جريمه فى صميم القلب بقلم هاجر نور الدين

♥️♥️♥️سكريبت بقلمي(هاجر نورالدين)♥️♥️♥️ رمى من إيديه السكينة اللي فيها د*م وقال بهيستريه وهو باصص على جثـ *تها في الأرض: _لأ ، لأ لأ. دخلت في اللحظة دي ومعايا زمايلي من الشرطة وشوفنا المنظر، إتكلمت بحذر وأنا بقول: =إهدى وسلم نفسك، إنت مُتلبِس دلوقتي ومفيش حاجة هتفيدك. إتكلم وهو بيعيط وبيقول: _أنا بحبها مكنتش قصدي . روحت بهدوء ناحيتهُ وكلبشت إيديه وخدناه بعدها على القسم، بعد وقت طويل في التحقيق معاه رميت جسمي على الكرسي بتعب وإرهاق، غمضت عيوني وأنا بحاول أنسى كل اللي شوفتهُ النهاردة من جر*ايم، إتنهدت والحادثة بتاعت النهاردة فكرتني بـِ حور، فتحت عيني بتعب لما سمعت صوت الصول وهو بيقول: _سيادة المُقدم في إبلاغ عن جريمة حصلت في المعادي. إتنهدت وقومت من مكاني وروحت للمكان مع زمايلي والرُتبة الأقل مني، لما وصلت المكان كان مليان ناس كتير حوالين البيت وبيتكلموا بس، طلعت الشقة وكان فيها الطب الشرعي بياخد البصمات وبيشوف كيفية الجـ *ثة كان إزاي، سألت ضابط شرطة كان واقف وقولت: _ملقيتوش آي أثر ? رد عليا وقال بإرهاق واضح: =لأ للأسف، لما وصلنا مكنش في آي حاجة. _الشاهد اللي شاف الجـ *ثة الأول فين? إتكلم بإرهاق أكبر وقال: =راحت المستشفى اللي في الشارع الجانبي لإنها مستحملتش وأغمى عليها. بصيتلهُ بإستغراب وقولت: _إنت كويس? رد عليا وهو بيحاول ميُقعش وقال: =أيوا، كويس يافندم. كلمت ضابط شرطة تاني جنبي وقولت: _خد زميلك للمستشفى عشان مش بصحة كويسة. قدم التحية وقال: =أمرك يافندم. مشيوا من قدامي وأنا فضلت باصص ليهم بإستغراب، عيني جات على رجل ضابط الشرطة اللي تعبان وكان فيها د *م مهتمتش وقولت عشان هو هنا من بدري يمكن جِه على البنطلون غصب عنهُ، ركزت تاني في التحقيقات وبعد ما خلصنا روحت القسم خلصت شوية حاجات وروحت البيت وأول ما وصلت دخلت فردت جسمي على السرير بتعب وروحت في النوم، لو آي شخص عادي شاف د *م مش هيجيلهُ نوم، بس أنا إتعودت على الجرايم اللي زي دي كل يوم وكل دقيقة وكل ساعة، تاني يوم صحيت من النوم وكالعادة نزلت من الشقة اللي عايش فيها لوحدي بعد ما كانت حور جارتي و..حبيبتي بتحا *رب وحش الوحدة معايا ولكنها إختفت من خمس سنين والقضية بتاعتها إتقفلت، بصراحة هي متعرفش إني بحبها، أو مجاتش الفرصة إني أعترف، ولكن أنا واثق إنها لسة عايشة وبالنسبالي الملف بتاعها متقفلش ولا عمرهُ هيتقفل وأول ما ألاقيها هعترفلها بِـحُبي من غير تردد، وصلت القسم ودخلت مكتبي مسكت القضية بتاعت إمبارح وقعدت أقرأ فيها وفي كل حاجة ممكن توصلني ، دخل زميلي وصاحبي ياسر وفي إيديه ملف وقال: _القضية دي إتحولت ليك يا حازم، بنت تم وإتوجدت في نفق مهجور وهي حالتها صعبة جدًا، ومن الواضح إنها إتعرضت للعـ *نف كمان، وحالتها مش مستقرة وهي دلوقتي في المستشفى وفاقدة للوعي. قولت بلا مبالاة وأنا باصص للملف في إيدي: =وإتحولت ليا أنا ليه، معايا قضايا كتير بالفعل. حط الملف على المكتب وقال: _من غير ليه، الملف أهو وأنا هبقى آجي معاك عشان أوريك اللي لاحظتهُ هناك. بصيتلهُ وقولت بـِ ملل: =هو كمان لازم نروح النهاردة? إتكلم وهو طالع وقال: _معلش بقى، هستناك الساعة 5 عشان هنروح المستشفى. مشي من قدامي وأنا بصيت على الملف وإتنهدت ورجعت بصيت للملف اللي في إيدي تاني، الساعة جات 5 وروحت معاه للمستشفى اللي فيها البنت، دخلت الأوضة بتاعتها عشان أشوف خالتها وصلت لـِ إي، كانت بنت ملامحها شاحبة جدًا، الجرو ح على جسمها ووشها، واضح إنها عا *نت كتير جدًا، كنت هخرج من الأوضة أشوف ياسر راح فين بس وفقت فجأة بصد*مة أول ما لاحظت حر *ق بعلامة مُميزة مشكلة قلب مقلوب في دراع البنت، بصيت للبنت تاني وأنا قلبي بينبُض بسرعة وخوف، ركزت في ملامحها اللي عليها أثار ضر *ب كتير مضيع ملامحها وكانت هي فعلًا، رجعت