غرام العز بقلم فرح وائل ج٢

#غرام_العز ♥ *كانت كارما تمسك الهاتف في محاوله منها للاتصال ب عز لكي تفهم لماذا فعل ذلك.. وبالفعل رنت اكثر من مره ولكن كانت الاجابه في كل مره ان الهاتف مشغول* كارما:- اوووف رد بقا منك لله سيبت مفاصلي عز:- الو!! كارما:- كل دا مشغول البيه بيحب جديد ولا ايه عز بأبتسامه:- ايه دا مالك في اي كارما:- في زفت علي دماغك سايبني ملطوعه كل دا ومديني مشغول… وكنت مشغول في اي بقا ان شاء الله

عز:-…………. كارما:- ما ترد يا بيه ولا القطه اكلت لسانك عز:- ماهو ارد اقول ايه..وانتي مالك اصلا كنت بكلم مين *ثم تابع بأبتسامه* تصدقي بالله لولا اني عارف انك مش طيقاني كنت افتكرتك غيرانه ولا حاجه كارما:- ولما انت عارف اني مش طيقااك جاي تتقدملي ليه عز:- اتقدملك!! ليه يا عسل اتخبطت في مخي ولا مستغني عن مرارتي عشان اجي اتقدملك!! كارما:- ولما هو زي ما انت بتقول كده..جيت واتقدمتلي ليه عاجبك شكلك كده وانت مرفوض

عز:- يبنتي اتقدم ايييه انا مجتش اتقدم لحد..ثم اني يوم ما هفكر اتجوز هاخدك انتي!!!! بكل عقلك مصدقه دا بجد كارما:- ليه يا حبيبي انت فاكرني بايره ولا اي لا فوق كده دا انت حته بوبع لا راح ولا جه هتعملي فيها عمر الشريف!! ثم انك اصلا مش من نوعي المفضل..انا مش هاخد واحد رياضي بياكل كل يوم اكل صحي..انا عايزه واحد نفطر انا وهو ممبار وكفته مشويه نتغدا محشي وبط نتعشي بيتزا وسوشي

عز:- دا انتو كده هيجيلكو انسداد في الشرايين من اول اسبوعين في الجواز كارما:- انت مالك هي شراينا ولا شرايينك نسدها نسلكها نشوحها مع قرن فلفل وناكلها انت مالك عز:- ايوا يعني انتي بترني عليا عشان تقوليلي خططك المستقبليه مع شريك حياتك يعني ولا ايه مش فاهم كارما:- لا يخفيف الظل.. انا برن عليك عشان افهم حضرتك متقدملي ليه عز:- انا مش فاهم اي اصرارك في انك تتغابي..بقولك متقدمتلكيش اغنيهاالك

كارما:- ماما قالتلي ان في ظابط واسمه عز الدين اتقدملك عز:- وهو مفيش ظابط واسمه عز في الدنيا كلها غيري!! اتكلي ع الله شوفي هتطفحوه اي وفكك مني الله يسترك كارما:- يعني مش انت العريس بجد!! عز:- وانا لو العريس هكدب عليكي ليه اديني سبب مقنع كارما:- ايوا بس انت قولتلي في الماسج اني حليت المشكله… ف افتكرت ان ا… قاطعها عز:- ايوا انا حليت المشكله فعلا بس اكيد مش بالطريقه دي… انا جبت عادل دا وحطيته ساعتين في الحبس طلع فاقد النطق اصلا..ف متقلقيش

كارما:- الله يخربيتك حبست الولا.! دا محامي يا متخلف..حبست محامي..ربنا ينتقم منك يا عز عز:- شش بس كفايه صداع…وبعدين كنتي عيزاني اعمل اي يعني كارما:- ولا حاجه يا عز..ولا حاجه عز:- طيب سلام بقا عشان انتي عطلتيني عن شغلي كارما:- عز عز:- ايوا كارما:- انت فعلا مش انت اللي متقدملي عز:- يشيخه يلعن ابو معرفتك…اقفلي يا كارما اقفلي

»قفل في وشي السكه الحقير المتدني دا…بس مش عارفه ليه اتضايقت لما طلع مش هو اللي متقدملي.. يمكن لو كان جه كنت هرفضه بس اتضايقت لما عرفت انه مش هو العريس مش عارفه اي الاستهبال اللي انا فيه دا الحقيقه ولا انا ماشيه بمبدأ “يمتنعن وهن الراغبات” ولا ايه… بس خساره المز دا يضيع كده والله… تصدقي بالله ما ضاعت الا اخلاقك يا كارما اخرسي منك لله..«

*ذهبت كارما لتستحم وتغير ملابسها لكي تذهب الي ريهام مره اخري..اما والدتها فكانت منشغله بترتيب المنزل استقبالا للشخص الذي سيأتي ويخلصها من ابنتها للابد ( ونعم الترابط الاسري والله يا ام كارما..دا انتو عيله نتنه كلكو..)* كارما:- ماما انا رايحه بقا ل ريهام عايزه حاجه والدتها:- روحي يختي وسبيني في الكركبه دي لوحدي. كارما:- حد قالك اقلبي الشقه يعني..انا مش فاهمه انتي جايبه الثقه دي منين اني هوافق عليه اصلا

والدتها:- طب تبقي تفتحي بوقك يا كارما.. عشان اجوزك الولا اسلام صاموله كارما:- لالا الله يسترك لا الولا دا ممحون اصلا ومشاعره فياضه زياده عن اللزوم وانا بقشعر لا والدتها:- يبقي توافقي ع الظابط يختي..ع الاقل محترم وابن ناس كارما:- وانتي عرفتي منين.. مش يمكن يكون صايع وخمورجي وبتاع ستات وبيشارك في قضايا مشبوهه وبيبيع اعضاء وسلاح والدتها:- ما طبيعي يبقي كده ماهو جاي وبكامل إرادته ويتقدملك.. اكيد مش هيبقي شخص مثالي يعني دا لو اخدك هياخدك تكفير ذنوب

كارما:- انا مش فاهمه اي كميه الحقد اللي بتشعوريه اتجاهي دا.. هو انا بطفي سجاير في صرصور ودنكم ولا بحط راسكم في قاعده الكبانيه لامؤاخذه والدتها:- بت غوري من وشي مش ناقصه هم ع الصبح انا فيا اللي مكفيني كارما:- يارب بعد كل التنضيف دا ما يجي.. عشان تبقي تعامليني معامله مرات الاب دي كويس *غادرت كارما المنزل وذهبت الي المستشفي ب وسيله مواصلاتها المفضله والوحيده الميكروباص* ريهام:- يعني انتي هرفضيه ولا لا

كارما:- والله لو مناسب مش هرفضه..اي اللي هيخليني ارفضه يعني ريهام:- طب مش محضره اسأله كارما:- اسأله ايه هو ميد ترم ياست انتي كمان ريهام:- انا بتكلم بجد والله كارما:- يستي سبيها ع الله انا السؤال اللي هيجي في بالي هقوله هو مش قاعد مع جورج قرداحي ف من سيربح المليون يعني