معتكف فى محراب قلبي بقلم مى سيد ج٢

معتكف ف محراب قلبي البارت السابع صل علي رسول الله.. 🕊💙 اتكلم بهدوء وهو مازال بيبصلها بنفس النظرات ال حيرتني _ خلصتي الأكل ي أميره ردت هي بتوتر وهي بتبعد نظراتها عنه = احم ، أيوه لحظه بس _ طب يلا خرج وانا اكتشفت انه ماليش لازمه ف المطبخ وهي مش طايقاني كده فخرجت وراه انا كمان خرج قعد ع الركنه وحط اللاب ع رجله يشتغل عليه وانا قعدت ع الكرسي بعيد عنه ، فضلت مكاني بتوتر مش عارفه اعمل اي ، ولا حتي اتكلم بما اني مش مديني فرصه لكده

قاطع سرحاني صوته وهو بيوجهلي الكلام بدون م يبصلي- كالعاده يعني- _ ممكن تتدخلي لماما لو تحبي يعني يجدع انا هلاقي فرصه اقعد معاك فيها واسيبك ، دي تبقي قله ادب مني والله = احم ، لا عادي ، عشان متعبهاش رد وهو مازال باصص ف اللاب قدامه _ هي مش هتتعب ولا حاجه ، بس خلاص ال يريحك = شكرا رفع حاجبه باستغراب وهو بيرد عليا بعد م رفعلي عينه ثانيه ونزلها تاني

_ ع اي؟ = عشان عرفتني ع مامتك ، او عشان جبتني ليها النهارده رد بهدوء _ ولا شكر ولا حاجه وزي م سمعتي منها ، انتي بقيتي زينا ، وقت م تحبي تيجي ليها تعالي اتكلمت وانا بحاول أفتح انا معاه اي موضوع = هو ممكن اطلب منك حاجه؟ رد بنبره عاديه _ اتفضلي = ينفع نعيش هنا بعد م نتجوز، انا ال… بكل برود وبكلمه واحده قاطع كلامي ، بدون اي فرصه للمناقشه

_ لا = لي طيب ، انا ال بطلب منك كده رد بحزم _ انا قولت لا ، هنعيش ف الشقه ال قصادنا ع طول اتكلمت بتصميم وانا بحاول اغير رأيه، الحقيقه اني حبيت دفا حضن مامته، وعايزه ابقي جمبها دايما = طيب مش هتفرق اهي ، وانا ال عايزه كده بنفس نبرته ال فاتت متغيرتش ، بل أعتقد انها زادت _ وانا قولت لا يعني لا قبل م اكمل كلام معاه واحاول اقنعه لقيت اميره جايه تنادي عشان الغدا وانها حطته ف اوضه السفره

* الغدا خلص ي نوح _ تمام وصلي حوراء وانا هجيب ماما واجي * اتفضلي دخلت قعدت ع السفره وهو شويه جاب مامته وجه ، قعد وكذلك مامته واخته جو أسري لطيف، لو بس اسثنينا ان اخته مش طيقاني ، وانه هو شخصيآ تقريباً مش حابب وجودي ، كان هيبقي لطيف فعلا وبما ان محدش بيكلمني غير مامته فده كان محفز قوي جدا اني اقوم من ع الكرسي عشان استاذن وامشي

بصولي باستغراب بس ال اتكلم كان مامته _ راحه فين ي بنتي = احم ، هستاذن بقا _ بس انتي مكلتيش ي حوراء ، اقعدي كملي اكلك مينفعش كده = شبعت والله ي ماما شكراً ، انا بس همشي عشان بابا ، استاذنكو أنا _ طب استني نوح هيوصلك = لا لا انا هاخد تاكسي ، شكرا بصتله وهي بتخبط دراعه من تحت ترابيزه السفره ، ع أساس اني مش شايفه وكده ، بس للاسف كانت باينه جدا ، او انا ال مركزه ، مش عارفه

_ قوم ي نوح وصل حوراء بص لمامته بصمت ، وبعدين قام ، وبنفس الصمت خرج من الاوضه اخد مفاتيحه وفونه وخرج ، بدون م يوجهلي اي كلمه قبل م اتحرك وراه بصمت انا كمان لقيت أميره بتبصلي بشماته وهي بتحاول تخبي ضحكتها ، تمام انا عارفه هي بتضحك ع اي ، بس مش عارفه لي ، لي الكره ال ليا من ناحيتها ده ، لي مش متقبلاني ماما صفاء بصتلي وهي بتحاول تبتسم عشان تنسيني تصرفات نوح وبنتها ،

بس هو ال بيعلم ف القلب بيعرف يتنسي؟ مكنش حد غلب ولا كان حد اتكسر بخاطره حاولت اردلها الابتسامه وانا بسلم عليها وبمشي لوحدي خرجت من الباب لقيته واقف مستنيني ، اتحرك وانا اتحركت وراه نزلنا ، ركب العربيه وكذلك انا ، وصلني لحد البيت وقبل م انزل كان حن عليا ووجهلي كلام أخيرا _ فاضلك حاجه هتشتريها؟ = اجم، فاضلي بس اللبس الخروج _ تمام ، هتشتريه امتي؟ = ببكره ان شاء الله

_ تمام ، ابقى رني عليا قبل م تنزلي اتكلمت باستغراب من اسئلته ، او من اهتمامه = هو ف حاجه؟ رد بهدوء كأنه شيء طبيعي، مانه موقف وبيحصل كل يوم _ هبقي اجي معاكي اتكلمت بفرحه وعدم تصديق = بجد _ احم ، ان شاء الله رديت بتوتر من الفرحه ال مش قادره اسيطر عليها = ماشي ماشي حاضر ، هبقى اكلمك بكره _ تمام = يلا باي خرجت من العربيه وانا حرفياً مش مصدقه ال حصل ، مش مصدقه اني هشوفه بكره تاني ، لا وهبقي معاه كمان ، ده ي فرحة قلبي والله

___________________ مؤمن دايما انه ربناا مبيعملش حاجه وحشه ، حقيقي ” وعسي ان تكرهوا شيئاً وهو خير لكم ” جايز اكون مش حابب حوراء ، ممكن اكون مش متقبل وجودها ، بس ده ميمنعش انه بسبب صبري ع الابتلاء عوضني عوضني حقيقي بجد ، بس هي حوراء إبتلاء ، للأسف مش قادر اشوفها اكتر من كده ، مش سهل اني اتجبر ع شخص يكمل معايا حياتي ، وغصب عني ان دي كل مشاعري ناحيتها

مش غبي عشان مقدرش اشوف حبها ، مش هقول ف عنيها عشان مش ببصلها ، بس خلينا نقول انه باين جدا من تصرفتها ، لهفتها ، فرحتها ، ارتباكها توترها قدامي ف الشركه ، فرحتها لما روحنا نتقدم ، غيرتها عليا ف المكتب ، بكاها وهي بتخلع الدبله ، ضحكتها وانا بقولها اني هبقي معاها وهي بتشتري لبسها خلينا نقول اني دي كلها علامات أوضح من الشمس ، بس اعمل اي

غصب عني اني مش قادر احس بيهاا ، ولا حتي قادر اتقبلها انا اتطمنت شويه من معامله ماما ليها ، ع عكس معامله أميره ليها ، وال مطمنتنيش خالص ، انا مدرك ان أميره زعلانه عشاني بس مدرك برضه انه حوراء ملهاش ذنب ، مش انا ال هاخدها بذنب هي متعرفوش اصلا مش ذنبها ان امي تعبانه ، مش ذنبها ان مكنش معايا فلوس ، مش ذنبها انه شرط باباها اني اتجوزها ، وال متأكد انها متعرفش حاجه عن الشرط ده

احنا لو هنقول ان ليها ذنب ف حاجه ، ف ذنبها الوحيد اني مش بحبها ، بس حتي ده مش ذنبها ، ذنبها اي إني بحب واحده غيرها الحقيقه انه ذنب كل حاجه عليا ، وذنبها الوحيد انها حبتني انا اصلا مش عارف لي اعتذرتلها ، لي طلبت تلبس الدبله تاني ، يمكن بكاها ، يمكن رعشتها ، يمكن حزنها ، مش عارف بس خلينا نقول اني ممكن أطلع كسبان من حوار الجواز ده ، لو مثلا ساعدتها تقرب من ربنآ ، فأنا حقيقي مش محتاج مكسب اكتر من كده

