي وعايز رقمك اكيد هتحتاجيني اليومين دول وانا كمان ممكن اعوز اقولك حاجه *سكتت رهف شويه وقالت* =ماشي.. هات فونك *دخلت عمتها عليهم* -ايه يولاد خلصتوا فارس = ايوه يطنط – طيب هروح اناديهم
بص فارس لرهف وابتسملها – صدقيني مفيش حاجه تقلق فكري كويس بس واكيد متجبيش سيره لحد = حاضر *دخلوا كلهم وقعدوا سوا* امجد لرهف – ايه يحبيبتي رايك ايه رد ابوها= اكيد طبعا موافقه هو ده فيه كلام اتكلم امجد بحده- ي استاذ حازم انا بسال البنت سيبها هي ترد – قوليلي يحبيبتي اتكلمت بخجل وتوتر ووشها للارض= والله يا استاذ امجد انا موافقه مبدئياً بس انا كنت عايزه يومين بس استخير ربنا عشان اطمن اكتر
*ابتسم فارس ابتسامه عريضه من ردها واتكلم جده* =ع راحتك يبنتي ربنا يبارك فيكي.. طيب احنا هنستأذن بقا وهنستنى رأي رهف كمان يومين حازم- لا والله ماينفع لازم تتغدوا معانا عيب تمشوا كده =شكرا يحازم دايما عامر احنا سبقناكوا عمتها- طب انتوا ملحقتوش ريحوا شويه م المشوار =تسلمي يست صفاء مره تانيه بإذن الله عن اذنكوا *اتجه امجد للباب وفارس قبل ما يلحقه بعت ابتسامه لطيفه لرهف كأنه بيطمنها ومشي ورا جده*
*دخلت رهف اوضتها وسابت ابوها وعمتها برا بيزنوا ان قد ايه معاهم فلوس ومتريشين.. دخلت وقعدت ع طرف سريرها بتفكر ف اللي جاي قاطع شرودها دخول عمتها وهي بتقول* – والله ووقعتي واقفه يبت يرهف لو اعرف ان رفضك للعرسان القدام هيوقعك ع ده مكنتش اتكلمت معاكي ربع كلمه( كملت بغمزه) وقعتيه ازاي ده يبت هه =عمتو ممكن تخرجي وتسبيني ف حالي – هتتفرعني من دلوقتي طب استني لما تتجوزوا
*مردتش رهف عليها.. وقامت عمتها تطلع لكن لحقتها رهف بسؤال* – هو اخوكي مشي. =ايه اخوكي دي يبت.. ع العموم مشي اه كنتي عايزه حاجه – لا هعوز منه ايه *خرجت عمتها وسابتها* *قالت رهف ف سرها* حتى مدخلش يطمن عليا بعد شهور مشافش وشي فيها معرفش ازاي ده بني ادم.. اللهم لا اعتراض ع قضائك يارب استغفر الله العظيم *قامت رهف تتوضى وتصلي استخارتها يمكن يرتاح قلبها وعقلها من كتر التفكير والحيره دي.. خلصت صلاه واتجهت لسريرها شارده ف افكارها وحياتها اللي اتشقلبت ف يوم وليله استسلمت لنومها وراحت ف النوم*
-ماما! وحشتيني اوي يماما اوي انا تعبانه من غيرك =حقك عليا يحبيبتي ربنا بيعوضك وقلبك هيرتاح قريب -يعني اعمل ايه يماما انا محتاره ومش عارفه اخد قرار =اتكلي ع الله يرهف اتكلي ع الله يبنتي وسلميها لله. *صحيت رهف فاجاه وهي مرتاحه وفرحانه انها شافت مامتها ف حلمها وثانيه واذان الفجر اذن* *فهمت رهف الرساله وقامت تصلي.. وبعد ما خلصت مسكت فونها ولقت رسالتين واتس* – ازيك ي رهف انا فارس
=الحمد لله اهلا يفارس ازيك *شويه ورد عليها* – الحمد لله بخير.. انتي لسه منمتيش. =لا نمت وصحيت ع صوت الفجر -موصلتيش لقرار =بصراحه وصلت -طب ايه قولي *قعدت تكتب كتير وتمسح وتفكر اخر مره وهي متردده* – ها يرهف = بص يعني هو انا قررت اسلمها لله و أوافق *ابتسم فارس بفرحه* – بجد يرهف =اه – انا عمري ماهنسالك الجميل ده بجد =مش جميل ولا حاجه وزي مانت قولت انا بردو مستفاده
– شكرا يرهف = العفو يفارس -طيب اسيبك تنامي بقا واشوفك بكره = بإذن الله .. تصبح ع خير – وانتي م اهله *نامت رهف وهي مش عارفه احساسها ايه هل مرتاحه ولا خايفه بس المهم حاسه انها ماشيه صح* *قفل فارس فونه وهو مبسوط انه اخيرا وافقت بس حاسس انه ناسي حاجه وقال* =ينهار ازرق.. مريمممم ____________________________ مُنيره سيف 🤍 ✨ اولى كتاباتي شكرا جدااااا ع رأيكم القمر ده بجد 💕
