عايده وهي مبتسمه بخبث:صباح الخير يااستاذ عادل ايه إللى جايبك بدرى اوى كده خير في حاجه ولا ايه
عادل مأمون بأستغراب:والله علمي علمك الباشا اللي طالبني
عايده:ااااااه طيب اتفضل حضرتك علشان عمي مايتعصبش انت عارفه دقيق في مواعيده
عادل :طيب عن اذنك ياعايده هانم
دخل عادل على مكتب الجد مباشرة
عادل :صباح الخير ياباشا
الجد:تعالى يامأمون اقعد عاوزك
عادل:ياباشا اتفضل دايما تناديني بأسم أبويا
الجد:عشرة عمرى أبوك انا عارف انك بتضايق لكن تعود بقي ياسيدى وسيبك من الكلام الفاضي ده وخلينا في المهم
عادل :خير ياباشا أول مره اشوفك مهموم اوى كده
الجد: انا عاوزك تطلع الوصيه القديمه وتعدل فيها لازم جسور يتجوز ميسون بنت حازم
عادل:طيب والانسه سيلين مش هي الأكبر برده
الجد:هي الأكبر لكن ان كان لازم يبقي يتجوزهم هما الاتنين
عادل وبدأ على ملامحه الدهشه:بس أزاى ياباشا
الجد:العهد بيقول ان مافيش بنت من العيله تتجوز غير من ابن عمها وعلشان كده ولادى متجوزين بنات اخواتى وبما أن جسور هو الولد الوحيد يبقي يتجوز البنتين
عادل:لكن ياباشا العهد حالل الموضوع ده وان ممكن البنت إللى مالهاش عريس من ولاد عمها تتجوز من ابن خالتها
وانا عاوزك تخفي الجزء ده من العهد انا يهمني أن جسور
يتجوز من بنت حازم وطبعا عايده عمرها ماحتسكت وحتقلب الدنيا لو بنتها ماتجوزيتش جسور
عادل:يعني ياباشا هي مش حتقلبها لما يتجوزهم هما الاتنين
الجد : طول ماانا عايش حاقدر احمي حفيدتي وواثق ان حييجي يوم وجسور هو اللي يحميها
عادل:أوامر ياباشا لكن تفتكر جسور بيه حيوافق
الجد:لازم يوافق هو لو رفض انا حكتب نص التركه لميسون بنت حازم وكده سيطرته على الشركات حتضيع
عادل:انا مستغربك ياباشا ماهي الانسه سيلين حفيدتك برده
الجد:عندى أسبابي ياعادل لكن حقولها فى وقتها المناسب
عادل: أوامرك ياباشا الدينى يومين واكون جهزت كل حاجه
الجد بصرامه:
عادل مش محتاج افكرك مافيش مخلوق يوم خبر بالكلام ده
عادل :ياباشا طول عمرنا انا وابويا وقبلنا جدى كاتمين أسراركم وبالمناسبة عايده هانم مستنياني في الجنينة
الجد:ههههه اتفضل طول عمرها غبيه فكرها انها ممكن تعرف منك حاجه
عادل:ولا يهمك ياباشا اتعلمت منها على كده
خرج عادل مأمون وطبعا لقي عايده مستنياه لكن المره دى فاقت كل التوقعات
عايده:هاااا ايه ياعادل حتقولى عمي كان عاوزك ليه ولا برده بتعمل فيها المخلص الأمين
عادل:عادى ياعايده هانم الموضوع مش مستاهل لانها مسائل شغل مش اكتر
عايده:بقولك ايه ياعادل تاخد كام وتعرفني عمي ناوى على ايه
عادل:على
كل خير ياهانم لكن اوعدك ان يوم ماينوى على حاجه حقولك وانا أولى باللى حتديهولى
عايده وهي مش مصدقاه:فكر ياعادل مصلحتك معايا
خرج عادل من القصر وهو في عربيته اتصل بلغ الجد بكل الحوار إللى دار بينه وبين عايده
عدى اليومين من غير أى حاجه جديده ماتحصل واول ما عادل بلغ الجد بأنه خلص كل حاجه اتصل الجد بأولاده وبلغهم انه عاوز يجتمع بيهم النهارده وبما أن الكل كان خايف وان كلمة موسي الشامي أمر اجتمع أفراد العيله في الميعاد
