كنت واقفه ع شط اسكندريه الساعه 2 بليل وفي ايدي كل الجوابات بتاعته ،مسحت دموعي وروحت رميتهم فالبحر وقعدت ع الرمله اعيط..لحد ماسمعت صوت ورايا كنت متاكده في اي لحظه انهم هيبقوا موجودين -تمام يافندم تم الوصول للمتهمه في شاطئ المندره. =هاتوها حالا تبقا ع المكتب قصادي -اوامرك يافندم لاقيت العساكر قربوا عليا ومسكوا ايدي حطوا فيها الكلبش وسحبوني للبوكس كل دا بهدوء من غير اي رد فعل مني!
بعد أقل من نص ساعه كنت واقفه قصاد ظابط قاعد ع مكتبه بيدخن سجاير بشراهه وعيونه تشبهه عيون الصقر في حدتها بيحاول يعري عقلي بعيونه ويوصل للي جواه وانا واقفه بكل برود.. حسام:صحفيه،شاطره وذكيه او زي مابيقولو عنك يعني انك ذكيه لو أني شايف انك غبيه! امل ببرود:الغباء اقصي مراحل السلام النفسي لاقيت بصلي بنظره غل وشر! حسام:بتوصلي للمعلومات ازاي امل:بتجيلي لحد عندي حسام باستغراب:بتضربي الودع تلاقي المعلومات قصادك! امل:حضرتك متعلم وعارف ان الودع تخاريف كل الموضوع ان الرزق بيجي لحد عندي مش اكتر
حسام بغضب:رزق اي… قطع كلامه مع رنه تليفون مكتبه حسام بغضب:ايوه انا المقدم حسام.. فجاه نبرته هديت•ايوه يافندم هي قصادي اهي =…. بس يافندم اخلي سبيلها ازاي وهي… =…. حسام :تمام يافندم لاقيته بصلي بغل وانا واقفه ابصله بكل برود حسام:اتفضل ياعسكري فك كلبشات المدام قصدي الانسه دا العريس هرب قبل الفرح بيومين مش كدا ياانسه أمل.. نظرتي اتحولت من البرود للشر وكأن عايزه اقتله بنظراتي،حسيت بغل الدنيا اتجمع جوايا كنت عايز افتت جلده من الغل..
فكوا الكلبشات وطلعت من القسم ع البيت.. مبني قديم في شارع بيطل من زوايه منه ع البحر،فتحت باب الشقه ودخلت اترميت ع اقرب كنبه بتعب بياكل من جسمي طبقات،كان النهار بدأ يطلع ،قومت عملت كوبايه قهوه وحطيت شال ع كتفي وطلعت البلكونه،رغم بروده الجو الشديده إلا ان الحزن والوجع اللي جوايا مسخن اطرافي وبتنفس بسرعه وكأني بصارع نفسي.. روحت ع علبه السجاير اللي بقت ملازمني مؤخرا طلعت منها سيجاره مختلفه عن الباقي محشيه بماده مخدره او زي مابيطلق حشيش!
غريب ان احنا نجيب نبات بيتزرع فالصحرا ونسميه ماده مخدره لمجرد أنه بيخليك تخرج من الواقع المقرف اللي احنا فيه.. مسكت تليفوني وبعد مده تدوير لا تتعدي الدقيقه كنت برن ع رقم .. امل بهدوء:اي الاخبار سعيد:كله تمام اتنازل عن القضيه..بس اتمني انك تبطلي تهور اللي كان هيوديكي ويودينا في داهيه خرجت نفس من السيجاره اللي في ايدي بهدوء امل:ساعات الحياه بتبقا عايزه شويه اكشن سعيد بنرفزه:اكشن اي ياامل انتي اتجننتي انتي عارفه نتيجه اللي عملتيه لو مكنش اتلحق كان اي اللي هيحصل وبلاش عاطفتك تخليكي مجنونه..
امل:طيب طيب يااسعيد اشوفك فالجريده سلام روحت ع اللاب بتاعي وفتحت البيدج بتاعتي اللي متابعين فيها قربوا يوصلوا للمليون! وبدأت اقرأ تعليقات ع اخر سبق صحفي ليا بين مؤيد ومعارض وبين شتيمه وتشجيع.. وبين مصدق وبين لا.. ” لا خير في قوم تحكمهم العاطفه ،وتصم اذنيهم عن حقيقه العالم البشعه السوداويه..” نزلت البوست وقفلت اللاب وقومت عشان اغير هدومي وانزل وجوايا طاقه العالم كله .. امل:صباح الخير ياعم محمد بالله فنجان القهوه ابعته ع مكتبي بسرعه لاحسن منمتش من امبارح
-عنيا ياست الاستاذه سعيد:اهلا اهلا بالهانم امل:سعيد بالله منمتش ومش قدرالك سعيد:انتي بتكتبي عنه عشان اللي عمله فيكي ولا عشان فساده! امل:سعيد… انا صحفيه ودا شغلي ومش هقدر انطق بكلمه زياده عن كدا وبدأت انشغل في الكتابه عن تفاصيل واحد من اهم رموز المجتمع وحياته اللي بدأت من طريق غلط وواحده باعها قبل الفرح بيومين بس.. جالي رساله ع التليفون من رقم برايفيت مش ظاهر ” استني قصاد باب بيتك الساعه 6 المغرب،ليكِ كل الامان متقلقيش”
رغم قوتي اللي ظاهره ديما وفضولي وانه مبخافش الا اني شبهه الورقه الهشه اللي من ريح اتلوي..الرساله فضلت طويل اليوم شاغله تفكيري عن صاحبها وسببها خلصت شغل وروحت البيت نمت ساعتين وقومت كلت ولبست كانت الساعه 6 الا ربع بالظبط نزلت وقفت قصاد باب البيت لحد مابقت 6.. جت عربيه باللون الرمادي وقفت قصادي وبابها اتفتح فضلت واقفه مستغربه شويه يمكن عشان كنت معتقده ان العربيه هتبقا سودا وجوها ناس لابسه اسود زي مابشوف فالافلام!