بعتذر ع اي خطأ لغوي او كتابي 🤍رممت حطامي .♥️ بارت 4 =ينهار ازرق.. مريمممم ____________________________ *تاني يوم صحيت رهف ووصلت شركتها* *وامجد قرر يرتاح كام يوم وفارس يتولى امر الشغل* *ف المكتب عند فارس* – الو ي ادهم ممكن تجيلي عايزك ف موضوع مهم =دقيقتين واكون عندك *راحله ادهم وابتدى فارس يتكلم* – انا عارف ان انت ليك ف شغل الهكر والمواضيع دي.. وبصراحه انا عايز اهكر فون مريم
= مريم! اشمعنا -انت عارف مدى كره جدي ليها وهو حذرني منها وبيقول ان هي وهماني بحبها والبنت مش كويسه وكلام كتير كده ف الاول انا مكنتش عايز اصدق كلامه بس لوهله قولت وليه لا ما اطمن – واشمعنا الهكر =بصراحه كذا مره وهي معايا حد يرن عليها ويبان عليها التوتر بس بتحاول تخبيه وكمان مبتدنيش اي فرصه امسك فونها او اشوف حتي مين بيرن بس انا مكنتش بدي اهميه للموضوع بس بصراحه كلام جدو فوقني وزرع الشك جوايا ف عشان كده قولتلك
– طيب يحبيبي اديني بيانتها بس وانا هتصرف واجبلك خلاصة اللي ع الفون =حاضر هبعتلك كل حاجه شكرا ي ادهم بجد – ماتبطل بقا يالا انت *فارس بضحك* = حاضر يخويا انت مبتحبش حد يحترمك ابدا *سابه ادهم وراح يكمل شغله ويفكر هيعمل ايه ف موضوع فارس* *افتكر فارس رهف وقام يشوفها* *خبط فارس بخفه ع باب مكتبها* – اتفضل *فارس بمزح* =ازيك يخطيبتي *خفق قلب رهف م الكلمه وقالت بتوتر*
=الحمد لله بس لسه مبقتش خطيبتك – مانتي هتبقي إن شاء الله *افتكرت اتفاقهم واتحولت ملامحها لضيقه خفيفه بس فارس قدر يلاحظها اتكلمت ولسه وشها ف الارض* =بس حتى لو حصل مش هبقا خطيبتك بجد *سكت فارس لوهله وبعدين قال* -الموضوع مضايقك اوي كده *رفعت رهف راسها وبصتله* = اكدب لو قولتلك لا.. بس هو الطبيعي يضايقني يعني لاسباب كتير – طب احكي الاسباب *رجعت رهف راسها للارض واكتفت بالسكوت*
=بستغربك اوي ليه بتكتمي ف قلبك وتسيبي نفسك للحزن لما ممكن تحكي وتفتفضي مع اي حد وترتاحي – يعني عادي متعودتش احكي واتكلم ومكنش عندى حد يسمعني ف اكتفيت بسكوتي وبعدين الكلام مش هيغير حاجه .. مفيش حد بيختار العذاب لنفسه – شكلك وراكي كتير.. بس تفائلي مهما طال التعب الفرج جاي وربنا شايفك وبتؤجري ع كل زعل بتشوفيه *بصتله رهف وابتسمت ابتسامه ممنونه* -شكرا ي فارس =العفو يرهوفتي
*سابها وخرج وسط صدمتها واستغربها من ياء الملكيه اللي ضافها لأسمها وكانها خلاص بقت بتاعته لواحده.. سابها سرحانه مش فاهمه ايه اللي بيحصل حواليها بس هي مرتاحه* *خلص اليوم وكانت رهف بتتجنب انها تشوف فارس او تكلمه وروح كل واحد ع بيته* ____________________________ *ف بيت رهف دخلت عمتها عليها وقالت* – ها يرهوفه نكلم الناس ونبلغهم بموافقتك = معلش يعمتو عندي سوال – اسالي يحبيبة عمتك = هو ايه الحب اللي نزل عليكي فجأه ده خير هيجرالك حاجه قريب
*رجعت ملامح عمتها من اصطناع الحب لعدتها* -تصدقي انتي بنت كلب وانا غلطانه = حصل يعمتو – اخلصي يبت عشان اكلم الناس = ع اساس يهمك رايي اوي – لا يروح امك بس الناس مهتمه برايك كده كده غصب عنك هتوافقي ف خلصينا بقا. = موافقه يعمتو روحي بلغيهم بقا وحلي عني *انشكحت عمتها ورقعت زغروته سمعت بيها عمارتهم* عمتها – الو ايوه ي حازم البت وافقت كلم الناس يخويا وبلغهم وشوف هييجوا امتى للاتفاق