ووصل عادل مأمون
الجد:اكيد كلكم عاوزين تعرفوا انا مجمعكم ليه وانا حوفر عليكم الحيره انا قررت
أن جسور يتجوز
الجميع : يتجوز مين
الجد :انتوا ناسيين ان في عهد واحنا ماشيين عليه من ايام أجدادنا
عايده بفرحه:يبقي حيتجوز سيلين طبعا
ميسون كانت قاعده ودموعها جوه عيونها وماحدش شاف لمعة عينيها غير جدها وقرر يفجر المفاجأة وويكسر نفس عايده
الجد:لا ياعايده جسور حيتجوز بنتك وبنت عمها
حازم :ازاى يابابا انا مش حقبل علي بنتي تكون زوجه تانيه
الجد بغضب :انت بتعصي العهد
عايده:
أنا كمان مش موافقه ام بنتي تتجوز علي دره
الجد:براحتكم لكن قبل ماتاخدوا قرار لازم تعرفوا العهد بيقول ايه .أقرالهم العهد ياعادل يمكن يكون ليهم قرارات تانيه
عادل بعد ماطلع ورق من شنطته:أقر انا عبدالله الشامي ان جميع ممتلكاتي تورث لابنائي وأحفادى وأحفاد احفادى بشرط عدم دخول او دم غريب عن عائلتي وان يتزوج جميع بنات العائله من أبناء أعمامهم حتي وان اضطروا ان يتزوج الرجل لأكثر من زوجه ومن يرفض منهم تنفيذ العهد فهذا بمثابة تنازل منه عن نصيبه من التركه ويعتبر نفسه منبوذ من العائله وعلى جميع أفرادها التبرئ منه رسميا بالجريدة الرسميه وهذا العهد كتبته حفاظا
على ممتلكاتى وانا بكامل قوايا العقليه وتم توثيقه بالشهر العقارى ولا يجوز الطعن عليه
جسور:معناه ايه الكلام ده ان انا لازم اتجوز الاتنين
الجد:ايوه الكلام واضح
عايده:
ويعني ايه يتبرئ منه بالجريدة الرسميه
عادل:يعني نعمل إعلان ان الشخص ده مش من العيله ولا يمكن التعامل معاه علي انه منها
عايده:دى حتبقي فضيحه كمان
الجد بصوت مرعب:وهو لو مافيش عهد كان حد فيكم حيقدر يقولى لأ
جسور :بس ياجدى ميسون صغيره جدا عليا
ميسون وهي بتقوم من الاجتماع:عن اذنكم
الجد:على فين ياحبيبتي انتي لازم تقولى رأيك
ميسون :اللي حضرتك وبابا تشوفوه ياجدو
الجد:ماشي ياحبيبتي اطلعي انتي
عايده: خلاص ياعمي احنا موافقين
الجد:مش انتي إللى حتتجوزى ياعايده اسمع رأى سيلين
سيلين:
مش عارفه ساجدة سيبونى افكر
جسور بعصبيه:تفكرى في ايه انا مش بقول اني ميت فيكي ده قرار على الكل
الجد:معلش ياحبيبي سيبها تفكر مع اني عارف قرارها
جسور :خلاص ساجدة اللي تشوفه اعمله وابقي بلغني اللي المفروض يتعمل
عايده:متزعلش من سيلين ياجسور الخبر كان مفاجأه عليها هي طول عمرها عارفه انك ليها لكن الجديد انك تكون مقسوم بينها وبين حد تاني
جسور بغضب :ايه ليها دى ياطنط ايه كمان مقسوم انا اعرف ازاى اعدل بينهم
مشيره:ربنا يهديك ياابني ويقدرك
الجد: جسور انا عاوزك تعالى معايا علي الجنينه وانتي ياعايده اطلعي شوفي قرار بنتك
عايده:حاضر ياعمي
جسور بضحك:يلا ياجدى تعالى وانا اسندك
الجد:تسند مين ياولد ده انا اجمد منك ده انا حتي بفكر اتجوز وارتاح منكم هههههههه
جسور :ياجدو ياجامد
وخرج الجد والمحامي وجسور
وطلعت عايده لابنتها وفي غرفة سيلين
عايده:انتي ازاى تقولى لجدك افكر يعنى البنت المفعوصه دى اوعي منك
سيلين :وانتي عاوزانى اعمل ايه اتجوز جسور علشان يقرفني ويعملى فيها سي السيد ويفضل بقي رايحه فين جايه منين