لـِ ورا بصد*مة ولسة قلبي بينبض بسرعة ودموعي نزلت وأنا بقول بو *جع: _حور!! #هاجر_نورالدين #جريمة_في_صميم_القلب #يتبعالجزء التاني ♥️♥️♥️بقلمي(هاجر نورالدين)♥️♥️♥️ _حور!! دخل صاحبي في اللحظة دي وشاف منظري وأنا واقف ساند على الحيطة ودموعي على خدي جِه عندي بسرعة وقال بإستغراب وعدم فهم: =حازم، مالك في إي? منطقتش بكلمة غير إسمها وأنا باصصلها بصد*مة: _حور. أول ما سمع الإسم سابني بهدوء وراح بص في وشها وهو بيركز وقال بيحاول يهديني: =إزاي! ملامح وشها مش باينة، يمكن غلطان أو حاجة ياحازم إهدى. زعقت غصب عني وقولت بعصبية: _هي حور مش غلطان، مين الحيوا *ن اللي عمل فيها كدا. قرب مني ومسِك دراعي وقال بنبرة هادية: =إهدى طيب وهنعرف كل حاجة، إهدى كدا وإستجمع نفسك عشان تعرف تحقق في القضية وتوصل للي عمل كدا. كلامهُ كان مُقنع بالنسبالي، لازم أهدى عشان أجيب الحيو *ان اللي عمل كدا ووقتها هنتـ *قم منهُ أنا بنفسي، خدت نفس بحاول أهدي أعصابي وروحت جنب حور وأنا دموعي لسة نازلة غصب عني، مسحت دموعي وسألت بحِدة: _الدكتور قال إي? إتنهد وقال: =قال إن حالتها مش مستقرة وهتحتاج كام يوم عقبال ما تفوق. بصيت للأرض بحاول أهدي قلبي اللي ضرباتهُ بتتسارع عشان أمسك اللي عملوا فيها كدا وأخلـ *ص عليهم واحد واحد بإيدي، سابني ياسر لوحدي مع حور وخرج برا، فضلت قاعد جنبها لـِ ساعات وأنا باصصلها وحاسس بالعجز، إفتكرت أول مرة شوفتها فيها أول ما نقلت في العمارة بتاعتنا، وقد إي كانت جميلة وكلها حيوية وإبتسامتها مش بتختفي من وشها لحظة على عكس الجـ *ثة الهامدة اللي قدامي دلوقتي. ____________________________________ كانت طالعة على السلم وشايلة شنط تسوق كتير جدًا وطالعة بصعوبة، كنت لسة راجع من الشغل ومحتاج أنام بس، مسكت منها الشنط من غير ما أقولها لدرجة إنها إتخضت مني، سبقتها بسلمتين ووقفتني وقالت بإستغراب وهي بتاخد نفسها: _مش اللي بيحب يساعد حد بيقولهُ الأول! بصيتلها وتنحت لـِ دقيقة وقولت وأنا مُبتسِم: =معلش أصلي تعبان شوية وبرضوا مينفعش أسيبك تعاني لوحدك مع كل الشنط دي، إنتي جديدة في العمارة صح? بصتلي وقالت بإبتسامة: _أيوا، في الدور الخامس. بصيتلها بدهشة وقولت بفرحة: =وأنا أبقى الشقة اللي في وشك في الدور الخامس. إتكلمت وقالت بإبتسامتها الملائكية: _طيب كويس، جار طيب من أولها. إبتسمت وطلعت قدامها وهي ورايا، أول ما وصلنا قدام الشُقق، بصيتلها وكانت بتتنسف بعُمق، إبتسمت وقولت: _لسة بدري عقبال ما تتعودي على الـ 5 أدوار على رجلك. بصتلي وقالت: =ليه مفيش أسانسير? _لإنها عمارة قديمة شوية. إبتسمت وخدت مني الشنط بعد ما فتحت الباب وقالت: =شكرًا جدًا بجد. ردتلها الإبتسامة وقولت: _العفو على إي، ولو في آي حاجة أنا تحت أمرك. إبتسامتها وسعت وقالت بعيون لامعة: =ربنا يخليك، عن إذنك. دخلت وقفلت الباب وراها، فضلت واقف مكاني خمس دقايق وأنا بفكر فيها وبتنفس بـِ راحة خصوصًا لما شوفت إيديها مفيهاش دبلة وإنها ساكنة قدامي، دخلت الشقة بفرحة مش عارف سببها. _______________________________________ خرجت من المستشفى بعد وقت كتير ومعايا ياسر، إتكلمت بجدية وقولت: _لازم أروح أخلص القواضي اللي معايا عشان أفضي نفسي لـِ القضية بتاعت حور. إتكلم ياسر بتشجيع وقال: =وأنا هبقى معاك لو إحتاجت آي حاجة عشان نخلصهم. إبتسمتلهُ من غير روح وركبنا بعدها العربية ومشينا، وصلت القسم ومسكت ملف القضية بتاعت المعادي وأنا بركز في كل تفصيلة فيها، من المفترض إن الشاهدة اللي شافت الجـ *ثة الأول واللي تبقى خطيبة المقـ *تول جاية عشان تفيد بأقوالها، أول ما وصلت كانت في حالة حُزن وتوتر شديد، كانت قاعدة بتترعش بخوف، بصيت لها وقولت وأنا بديها ماية: _إهدي خالص، إشربي ماية. مسكت كوباية الماية وشربت شوية صغيرين وبعدين قربت من المكتب شوية وقالت بصوت واطي