ركبت فالعربيه كان فيها سواق بس ، ساق من غير ولا كلمه ،حوالت اوجهله كلام لكنه مردش ففضلت اني اسكت واوفر مجهودي للي جاي احسن! بعد اقل من ساعه وقفت العربيه قصاد عماره باين انها من الطراز الحديث والفخم واللي لا يمت للعماره اللي انا عايشه فيها بصله كان واحد واقف قصاد الباب اول ماشافني دخلني لحد جوا في اول دور.. كان مكتب ولكن اشبهه بمكاتب الاحلام انتيكات في كل مكان،ولوح كل حاجه فيه كلاسيك حتي الالوان
-الانسه امل صفوان! فوقت من سرحاني فالمكتب لواحد تقريبا في سن الخمسين باين من خصلات شعره البيضا اللي احتلت ع شعره الاسود،ببدله كلاسيك تشبه المكتب اللي انا فيه وبابتسامه لطيفه متشبهش خوفي ابدا - اتفضلي اقعدي قعدت ع كرسي وهو قعد ع الكرسي اللي قصادي مش ع المكتب -اتفضلي قهوه ساده رفعتله حاجبي باستغراب لكن رديت وانا اطرافي بتترجف •متشكره.. -انا نعيم الالفي المحامي..محامي استاذ مازن الصواف امل:اااه قولتلي بقا كدا البيه خايف مني لافضحه وجايبني يترجاني هو خاف وكش بعد سنه من الفضايح مش كدا
نعيم:استاذ مازن ميعرفش مبقابلتنا دي امل:بمعني! نعيم:بمعني دي مقابله وديه بيني وبينك امل:اي بيني وبينك ودي عشان نتقابل.. نعيم:انا محامي استاذ مازن ،طبعا مجموعه الحرب اللي بدأتي شنها عليه من اقل من سنه،كانت بتوصلني وبقراها وهو كمان حاولت اتخذ اجراء قانوني معاكي لكنه رفض بكل الطرق ولاسباب مش راضي يقولها..كل اللي قاله انه مش هاين عليه يآذيكي بـ اي شكل،احترمت رأيه،لكن انتي هجومك زاد عليه جدا وبطرق ووسائل بايخه واقل مايقال عنها انها رخيصه .. انا السبب في امر الضبط والاحضار ليكي امبارح لكن للاسف بعد مااستاذ مازن عرف اتواصل مع ناس معرفه ليه واتنازل وخرجك!
اللي انتي بتكتبيه دا مع ان ملوش اي اساس من الصحه لكن بياذيه في شغله جدا.. فقررت انا اتصرف لو عايزه فلوس قولي وهيتدفعلك المبلغ اللي تطلبيه.. بدات اضحك بقوه لحد ماعيني دمعت امل:هو الفاسد بقا ليه عين وبيتكلم وبجاحه كمان نعيم بهدوء:انتي عارفه كويس ان مازن مش فاسد امل :فاسد وانت فاسد زيه وعاملين دور الشرف وعايشينه ع اصله بس هفضحكم وهتشوفوا وسيبته وطلعت وانا حاسه بغل جوايا وشر وماشيه بدوس خطواتي بكل الغل اللي جوايا من البجاحه اللي شوفتها
روحت البيت روحت عن النوت بتاعتي كتبت فيها «غيابك غُربه.. ألم يحن الموعد،لتُذيقني حلاوه الوطن ياوطني!» انا واثقه انه بيحب الرسايل المكتوبه بالايد،انا هبعتله الرساله رقم..ثانيه واحده انا حتي من كتر مااببعت مش عارفه دي الرساله الكام بس لحد دلوقتي متظراه يرد عليا نزلت بعتها ع فاكس لـ عنوان ” مازن الصواف”! ورجعت قعدت ع سريري ضمت ركبتي لقلبي وفضلت اعيط بحزن العالم كله اللي متجمع جوايا
كانت كل حاجه في حياتنا ماشيه كويسه عرفته وانا وانا لسه صحفيه مبتدئه شجعني عشان اكمل وواصل شغلي وحياتي للاحسن وهو كمل في مجال البيزنس اللي بيحبه رغم انه كان بردوا لسه مبتدئ،حبيته بكل ذره فيا اتخطبنا وحددنا معاد الفرح كل حاجه ماشيه زي الحكايات اللي بنقراها حياه ورديه بين اتنين بيحبوا بعض وكل حياتهم ماشيه تمام انا وحديه ومليش اهل وهو وحيد زي بالظبط احنا الاتنين مقطوعين من نفس جذع الشجره عشان كدا قلبه اتطابق علي قلبي وضمه..ليه سابني وبعد ليه!