عايده:لا ازاى ارفضىواتنازلى عن ثروتك إللى عملاكي بني ادمه
سيلين :مامي انا بني أدمه من غير الفلوس
عايده:انتي عبيطه جسور معجب بيكي من زمان وانا
عارفه كده كويس لازم تعرفي تعلقيه بيكي ومايشوفش غيرك انتي وبس ميسون دى عيله عايشه دور البراءه وانتي جميله وشقيه وروشه لازم تسمعي كلامي علشان نسيطر على كل حاجه فاهمه
سيلين :يعني عوزانى اعمل ايه دلوقتي
عايده:انتي حتنزلى حالا وتاخدى جسور على جنب وتبلغيه بموافقتك وتتدلعي كده وتعتذرى عن كلامك الخايب وتبرري تصرفك
سيلين :حاضر حنزل
******ياترى ايه اللي حيحصل وعايده وسيلين حيعرفوا يوقعوا جسور وجده كان عاوزه في ايه تابعونى وحتعرفوا*******
الحلقه الثانيه /
خرج الجد وجسور وأستاذن المحامي بالانصراف بعد ماشاف في عيون الجد نظرة رضا عن الحبكه القانونيه إللى خلت الموافقة على قرار الجد لازمه اخد الجد جسور لأبعد مكان في حديقة القصر وده خلى جسور يحس ان فى حاجه مهمه جده مش حابب حد يعرفها
جسور :ايه ياجدى بتبعد كده ليه هو اجتماع مغلق ولا ايه
الجد:انا مش عاوز حد من الحوش إللى جوه يسمعنا
جسور :قلقتني ياجدى خير
الجد:انا عاوز افهم انت عاملت بنت عمك كده
ليه
جسور :مين فيهم ياجدى ماانا كلمت الإتنين بنفس الطريقه تقريبا
الجد:انا بتكلم عن ميسون كسرت بخاطرها
جسور:بالعكس ياجدى انا قولت الحقيقه ميسون صغيره جدا عليا الفرق بينا ١٢سنه
الجد:انت مش حاببها علشان هاديه وفى حالها مش زى سيلين شقيه ومجنونه
جسور :بالعكس ده يمكن سبب فى اني مش عارف اقرب منها رغم اعجابى بيها وانى عارف انها فى الاخر حتكون مراتى
الجد:انا عاوزك تحتوى ميسون وتاخد بالك منها
جسور:غريبه ياجدى عمرك مافرقت فى المعامله بينهم دلوقتي عاوزنى اهتم بيها اكتر من سيلين طيب ازاى وانا المفروض اعدل بينهم
الجد:اسمع ياابنى انا عندى
أسبابى واكيد فى يوم من الأيام حتعرفها لكن دلوقتي تسمع كلامي زى ماعودتنى طول عمرك
جسور:وعاوزنى اعمل ايه ياجدى انت عارفنى انا ماليش فى حركات الشباب وكلامهم
الجد:ههههه بقي انت عاوزنى انا اعرفك
جسور:عموما ياجدى انا حطلع اراضي الاتنين
الجد:ماتستعجلش دلوقتي تلاقي عايده بعتالك بنتها هي إللى تصالحك
ابتسم كل من الجد وجسور وماعداش دقايق ولقي سيلين بتنادى عليه
ابتسم الجد ابتسامه معناها ان كلامه اتحقق
سيلين:جسور عاوزه اتكلم معاك شويه بعد اذنك ياجدو
الجد:اتفضلي ياحبيبتي انتوا فى حكم المخطوبين دلوقتي
قام الجد وهو بيغمز بعينه لجسور ودخل القصر
جسور:خير ياسيلين
كنتي عاوزه تقولى حاجه
سيلين بدلع:كنت عاوزه اعتذرلك عن طريقتي في الكلام انت عارف اني اتمني اتجوزك طبعا لكن حقيقي اتصدمت ان حد ممكن يشاركنى حبك كان نفسي تحبني انا بس زى ما……
جسور:ايه سكتى ليه كلمى
سيلين:
اكمل ازاى عاوزني اعترف انى بحبك من أول مابدات اكبر وافتح عيونى على الدنيا وعرفت أن عهد عيلتنا كتبننى على اسمك وانا فرحتي ماكانش ليها حدود بقي معقول الراجل الوسيم القمر ده إللى كل البنات حتم*وت على نظره منه حيكون جوزى وحبيبي
جسور بمكر:يااااه كل ده كنتى شيلاه في قلبك وساكته