وخوف: =أنا شوفت القا *تل. بصيتلها بتركيز وقولت: _قولي مين هو وقولي كل اللي تعرفيه ومتخافيش من آي حاجة أوعدك هحميكي. بدأت تعيط وقالت بتوتر: =كان، كان لابس لبس ضُباط ونازل من على السلم في نفس الوقت اللي أنا كنت طالعة فيه للشقة. بصيتلها وأنا بشجعها تكمل وقولت: _شكلهُ عامل إزاي? إتكلمت بتوتر وهي بتحاول تفتكر وقالت: =كان لابس ماسك على وشهُ فـ مشوفتش ملامحهُ، بس اللي خلاني أعرف إن هو إن هدومهُ كان عليها د *م، مهتمتش في الأول وقولت يمكن من شغلهُ، بس لما طلعت وشوفت كريم وهو.. قطعت كلامها وبدأت تعيط بقوة تاني، إديتلها مناديل وقعدت مكاني وأنا باصث عليها بتركيز وبشوف ردود أفعالها إذا كانت صادقة، إتكلمت وقولت: _تمام أنا خدت أقوالك، هعيد النظر تاني وهعمل كل اللي أقدر عليه عشان ألاقي القا *تل، أوعدك. بصتلي بتوتر وقالت: =ممكن أمشي دلوقتي? هزيتلها راسي وقولت: _أيوا، إتفضلي. قعدت مكاني تاني وحطيت إسمها في قايمة المُشتبه فيهم. #هاجر_نورالدين #جريمة_في_صميم_القلب #يتبعالجزء التالت ♥️♥️♥️بقلمي(هاجر نورالدين)♥️♥️♥️ حطيت إسمها من ضمن لائحة المُشتبه فيهم، مسكت التليفون بعدها وكلمت الصول وطلبت منهُ يبعتلي ضابط الشرطة اللي رجليه كان عليها أثار د *م، بعد شوية جالي وقال بإبتسامة بعد ما قدم التحية: _شكرًا على اللي حضرتك عملتهُ معايا إمبارح يافندم. إبتسمت من غير روح وبعدين قولت: =أقعد ياحسام، إسمك حسام صح? قعد بتردد وقال: _أيوا يافندم، خير. إتكلمت وقولت وأنا باصصلهُ بتركيز عشان اشوف رد فعلهُ: =إنت من ضمن لائحة المُشتبه فيهم في جريمة المعادي. سكتت عشان أشوف رد فعلهُ، ولكنهُ كان ساكت وباصصلي بصد*مة، بعد دقيقة نطق وقال وهو مش مستوعب: _جريمة المعادي اللي كُنا فيها إمبارح، طيب ليه!! =خطيبة الضحية أفادت بأقوالها وقالت إنها شافت ظابط على السلم وهي طالعة الشقة لـِ خطيبها وكانت هدومهُ فيها د *م، بس كان لابس ماسك ومعرفتش تشوف وشهُ، وأنا لاحظت إن هدومك كان عليها د *م. إتكلم بتبرير وهو كلامهُ مُتقطع وقال: _أنا هدومي كان عليها د *م لإن خطيبة المتوفي لما وصلت كانت مُنهارة وقاعدة جنبهُ على الأرض وإيديها جات على الد *م بتاعهُ، وأول ما شافتني قامت مسكت فيا بخوف وإيديها جات على هدومي فـ بالتالي دا يبرر وجود الد *م. كنت ساكتت وباصص لـِ كلامهُ وردود أفعالهُ، وأول ما خلص قربت منهُ شوية وقولت بتساؤل: =لما وصلت هناك، إي اللي وصلك لـِ حالة التعب دي? فكر شوية وقال: _أنا نفسي مش عارف السبب لإني كنت رايح كويس جدًا، بس تعبت فجأة وبعد ما وصلت المستشفى أغمى عليا هناك، والدكاترة قالت إني كويس وكل حاجة تمام ومكنش في سبب للتعب فـَ ممكن يكون إرهاق. رجعت ضهري لـِورا وأنا باصصلهُ بتفكير وقولت: =تمام، تقدر تمشي إنت. قام وقدم التحية ومشي من المكتب، فضلت قاعد ساعة..إتنين..تلاتة وجالي إتصال كنت مستنيه، رديت وقولت: _إي لاقيت حاجة غريبة? جالي رد الضابط اللي بعتتهُ عشان يراقب خطيبة القتـ *يل وقال: =كل اللي شوفتهُ غريب يافندم، بصراحة من ساعة ما نزلت من القسم وهي مش شكل واحدة لسة خطيبها وحبيبها مقتـ *ول، يعني كانت بتتكلم في التليفون وبتضحك وبعدين راحت كافيه وقعدت مع شخص كدا وكانوا بيهزروا وماسكين إيد بعض، معرفتش أسمعهم أوي بس كل اللي سمعتهُ أكيد كان "مفيش حاجة في طريقنا تاني"، "هنبقى أغنية وهنسافر". غمضت عيني من ألم القضية وقولت بتنهيدة: _كدا قدرت أربط كل حاجة واللي للأسف مكنتش عايزها زي توقعاتي المرة دي، عايز كل حاجة تخُص الشخص اللي كانت قاعدة معاه وعايزهُ بكرا يكون عندي هنا. =أمرك يافندم. قفلت معاه وسندت راسي بين دراعي على المكتب وأنا بفكر في حور، إبتسمت أول ما إفتكرت موقف طريف ليا معاها واللي كان. ______________________________________ فتحت الباب اللي بيخبط بغضب وأنا في إيدي المعلقة اللي كنت