حازم = بجد طب كويس.. هكلمهم واقولك الميعاد – ماشي يخويا سلام سلام سلام سلام( عاده مصريه اصيله ) ____________________________ *ف الڨله عند امجد* -الو ياحازم خير يارب يكون عندك اخبار كويسه =طبعا كويسه البت وافقت ومنتظرين الميعاد اللي هنتفق فيه – لا ده انت اللي تحدده احنا كده كده جاهزين لو عايز بكره مش مشكله نيجي =طب ياريت والله تنورنا انا عن نفسي موافق. – تمام يبقا نيجي بكره.. بس ياريت تبعتلي رقم رهف عايزها ف كلمتين
=حاضر ي استاذ امجد حالا *قفلوا وحازم بعت لامجد الرقم* امجد- الو يرهف = الو مين حضرتك -انا امجد يبنتي = استاذ امجد اخبار حضرتك ايه – الحمد لله يحبيبتي.. انا بس رنيت اطمن فعلا الاخبار الحلوه اللي سمعتها من بابا دي صح انتي وافقتي = اه صح – طيب لو حد ضاغط عليكي يحبيبتي قولي ولو انتي مش عايزه متتكسفيش *استغربت رهف من سؤاله وقالت* = لالا والله مفيش حاجة من دي ليه بتقول كده
– عادي يبنتي بطمن = لا اطمن ي استاذ امجد – لا استاذ ايه بقا.. خلاص انتي ناديني ب جدو *ضحكت رهف واستغلت الفرصه لان من اول مااشتغلت وهي بتحبه جدا بسبب معاملته معاها واتمنت يكون ف صلة قرابه بينهم* =ده عيوني والله يجدو – طالعه من بوقك سكر.. انا اتفقت مع بابا ان احنا جايين بكره نتفق ع الخطوبه والجواز وكده =تنوروا نورك يحبيبتي.. اشوفك بكره بإذن الله – إن شاء الله يجدو
*ابتسم امجد من كلمتها وقفل مع دخول فارس* – ايه يجدو بتكلم مين =رهف.. اخدت ميعاد من باباها بكره هنروح نتفق – ايه السرعه دي يجدو براحه شويه طيب =يبني خير البر عاجله جهز نفسك انت بس -حاضر يجدو *مشي فارس ع اوضته بحزن وكسره وهو بيفكر ف كلام ادهم اللي صدمه وبيفتكر الحوار* ✨فلاش باااك✨ – ايه يا ادهم الاخبار =بصراحه يفارس غير مبشره بالمره *ملى القلق وش فارس واتكلم بتوتر*
– ليه كده =انا قدرت اهكر الفون كله ودخلت ع كذا حاجه بس اللي لقيت عليه البلاوي كلها الواتس. – بلاوي ايه = لقيتها مثبته شات باسم Baby لما وقع عيني ع الاسم قولت يمكن انت بس للاسف صوره البروفايل صدمتني ف دخلت وقلبت ف الشات وبعد تدوير كتير طلعت بكام معلومه مهمين هما اللي فيهم البلاوي كلها -طب ها ي ادهم كمل = اسمه محمد واكيد م الاسم بتاعها علاقتهم باينه ع قد ما الموضوع اكيد يقهر.. بس المشكله للاسف مش هنا.. انت معايا ي فارس
-كمل = طب ممكن اسكت هنا وتهدي شويه واكمل *قال فارس بنبره عاليه شويه* – كمل يادهم =طيب هو محمد ده طلع يعرفك وعارف علاقتكوا ببعض وزي ماقال جدك البت وهماك فعلا ووخداك عشان فلوسك ونيتها كانت تتجوزوا وتكتبلها كام حاجه باسمها وتطلق منك وفوق كل ده اللي مايتسمى بتاعها كان بيشجعها ع كدهده خلاصه اللي قريتوا ف الشات *وقع الكلام ع دماغ فارس واتصدم صدمة عمره.. مر كل اللي بينهم ف دماغه بس وهو بيستوعب ان ده كله كان كذب قام وسط صدمته وحس انه عايز يروح ويقفل باب اوضته ع نفسه ويحاول يستوعب براحه*
= رايح فين يفارس – مروح =طب اهدى بس واستني اوصلك – انا كويس ي ادهم متقلقش بس عايز ابقا لوحدي معلش =ع راحتك يحبيبي بس هون ع نفسك هي متستاهلش زعلك – انت اكيد معاك اسكرينات للشات وصورة الواد ابعتهملي =حاضر.. خلي بالك ع نفسك *هز فارس راسه بإيجاب وهو بيطلع م المكتب عشان يروح* ✨باااك✨ *دخل اوضته وفرد جسمه ع سريره وهو بيتالم كأنه واخد علقه موت واتكلم بخفوت*