سيلين :واكتر من كده كمان بس للاسف مضطرين ننفذ العهد واقبل بنص راجل
جسور بغضب:ايه نص راجل ديه فى حاجه اسمها العدل بينكم وحعرفك ازاى انك اتجوزتى راجل كامل ياهانم
سيلين:حبيبي انا مقصدش والله طبعا انت سيد.الرجاله كلهم انا قصدى انك حتكون مضطر تعاملها كويس علشان
جدو يعني وكده
جسور :اولا- انا مش حكون مضطر لانها حتبقي مراتى زيها زيك .ثانيا -مش يمكن هي تعرف تخليني أحبها
سيلين:لا دى طفله وصعب جدا تعرف تتعامل مع راجل ناضج زيك
جسور:واثقه فى نفسك اوى انتى ياسيلين
سيلين:لا يا حبيبي واثقه فى حبى ليك
وقطع كلامهم ظهور عايده وطبعا جايه تكمل إللى بنتها بدأته
عايده:ايه ياولاد كل ده كلام انتوا ماصدقتوا ولا ايه ؟
جسور:لا أبدأ انا كنت لسه حدخل حالا
عايده مقاطعه:عادى يا حبيبي انا بهزر معاكم ده انتوا حتى لايقين على بعض اوى وشكلكم زى القمر صحيح يا جسور هو جدك ما تكلمش معاك على معاد الفرح او تفاصيله
جسور :لا لسه ماحددناش حاجه
عايده:انا بس عاوزه اعرف علشان الوقت مايسرقناش وأقدر أجيب لبنتى كل إللى بتتمناه
سيلين:حبيبتي يامامى ربنا مايحرمني منك
جسور:بعد اذنكم حطلع أرتاح شويه
عايده وسيلين :اتفضل
مشي جسور من قدامهم وهو مش مصدق كم النفاق إللى حس بيه في كلامهم وقرر يطلع يتكلم مع ميسون ويشوف كلامها هى كمان يمكن تعمل زى
سيلين وتحاول تجذبهةليها
دق جسور علي باب غرفة ميسون
ميسون وهي بتفتح الباب اتفاجئت بجسور واقف قدامها زى ماهو اتفاجئ بعيونها الحمرا من كتر البكا وعلى اد ماصعبت عليه جدا على اد ماتاه فى جمالها
ميسون : نعم ياأبيه حضرتك عاوز حاجه
جسور:
ايوه بميسون لو سمحتي عاوز اتكلم معاكى شويه تعالى نقعد فى الليفنج
خرجت ميسون من غرفتها وراحت ورا جسور قعدت وهو جه وقعد جنبها ولان ميسون من البنات الخجوله جدا بدأت تتحرك بجسمها علشان تبعد عنه قدر الإمكان
جسور:بس يابنتي حتقعي من الكنبه انا مش حاكلك والله انا بس مش حابب حد يسمع كلامنا
ميسون باحراج:لا عادى انا بس بوسع لحضرتك مكان
جسور:اولا بلاش حضرتك وكمان مافيش واحده تقول لخطيبها ياأبيه إللى قولتيها فوق دى
ثانيا:الكنبه واسعه جدا ماتتججيش
ميسون :بس انا طول عمرى بقولك ياأبيه
جسور بحده:وانا قولت ماتتقالش تانى
ميسون بخوف:حاضر
وقتها حس جسور انه خوفها وانها اد ايه ناعمه ورقيقة وتفهم خوف جده عليها
جسور :انا مش عاوزك تخافى منى انا عاوزك تحبيني ولا انتى مش عارفه يعني ايه جواز وارتباط
ميسون:عارفه لكن انا خايفه من إللى جده طلبه انا كده حكون بفرق بينك وبين سيلين
جسور:انتي حيكون زيك زيها هي حتكون مراتى وانتى كمان
ميسون :لو انت حابب اكلم جده واتحايل عليه لحد مايوافق انك تتجوز سيلين بس انا اعمل كده
جسور:وعاوزه تعملى كده ليه علشان رفضانى
ميسون ولسانها فضح مشاعرها:انا لا بالعكس وقطعت الكلام لكن جسور مسك في كلامها وصمم يفهم في ايه
في الأول تخيل انها حتنافقه زى سيلين لكن صدمته لما حس ان هي اللي بتحبه بجد ومن غير ماتقول
جسور بمكر:هااااا يعني افهم من كده انك موافقه على جوازنا
ميسون :……….