ده غير انها بتصعب عليا ، بتثير جوايا مشاعر غريبه ، معرفش شفقه ، حزن ، مش عارف ، بس مش مشاعر حب ، وده مش بايدي بكاها النهارده ف المول حسسني انها طفله تايهه من مامتها ف الزحمه ومش عارفه تروح فين ولا مين بكاها لما ماما حضنتها عرفني كم الحزن ال هي فيه ، عرفني اد اي هي مفتقده مامتها وحنيتها فرحتها لما نصحتها عشان حوار البرفيوم حسسني أنها طفله صغيره لسه بتتعلم تخطي برجليها ع الطريق الصح

تقبلها النصيحه وانها مجادلتش وسمعت الكلام هو ده ال شجعني اني اخدها تحدي ف انها تقرب من ربناا اينعم مش بحبها بس ع الأقل اقربها ، هتتعب معايا انا عارف ، ولعل ده يكون شفيع ليا عندها بعدين __________________ الساعه الآن التاسعه بتوقيت القاهره ، وي فرحه قلبي بالساعه دي نوح بيه هيعدي عليا حالا عشان نتحرك نروح المول مش معقول كم الفرحه ال انتي فيها دي ي حوراء عشان بس هتشوفيه وتروحي معاه المول

اومال لما يقولك بحبك هتعملي اي ، بس لحظه ، هو نوح ممكن يقولي بحبك هششششششش والله م هنكد ع نفسي ، نتناقش ف الموضوع ده بعدين وطبعاً كعاده اي بنت مدهوله ع عينها وبتحب ده كان حوار بين وبين عقلي ، بس انا حاولت اسكته بس ده ميمنعش ان السؤال فعلا علق معاياا ، هو انا ممكن نوح يحبني من ساعة م لبست الدبله تاني وانا قلب نوح بقا ملكي ، جايز مش ملكي دلوقتي ، بس هوصله ، مسيري يوم هوصله

انا ورايا اي يعني غير سي نوح وقلب سي نوح مش غبيه انا عشان معرفش انه بيحب حد تاني ، وانا مش بيحبني ومش متقبلني ، ومعرفش لي خطبني الحقيقه بس مدام قرار الخطوبه كان منه ، واني البس الدبله تاني بعد م قلعتها كان قرار مني ، فانا معاه للاخر والموضوع مش تحدي ، بس انا الحقيقه معنديش اي استعداد اني افكر ف احتمال انه ميحبنيش ، مقدرش استحمل الفكره أصلا

انا مش هقدر اكمل من غير كده ، ومن غير انه يبقي جمبي _ يلا ي ست حوراء ، نوح مستنيكي تحت وده كان صوت بابا وهو بيجي عشان ينقذني من افكاري الحقيقه انه اكتر شيء مؤذي للإنسان هي أفكاره ، كفيله انه ترميه ف سابع ارض بعد م طلعته سابع سما ، بدون اي رافه ولا شفقه _ ي حوراء بكلمك = أيوه ي بابا معاك _ نوح مستنيكي تحت

= حاضر نازله اهو ، هلبس بس الكوتشي واجي _ ماشي بس خلصي عشان متتاخروش = حاضر بابا خرج وانا لبست الكوتشي ونزلت ، بعد م اتأكدت من شكلي ف المرايه ، وانه البرفيوم ال حطاه مش طالع ، والحقيقه اني عملت كده عشان نوح ميضايقش مش عشان حاجه تانيه نزلت لقيته قاعد مع بابا بيشربو القهوه ، اول م شافني قام واستاذن من بابا ومشينا ، بعد توصيات بابا ليه عليا ، بس المفروض والله يوصيني انا عليه ، ده انا باكله بعيني وهو مش بيبصلي أصلا ،

اصلا المفروض ماما صفاء تخاف ع نوح مني ، وابنها عامل زي لهطه الجشطه كده ، هيييح فوقي ي حوراء يخربيتك هتفضحينا ، فوقي ، فوقي بصراحه بقا مفيش حاجه بتشجعني اني افوق ، افوق ازاي يعني ببرفانه ال يدوخ ده ، ع فكره المفروض يراعي اني انسان دعيف وميحطوش المهم اني احترمت نفسي طول الطريق ومعملتش فيه حاجه الحمدلله وصلنا المول ودخلت عشان اشتري لبسي وقبل م نتحرك وندخل اتكلم

_ انتي عارفه محل معين هتشتري منه = أيوه _ طب ف محل كويس أميره بتشتري منه هي والاء ، انا عارفه تعالي نروحه = لحظه بس ، مين آلاء ………….. #يتبع #Mai_Sayed #معتكف_ف_محراب_قلبي #حكايات_اخر_الليل استغفروا الله لعلها تصادف ساعة استجابه.. 💙معكتف ف محراب قلبي البارت الثامن صل علي رسول الله.. 🕊💙 _ مين آلاء ي نوح رد بثبات = بنت عمي _ ودي كام سنه بقا؟ 25 = يعني اكبر مني بسنتين كمان ، مانا اصغر من البيه بخمس سنين ، البيه ال بيتكلم بلامبالاه هتشلني

، اتكلمت بذهول وغضب ، وغيره بتنبش ف قلبي بعنف _25 يعني اصغر منك ب 3 سنين رد بلامبالاه غير طبيعيه = اها واي المشكله؟ اتكلمت بغضب وعصبيه من لامبالاته _ اي المشكله؟ انت مش شايف انه ف مشكله انك تيجي مع بنت عمك وهي بتشتري لبس = ومين قال اني كنت باجي معاها _ انت لسه قايل من دقيقه = فكريني كده انا قولت اي معلش _ قولت انه ف محل أميره بتشتري منه هي وال اسمها بنت عمك دي ، وانك عارف المحل ده

= أيوه فين جمله اني باجي معاها بقا مش فاهم _ يعني اي رد بهدوء ولا مبالاه بقلبي ال بيتحرق من فكره انها بتبقي معاه ، او هو بيشاركها مشاويرها = يعني انا أكيد ببقا عارف المحلات ال اختي بتشتري منها لبسها مقدرتش امسك غيرتي وانا برد عليه بسخريه _ اختك ولا بنت عمك؟ اتكلم بتحذير غاضب ف حين انه محافظ ع نبره صوته الهاديه = مش معني اني جاوبت ع اسئلتك انك تخطي حدودك ، اعرفي انتي بتقولي اي

_ انا عايزه أروح ، بعد اذنك = استنى عندك ، انتي مفكره نفسك راحه فين _ هروح ، وبعد اذنك عديني = انا مش فاهم ف اي ، ومفيش مرواح ، اتفضلي عشان نخلص ف اليوم ده _ وانا مش عايزه اشتري حاجه = وانا قولت يلا اتكلمت بتوتر وانا ع وشك اني أبكي _ بس.. بس انا عايزه أروح رد بهدوء وبنبره اقل من العادي ، بدون اي اهتمام بيا

= حوراء انا مش جايب معايا بنت اختي ، قولت يلا _ طب مش هنشتري من نفس المحل رد بنفاذ صبر وهو بيحاول ميزعقش = زي م تحبي ، يلا اتحركنا فعلا عشان نشتري وانا عايزه اعيط ، مش عارفه اعدي الفكره من دماغي ، اوك انا مش شاكه ف نوح ، بس الفكره نفسها متعبه انه يبقى واخد باله من المحل ال هي بتشتري منه ده جنني ، حتي لو مفيش حاجه ، بس غصب عني

دخلنا المحل وانا بدأت اختار اللبس ف محاوله اني انسي افكاري شويه ، دقيقه ولقيته بيختار لبس هو كمان مجاش ف بالي غير انه بيشتري لاخته ، اصله بيشتري استايل غير استايل لبسي ، ف اكيد مش ليا يعني ده غير انه أكيد مش هيكون بيشتري ليا ومياخدش رايي ، مش طبيعي يعني ، انا مش قلقاسه للدرجادي ، او لا انا قلقاسه مع نوح عادشي المهم اخترت لبسي وهو اختار لبس كمان وجينا عشان نحاسب ، طلعت الفيزا وقبل م امدها للبنت ال كانت واقفه ف المحل كان هو طلع بتاعته ومدها ليها ،

وبما انها كانت مبحلقه لسي نوح فهي أكيد مخدتش بالها مني _ انا هحاسب ع لبسي ي نوح طبعاً لو كنت مفكره انه هيرد عليا فلا محصلش ، ولو حد مفكر اني هعاند واصمم ولا انا هحاسب لنفسي وشغل الفيمسنت ده ، فبرضو لا هو بصته كانت كفيله تخرسني ف سكت يعني ، م هو الواحد مش مستغني عن روحه برضه حاسب ع اللبس وشال مني الشنط ومشينا ، خرجنا حطهم ف شنطه العربيه والتفتلي