= معقوله كل ده كان تمثيل ازاي قدرت تعمل كده اه يبنت الكلب إن ماوريتك مبقاش انا فارس الصاوي *افتكر فارس انه مقالش لمريم ع موضوع رهف وعرف هينتقم منها ازاي* فارس- الو رهف = ايوه ي فارس خير ف حاجه – انا اسف اني رنيت ف وقت متاخر بس حاحه ضروريه =ولا يهمك قول – احنا جايين بكره.. عرفتي؟ =اممم -طيب ركزي معايا =ها -انا هاجي اتفق ع جواز مش خطوبه
= نعم لا بقا انت كده بتهزر هو كل شويه تطلعلي بقرار ف ايه ب *قاطعها ادهم بسرعه* – بس بس بس بس ايهههه مجاري وطفحت ماتهدي يست وتسمعي = اسمع ايه هو انت بتقول حاجه تتسمع كله كلام متهور والمشكله بتقنعني وبتعمل اللي بتقول عليه – طب بس اسمعيني للاخر = ارغي – ارغي.. دانتي ايامك معايا زي وشك = لا نتعدل ف الكلام اخلص قول عايز ايه اما نشوف اخرتها
-طيب احنا كده كده هنتجوز دي متفقين عليها ف ليه بقا نعمل خطوبه ويبقا 5 شهور خطوبه ولا سنه وفوقهم 5 شهور جواز ليه بقا هنطول اوي كده = اممم عندك حق -اهو شوفتي =شوفت -يعني موافقه =مش عارفه – ايه البلاهه اللي عندك دي ماتخلصي يبنتي =بقولك ايه هي كده كده خربانه اه موافقه – هو ده الكلام = بقولك ايه متبقاش تاخد رأيي ف حاجه تاني اللي انت عايزه اعمله
*فارس بنبره خبيثه* – طب حلو ده قد كلامك؟ *اتوترت رهف من سؤاله ونبرة صوته الخبيثه فاجاه* = ااا قصدك ايه يعني -يستي ولا حاجه الله = طيب يلا عن اذنك عشان انام – ماشي يحب = حب ف عينك ولا اتعدل – ع فكره انتي خدتي عليا اوي وخدي بالك هزعلك = والله تستاهل لو لميت نفسك هلم نفسي – يلا يبت سلام = متقولش بت يجدع انت *قفل ف وشها السكه*
*رهف ف اوضتها* – ينهارك ازرق بتقفل ف وشي السكه.. شكلك انت اللي هتشوف ايام زي وشك معايا ____________________________ مُنيره سيف .♥️ اولى كتاباتي 🤍 شكرااا جدا ليكوا بجد♥️♥️♥️♥️رممت حطامي .♥️ بارت 5 *تاني يوم جه* *وصل امجد ومعاه فارس لبيت رهف استقبلهم حازم استقبال جَلٌل ومنتظرين دخول رهف* *رهف ف اوضتها بتكلم نفسها* – انا مش عارفه اللي بيحصل ده صح ولا غلط بس لو غلط هصلي استخاره واحلم الحلم ده ليه .. طب اعمل ايه اطلع اطردهم
طب اطلع اقول مش موافقه وافتح عليا ابواب جهنم من عمتي وغير كده دانا ممكن اترفد م الشركه هو كان قرار زفت زي عادتي *كملت رهف بقله حيله* انا هسمع كلام امي هي قالتلي اتكلي ع الله انا هتكل ع الله اصل كده كده لو مش هو ف هيبقا ف غيره وجوازه بجد بقا المرادي *دخلت عمتها اللي سمعت تمتمات كلامها* – ايه للدرجادي فرحانه بتكلمي نفسك =هما جم – مستنيينك بره يلا
*خرجت رهف مسلمه امرها لله* رهف- السلام عليكم كلهم ردوا = وعليكم السلام ورحمة الله وبركاته حازم – تعالي يعروسه اقعدي امجد= طيب كلنا موجودين اهو.. نتفق بقا عمتها – اكيد طبعا نتفق امجد=حلو اوي.. النهارده الاتنين مش كده حازم- مظبوط = طيب انا بقول ع يوم الجمعه بإذن الله نتم الخطوبه صفاء عمتها – ايوه ي امجد بيه بس لسه ف اتفاقات تانيه قايمه مؤخر دهب كده
امجد = لالا متقلقيش خالص مش هنختلف ابدا ع الحاجات دي وبالنسبه لمجايبكوا ومجايبنا ف احنا مش عايزينكوا تجيبوا اي حاجه كده كده هما هيقعدوا ف الڨله معايا اكيد مش هتسبوني لوحدي ولا ايه يرهف رهف-اكيد طبعا ي استاذ امجد ده انا اتمنى امجد = تااااااني استاذ وبعدين معاكي بقا *ضحكت رهف بلطف* -جدو.. جدو امجد *ضحكوا كلهم واولهم فارس* فارس= انا اسف يجدو ع مقاطعتك بس بصراحه انا كنت عايز حاجه
