انا هخ,طب ج٢

عدي اسبوع ونص و رزان كل يوم تصحي من النوم وهي قلقانه و دايما بتعيط .. اياد كالعاده كان واقف جنبها و كانت صعبانه عليه جدا لدرجه انه كان بيفكر يقولها علي حقيقه امها .. لولا ان الام والاب مع بعض اخدوه للمستشفي كان شك انها عايزه تتخلص منه .. بس هو شايف ان ابو رزان طيب ومستحيل يعمل حاجه تأذي ابن اخوه ف كان متطمن من ناحيه حوار المستشفي لغايه لما راح لرزان فيوم من الايام كالعاده عشان ياخدها يفسحها شويه بدل م هي قاعده بتعيط علطول

بس المفاجأه انها لما فتحتله الباب كانت لابسه ومتشيكه و حاطه ميكب .. كان بقالها فتره طويله بتقابله بالبيجامه و كمان وشها مفيش فيه حاجه غير الدموع ~ اووه ايه الشياكه دي بس بصوت عالي -ماما انا رايحه اتغدي مع اياد واخدته و خرجت من الشقه ~ رايحين نتغدي بجد ؟ من غير م اتحايل عليكي ؟ -هنروح المستشفي الي فيها تميم .. انا عايزه اشوفه بنفسي واتطمن انه بخير

~ تمام يلا بينا و يارب يخلونا نشوفه بس استني -نعم ~ عرفتي منين اسم المستشفي الموجود فيها -دورت ف دولاب بابا فالاوراق بتاعته ~ اها دا انتي مش سهله خالص -يلا يا اياد نروح انا معنديش خلق للهزار ~ يلا بينا راحو المستشفي و لبسو البالطوهات الي رزان كانت محضراهم ~ بس كدا هنتقفش يا رزان ! اكيد حافظين اسماء زمايلهم الي معاهم فالمستشفي -طيب تعالا نستني لغايه بالليل خالص يكونو اغلب الدكاتره مشيو و بعدها ندخل و لو حد سألنا نقولهم اننا دكاتره جداد هنشتغل فالفتره الليليه ولسا دي اول ليله لينا هنا

~ تمام يا رزان قعدو فالشارع قريب من المستشفي شويه وهما حاطين ايدهم علي خدهم ~ رزان .. -نعم ~ لو انسان مخبي حقيقه عشان خاطر يعرف حاجه نفسه يعرفها اوي .. تفتكري لما صاحبه يعرف الحقيقه الي مخبيها عنه هيتضايق ؟ -طالما حاجه مش مستعجله ومش هتضر صاحبه لو معرفهاش ف خلاص مش هيزعل اياد اتنهد بفرح اصلا رزان من مصلحتها متعرفش حقيقه امها عشان متتضايقش و تحس انها عايشه ف وهم ..

-يلا يا اياد ندخل . الساعه ١٢ نص الليل ~ يلا دخلو المستشفي و كانت هاديه جدا جدا كان فيه ممرضه بتجري بسرعه فالطرقه الممرضه وهي بتصرخ بصوت عالي : بسرعه قولو للدكتور يجي يعمل جلسه كهربا للمريض !! مش عارفين نسيطر عليه رزان اتصدمت من كلامها و دخلت الحمام وعيطت و طبعا اياد دخل وراها ~ رزان مالك بعياط – اتخيل يكونو بيعملو كدا ف تميم بردو .. المفروض مكناش خليناه يفضل هنا اسبوع ونص كاملين يا اياد

~اهدي اهو هنلاقيه دلوقتي ونشوف حاله عامل ازاي المهم متتضايقيش مسحت دموعها و بصت ل اياد -مش عارفه بجد يا اياد من غيرك كنت هعمل ايه اياد ابتسم ~ علي فكره احنا ف حمام البنات ف يلا نخرج خرجو من الحمام و كانو بيدورو علي تميم بس المستشفي كانت كبيره + انتو مين ! بصولها وهما متوترين جدا ~ احنا الدكاتره الجداد الي اتعينا هنا .. هنشتغل فالفتره الليليه + ياه اخيرا وافقو علي طلبنا و وظفو دكاتره للفتره الليليه .. اصل الدكاتره هنا مش بيرضو يشتغلو فالفتره الليليه ابدا

~ اه احنا جينا نعوض النقص دا مدت ايدها عشان تسلم + انا الممرضه ريهام -وانا رزان ~ انا اياد + حلو اووي كدا ممكن نعمل شله بقا -ريهام .. ممكن معلش تقوليلنا عن مكان مريض هنا اسمه تميم ؟ ريهام استغربت من سؤالها وبدأت تشك فيهم + اشمعنا بتسألي عن المريض دا بالذات اياد اتدخل بسرعه ~ اصل احنا شفنا كل الملفات الي هنا ولفت نظرنا ملف المريض دا ف كنا حابين نشوفه اول مريض

+اهاا فهمت تمام امشو ورايا وهاخدكم عنده ومشيت قدامهم اياد ضرب رزان علي كتفها بلطف وهمس ف ودنها ~ كنتي هتكشفينا يا رزان ! -كويس انت صلحت الموقف ريهام بصت عليهم وشافتهم بيهمسو لبعض ف خمنت انهم مخطوبين او خطوبتهم قريب مثلا بما ان مفيش دبله ف ايدهم + تميم فالاوضه دي -ممكن تحكيلنا عن حالته يا ريهام ؟ ريهام بدأت تشك اكتر فيهم +مش المفروض شفتو الملف بتاعه و عرفتو حالته ؟