_ تحبي تروحي ولا تروحي ف مكان تاني والله انا مش عايزه اليوم يخلص مدام معاك ، ف بالتالي لا هنروح مكان تاني = احم ، ممكن بس نروح اي كافيه ، عايزه اشرب قهوه عشان اصحي بس _ طب م تروحي تنامي = لسه عايزه أروح الشركه _ طب تمام ، اتفضلي روحنا الكافيه ال كنا فيه المره ال فاتت ، دخلنا ، قلع نضارته وحط مفاتيحه وفونه وقعدنا ، دقيقه وطلب سندوتشات واتنين قهوه

مجاش ف بالي انه طلب ليا انا السندوتشات غير لما الاوردر جه بمد ايدي عشان اخد قهوتي لقيته بيمد ايده ويحط السندوتشات قدامي _ اي ده؟ = كلي الاول ، بلاش قهوه من غير اكل وطبعاا كاي بنت مش هكتفي بالحركه الچنتل دي لا ، لازم اسوق فيها _ بس انا مش جعانه = ال يريحك بس كده أحسن _ اممم ، ع كده انت بتفطر قبل القهوه رد بلامبالاه وهو بيرفع قهوته يشربها ويدور بعينه ف المكان

= لا مش هتكلم خلاص ، يعني الواحد عايز اي اكتر من كده النهارده يعني ، خلصنا وحاسب ع القهوه ومشينا وصلني البيت وقبل م انزل اتكلمت _ انت رايح الشركه ولا هتروح = لا رايح الشركه _ طيب ممكن لو مش هتعبك تستناني = تمام بس ياريت بسرعه _ هوا اخدت شنطي من العربيه وخرجت بسرعه عشان متاخرش عليه ، وانا عارفه اني لو اتاخرت مش هيستناني غسلت وشي بسرعه ونزلت عشان نلحق نمشي وهو ميزهقش ، نزلت ركبت العربيه وهو اتحرك بسرعه ومشينا

شويه ووصلنا الشركه ، دخلت وانا جمبه ، هو اينعم انا مش باينه جمبه بس ولو ، جمبه برضه وطبعا عشان انا معاه مكناش هنركب الاسانسير لوحدنا ، وعشان ميقوليش أمشي اخذناها مشي ع السلم ، طلع الأول وانا طلعت وراه والله ي جدع لو مش بستغل كل دقيقه انت جمبي فيها كنت قولتلك اطلع ف الاسانسير ، بس مقدرش والله وصلنا وهو اتحرك ع المكتب بتاعه بدون م يكلمني وانا دخلت مكتبي ، ال المفروض ف نهي وزميلنا مصطفي

دخلت قعدت ع المكتب وانا لسه هيمانه ف ملامح نوح ، او هيمانه ف تفاصيل اليوم ككل يعني فوقت ع ايد نهي ال خبطتني بعنف _ اااه، ف اي ي نهي ، م براحه * م انتي ال داخله من غير لا سلام ولا كلام _ ي ستي سلام وكلام ، كده انتي تمام يعني * ف اي ي ست حوراء ، بتتكلمي كده لي ، هو محدش هيتجوز غيرك يعني

رديت بتبرير وانا بحاول مزعلهاش _ ي نهي مش كده ، بس انتي خضتيني اتكلمت بامتعاض وهي بتلوي بوقها بحركه غريبه * اممم ، واخبارك مع سي نوح اي بقا _ مش فاهمه يعني قصدك اي؟ اتكلم مصطفي ال كان قاعد بيتابع كل ده بصمت ، بص بخبث لنهي وهو بيتكلم