امجد- قول يبني *بصوله كلهم بإستماع إلا رهف كانت عارفه هيقول ايه* فارس=طيب انا كنت بقول يعني لو نخليها كتب كتاب ع طول وبعد كام يوم نعمل فرح *عدت لحظات عليهم ف زهول وبالأخص امجد اللي مكنش فاهم حفيده من رفص تاام لكتب كتاب مره واحده* حازم- والله انا شخصياً موافق *بصتله رهف بنظره من كتر كرهها بس ف نفس الوقت ابوها النظره متفهمتش هي عتاب ولوم ولا كره وقرف*
كمل حازم وهو باصص لاخته= ايه رايك عمتها وهي بصالها- انتي ايه رايك يرهف *وكانت سرحانه ف وادي تاني وان اللي مصبرها ع ده كله حلم امها وانها حاسه انه خير ومرتاحه.. غير كده هي ف حاله من عدم الفهم والوعي كبيره ومش عارفه اللي بيدور حواليها ده صح ولا غلط فاقت من شرودها ع صوت* فارس= رهف رهف – اممم.. معلش اسفه سرحت بس فارس= طيب عمتك بتسالك عن رايك
رهف بصت لعمتها – ف ايه عمتها = ف كلام فارس يبنتي.. ف الجواز رهف- اه اه مفيش مانع *استغرب امجد جدا من موافقتها وحس ان فيه حاجه غلط بس فضل السكوت اما عمتها وابوها كانوا فرحانين بالنسب اللي يشرف و انهم هيخلصوا منها ف مركزوش ف ان موافقتها غريبه* فارس_ طيب لو تسمحلي يعني يجدو.. انا بقول ان كتب الكتاب يكون الاربع والفرح يبقا الجمعه زي ماقال جدو عمتها بضحكه خبيثه = بس يبني كده مش هنلحق نجيب حاجات العروسه
امجد – لا لو دي المشكله ف اللي تلحقي تجبيه هاتيه والباقي رهف تبقا تجيبه ع راحتها مش مشكله *اتفقوا وقرأوا الفاتحه ع اتفاقهم كتب الكتاب الاربع والجمعه الفرح بس الفرحه مدخلتش قلب رهف اصل هتجيلها منين* *روح فارس وجده بس جده ف دماغه تساؤلات كتير وقرر يتكلم مع فارس ويفهم منه* امجد- بقولك يفارس فارس= ايه يجدو – مش شايف ان موافقه رهف ع موضوع الجواز ده غريبه شويه
*بلع فارس ريقه وقلق من سؤال جده وخاف اتفاقهم يتكشف* فارس بإصطناع الامبالاه= لا غريبه ف ايه امجد-ازاي بقا.. ده البنت حتي مفكرتش كأنها متسستمه ع الموافقه فارس بتمثيل= انا بالنسبالي شايفها مش غريبه جده- اقنعني يعبقري فارس=اصل يجدو مين هيحب يعيش وسط ناس زي ابوها وعمتها اكيد ماصدقت تخلص منهم يعني جده – والله وجهة نظر بس مش عارف اقتنع حاسس ف حاجه تانيه فارس بتوتر حاول يخبيه= مظنش حاجه تانيه زي ايه
امجد- مش عارف بس كله مع الوقت هيبان .. يلا يلا روح نام فارس بهروب = حاضر يجدو.. تصبح ع خير امجد بمزح – وانت م اهله يعريييس *دخل فارس اوضته وبرغم كل احداث اليوم ف بردو مقدرش ينسى حزن قلبه من ناحية مريم* *فكر يكلمها ويواجهها بس رجع ف قراره لما اقتنع ان اكيد مش هييجي بفايده مع واحده زي دي وقرر ينسى ويعدي بس وجعه وكسرة قلبه وغشه طول الوقت ده مسمحلوش انه يعملها*
*ف قرر يكمل ف اللي بدأه ويحرق دمها ويبوظ كل اللي رتبتله وتبقا هي اللي خسرانه مش هو* ____________________________ *رهف ف اوضتها عقلها وقف عن التفكير واستيعاب اللي بيحصل وقررت تنام وتسيب كل حاجه تمشي زي ما الدنيا عايزه واكيد اللي جاي مش هيكون اوحش م اللي شافته* ____________________________ *تاني يوم بعد ماوصلت رهف الشركه واستقرت حالة امجد ورجع الشغل بس فارس كان معاه قرر امجد ان يفهمه تفاصيل الشغل عشان يبقا قادر يدير مكانه بنفس الكفاءه بعدين*