بقلب بيها الأكل على النار اللي لـِ تالت مرة بعد ما أحرقهُ وكانت حور، إتغيرت ملامح وشي من الغضب لإبتسامة بلهاء وقولت: _أقدر اساعدك بآي حاجة. كتمت ضحكتها لسبب أنا مش فاهمهُ وقالت: =لأ، بس شكل حضرتك اللي محتاج مساعدة، في ريحة حريقة كانت جاية من الشقة بتاعتك وبصراحة الريحة لا تُطاق، فـَ قولت أشوف لو في حاجة. إتكلمت بتفكير وأنا ببُص للمعلقة وقولت: _لأ لأ مفيش الكلام دا، أنا بس كنت بطبخ بيض بالبسطرمة وشكل كدا البسطرمة بايظة. بصتلي بإستغراب وقالت: =بتطبخ وبيض في نفس الجملة!! بصتلها وقولت برفعة حاجب: _إي مش طبيخ دا ولا مش طبيخ! رفعت رجليها من على الأرض وجابت حاجة من شعري وهي بتضحك واللي كانت شعرية وقالت: =طيب إي علاقتهم بالشعرية! بصيت للشعرية بإسغراب وبرائة وقولت: _ما أنا كنت بخترع طبخة جديدة، بس هي اي اللي جابها في شعري! ضحكت وقالت: =أنا عاملة مكرونة بشاميل النهاردة ممكن أبقى أجبلك، بس متخترعش تاني عشان مستقبل البشرية. سابتني واقف باصصلها بدهشة ومشيت من قدامي وبعد شوية خبطت عليا وهي في إيديها صينية مكرونة بالبشاميل صغيرة وقالت: _أنا كدا كدا عاملة إتنين، إتفضل بالهنا والشفا. مسكتها من إيديها وقولت: =في الحقيقة أنا في وضع ميسمحليش إني أرفض فـ هوافق، شكرًا جدًا بس ليكي عندي كدا عزومة برضوا. إكتفت بإبتسامة وسابتني ومشيت، بصراحة مكنتش عارف أركز مع جمال المكرونة ولا مع جمال اللي عاملة المكرونة، اللي مكنش حلو في اليوم كلهُ التنضيف مكان الحريقة اللي عملتها في الشقة دي. ________________________________________ فوقت من ذكرياتي على صوت ياسر صاحبي وهو بيهز دراعي وبيقول: _حازم. رفعت راسي وبصتلهُ بعيون مفيهاش روح وقولت: =أيوا يا ياسر. إتكلم بحُزن وقال: _روح إنت ريح شوية في البيت وأنا هغطي مكانك النهاردة. بصيت قدامي لـِ مدة دقيقتين وبعدين قومت ومشيت بعد ما شكرتهُ، كنت ماشي في الطُرق تايه، أنا فكرتها طول الـ 5 سنين رجعت للبلد بتاعتها قبل ما تيجي هنا مثلًا، رجعت فجأة زي ما جات فجأة، بس..مكنتش أتخيل إنها ترجعلي بالشكل دا، ترجعلي وهي متعرضة لـِ كل دا، أنا شوفت أسوأ الجرا *يم، بس صد *متي المرة دي مش من القضية صد *متي من الضحية نفسها، روحت البيت وأنا قلبي وا *جعني بِشدة ودخلت نمت ودمعة هاربة نزلت على خدي حتى من غير إستأذان. #هاجر_نورالدين #جريمة_في_صميم_القلب #يتبعالجزء الرابع ♥️♥️♥️بقلمي(هاجر نورالدين)♥️♥️♥️ تاني يوم جهزت ونزلت وقبل ما أروح القسم روحت المستشفى عشان اشوفها، دخلت الأوضة وكانت نايمة زي ما هي في نفس حالة ملامحها اللي مفيهاش روح والمحاليل متعلقة وشكلها اللي بيقطـ *ع قلبي، قربت منها ومسكت إيديها وغصب عني دموعي نزلت، قد إي وحشتني وقد إي نفسي ترجع تبُصلي بعيونها تاني وتبتسملي إبتسامتها الساحرة، قد إي كنت مستني لحظة رجوعها تاني ويوم ما ترجعلي تبقى بالمنظر دا، فضلت قاعد جنبها ساعة من غير آي حاجة، مُجرد باصصلها بس وبفتكر كل دقيقة عيشتها وهي كانت معايا فيها، إفتكرت يوم ما جاتلي القسم في مرة وإتفأجات إني شغال ضابط. ________________________________________ كانت قاعدة مستنية وفي واحد واقف وماسكهُ العسكري عشان ميهربش، إتكلمت بغضب وقالت: _أنا هوريك قيمتك دلوقتي، ومش هتنازل دا بعينك. إتكلم الراجل بغضب: =ما خلاص بقى يا أستاذة متاخديش مقلب في نفسك يعني، أنا بعاكس آي حد معدي، وبعدين قولت هدفعلك فلوس. قامت وقفت بغضب وقالت بعصبية وصوت عالي: _إنت حيوان، ومش هسيبك غير لما أشوفك ورا الحديد بعيني يا حُسالة المجتمع. خرجت على الصوت بغضب وقولت بصوت عالي: =في إي يا إبراهيم! قبل ما العسكري يرد عليا شوفتها وهي بصتلي بصد *مة واللي كانت متقلش حاجة عن صد *متي لما شوفتها وقولت: _آنسة حور، إي اللي جابك هنا? ردت عليا بسؤال ودهشة: =إنت اللي إي جابك هنا، إنت ضابط?! رديت عليها