< سبيها ي نهي بقا ، مترخميش عليها وهي جايه هيمانه فيه كده _ هو ف اي ، انتو بتتكلموا كده لي انتو الاتنين اتكلمت نهي بغل وهي بتبصلي بسخريه _ غير مبرره _ * اصل كلنا مستغربين يعني ان نوح يخطبك _ ومستغربين لي مش فاهمه اتكلمت باهمال وهي بتقعد مكانها ع كرسي المكتب * اصل كلنا عارفين انه عمره م بصلك ، بس بعد كده فهمنا بقا اتكلمت وانا مازلت مستغربه من طريقتها والحقد ال فيها _ طب م نوح طول عمره م بص لبنت ، وبعدين فهمتوا ازاي مش فاهمه؟ رد مصطفي وهو بيبصلي بطريقه غريبه < فهمنا انه خطبك عشان شركه ابوكي .......... #يتبع #Mai_Sayed #معتكف_ف_محراب_قلبي #حكايات_اخر_الليل استغفروا الله لعلها تصادف ساعة استجابه.. 💙معتكف ف محراب قلبي البارت التاسع صلِ عليٰ رسول الله.. 💙 _ معلش ي مصطفي قول تاني كده ، كنت بتقول نوح خطبني لي؟ * عشان شركه باباكي _ اها ، وهو عشان انت كنت هتعمل كده مفكر كله زيك * قصدك اي ي حوراء _ قصدي انت‌َ عارفه كويس جدا ، فمش هنلف وندور ع بعض * منكرش ان ده كان من ضمن الاسباب.، بس ده ميمنعش اني معجب بيكي ي حوراء _اووو ، والمفروض اني اصدقك بقا، م بلاش نلعب ع بعض كتير، عشان الموضوع بيبقي ممل ، ولا انت اي رايك اتكلمت نهي بعد صمتها طول كلامي مع مصطفي _ اومال نوح خطبك لي ي ست حوراء ؟ = انتي مين ؟ _ انا مين ازاي يعني = يعني انتي مين عشان تسالي سؤال ميخصكيش ، نوح ده قريبك ، اخوكي ، انا اختك ولا حاجه ، تقربي لحد فينا بحاجه عشان تسالي سؤال بجح زي ده _ اها ، ده انتي شكلك عارفه بقا = وانتي ما.لك برضه يخص.ك ف اي ؟ _ مسم ، صحيح ، مرايه الحب عاميه = لا دي مكس.وره ، انتي مالك برضه ، يخصك ف اي * بس ي نهي ، دول شكلهم اشتروه بفلوسه... قاطعته بصوت عالي وانا بزعق بعصبيه بنفاذ صبر منهم ، او مستحملتش كلمه ع نوح ، كنت بعدي ف ال يخصني ، انما نوح معتقدش اني اقدر _ اقسم بربي ، كلمه زياده ع نوح وم هخليكو تسووا تلاته مليم وسط الشركه كلها ، مش معني اني عديت طريقه الكلام دي انكو تنسو نفسكو وتتدخلو ف ال ملكوش فيه ، لا فوقو ، كل واحد يخليه ف حاله أحسن بدل م تشوفو مني وش هيزعلكو = اااه ، مش عشان ابوكي صاحب الشركه ت.. _ مش انا ، وانتو الاثنين عارفين انه مش انا ، مش انا ال بتعامل بمبدا ابويا مين ، وعمري م عملتها ، ولا هعملها ، انا كفيله اجيب حقي بايدي ، وانتو برضه عارفين ، فبلاش لمصلحتكو انتو * ماشي ي ست حوراء ، ماشي _ مانتي قاعده شويه ي حبيبتي * هووووف ، يلا بينا ي مصطفي ، خليلها المكتب تشبع بيه _ لا انا شبعانه لوحدي ي حبيبتي ، الدور والباقي ع ال عمره لاشبع ولا هيشبع * صدقيني مش هعدي كل ده ي حوراء ، والله م هعديه _ ال بيقول مبيعملش ي عروسه ، ويلا شوفو كنتو رايحين فين خرجوا بعصبيه وهما بيبصولي بغل وانا قعدت ع المكتب بسرحان ، والحقيقه اني مهتمتش بنظراتهم قد م اهتميت بكلامهم ، مش شاكه انه نوح طماع بس انا لسه لحد دلوقتي مش عارفه نوح خطبني لي ممكن يكون مش كل كلامهم صح ، ممكن مش هدفه الشركه نفسها ، ممكن ف هدف تاني وراه ،حاجه تانيه غير الشركه أصله بالعقل كده ، نوح لو خاطبني عشان يكسب الشركه فكان كسبني انا الأول ، كان مثلا يوهمني انه بيحبني ، يعاملني كويس حتي ، اي معامله غير معاملته دي يعني انا بحبه ، وهو عايز الشركه ، فكان هيلف ويدور عشان يوصلها عن طريقي ، خصوصا انه حبي باين أصله لي يختار الطريق الصعب مع ان الاسهل قدامه مبدئياً كده انا مش هصدق كلامهم ، بس مش هنساه ، انا هحاول اتنساه لحد م اعدي الفتره ال مش عاوزه ازعل فيها ، او بمعني اصح ، لحد م افهم ـــــــــــــــــــــــــــــــــــــــــــــــــــــــــــــــ متفاجيء؟ ، اها جدا ، الحقيقه اني متفاجيء جدا من شراستها ، من حبها ، يعني صراحهً مكنتش متخيل انها هترد عني كده مكنتش بتصنت بس كنت نازل اناديها عشان باباها طالبنا احنا الاتنين ف المكتب وكاي اب حابب يطمن اني مش هاذي بنته طلب اني اجيبها واجي ، ع اساس انه الدنيا بينا تمام وخلاص انا رضيت بالامر الواقع ، بس انا غصب عني مش قادر ارضي ، حتي بعد كل ال سمعته دلوقتي ، حتي بعد حبها ال كلامهم وضحه ، وال كان واضح جدا ف تصرفاتها قبل كلامهم حتي بعد دفاعها عني بكل الشراسه ال كانت بتتكلم بيها ، اوك حوراء كبرت ف نظري وانا صغرت ف نظر نفسي ، بس اعمل اي ، مش انا ال عملت كده فينا احنا الاتنين ، مش انا ال حطتها ف الموقف ده من البدايه مش انا ال طلبت اني اخطبها ، انا يدوب نفذت شرط عشان انقذ أمي ، كنت هعمل اي بس مكنش بايدي ابيع قلبي ، مش بمزاجي اني هبيع ال عشت ببني احلامي مع مواصفاتها ، مش راضي عن اني ابيع ال قلبي اختارها انا مختارتش حوراء ، ولا ف يوم كنت هختارها ، ومش قابل وجودها حتي ، بس كنت أعمل اي ، ي اجي ع قلبي ي اجي ع امي وانا مش هاذيها ، اعتقد.. عامه معدش فيه فرصه للرجوع تاني ، فاضل بس 4 ايام ع الفرح ، ومش انا ال هسيبها قبل فرحها ب 4 أيام خبطت ع المكتب ودخلتلها ، بعد م قامت من ع الكرسي بفرحه اول م شافتني _ سلام عليكم = وعليكم السلام ورحمة الله وبركاته ، اتفضل _ لا مالوش داعي ، باباكي بس عايزنا = بابا ؟! ف حاجه ولا ايه ؟ _ مش عارف اتكلمت باستغراب تاني وهي بتفتح فونها تبص فيه = طب مكلمنيش ع فون المكتب لي رديت ببرود اعتقد انها اتعودت عليه وانا بسيبها واخرج _ ابقي اساليه ، يلا اتكلمت بصوت واطي وهي بتلم حاجتها بعصبيه = ده يخربيت البرود والله خرجت وهي فضلت تبرطم بالكلام وخرجت ورايا ، وبدون م احس لقيتني ببتسم ببطء ع كلامها ، قبل م الف ليها وانا بكلمها ببرود _ بتقولي حاجه ي حوراء = انا ؟! محصلش وغلاوتك ي اخويا _ متأكده = يعني ، شويه _ امممم ، هعمل نفسي مصدقك ، يلا = يلا ي اخويا وانا قولت حاجه _ ورايا برطمت تاني بصوت متخيله انه واطي = قال ورايا قال ، العسكري بتاعه انا عشان امشي وراه لفيت ليها تاني وانا بكلمها بدون م ابص عليها _ عارفه المشكله فين ؟ ردت بتوتر وهي بترجع خطوه لورا = هاا ، فين ؟ _ المشكله انه صوتك عالي ، جداا ردت بطريقه مضحكه وهي بتخبط بايديها = نوطيه ي اخويا ، نوطيه _ طب م تمسكي لسانك أسهل = نمسكه ، منمسكوش لي _ يلا خرجنا روحنا لوالدها ، وال اتكلم ف حجات عاديه لأي حد المفروض انه بيتجوز ، خلصت معاه كلام ببرود اعتقد مكنش هيبقي موجود لو العروسه واحده تانيه وزي م كنا متفقين انه الفرح ع الضيق ، الأهل من العيلتين وخلاص خرجنا انا وهي بعد م خلصنا كلام مع باباها ، سبتها ودخلت مكتبي بدون م اتكلم فضلت قاعد فيه شويه مش عارف اعمل اي ، مش عارف اصلا المفروض اعمل اي ، الحاجه لو مش معموله بحب مبتبقاش حلوه ، مهما بذلت فيها من مجهود وده ال بيحصل بالظبط ، مهما حاولت اصبر نفسي او اقول انه عادي مش عارف افرح ، او اشوف حتي الموضوع عادي فضلت حوالي ساعه وبعدين قومت عشان اروح ، نزلت ركبت العربيه وانا ماشي لقيت حوراء واقفه ، فكرت اسيبها وامشي ولا كاني شوفتها بس مرضتش لسببين ، اولا انه مينفعش اعمل كده ، عيب ف حقي حتي ، وانا عمري م قبلت العيب ف حقي تاني سبب انها هتبقى مراتي ، مش معقول كل م شوفها ف مكان هسيبه وامشي ،عال والله ، باين اني بدأت اتعود اهو نزلت قزاز العربيه وانا بميل ع الشباك ال جمبي عشان اكلمها _ واقفه لي ؟ بدون تفكير لقيتها بتقرب ، والواضح انها تقريبا عرفت انه انا من العربيه = مستنيه تاكسي ، انت جبتني فمش معايا العربيه _ طب مستنتيش باباكي لي = هيتاخر وانا تعبانه وعايزه انام _ طب تعالي هروحك = بجد ؟ _ يلا ركبت العربيه بسرعه وفرحه وانا اتحركت عشان نمشي ، وكالعاده بدات هي الكلام _ ماما صفاء عامله اي ؟ = الحمدلله ، بتسلم عليكي _ الله يسلمك = انتي حابه تروحي لكوافير ؟ _ هو انا لو حابه انت هتوافق ؟ = وانا هرفض لي مدام مش هيبقي ف رجاله هتشوفك اتكلمت بتوتر وهي بتفرك ف ايديها وبتبصلي _ احم ، انت بتغير عليا اتصدمت من السؤال ، ف اخدت وقت ع م رديت بسؤال تاني = مردتيش ع السؤال ، هتروحي ولا لا سكتت وهي بتبصلي بحزن ، قبل م تحرك رأسها وتبص من الشباك وهي بترد بنفس الحزن _ لا = لي ، اعتقد اني مرفضتش ردت بنفس النبره الحزينه وهي بتبلع ريقها بصعوبه _ هبقي لوحدي وسط كل واحده مع امها او صاحبتها او أختها ، هبقي لوحدي كالعاده خلصت كلام وسكتت بوجع بان عليها من كلامها ، ومع كم الوجع ال كان ف صوتها مقدرتش اتكلم ولا انطق بحرف ، وسكتنا احنا الاتنين ............ #يتبع #Mai_Sayed #معتكف_ف_محراب_قلبي استغفروا الله لعلها تصادف ساعة استجابه..🧡معتكف ف محراب قلبي صلِّ علي رسول الله ❤ البارت العاشر وصلنا البيت ، فتحت الباب ونزلت بدون م توجهلي اى كلمه ع غير العاده ، نزلت بعد م لمحت دموعها وهى بتنزل وبتحاول تخبيها ، فتحت الباب ودخلت بدون م ترجع تبص ع غير العاده ، وانا متحركتش بعد نزولها ع غير العاده مقدرتش امنع نفسي انى افكر ف حالتها طول الطريق ، مشوفتهاش موجوعه كده غير النهارده ، او مخدتش بالي غير النهارده ، مش عارف روحت البيت ، وروحت لماما حكيتلها ال حصل وانا مش عارف لى ، م براحتها مش عايزه تروح ، انا مالي خلصت كلام مع ماما ، لقيتها بتبصلي ف عيني كانها هتخترق تفكيري ، ومقدرتش استمر انا ع الوضع ده كتير قطعت الصمت ال غلفنا وانا بحاول ابتسم _ اى يماما ف اى ، بتبصيلي كده ليه ؟ = وانت بتحكيلي لى ي نوح ؟ _ يعني اى بحكيلك لى ، بحكيلك عشان مش عارف اتصرف = اه وتتصرف لى بقا ؟ _ هو اى ال اتصرف لى ي ماما ، انتى بتتكلمي بالالغاز لي مش فاهم اتكلمت بصراحه صدمتني = بص ي ابن بطني ، بلاش لف ودوران عشان نيجي مع بعض دوغري ، اسمع بقا ، انت لو مفكر انى فاهمه انك بتحب حوراء تبقي أهبل ، ولو مفكر انى كنت تايهه ع تفكيرك ف بنت عمك تبقي متعرفش أمك يمكن انا لحد دلوقتي مش فاهمه انت عايز تتجوز حوراء لى ، ومش هقولك لازم تقولي ، انا طول عمري سايباكو تعملو انتو عايزينه مدام مش حرام ، بس قسما برب الخلق ي نوح م تيجي ع البنت دى قيراط لاجي انا عليك ٢٤ فاهم ؟؟ انهت كلامها بصرامه غريبه عليها خاصة معايا _ احم ، فاهم يماما = مراتك او خطيبتك ملهاش حد يبقي معاها ف اليوم ده ، بس انا واختك هنبقي معاها ، ف احجز ليها ف أحسن كوافير تروحه ، كده كده مش هيبقي فيه اجانب عنها ف الفرح ، كفايه ال هى شايفاه وال انت اعمي عنه مش شايفه _ حاضر يماما = فرحكو كمان تلت أيام ، عايز تكلمها تقولها ماشي ، عايز تعملها مفاجاه ليها برضو ماشي مش هتفرق ، بس اعمل حسابك ان انت ال هتودينا كلنا للكوافير ده _ حاضر ي ماما ، تصبحي ع خير #Mai_Sayed #حكايات_اخر_الليل #معتكف_ف_محراب_قلبي دعواتكم باللهمُعتكف ف مِحراب قلبي صلِّ علي رسول الله ❤ البارت الحادي عشر خلصت كلام مع ماما وسبتها ودخلت اوضتي ، فضلت قاعد فيها مش عارف افكر ، مش عارف اوصل لحل انا لاول مره حاسس اني بظلم حوراء ، بس انا مفيش ف ايدي حاجه اعملها ، مش طايل حاجه قومت صليت القيام وقعدت خلاص عشان انام ، بس معرفش لي جت ع بالي ، شكلها النهارده وهي حزينه مش قادر انساه ، مش قادر اقول اني اتوجعت لوجعها ، بس صعبت عليا طلعت الفون عشان ارن عليها واعرفها بال ماما قالته ، بس افتكرت اني مش معايا رقمها وقبل م احط الفون واستسلم خلاص ع اساس اني عملت ال عليا وكده ، جه ف بالي اني اكلم باباها واخد منه الرقم وبدات اعمل كده فعلاً ، رنيت ، وقبل م يفصل رد _ الو ، ازيك ي نوح = الحمدلله ، ازاي حضرتك _ الحمدلله ، خير متصل متاخر ف حاجه ولا اي = احم ، كنت بس محتاج رقم حوراء اكلمها ، ده بعد اذن حضرتك _ لا ولا يهمك اخدت منه الرقم وقفلنا ، بعد كم توصيات منه ع حوراء ، معرفش ازاي يعمل كده ف بنته ، ازاي يحطني انا وهي ف الموقف ده او يحطها هي ، انا عادي ممكن اتجوز غيرها لو حبيتها ، انما هي !! سجلت رقمها ورنيت وانا بدعي جوايا انها متردش ، وفعلا مردتش ومعرفش اي ال خلاني ارن تاني ، عشان ترد قبل م المكالمه تفصل ردت وهي بتحاول تنضف صوتها من النوم ، او من البكا ، مش عارف _ الو = حوراء انا نوح ردت بعد فتره وصوتها بيرتعش _ عارفه = كنت عايز ابلغك بحاجه _ اتفضل = انا موافق انك تروحي لكوافير ، وحجزتلك ف مكان هبعتلك اللوكيشن بتاعته ف مسدج _ وانا قولتلك مش عايزه اروح عشان هبقي لو... قاطعتها قبل م تنهي كلامها وال حسيت فيه بنبره البكا = مش هتبقي لوحدك ، ماما هتبقي معاكي ردت بعدم تصديق والفرحه بانت ف صوتها _ انت بتتكلم بجد ولسبب مش فاهمه فرحتها ريحتني = ايوه _ شكراً ، شكراً اوي اوي بجد = ع اي يعني معملتش حاجه ، ده حقك اتكلمت بحُب بان ف صوتها ونبرتها _ لا عملت ، كفايه انك حاولت وعملت كده عشاني رديت بلامبالاه وانا مش متخيل ال انا بعمله ، او اني مش عايز اعشمها بحاجه = لا ده ماما ، هي ال اقترحت اعمل كده عشان متزعليش وكده صوتها اتغير ، بانت الخيبه ف حروفها ال نطقتها بزعل _ بجد ، طب قولها شكراً رديت ببرود وانا بستعجل عشان اقفل = العفو ، تصبحي ع خير _ وانت من اهله مقدرتش امنع ودني من انها تستشعر غصة البكا ف كلامها قبل م تقفل ، بس هو ده الصح ، مش لازم تفكر ان فيها من ناحيتي ليها عشان متتعشمش ع الفاضي ، مش لازم تفكر انها تفرق معايا ، او زعلها يفرقلي ومش عارف لي عايز اوصلها كده ، بس انا شايف انه دي الصح عدي اول يوم ، والتاني ، وجه يوم كتب الكتاب الايام ال فاتت مكنش فيه بينا اي كلام ، يدوب بشوفها ف الشركه بس ، وع غير العاده لو شافتني مش بتتكلم جه يوم كتب الكتاب ، صليت الفجر وفضلت صاحي مش عارف انام ، زي عادتي كل م اليوم ده يقرب ، اي فرصه للتراجع بمحيها بفكرة اني مش قدامي حل تاني ، وانا معنديش رفاهية الاختيار وف الأول والاخر مش انا ال عملت فيها كده ، مش انا ال حطيتها ف الموقف ده والدها عارف اني ماليش اي ميل ناحية بنته ومع ذلك هو ال صمم ، مش انا ال عملت فينا احنا الاتنين كده قاطع صوت افكاري ماما وهي بتخبط ع الباب بهدوء _ اي ي نوح ، يلا عشان تودينا لخطيبتك بصيت للساعه ف ايدي باستغراب بما انه الوقت بدري جدا = دلوقتي يماما ؟! _ اه يحبيبي يلا = بس مش لسه بدري ولا اي ؟ ده الساعه لسه 10 _ بدري اي يبني ده يدوب ، انت عارف بقا دلع البنات وكده = تمام هلبس بس _ طب بسرعه ع م اصحي اختك وتلبس تكون خلصت خرجت وقفلت الباب وراها وانا بالفعل بدأت البس هدومي عشان نروحلها لبست وخرجنا واتحركنا عشان نروحلها عشان نتفاجيء انه الانسه حوراء مش ف البيت ..... #Mai_Sayed #معتكف_ف_محراب_قلبي #حكايات_اخر_الليل استغفرو الله لعلها تصادف ساعة استجابهمعتكف ف محراب قلبي صلِّ علي رسول اللّه ❤ البارت الثاني عشر رنينا الجرس عشان تفتحلنا الداده وترحب بيا وتدخلنا ، بعد م قعدنا بدأت ماما الكلام وهي بتسالها بهدوء _ اومال عروستنا الحلوه فين ردت عليها الداده باحراج من تصرفات الطفله ال اسمها حوراء = احم ، انسه حوراء نزلت الشركه من بدري وع عكس الحموات ماما متعصبتش خالص ، ردت بكل هدوء _ ربنا معاها ويقويها مخدتش دور الحما عشان اميره اختي تاخده وبجداره وهي بتتكلم = ده ال هو ازاي يعني تنزل والنهارده فرحها ، ده غير انه نوح معرفها اننا هنروح للكوافير النهارده قبل م ارد عليها الرد ال يليق بمكاننا لقيت والدتي ردت وهي بتجز ع اسنانها وتبصلها بعصبيه _ محصلش حاجه ي اميره ، نزلت تتابع شغلها مكفرتش بعدين كملت كلامها وهي بتستعد عشان تقوم _ يلا يبني نروح الشركه نجيبها ونطلع ع مشوارنا رديت وانا بقوم فعليا عشان اتحرك = خليكي انتي ي امي ، انا هروح اجيبها ونيجي عشان متتعبيش نفسك خلصت كلامي وخرجت فعلاً عشان اروح لست حوراء الشركه ————————————— غريبه صح ؟ مش طبيعي فعلاً ابقي ف شغل يوم كتب كتابي ع الشخص ال بحبه وال بتمناه بس اي ف حياتي طبيعي ، اي ف حياتي ماشي صح او مظبوط ، حاسه انه مش مكتوبلي افرح ان ده مش مكاني ، اني لوحدي محدش متقبلني ، حتي نوح مش متقبلني انا مجتش الشركه النهارده عشان حابه الشغل ، او عشان ورايا شغل محتاج يخلص بالعكس انا تقريباً مش باخد شغل خالص ، انا جيت عشان ارتب افكاري ، عشان اعرف هعمل اي ف ال جاي هعمل اي مع نوح ومع اخته ، اخته ال متقبلاني مش عارفه لي ، كاني قتلالها قتيل بحس ان الدنيا بتستغرب طلبي للفرحه ، ال هو انتي تفرحي لي ، مع اني والله اتوجعت بما يكفي ، اتوجعت بعمري كله ومهما افكر ارجع بتفكيري تاني لنوح ، لايامي ال جايه معاه ، ارجع للفكره ال جت ف دماغي النهارده ، وال هي اني اسيبه وابعد من امتي كنت بفرض نفسي ع حد ، من امتي كنت ببقي موجوده ف حياه حد مش متقبلني مانا مش غبيه عشان افضل معلقه كل تصرفاته دي ع شماعه الدين ، وانه بيعمل كده عشان انا غريبه عنه ، اوك انا عارفه انه المفروض تبقي تصرفاته رسميه ف فتره الخطوبه بس مانا كمان عندي صحابي متدينين ، وبيحكولي ان الدنيا بتبقي الطف من كده بمراحل وده ال خلاني افكر اني اخد قرار الانفصال ونبعد وقبل م اقوم عشان ابلغ بابا بقراري لقيت نوح ف وشي لحظه هو انا كنت بفكر انفصل ؟! اصل تقريباً كده انا رجعت ف كلامي ، عادي واحده نسوان ارجع ف كلامي براحتي بصيتله وهو واقف ساند كتفه ع الباب براحه وحاطط ايديه ف جيوب البنطلون ولاول مره باصصلي بطريقه غريبه ، ولاول مره انزل عيني من عليه عشان متلغبطه مش متلغبطه من تفكيري وكده ، تؤتؤتؤ ، ده من حلاوته يجماعه ، الولا حلو اوي بجد ، انا عارفه مامته كانت بتتوحم فيه ع اي !! قبل م ابتسم ع تفكيري ال عمال ينجرف لحلاوته وكاريزمته لقيته بيتكلم _ انتي بتعملي اي هنا النهارده رديت بكذب وانا بحاول ابعد بعيني عن رؤيته = احم ، بشتغل _ بجد ؟! بتشتغلي ع اي بقا = ع مشروع بابا كان مديهولي رد ببرود وهو عارف اني بكذب ومستمره ف كذبي _ بجد والله ، طب م توريني التصاميم بتاعته كده = احم ، مهي مش معايا ، نسيتها ف البيت _ ولما انتي نسيتها بتعملي اي هنا سكت ومردتش فكمل كلامها بغضب ونفاذ صبر بدون م صوته يعلي _ هو انتي مش عارفه اني المفروض جايلك عشان نروح للزفت الكوافير طريقه كلامه وجعتني ، خلتني مش عارفه ارد عليه ، بس رفعت راسي وانا ببصله بوجع حاولت اداريه = زفت ؟! لف وشي عنه وهو بيستغفر ويحاول يهدي نفسه بس مكنش له لزوم عادي يعني خلاص اتوجعت وخلاص قبل م يتكلم تاني كنت اخدت شنطتي وقومت عشان امشي وانا بحاول امحي الغصه ال اتشكلت جوايا وانا بتكلم = عامه انا مكنتش اعرف حضرتك هتيجي امتي عشان نروح للزفت ، وقولت انك هتكلمني قبل م تيجي وساعتها هتحرك من الشركه ع البيت بس حضرتك مهانش عليك تكلمني ، عامه انا اسفه خلصت كلامي وانا بعدي من جمبه واخرج من باب المكتب بدون م يحاول يوقفني او يحاول يراضيني ف يوم زي ده والحمدلله انه محدش كان ف المكتب غيرنا ، والا الوجع كان هيبقي اكبر نزلت من الشركه ركبت عربيتي بدون م اتكلم معاه ، اتحركت بالعربيه تجاه البيت وهو كذلك اتحرك ورايا وصلت البيت ركنت العربيه ودخلت وسبت الباب مفتوح عشان يدخل بعدي لقيت مامته واخته قاعدين يهزرو مع الداده ، جريت عشان اترمي ف حضن مامته _ ماما ازيك ، وحشتيني ردت وهي بتطبطب ع كتفي بحنيه = وانتي كمان يقلب ماما وحشتيني ، عامله اي ي رورو _ الحمدلله يماما اهم حاجه صحتك كويسه ردت وهي بتبصلي بعد م خرجت من حضنها وقعدت ع ركبي قدامها = الحمدلله يحبيبتي بعدين وجهتلي الكلام وهي بتبص ورايا = اخبار نوح معاكي اي ، اوعي يكون مزعلك كان نفسي اشتكيلك منه والله ، كان نفسي رسمت ابتسامه ع شفايفي غصب عني وانا بتكلم _ لا يماما متقلقيش ، نوح كويس جدا معايا = وهو ميقدرش يبقي كويس ، ده انا كنت زعلته * مش هنخلص بقا ي ماما ولا اي ، خلينا نخلص من اليوم ده هو ده كان صوت اخته ، بس انا متاكده انه ده نفس الكلام ال كان بيقوله بينه وبين نفسه بصتلها بابتسامه من غير م ارد لان والدتها كانت بتتكلم هي _ محدش غصبك انك تيجي ي اميره ، فمدام جيتي اقعدي ، ورحبي بمرات اخوكي * لا حضرتك غصبتيني ، ولسه مبقتش مرات اخويا عشان ارحب بيها مازلت محافظه ع ابتسامتي ال اترعشت وانا ع وشك البكا ف اليوم ال المفروض يبقي اسعد يوم ف حياتي ردت والدتها تاني وهو بتبصلها بغضب _ يبقي تحترمي ال انتي قاعده ف بيتها ، وده مش بمزاجك ده غصب عنك مردتش ع مامتها ووجهت وشها الناحيه التانيه بغضب بعد م بصتلي بطريقه مش كويسه وانا قومت عشان أطلع اغير هدومي عشان نمشي ، اتكلمت وانا بوجهلها كلامي وبحاول ميعطش = انا اسفه اني عطلتكو بس بشمهندس نوح مقالش انتو جايين امتي ، عامة خمس دقايق هغير وانزل ، بعد اذنكو اتحركت اطلع قبل م استني حد منهم يرد ، عديت من جمب نوح ال مازال واقف مكانه من ساعه م دخل نوح ال محاولش يسكت اخته او يقولها عيب ال هي بتعمله ، او يقولها اني هبقي مراته فلازم تحترمني كان ساكت كانه مبسوط بال بيحصل ، او كانه نفسه فعلاً اني اسمع الكلام ده دخلت الحمام ، حطيت دماغي تحت الميه ف محاوله اني مبكيش ، واني الهي نفسي ببرد الميه عن التفكير ف كل