*رهف متجهه لمكتب امجد بإرياحيه و عرفت انه رجع للشغل خبطت وسمعت اذن الدخول* رهف- السلام عليكم امجد وحفيده = وعليكم السلام ورحمة الله وبركاته *اتخضت رهف وهي بتقفل الباب من ثنائية الصوت اللي سمعته وعرفت ان فارس معاه* *اتكلمت بجديه وهي باصه لمديرها ( امجد) رهف- ده جدول مواعيد حضرتك النهارده.. ودي ملفات محتاجين توقيعك عليها امجد= حاضر رهف – عن اذنك امجد = اي ده استني يرهف رهف – ايوه ي استاذ امجد
امجد = الله بردو استاذ *ابتسمت رهف بخفه وقالت* رهف- ماحنا ف الشغل بقا امجد بهزار = ولو بردو جدو.. ولا ارفدك رهف بضحك – لا ع ايه جدو امجد = كنت هقولك ايه.. اه داخله كده مسلمتيش ع خطيبك اللي كلها بكره ويبقا جوزك *احتل التوتر والخجل وشها وتصرفاتها واكتفت بالسكوت ووشها ف الارض* فارس- خلاص يجدو متكسفهاش امجد = طب قوم قوم.. قوم اشربوا قهوه سوا ولا اعملوا حاجه دانتوا جيل مايعلم بيكوا الا ربنا
*ضحكوا كلهم وقام فارس ينفذ كلام جده كانه ماصدق* – طب يلا يارهف بدل مايقيم علينا الحد ضحكت رهف وقالت= يلا *خرجوا الكافتيريا وطلبوا اتنين قهوه* فارس-جدو سالني انبارح عن موافقتك فاجاه وشايف انها غريبه رهف= عنده حق كويس انه مقالش عليا مجنونه فارس_ للدرحادي رهف= اكيد يعني ف الخطوبه فكرت يومين وصليت وف الجوااز أوافق ف نفس الدقيقه *هنا ايقن فارس ان الموضوع فعلا مش منطقي* فارس- طب وبعدين
رهف= ولا قبلين.. انت قولتله ايه – بصراحه قولتله انه طبيعي عشان تبعدي عن قرف البيت وكده رهف= واقتنع فارس- هو قال ممكن بس لسه حاسس ان فيه حاجه غلط.. انا قولت اقولك عشان لو سالك تقولي نفس الكلام رهف بقلة حيله=حاضر فارس- مالك =مفيش حاجه – لا بجد مالك شكلك اصلا تعبان كده.. بتفكري ف ايه = والله انا اصلا مش عارفه افكر – اشمعنا =دماغي وقفت م اللي بيحصل ده مش عارفه استوعبه فاهمني
*سرح فارس وافتكر مريم وانه هو كمان مش قادر يستوعب* فارس-فاهمك جدا رهف= انت كمان كده فارس – اه.. اه يعني شويه رهف = هو مفيش حل تاني غير كده – بصراحه انا مفكرتش بس هو جدي شرط كده ده واديكي شوفتي صحته اتحسنت ورجع الشغل وكمان مظنش ف حاجه ينفع نعملها ( كمل بضحكة سخريه) احنا كتب كتابنا بكره *سكتوا للحظات كل واحد فيهم ف وادي* اتكلم فارس= انتي اصلا ايه نزلك الشغل مش المفروض بتجيبي حاجتك بقا واللي هتلبسيه بكره وكده
*حطت رهف ايديها ع دماغها* -ينهار ابيض انا نسيت اعمل حساب كل ده = برافو.. وبعدين _ اكيد هجيبهم لسه ف وقت *بصت ف ساعتها* =الساعه 5 هلحق اكيد _طب استاذني من جدو وانزلي = هروح اعمل كده *مشيت رهف ف اتجاه المكتب وصلت وخبطت ودخلت بعد إذن الدخول* -استااذ.. ( كملت بابتسامه) قصدي جدو = ايوووه كده.. قولي – كنت بس محتاجه اخد نص اليوم اجازه عشان انا معملتش حسابي ف حاجات بكره وعايزه انزل اجيبهم
= حاجات ايه _ يعني دريس وكده لبكره = اه اكيد.. هتروحي لوحدك – اه = لا استني اكلم فارس ييجي معاكي لحقته رهف – لا ملوش لزوم انا هنزل بسرعه اجيبه = اكيد لا ده واجب عليه.. استني *رهف لنفسها كان لازم يعني اقول هجيب ايه ما هاخد اجازه وخلاص يووووه* – ايوه يفارس.. تعالي عايزك *بعد دقايق* =ايوه يجدو – رهف نازله تشتري حاجات انزل معاها يلا ووصلها بعد ماتخلص