وقولت: _أيوا، مقدم. إبتسمت بـِ شر وقالت: =حلو أوي.. بصت للشخص اللي كان ماسكهُ العسكري من دراعهُ وكملت: =المقدم حازم يبقى جاري، وريني بقى تتخرج منها بالفلوس إزاي يا حقيـ *ر. بصتلهُ بغضب من قبل ما أعرف اللي حصل وقولت بعصبية: _إنت عملت إي يالا? إتكلم بإهتزاز وقال: =يا باشا معملتش حاجة بس الأستاذة بتحب تأڤور. إتكلمت هي بغضب وقالت: _إنك تتحر *ش بيا لفظيًا دا كدا آڤورة يا تور. قربت منهُ بغضب وعصبية وضر *بتهُ في وشهُ بغضب وقولت: =بتتحر *ش بيها يا حيوان، دا انا هخليك تقضي سنتين في السجن. بصلي بخوف وهو ماسك وشهُ بألم وقال: _سنتين ليه يا باشا، دا هو المفروض كام شهر بس، ولا عشان الأستاذة تخُصك يعني هتيجي عليا? بصتلهُ بغضب وقولت: =أه عشان الأستاذة تخُصني، خدهُ يابني على الحجز. بصتلي بدهشة وإبتسامة وقالت: _ضابط بقى ها? رديت عليها بإبتسامة وأنا بمشي إيدي على شعري وباصص في الأرض: =أه بعرف أعمل حاجات تانية بعيدة عن الطبيخ يعني. _________________________________________ ضحكت على الموقف اللي كان بيننا وقومت بعدها من جنبها وأنا باصصلها بحُزن، روحت القسم وكان الشخص اللي كان مع خطيبة القتيـ *ل موجود وفي إنتظاري، قعدت على المكتب وبصتلهُ بجمود وقولت: _أنا سامعك، إحكيلي. إتكلم بتوتر بعد ما بلع ريقهُ وقال: =أحكي إي مش فاهم، أنا الحكومة جات خدتني وأنا مش فاهم آي حاجة بجد. بصتلهُ بجنب عيني وقربت منهُ شوية وبقت عينهُ في عيني وقولت: _إحكي كل تخطيطك إنت وخطيبة القتيـ *ل بتاع المعادي عشان تقتـ *لوه، يلا إحكيلي قصة نجاحكم. فضل يبُص يمين وشمال بتوتر وهو بيترعش وقال: =مفيش الكلام اللي حضرتك بتقولهُ دا، هنعمل كدا ليه يعني. بصتلهُ ومن غير مشاعر وقولت بِحِدة: _بُص، زميلتك في الجريمة إعترفت بِكل حاجة لما مسكناها الصُبح وحققنا معاها، وقالت إسمك وإنك إنت اللي قتـ *لتهُ، وخلاص مبقاش في قدامك غير إنك تعترف يمكن الحُكم يبقى خفيف عليك وتاخد كام سنة بس غير كدا فـَ هتاخد إعد *ام وش. إتوتر وإتكلم بغضب وقال: =دي كدابة، أنا مقتـ *لتش حد، الخطة كانت خطتها أصلًا، أنا أه وافقتها على اللي هتعملهُ بس أنا مقتـ *لتش حد ولا أقدر أعملها، هي اللي إتفقت وعملت كل حاجة وبعتت بلطجي لـِ بيتهُ على هيئة عامل في الغاز الطبيعي وخلـ *ص عليه. كنت قاعد باصصلهُ وساكت بس، مستنيه يقول ويعترف بـِكل حاجة بنفسهُ، رفعت سماعة التليفون وقولت بِجمود: _المُتهم إعترف بِكل حاجة، تعالى خدهُ على الحجز يابني وقول لـِ ياسر يتحرك وياخد الخطوة ويقبُض على المُتهمة فورًا. قفلت معاه فـَ بصلي بتوتر وهو بيعرق وقال بتهتها: =إنتوا لسة مقبضتوش عليها? إبتسمت إبتسامة جانية وقولت: _هنقبض فورًا، تعيش وتاخد غيرها. دخل العسكري بعدها وخدهُ من قدامي، فضلت قاعد وبفكر قد إي الإنسان مخهُ صغير أوي، يعني مُجرد ترميلهُ حاجة تُثير هرمون الأدرينالين عندهُ والإستفزاز يشتغل فـَ يبدأ يقول كل حاجة إنت محتاجها ومش محتاجها كمان، رجعت راسي لـِ ورا وغمضت عيني بهدوء، راحت عليا نومة غصب عني وبعدها لاقيت ياسر بيهزني جامد وهو مُبتسم وبيقول: _يا حازم إصحى بسرعة في خبر حلو. بصتلهُ بـِ نُص عين وأنا لسة نايم وقولت: =إي، أبوك طلق أمك? ملامح وشهُ بقت عابسة وقال بصوت واطي نسبيًا: _حور فاقت. قومت بلهفة وسرعة من قبل ما أفتح عيني وقولت: =بجد? بصلي بإبتسامة وقال: _أيوا، لسة قافل مع المستشفى دلو.. سبتهُ بعدها ومشيت من غير ما أسمع باقي كلامهُ وسمعتهُ وهو بيشتمني بس مش مهم، المهم إن حور فاقت. #هاجر_نورالدين #جريمة_في_صميم_القلبالجزء الخامس ♥️♥️♥️بقلمي(هاجر نورالدين)♥️♥️♥️ جريت بعدها على المستشفى وأنا عيوني مُبتسمة قبل وشي، كُلي حماس عشان أشوف عيونها من تاني، وصلت المستشفى وقبل ما أدخل الأوضة اللي هي فيها فضلت واقف شوية، حاسس بتوتر ولهفة مش طبيعية، إتشجعت وفتحت