ال بيحصل معايا ————————————— #يتبع #Mai_Sayed #معتكف_ف_محراب_قلبي استغفرو آلله لعلها تصادف ساعة استجابه ❤معتكف ف محراب قلبي صلِّ علي رسول اللّه ❤ البارت الثالث عشر غسلت وشي وغيرت هدومي ونزلت ، بعد م هديت نفسي وانه خلاص ، انا مش هتراجع يوم الفرح ، وانا كالعاده كفيله اواجه اي حاجه ومش حاجه ال هتوقفني او تخليني اضعف ، كفايه ضعف لحد كده نزلت مديت ايدي لمامته واخدتها وخرجنا واتوجهت لعربيتي قبل م افتح الباب واركب سمعت صوته وهو بيكلمني _ انتي راحه فين رديت بهدوء وانا مازلت مدياه ضهري ومامته مازالت ف ايدي = هركب العربيه عشان نمشي _ بس كلنا هنركب ف عربيتي رديت بنفس الهدوء ومامته واخته واقفين يتفرجو بصمت = بس انا عايزه اروح بعربيتيو اتكلم بنفاذ صبر - كالعاده معايا يعني - _ واحنا مش هنمشي بمية عربيه واحنا 4 بس ، اتفضلي يلا عشان نخلص قبل م اجادل تاني لقيت مامته بتشد دراعي وهي بتهمس = اسمعي كلامه يلا ومتجادليش ، كبري دماغك شويه ، واهو بدل م تتعبي نفسك ف السواقه وبعدين كملت كلامها بغمزه خبيثه غربيه ع طبعها الطيب = خلي التعب ل باليل يهبله ردت بغباء وانا مش واخده بالي من قصدها _ اي ده يعني اي ، مش فاهمه ردت بطيبه وهو بتغير ملامحها بطريقه مضحكه = الله يعينك ي نوح ي ابني ، واخدها هبله قبل م اتكلم معاها تاني ونتناقش سمعنا صوت نوح وهو قريب مننا وبيتكلم _ حزب الاحرار ال هنا مش هيخلص همسات النهارده ولا ايه هه بيهزر ، البيه بيهزر ، طويل القامه خفيف الظل بيهزر بصتله بلامبالاه مصطنعه من غير م ارد ، وده ال نرفزه جدا ، هه بهزر معاكو ، مخدش باله مني اصلا مامته ردت وهي بتزغرله = وانت مالك انت ، م نهزر براحتنا ولا انت غيران منها ردها ال ف صفي خلاني مش عارفه ازاي بدون م احس اطلعله لساني بطريقه طفوليه بحته لقيت انظاره اتوجهتلي ، فضل باصص فتره بدون اي ريأكشن لحد م لقيته بيتكلم بهدوء ع عكس العاده النهارده _ يلا ي حوراء عشان منتاخرش = احم ماشي يلا لقيت مامته بتميل عليا تهمس _ هتركبي ف انهي عربيه يبت ي حوراء رديت عليها بنفس الهمس وهو واقف يبصلنا بهدوء = عربية ابنك مصمصت شفايفها بطريقه مضحكه واتكلمت وهي بتبصلي من فوق لتحت _ يعني كان لازم يبصلك بعينه ي اختي عشان ترضي ع طول = مانا اعمل اي بقا ف ابنك وعيونه وقبل م نكمل همسنا وننسي نفسنا لقيته بيقاطعنا تاني بنفاذ صبر _ يبنتي يلا بقا ، يلا ي امي بالله عليكي ، مانتو هتبقو مع بعض طول اليوم قولو ال انتو عايزينه ردت وهي بتسيب ايدها من دراعي وبتتجه لعربيه نوح = يلا ي بني ، انا معرفش البت حوراء دي رغايه كده لي فتحت عيني بصدمه وبعدين ضحكت واتوجهتلهم ماما صفاء ركبت ورا وانا اتحركت عشان اركب جمبها ، بعد م لقيت اخته ركبت جمبه وهي بتبصلي بتشفي قبل م اركب العربيه جمب ورا لقيت ماما بتوجهلها الكلام وهي بتبصلها بغضب _ تعالي اركبي جمبي ي اميره = مانا ركبت هنا اهو ي ماما _ لا حوراء هتركب مكانك ، اتفضلي انزلي يلا نزلت وانا ركبت مكانها ونوح كذلك جه ركب وبعدين اتحركنا وصلنا لمكان الكوافير بعد م وصفتله الطريق ، انا نزلت وماما صفاء نزلت وقبل م اخته تنزل كان كلمها _ استني دقيقه ي اميره لو سمحتي هي فضلت وانا اخدت بأيد ماما صفاء واتحركت عشان ندخل قبل م ينادي عليا _ حوراء التفتله عشان اشوفه عايز اي لقيته بيخرج من العربيه بهدوء وجاي عليا = نعم اتكلم بهدوء شديد وهو ع عكس العاده بيبصلي _ من فضلك بلاش ميكاب تقيل ، يعني خليه خفيف ع قد م تقدري ولاني كده كده بحب الميكاب السيمبل رديت انا كمان بهدوء اشد ، ان لم يكن ببرود = ماشي سيبته من غير كلام واتوجهت للمحل ومامته ف ايدي بعد شويه لقيت اخته داخله وباين عليها انها مكشره وع وشك العياط ، الحقيقه متاثرتش ، احسن يارب يكون زعقلك ——————————— تمام مكنش ينفع اقولها زفت ، خاصه ف يوم زي ده ، بس اتعصبت والله العظيم غصب عني اتعصبت ، مش مستوعب حاجه ، مش متسوعب اني خلاص هتجوزها وعشان اكتشفت اني اتعصبت كنت هكلمها ، بس هي مدتنيش فرصه ، اينعم مكنتش هعتذر بس كنت هحاول اخبي ع ال قولته اوك عارف ان اميره غلطت ب اسلوبها وطريقه كلامها ، وعشان كده زعقلتها ف العربيه وحاولت اراضيها ، ناديتها قبل م تدخل عشان اراضيها عشان متزعلش ف يوم زي ده الوقت عدي واتلهيت ف تحضيرات كتب الكتاب ، وال كان ف بيتها ع حسب طلب والدها تحضيرات مكنتش حاسس اني بعملها من قلبي ، او عايز اعملها اصلا ، انا عايز كل ده ينتهي كلمت المأذون وروحت عشان اجيبها من الكوافير دخلت لقيتها واقفه مدياني ضهرها ، ماما واقفه تبصلها وهي فرحانه بيها كانه بنتها ، اميره واقفه مكشره بس بتبصلي وتبتسم لما حست بوجودي ابتدت تلف بهدوء وهي موطيه رأسها ، بهدوء وواحده واحده ابتدت ترفعها من غير م عنيها تتوجهلي لحظات وبصتلي ، حلوه وجميله وملامحها هاديه بس للأسف مش بحبها هاديه وضحكتها حلوه وطفولتها مبهره ، بس قلبي مش بيدقلها الفرحه باينه ف عنيها وملامحها بس مش باينه عليا انا غصب عني والله العظيم غصب عني قربت عليها لما لاحظت نظراتها الحزينه ليا ونظرات امي المتعصبه ليا كلمتها بهدوء وانا ببصلها وبحاول ابتسم _ مبارك لوهله حسيتها اتصدمت بس ردت وهي بتحاول تهدي = الله يبارك فيك خدتها واتحركنا عشان نركب العربيه ركبت قدام وبما ان فستانها كان عادي ركبت جمبي ، وماما واميره ركبو ورا ، وبما ان الفرح كان ع قدنا بس مكنش فيه حد موجود وصلنا البيت نزلنا قعدنا وشويه والماذون جه سلمت ع باباها وحطيت ايدي ف ايده واستنيت ، مكنش حد موجود غيري وغيرها وعمي وبناته ، منهم الاء ، الاء ال اتمنيت تكون جمبي اتمنيت تكون مكانها ، اتمنيت هي ال اتكون مراتي ، اتمنيت عمي هو ال تكون ايده ف ايدي دلوقتي ، هو ال كمان شويه يسلمني الاء ويوصيني عليها مش ال بيحصل ده فوقت من اوهامي ع صوت الماذون وهو بيتكلم عشان نبدا كتب الكتاب وقبل م يبدا يتكلم اتكلمت هي بطريقه غريبه _ استني ......... #يتبع #Mai_Sayed استغفرو الله لعلها تصادف ساعة استجابه ..❤معتكف ف محراب قلبي صلِّ علي رسول الله ❤ البارت الرابع عشر مندمتش اني روحت للكوافير ، مش عشان الميكب والكلام ده ، لا عشان مامته كانت حنينه ، وجمبي ، قبل م نبدا اي حاجه صممت تاكلني لما عرفت اني مكلتش كل شويه تبصلي وتبتسم فرحانه بيا كاني بنتها مش خطيبه ابنها ال لسه مبقتش مراته اكلتني هي بايديها ، صممت اني اخلص الأكل حتي لو كنت شبعت ، سقتني الميه بايديها ، كل ساعه تسالني اشرب عصير اي ، وبما ان عندي السكر مكنش ينفع اشرب عصير وبما انها متعرفش كانت كل شويه تسأل وانا ارفض بعد م خلصت الميكاب هي ال صممت تلبسني الفستان ، ع الرغم من انه مكنش منفوش ولا حاجه ، مكنش زي بتاع الفرح بس كان ابيض لبستني الفستان وهي ال صممت تلبسني التاج خلصنا وبصتلي والدموع ف عنيها وبعدين باست رأسي وحضتني وهي بتبكي بهدوء _ اول مره اعرف انه نوح محظوظ اوي كده رديت بهدوء وانا فرحانه بفرحتها بيا = هو محظوظ من يوم م اتولد بيكي ، يابخته _ لا لا هو مبقاش ابني خلاص ، بقا جوز بنتي ينفع اقول اني مبسوطه بالجوزاه دي عشان خاطر مامته مش عشان حاجه تانيه مستنتش كتير بعد م خلصت ولقيت نوح جه ، دخل ووقف ورايا وانا التفتله بتوتر ان لم يكن خوف مبارك !!! بس كده ؟! بجد يعني والله بس كده ؟ هو بجد ده ال بيتقال بس ؟ مش اكتر من كده ؟ رديت بهدوء وانا حرفيا عايزه اعيط بس مش هينفع ، مش وقته ومش مكانه اتحركنا ووصلنا ، قعدنا شويه وهو سرحان مش معانا خالص ، مش ف الدنيا اول م المأذون بدأ يكتب الكتاب وقفته ، معرفش لي بس حسيت اني عايزه اتراجع ، مش مستريحه لل بيحصل ده هو حساه مش موافق ، مش عارفه اي ال جابره بس هو مش مبسوط ، مش معقول ده شكل واحد بيكتب كتابه مش معقول ده واحد فرحان عشان هيكمل نص دينه ، حتي الالتزام مش بيمنع الانسان انه يفرح او يبين فرحته لما لاحظت نظرات الاستغراب ع وشهم لقيتني غصب عني بغير رايي اتكلمت وانا بحاول متوترش واثبت ع رايي _ فين ماما صفاء لقيت انظاره لفت ف المكان عشان يشوفها قبل م يلمحها جايه ف ايد اميره من جوا فك ايده من ايد بابا وجري عليها بلهفه عشان يطمن عليها اتكلمو شويه وبعدين لقيته جايبها وجاي ناحيتي ، قعدها ع كرسي جمبي وحط ايده ف ايد بابا تاني وانا لقيت ايد بتتمدلي بدفا ، وهي بتبطب ع كفي بحنيه ، مش محتاجه اعرف انها مامته ، مهو محدش بيحن عليا هنا غيرها ، ابتسمتلها بهدوء وانا بحاول مترميش ف حضنها وابكي بدأو مراسم كتب الكتاب وانا قاعده ساكته ، مش لاقيه حد يخصني حواليا ، مش لاقيه اخت ، ام ، صاحبه ، زميله ، ولا اي حد مش هبكي ، مش هبكي ، مش هبكي فضلت ارددها جوايا بهدوء بدون م اغفل عن خفوت صوته وهو بيردد الكلام ورا الماذون لحد م اخدت بالي من الماذون وهو بيشيل الماذون وانهم خلاص اعلنو الجواز بابا قام خطفني ف حضنه ، بكي وهو بيضمني _ مبروك ي حوراء ، مبروك يبنتي = الله يبارك فيك ي بابا _ كده خلاص هبقي مطمن عليكي رديت بمرح وانا بحاول مبكيش ، مبكيش عشان انا ال مبقتش مطمنه = قصدك اي يعني ي بابا ع فكره انا strong woman خرجني من حضنه وهو بيضحك ويمسح عينه من الدموع _ ايوه طبعاً انا عارف بس كده هبقي مطمن ان مشاكلك مش هتيجي فوق دماغي انا رديت بصدمه مصطنعه وانا بحاول اندمج معاه = وه ، قصدك اي يبابا ، ان انا بتاعة مشاكل ، اخص عليك يراجل _ لا لا طبعاً محدش يقدر يقول كده قبل م نكمل كلام لقيت مامته بتشدني وهي بتحضني بحنيه _ مبارك ي مرات إبني = الله يبارك فيكي ي ماما اتكلمت معاها وانا بلاحظ بابا وهو بيتوجه لنوح ويديله حاجه ف ايده بدون م اعرف اي هي ، وبدون م اهتم الحقيقه كبرت دماغي وفضلت اتكلم معاها وخمسه ولقيت اميره جايه وجايبه بنت ف ايديها ، الغريب انها بتبصلي بشماته ، والاغرب ان ماما صفاء بتبصلها كانها بتبصلها بعتاب جت وهي مازلت مبتسمه نفس الابتسامة الغريبه وهي بتعرفني ع البنوته ال معاها _ دي بنت عمي ي حوراء ، الاء ابتسمت للبنت ومع نطق اميره للاسم الاخير ابتسامتي خفتت بس منمحتش ، اصل مش ناسيه الاء ، ال نوح عارف المكان ال بتشتري هدومها منه يمكن بدون سبب او مبرر حسيت اني غيرانه منها ، بس ملامحها المبتسمه خلتني اسلم عليها وانا بحاول ابتسم انا كمان سلمنا ع الموجودين ، وال كان عددهم مش كتير خالص ، وبعدين اخيرا لقيته بيتوجه ليا وانا واقفه مع مامته اتكلم ببرود وهو بيبصلي عادي ، بس مش بصه كنت اتمناها ف يوم زي ده _ هاتي شنطك يلا عشان نمشي = احم ، هنحط الشنط ونروح كلنا ازاي _ هناخد الشنط واروحك وبعدين اجي اخد ماما واميره قبل م ارد لقيت مامته اتكلمت _ لا روحو انتو وانا هاجي ف تاكس انا واميره قبل مانا ارفض قبله لقيت بابا بيتكلم عشان يحل الموضوع = انا هجيبهم انا واجي الدنيا اتظبطت وطلعت جبت شنطي من فوق فعلاً ، قابلني ع السلم اخدهم مني ، سلمت ع بابا ، وال فضل يوصيه عليا ومشينا فتحلي الباب وركب وانا ركبت جمبه واتحركنا ، استنيته يتكلم ، يتلفت ، يقول اي حاجه ، اي حاجه مقالش سكت ، وفضلنا كده طول الطريق لحد م وصلنا للعماره ، خرج الشنط وطلعهم ، ركبنا الاسانسير واحنا مازلنا ف نفس الصمت محدش اتكلم دخلت ألشقه وهو دخل ورايا ومتكلمش ، حط الشنط ودخلهم اوضتنا وبعدين خرج قعد ع الركنه ، حط ايده ع دماغه بهم وسكت دخلت انا غيرت هدومي ولبست بجامه وخرجتله بعد م لاحظت الأكل ال محطوط ف نص الصاله بس الحقيقه مهتمتش ،خرجت لنوح عشان اتكلم معاه واحاول افهم حتي ف اي مهو اصل ده شيء مش طبيعي _ احم ، نوح رفعلي رأسه من غير م يرد ف انتظار اني اكمل كلامي _ قوم غير هدومك = ماشي اتكلمت تاني وانا بحاول افهم ف اي _ هو فيه حاجه ي نوح = حاجه زي اي ؟ _ معرفش انا ال بسالك ! = مفيش حاجه انا بس تعبان من مشاوير طول النهار بدون م احس لقيتني ببتسمله بهدوء وبمد ايدي عشان اخد بايده وادخله للحمام _ معلش ، خدلك دش يفوق جسمك كده وتعالي نام ، وان شاء الله الصبح تبقي كويس بصلي باستغراب شديد ، كانه مكنش متوقع ال انا عملته ، بس ده ممنعش انه يجاريني ف مشيتي فعلاً لحد م وصل الحمام بس قبل م يدخل اتكلم بتعب _ طب هجبلي هدوم دخلته بهدوء وانا بقفل الباب وهو مازال مستغرب = انا هجبلك ، اتفضل انت بس دخل وانا دخلت الاوضه عشان اجبله لبس فعلاً ، احساس جميل ، جميل اوي ان انا ال هجبله لبسه ع فكره انا عارفه اني هاجي ومش هتعامل انا وهو زي اي زوجين ، وان علاقتنا ف البدايه مش هتبقي سهله بالعكس هتبقي صعبه جدا بس انا قدها ، انا قد اي حاجه عشان اوصل لنوح جبتله لبسه ووديتهوله ، اخده منى وخد دش وخرج اتكلمت وانا بحاول افتح معاه كلام _ ها ، احسن دلوقتي ؟ = اه الحمدلله ، شكرا _ الشكر لله = ممكن تدخلى تتوضي _ حاضر بس لى ؟ = هصلي بيكي ، طبيعي يعني _ تمام لحظه دخلت اتوضيت بس مش هينفع اصلي كده ، انا مش معايا طرح اصلي بيها دورت عليه بعيني عشان اقوله لقيته قاعد ع الركنه وساند عليها رأسه بتعب مكنتش هصحيه ، كنت هفضل اتامله بس ، مش عايزه اكتر من كده ، بس هو صحي _ احم ، ف حاجه اتكلمت بتوتر وانا بلعب بكم البچامه بعد م نزلت عيني = انا مش معايا حاجه اصلي بيها بصلي للحظه وبعدين قام اتوجه للاوضه وانا دخلت وراه ، وقف قدام الدولاب وخرج منه اسدال ، ع مقاسي ، ده ال هو ازاي ! مركزتش لما لقيته مستعجل عشان تقريباً تعبان بدأ يصلي وانا صليت وراه ، صوته جميل ، جميل اوي ، ولطيف ، لطيف اوي اوي اوي خاشع ، وهادي ، تحس فيه بالسكينه ، تحس انك محتاج تسمعه دايما ، اعتقد لو الإنسان حزين فصوت نوح وهو بيقرا القران كفيل يمحي الحزن ده انا مش عايزه الصلاه تخلص ، ومش عايزاه يبطل يقرا ، صوته حلو اووي بس خلصنا صلاه ، وحط ايده ع جبيني وقرا دعاء اعتقد انه دعاء الازواج قبل م يسالني شؤال مكنتش اتوقع اني ممكن اتساله ، ومن نوح بالذات ......... #يتبع #Mai_Sayed #معتكف_ف_محراب_قلبي استغفرو آلله لعلها تصادف ساعة استجابه..❤