خدت اخويا الصغير الي بيعيط بخوف ودخلنا جوا الدولاب واحنا خايفين وبندعي إن الخناقه تعدي بسرعه .. صوت كبير بره وزعيق ، صوت صويت ماما الي بتضرب ، وصوت دموعنا ونفسنا الي بيخرج برعب دخلت ماما وهي بتلم هدومنا وهي بتحلف إنها مش بايته فيها ! خرجنا من البيت والجيران بتبصلنا بشفقه واحنا محرجين صحابنا واقفين وكانوا سامعين الخناقه ، روحنا عن بيت تيته ، وهو بيت عيله طلعنا ودموعنا سبقتنا
خرجت خالتو من شقتها وهي بتقول _ يلهوي هو ضربك تاني ؟ ، انتي ازاي ساكتاله ،سيبيله العيال وامشي ، انتي اي الي مصبرك عليه ! وكلام كتير من ده خلت ماما تفكر كذا مره هل تسيبنا هناك وتمشي لحد ما لقيناها بعدها بيوم بتلملنا هدومنا في شنطه صغيره وبتنصحنا كتير زي _ انا مش هسيبكم انا بس هوديكم عشان مش هيعرف يقعد بيكم ، فـ هييجي ياخدني انا بحبكم بس ده لمصلحتنا كلنا يا حبايبي ، اوعي تنسي تكلميني وتطمنيني ، وافضلوا عيطوا وقولوا عايزين ماما اوعو تنسوني ، انا هاجيلكم علطول
وبعتت حد من قرايبنا يودينا واحنا بنتوسلها إننا مش عايزين نروح . ” يعني امك بعتاكوا تلوي دراعي ، طيب انا هوريها ( بس هما بيفكروا في نفسهم ، لي يخلفوا اطفال عندهم عقده نفسيه من الحياه والجواز والمسؤليه ؟ ، لي يخافوا يدخلوا في اي مشاركه ، عدي وقت كبير شهر كامل وهي مش بتسأل علينا ، واحنا هنا عايشين لوحدنا مبناكلش غير لما بابا يجي ، كل واحد بيفكر في نفسه ، طيب واحنا!
، احنا تعبنا والله ، فاكرين إننا اطفال ومش فاهمين حاجه ، بس للاسف احنا فاهمين والله ، فاهمين كم البهدله الي بنتعرضها ، احنا معندناش مكان ثابت ، كل شويه نتنقل من مكان لمكان ، تعبنا وزهقنا وقرفنا ، عايزين نستقر بقي بين اب وام عارفين يعني اي بيحترموا بعض وبيحترموا الاطفال الي بينهم . _ انتي متخلفه ؟ ازاي تضربي زميلتك ، انتي معقده نفسياً