الباب، دخلت بهدوء وأنا باصص عليها وكانت باصة للسقف من غير آي رد فعل، أول ما شافتني دموعها نزلت وهي بتصرخ وبتقول بهستيريه: _إطلع برا، متدهلش وتشوفني في الوضع دا. إتصد *مت من ردة فعلها بس كنت حزين جدًا، هي مرت بـِ حاجات كتير جدًا صعبة ووحشة، قربت منها بهدوء وقولت بغضب وحُزن: =أنا مش هسيب اللي عمل فيكِ كدا وعد، إهدي أنا مش فارق معايا آي حاجة، أهم حاجة إنك بخير وإني شوفتك تاني. فضلت تعيط بصوت عالي وبتقول بِتقطع: _أنا مش بخير ياحازم، أنا في اسوء حالاتي بجد، أنا شوفت كتير أوي. حسيت بقبضة في قلبي وأنا بسمع كلامها، حاسس إن روحي هتروح مني من كتر الحُزن والغضب اللي حاسس بيه، حاولت أتماسك قدامها على قد ما أقدر عشان أشجعها وقولت: =أنا مستنيكي بس تفوقي كويس وتكوني بِصحة كويسة وهعرف منك كل حاجة وإي اللي حصل خلال الـ 5 سنين اللي فاتوا بالتفصيل وأوعدك إني هجيب اللي عملوا كدا وهخليهم يندموا على اليوم اللي إتولدوا فيه. العياط بتاعها هِدي شوية وقالت: _أنا أقدر أحكي دلوقتي عادي. وقولت بحنان وأنا مُبتسم إبتسامة خفيفة: =مش هتقدري تتكلمي دلوقتي عشان تعبانة والدكتور قبل ما أدخل قالي الكلام الكتير غلط عليكي دلوقتي، إرتاحي وأنا اوعدك إني هجبلك حقك ومش هسيب واحد من اللي عملوا فيكِ كدا. بصتلي بإمتنان ودموعها نازلة بصمت، مقدرتش أشوف دموعها أكتر من كدا وقولت: _أنا همشي دلوقتي عشان فيه ورايا شغل في القسم هخلصهُ وآجي هنا تاني وهبات هنا معاكي. بصتلي وقالت بإمتنان: =شكرًا بجد يا حازم، أنا حقيقي من غيرك مكنش هيبقى ليا سبب أعيش بعد اللي حصل معايا. إبتسمتلها ومشيت من قدامها بسرعة عشان دموعي متنزلش قدامها، ركبت العربية وأنا عيوني مليانة دموع وقلبي بيتـ *قطع عليها وبينفرط في الحُزن، وصلت بعد شوية القسم وقعدت خلصت القضايا اللي معايا في سرعة وبعد حوالي 4 ساعات خلصت وروحت المستشفى تاني، دخلت ليها الأوضة وأنا مُبتسم وجايب كيكة بالشيكولاتة اللي هي بتحبها وآيس كوفي، لما وصلت عند السرير لاقيتها نايمة، ركنت الحاجات على التربيزة اللي جنب السرير وقعدت جنبها أتأمل فيها شوية بـِ حُب وحُزن، إبتسمت لما إفتكرت موقف الكيكة بالشيكولاتة اللي كان بيننا. ______________________________________ خبطت الباب عليها وأنا مُبتسم، فتحتلي وأول ما شافت منظري ومنظر الكيكة اللي في إيدي إتصد *مت وفضلت تضحك بشكل متواصل، فضلت باصصلها بإستغراب وخيبة أمل وقولت بلوية بوز: _هو كدا خيرًا تعمل شرًا تلقى. حاولت توقف ضحكاتها وقالت: =متقولش إن دي كيكة بجد! بصيتلها بجنب عيني وقولت: _تعرفي تعمليها دي? إبتسمت بسخرية وقالت: =بصراحة لأ. إتكلمت بإحراج وقولت: _كنت عرفت إنك بتحبيها جدًا وإتحديت نفسي وقولت أعملها بدل ما أجبها وأهي تبقى فيها تعب أكتر، عشان أردلك المكرونة، بس هي قلبت على إختراع فحم جديد. رجعت تضحك تاني وأنا رغم إني كنت متدايق إلا إني غصب عنس قعدت أضحك معاها وأتتريق على نفسي، أنا أه شخص فاشل مطبخيًا بس شاطر في حاجات تانية زي خطف القلوب مثلًا..بيقولوا يعني. ________________________________________ فوقت من سرحاني على صوتها وهي بتقول: _سرحان في إي? بصيتلها بإبتسامة واسعة وقولت: =فيكِ. إبتسمت وبعدت عينيها عني بإحراج وقالت وهي باصة للكيكة: _دا إي? مسكتها وفتحتها وطلعت منها الكيكة وقولت بإبتسامة: =الكيكة اللي بتحبيها وجبت كمان آيس كوفي عشان نقعد نسهر مع بعض. قامت قعدت وأنا ساعدتها وقالت: _حازم أنا بجد مستعدة إني أحكي كل حاجة دلوقتي وأنا فاكراها بالتفصيل. ركزت معاها وقولت: =تمام كُلي الكيكة الأول ونتكلم وإحنا بنشرب الآيس كوفي. بصتلي بإبتسامة وهزت راسها بالموافقة، بادتلها الإبتسامة وإديتها الكيكة وبدأنا ناكل. #هاجر_نورالدين #جريمة_في_صميم_القلب #يتبعالجزء السادس والأخير ♥️♥️♥️بقلمي(هاجر نورالدين)♥️♥️♥️ بعد ما