*سكت فارس لوهله بعدين اتكلم* = حاضر يجدو.. يلا يرهف امجد- روحي يرهف هاتي شنطتك ودقيقه وفارس جاي وراكي *خرجت رهف م المكتب واتكلم امجد* = انت كتت هتسيبها تنزل لوحدها تشتري – اه بجدو عادي فيها ايه = فيها كتير يبني متبقاش عبيط ازاي يعني هتنزل لوحدها.. يحبيبي هي مسؤوله منك دلوقتي وانت ملزم بكل حاجه تخصها ورجلك ع رجلها بعد كده ف مشاويرها.. انتوا مش متجوزين عشان كل واحد يعيش لواحده لا اتشاركوا الحياه سوا وشيلوا مع بعض هتلاقوا الدنيا بقت خفيفه وبقت احلى وتتعاش افهم بقا
– يسلام عليك يجدو ايه الكلام ده بس = اهو ده اللي فالح فيه لكن تعمل بيه لا – لا والله يجدو هعمل عيوني = طب يلا اجري زمانها خلصت م بدري – حاضر *راح فارس لرهف* = ايه يرهوفتي خلصتي – استغفر الله العظييم = ف ايه بس – اسمييي رهفف = طب ومالك متضايقه ليه.. كل ده عشان بدلعك – لا متدلعنيش.. اسمي رهف هااا رهفف – حاصر يرهوف.. قصدي يرهف
*بصتله رهف بغيظ ومشيت قدامه* *وصلوا العربيه وركبوا* -انت بقا هتوديني فين = والله مانا عارف *ابتدت رهف تشرحله طريق المول اللي هتشتري منه حاجتها* *وصلوا وابتدوا رحلة الشوبينج المحببه لرهف واللي بسببها فارس بيتمنى لو كان تكييف* رهف – كده احنا جبنا الهيلز والشنطه والميكب اللي ناقص فاضل اهم حاجه.. الدريس =وبعدين – مش عايز حاجه صح نجبها بالمره =ياريت – طب ماتقول = الصحه والصبر وطولة البال – امممم. لا دول ابقا فكرني ادعيلك بيهم ف القيام
*ضحكوا الاتنين واتكلم فارس* =طب الله يخليكي ناكل لقمه ونكمل – لما نخلص بقا وخلاص = لا بقولك ايه انا عطلت مش قادر – طيب خلاص خلاص انت هتشحت.. يلا يسيدي اتكلم فارس بكلام مش مسموع= ناس مش بتيجي الا بالعين الحمره رهف- بتقول ايه -لا ولا حاجه يرهوفتي.. بقول اخيرا هناكل = اسمي زفتتت – اوكي يزفت *بصتله رهف بعصبيه وكملت مشي لحد ماوصلوا للمطعم وطلبوا الاكل* = ها كلت يلا بقا خلينا نخلص
– يبنتي اهدي بقا انتي جايبه الصحه دي كلها منين = صحة ايه هو احنا عملنا حاجه اصلا.. هتقوم ولا لا – قااااايم.. قااايم *وصلوا ودخلت رهف ووراها فارس* *نقوا كذا دريس ودخلت رهف تقيس وكانت بتطلع تاخد راي فارس* = ها حلو؟ -لا = ايه الدبش ده -يلا غيريه =ده -نص نص =طب ودهه -لا ف احلى = مش باقي غير تلاته جوه – طب قيسي يستي انتي خسرانه حاجه
= هااااا – بصي يعني.. لالا غيريه = احضر بالبيجامه؟ – ياريت = هو ايه اللي مش عاجبك فيهم – يا ضيق اوفر يا مفتوح اوفر يا اصلا هو اوفر =والله انت اللي اوفر *دخلت رهف وهي بتقول ف سرها كان يوم شبه وش عمتي لما جيت معايا* = هاااااا – لا بصي انا نقيتلك واحد اركني بقا كل دول وقيسي ده هيطلع تحفه انا متأكد *لبست رهف الدريس وطلع فعلا تحفه كانه عارف ايه هيليق عليها وايه لا وخرجت تشوف رأيه وهي ساكته المرادي*
=….. * بعد لحظات من سكوت فارس لما شافها قال* _ الصمت ف حرم الجمال جمال *خجلت رهف وقفلت الباب تاني تغير اتكلم فارس م بره* = يبنتي استني طيب ابص تاني يمكن ميعجبنيش – لا حلو عجبني انا دي كفايه *ضحك فارس ع كسوفها وطلع يستناها ع الكاشير اللي كل مره يقعدوا يتخانقوا بصوت واطي عشان مين يدفع وف الاخر هو اللي بيدفع* = ها يستي مرضيه – اممم.. جداا
= طيب الحمد لله _ فارس *بصلها فارس بلطف وإنتباه وهو سامع اسمه منها بطريقه الطف من ابتسامتها* اتكلمت رهف ببعض من الخجل- يعني كنت عايزه اقولك شكرا = ع ايه بس – ع لفك معايا وتعبك ده = يستي ولا تعب ولا حاحه -….. =وبعدين انتي كلها بكره وتبقي مراتي *سكتت رهف وبتحاول تسكت مشاعرها المتلخبطه من خوف وقلق وتوتر وكمان خجل وشويه استلطاف هي مش عايزه تعترف بيهم عشان مينفعش*