خلصنا أكل مديت ليها إيدي بالآيس كوفي وأنا مُبتسم، خدتهُ من إيدي وقالت: _هبدأ أحكي. بصيتلها بتركيز شديد وهي إتنهدت تنهيدة كـَ محاولة تخرج بيها اللي متراكم جواها وقالت: _أنا عارفة مين اللي ورا كل اللي حصلي دا. بصتلها بصد *مة وقولت: =مين هو طيب? بصت قدامها وقالت: _عمي، مسألتش نفسك قبل كدا أنا ليه فجأة نقلت في العمارة بتاعتكم ومعييش أهلي أو آي حد من قرايبي في المنطقة. بصتلها بتركيز أكبر وكملت وقالت: _أنا أصلي من الصعيد محافظة أسيوط، كانت حياتي طبيعية بس بعد وفاة والدي وعمي مُصمم إنهُ ياخد الورث بتاع والدي لإنه عندهُ أراضي كتير وطبعًا مفيش وريث لـِ والدي غيري لإنهُ مش مخلف غيري، وكان عايزني أتنازل عن كل دا ليه هو، رغم إنهُ هياخد جزء بحُكم إنهُ أخو والدي، ولكن الطمع اللي كان فيه مرضيش بالجزء دا وقال البنات مالهاش ورث، لِدرجة إنهُ في مرة كلن عايز يخلـ *ص عليا، والموضوع مكنش مرة ولا إتنين، الموضوع إتكرر ييجي 10 مرات، لحد ما والدتي قالتلي إني لازم أسافر بعيد عن عمي وأذاه، وبالفعل جهزت نفسي ولميت حاجتي بالليل والبلد كلها نايمة وخدت أول قطر جاي على القاهرة، الأمور كانت كويس لما نقلت هنا لحد ما جالي تليفون في اليوم اللي إتخطـ *فت فيه وكان من واحدة كبيرة في السن باين من صوتها وقالتلي آجي البلد بسرعة لإن عمي عايز يقتـ *ل أمي بسببي، طبعًا نزلت على طول وفي سرعة ومن غير تفكير وأنا كل همي أمي بس، بعد ما نزلت ووصلت لمحطة القطر لاقيت حد كممني وأُغمى عليا ومشوفتش شكلهُ، بعد ما فوقت لاقيت نفسي في مكان مهجور يشبه لـِ عمارة لسة بتتبني كدا، كنت خايفة جدًا وبعدها دخل راجل ضخم وفضل يهـ *ددني أعمل كل اللي هيطلبوه من غير ما اسأل ومن غير ولا كلمة، وجايلي ورقة عشان أمشي عليها من غير ما اقرأ اللي فيها حتى، أنا رفضت أمضي وبعدها الراجل الضخم دا وراجل تاني بدأوا يضـ *ربوني بِشدة وبعدها الراجل الضخم دا إتكلم وقالي إن دي كانت فرصتي الوحيدة إني أمشي من غير آي حاجة، بس مش هيدوني الحرية بالساهل بعد كدا، فضلت 3 سنين على نفس الحال ومحدش بيكلمني ولا آي حاجة، مجرد واحد بيدخل يحط الأكل والشرب وبيمشي من غير كلام، فضلت أترجاهم يخرجوني وأنا هعمل اللي عايزينهُ خلاص لإن فاض بيا، بس محدش كان بيرد عليا وأنا مكنتش أعرف إي سبب كل دا بجد، كنت حاسة إن عدا أيام كتير أوي بس معرفش عدا قد إي، كانت الأيام بتاعتي كلها شبه بعض وكنت بتمنى المو *ت كل يوم أهون من اللي كان بيحصلي واللي كنت عايشاه، لحد ما في يوم دخل الراجل الضخم دا ومعاه الورقة وقالي أمضي من سكات، مضيت فورًا وأنا في اعتقادي إنهم هيسيبوني خلاص، خد الورقة وقال لواحد واقف يوصلها للباشا، بعدها بصلي نظرات غريبة وقالي هتطلعي بس مش دلوقتي، وسابني ومشي وأنا قعدت أعيط لإني مش فاهمة انا ليه هنا وإي اللي بيحصل، عدت شهور بعدها وأنا مستنية أمشي ومش بشوف الراجل الضخم دا، لحد ما جِه في مرة تانية وقال وهو مُبتسم إن خلاص همشي، صدقتهُ ومشيت معاه، ركبت معاه العربية ووصلنا بعدها على مكان مهجور تاني، بصتلهُ بخوف وقولت إن دا مكان مهجور، رد عليا بإبتسامة مُشمئزة، ان دا مكاني الجديد مفهمتش كلامهُ وبعدها زقني لـِ جوا بالعافية وربطني في الكرسي عشان متحركش، فضلت حوالي شهرين في المكان دا وأنا مش بعمل آي حاجة ولا آي حاجة بتحصل غير إن الراجل دا سا *دي ومجنون ومتضطرب نفسيًا، بيحب يعـ *ذب الناس ويشوفهم بيتـ *ألموا بس، كان بيضر *بني بكُرباج طول الشهرين وهو مبسوط وبيضحك، بس في يوم جِه معاه واحد تاني أقذ *ر منهُ وإغتصـ *بني تحت دفاعي ورفضي واللي كنت كل ما أرفض يضر *بني لحد ما شو *هني وفي الأخر خبط دماغي جامد في الأرض وأغمى عليا وبقيت سا *يحة في د *مي، بعدها معرفش إي اللي حصل ولما فوقت لقيت نفسي في المستشفى. خلصت كلامها وهي بتعيط وأنا مع كل كلمة بتقولها الد *م بيفور في عروقي والغضب بيكبر جوايا، إتكلمت بعصبية وأنا بحاول أهدي نفسي قدامها وقولت: =طيب إديني إسم عمك والمكان بتاعهُ بالظبط. بعد ما خدت منها التفاصيل مشيت من عندها وروحت القسم عرفت ياسر باللي هعملهُ وإني هسافر الصعيد حالًا وهو هيبقى يكلم ناس من القسم هناك يتحركوا معايا، ركبت أول قطر على أسيوط وأول ما وصلت البيت لاقيت ضباط مستنييني هناك، فتحت الباب بعُـ *نف ودخلت لاقيتهُ قاعد بآريحيه وماسك كوباية شاي، أول ما شافنا وشهُ جاب ألوان ووقف وقال بتوتر: _في إي يا سعادت الباشا? روحت عندهُ وضر *بتهُ في مناطق متفرقة بغضب شديد، لحد ما الضباط لحقوني وبعدوني عنهُ قبل ما أخلـ *ص عليه، كلبشتهُ وخدتهُ بعدها وركبت قطر تاني لـِ القاهرة، أول ما وصلت القسم في القاهرة قعد قدامي بخوف وتوتر ووشهُ بيجيب د *م، إتكلمت بغضب وحِدة شديدة وقولت وأنا مركز معاه: =بنت أخوك حور محمد حسين، إنت مُتهم بقضية خطـ *ف وتحريض على إغتـ *صاب وشروع في قتـ *ل. بصلي بتوتر وبدأ يعرق وقال بتهتها: _مفيش الكلام دا ياباشا، البت دي كدابة وبتتبلى عليا. خبطت على المكتب بقوة واللي خلاه إتخرص، وقولت في حِدة: =أنا عارف كل حاجة ومش جايبك عشان أسمع منك، كدا كدا هتعفن في السجن مع إستقبال خاص بيك، عايز أعرف دلوقتي الناس اللي إنت شغلتهم للعملية دي ومكانهم فين. فضل ينكر إنهُ عمل كدا لحد ما قولت بغضب: =لو فضلت تنكر من هنا للسنة الجاية مش هصدقك، معايا الأوراق اللي تثبت اللي حصل في حور ومعايا برضوا الأوراق اللي خدتها من بيتك واللي فيها إمضة حور على عقد تنازل للورث بتاعها ليك، ودا اللي حصل في مدة الخطف، هتتكلم كتير هخليهم يعملوا معاك الواجب عشان تقول أسماء الناس التانية، هاا هتختار إي? فضل قاعد متردد ومتوتر وبيطلع عرق من كل حتة، بعدها بلع ريقهُ وقال: _هقولك على اسمائهم بس والله ما كنت أعرف اللي عملوه أنا قولتلهم يمضوها على العقد بس حتى لو الموضوع خد شهور عشان يخلوها تتنازل أنا موافق، ودا كان عن طريق التهديدات والكلام دا بس معرفش موضوا الخطـ *ف والإغتـ *صاب والقتـ *ل، أنا بس كنت عايز الورقة مش أكتر. قولت بغضب وصوت عالي: =إنجز ومترغيش كتير. قال على أسمائهم بعدها والأماكن اللي بيبقوا فيها، خدت فريق وطلعت على الأماكن على طول وخدتهم كلهم بعد وقت من تبادل الرصاص. عدا بعدها 3 شهور كنت حريص جدًا على إنهم ياخدوا مؤبد أو إعد *ام، وبالفعل خدوا مؤبد عشان هما خطر على الدولة، روحت قابلت حور في المستشفى لإنها هتخرج النهاردة بعد ما تم شفاها بالكامل وأول ما شوفتها إبتسمت وقالت بِشكر: _حقيقي ياحازم مش عارفة أشكرك إزاي. إتكلمت وقولت وأنا باصصلها بإحراج بسيط: =بإنك تتجوزيني مثلًا. بصتلي بِدهشة وقالت: _إي? ردتلها نفس الدهشة وقولت: =إي! بصت قدامها بِحُزن وفي دمعة نزلت منها واللي زاد غرابتي وقالت: _صدقني ياحازم تستاهل واحدة أحسن بكتير. بصيتلها بغضب وقولت: =مش هلاقي واحدة أحسن منك بجد، وأنا عارف مين حور وحقيقي مش شايف غيرك ومش عايز غيرك، إنتي وبس اللي حبيبتي، حور أنا بحبك، ومش من دلوقتي لأ، من زمان أوي، ومش هسيبك تضيعي مني تاني وبصراحة بقى كدا هتجوزك برضاكي أو غصب عنك بقى مش هتفرق الأهم النهاية واحدة. بصتلي بدهشة وصد *مة وهي رافعة حواجبها وقالت: _والله! أومال كنت عاملي فيها رومانسي ليه من الأول، مش هتجوز شخص ديكتاتوري لأ. بعدها خدت شنطتها ومشبت من قدامي وأنا جريت وراها وأنا بقول: =إستني بس هفهمك بهزر والله أنا عيل أصلًا. ودلوقتي أقدر أقول بعد إلحاح كبير من حور عشان تتجوزني وافقت أخيرًا، إحم للتوضيح يعني عشان حور سمعاني، بعد إلحاح كبير مني أنا هي وافقت عليا وإتجوزنا. #هاجر_نورالدين #جريمة_في_صميم_القلب #تمت

مقالات ذات صلة

حبك محال دارين الاطرش 1

لاميرضنيش

سوليه نصار ٤

سيف القاضي اسراء شويخ 4

اترك تعليقاً إلغاء الرد