*وصلوا للعربيه وركبوا* *رن فون رهف وطلعت عمتها* رهف – يارب ماتنكد عليا فارس = مين رهف – عمتو.. استنى هرد – الو يعمتو = فينك ميعاد شغلك عدى عليه ساعه ونص ولسه مجتيش – معلش يعمتو كنت بشتري حاجات لبكره = حاجات ايه -الدريس يعمتو وشويه حاجات = طيب يختي خلصي بسرعه عشان متتاخريش بره لوحدك – مش لوحدي معايا فارس = بجد طب كويس.. سلميلي عليه – الله يسلمك يعمتو
*بعد ماقفلوا* رهف = عمتو بتسلم عليك فارس- الله يسلمها =….. – تحبي نروح ف حته =فين -ع البحر محدش مبيحبش البحر – اكيد = طب نيلا – بس الوقت وعمتو = يستي هوصلك انتي معايا *سكتت رهف وحبت كلمة انتي معايا كأنه بيطمنها م غير مايقصد.. بس هي للاسف مش قادره تطمن* *وصلوا ونزلوا يقعدوا ع الصخر مابينهم وبين البحر مسافه مش بعيده الهوا حرفيا يرد الروح قطع سكوتهم صوت حد بيبيع ورد بعيد عنهم شويه*
فارس – بتحبي الورد رهف = اكيد *قام فارس وجابلها ورده حمرا بلون خدودها لما بتتكسف* فارس – اتفضلي *ابتسمت رهف بفرحه واخدتها منه بسرعه .. طول عمرها بتحب الورد بس عمر ماحد هداها بيه* *فارس خد نفس كبير وطلعه بغيظ كانه بيحاول يرمي معاه كل الحزن اللي بقلبه لكن بيفشل* رهف = ف حاجه مضيقاك فارس – لا.. ليه بتقولي كده رهف = مش عارفه بس حسيت فارس – لا مفيش حاجه
*بعد فتره مش كبيره م السكوت* فارس- الاول كنت بحب اجي هنا كل ماابقا مخنوق او حزين متضايق كده.. برمي همومي للبحر وهو مبيقصرش بياخده بعيد عني… بس مؤخراً بقيت باجي وانا فرحان بردو اصل هشاركه احزاني بس بقيت بشاركه الاتنين بقا رهف = طب والمرادي .. جاي مبسوط ولا حزين – بصي مش هكدب عليكي.. بس بجد مش عارف بس حسيت اني محتاج اقعد = طب واشمعنا جبتني فارس بهزار – لا انتي هتقعدي تستجوبيني
رهف بضحك = مش قصدي والله بس مستغربه – بصي انا دايما لما بعوز حاجه بعملها.. مقعدش بقا افكر ف اسباب ومبررات او اتردد لا اللي انا عايزه بعمله رهف = طيب علمني بقا فارس – بس كده ده عيوني والله رهف بخجل = يسلموا فارس – ايه رايك ناخد صوره رهف = اممم.. يلا *خرح فارس فونه واتصوروا صورتين صوره ليهم وهما قريبين م بعض بابتسامه لطيفه وصوره لرجليهم والمايه*
فارس – يلا نروح بقا الوقت اتاخر رهف = يلا *وصلها فارس تحت البيت عكس المره الاولى ودعوا بعض ونزلت رهف ثبت نظره عليها لحد ماطلعت وروح هو كمان* ____________________________ *دخلت رهف البيت ولقت كله نايم راحت ع اوضتها غيرت لبسها واتجهت للنوم وهي بتفتكر احداث اليوم وحطت وردتها ف النوته وكتبت جنبها* *لو بس كنا اتقابلنا بشكل تاني بظروف احسن م غير اتفاقيه ولا كذب بس برغم كل ده مفقدتش فرحه اول ورده
____________________________ *عند فارس ف اوضته باصص لصورتهم سوا وقال بخفوت* – الاكيد اني بظلمك وانتي اصلا شبعانه ظلم بس والله وربنا اعلم بنيتي انا هتجوزك عشان انا عايز ده مش هقول حبيتك ابقا كداب.. انا اه فيا جزء بنتقم من مريم بس الجزء الاكبر اني فعلا عايز كده ليه معرفش يمكن عشان جده وتعبه بس بعد 5 شهور لو لسه عايزه تطلقي زي ماوعدتك هطلقك *اتنهد بوجع لما افتكر مريم واللي عملته وقرر ينام ويبطل يفكر*
____________________________ مُنيره سيف🤍✨ اولى كتاباتي