جسور:ماتردى عليا
وشها احمر وعيونها اتملت بالدموع وجسمها بدأ يترعش
جسور خاف عليها جدا وحس ان قلبه بيوجعه .مسك ايديها وكان بيطبطب عليها علشان تحس بالأمان
جسور:ميسون انتى مالك فيكي ايه خلاص لو مش عاوزه تتكلمى بلاش انا بس كنت عاوز اصالحك وماحبتش تنامى وانتى زعلانه منى
ميسون :
لا انا مش زعلانه منك انا خايفه يكون جدو فرضنى عليك ووالله انا بجد مستعده اعفيك من كده واتحمل انا ان الوصيه تتنفذ عليا
جسور في نفسه :يااااه معقوله تكونى عاوزه تضحي علشانى للدرجه دى وانا إللى طول عمرى معجب باللى مفكرانى اهبل واصدق الشويتين بتوعها هى وامها
ميسون :هو حضرتك سرحت فى حاجه
جسور :هو انا مش قولت بلاش حضرتك
ميسون :انا اسفه نسيت
جسور :ولا يهمك ياحبيبتي بس خدى بالك بعد كده ولا عاوزه الناس تضحك علينا هههههههه
ابتسم ميسون ابتسامتها الهاديه وكانت فرحانه من جواها جدا ان جسور خاف على زعلها
جسور :انتى عندك مدرسه بكره ان شاء الله
ميسون:أيوه
جسور :خلاص اطلعي نامى وانا حوصلك بكره الصبح
ميسون بخجل:السواق بيوصلنى علشان سيلين متزعلش وانت ماتتعبش
جسور وبدأ يظهر عليه غضبه: مادمت انا قولت حاجه يبقي تنفذيها وماتفكريش فى غيرك فكرى فى نفسك وبس مفهوم
ميسون:حاضر حكون جاهزه الصبح ان شاء الله
جسور:يلا اتفضلى على غرفتك
طلعت ميسون على غرفتها وهى طايره من الفرحه ان جسور مهتم بيها وحيوصلها كمان نامت وهي بتحلم بالدقيقة إللى حتركب جنبه العربيه
وطلع جسور على غرفته وهو بيفكر فى براءة ميسون جمالها
اما عند عايده وبنتها
سيلين:اووووف ايه البنى آدم التقيل ده هو مفكر نفسه ايه بيتكلم بمنتهي العوجان
عايده:طمنيني عملتى معاه ايه
حكت سيلين لامها كل الحوار إللى دار بينهم
عايده:حلو اوى كده خليكى راسمه عليه الدور بقي وانا من ناحيتي حتصرف مع سميه وبنتها وحعرف ازاى ابعدهم عن طريقنا
سيلين :بس يامامي هو انا حفضل اتذلله كده كتير انا مش قادره اتخنقت منه
عايده:
فى الأول بس ياعبيطه وبعد الجواز حخليه يبوس الشوز بتاعك ياروح مامى
ضحك الاتنين ضحكه شريره ههههههههه
الحلقه الثالثه/
• ظهرت شمس يوم جديد على قصر الشامي واجتمع كل أفراد العيله على سفرة الفطار كعادتهم لكن النهارده كان موسي الشامي مقرر يفجر باقى القنبلة وصل لغرفة السفره الجد وقعد على رأس المائده زى مايكون ملك على عرشه وبمنتهى القوه والصرامه بدأ كلامه
الجد:صباح الخير
الجميع :صباح النور
الجد:كويس ان كلكم متجمعين ومحدش اتحرك منكم قبل ماانزل علشان عاوزكم
عايده :خير ياعمى
الجد:ماتستعجليش ياعايده نفطر وبعدين نتكلم
بدأ الجميع فى تناول فطارهم لكن
عايده ماكنتش عارفه تاكل وعيونها مش بتنزل من على عمها زى ماتكون بتحاول تقرأ أفكاره كان الجد بيفكر لكن عيونه شايفه كل العلامات إللى على وجوه الجميع من استفسار وشاف كمان ان لا ميسون ولا سميه امها مهتمين يعرفوا وواضح عليهم انهم متقبلين أى حاجه منه وعلشان كده قرر يكمل كلامه
الجد:جسور انا عاوزك تفضى نفسك من شغلك وتاخد عرايسك وتشترى لهم الشبكه والفساتين ونشوف لوازم الخطوبه وكتب الكتاب
جسور:حاضر ياجدى ححدد يومين لكل واحده يوم
الجد بصوت عالى :قولت يوم كلامي واضح يشتروا فى نفس اليوم
عايده :بس ياعمي ازاى كده اكيد سيلين حيكون طلباتها غير
ميسون
الجد:مافيش حاجه اسمها طلباتها ياعايده دى عروسه ودى عروسه
عايده باستخفاف:ياعمى لكن في فرق واضح بينهم سيلين انسه كبيره لكن ميسون حبيبتي لسه بيبي خالص وحتحتاج وقت كبير علشان تعرف تختار حاجتها
الجد:انا كلامي يتنفذ ولا انا شايف ايه يا جسور
جسور وكان فهم كلام جده:حاضر ياجدى حاخدهم الاتنين مع بعض وبعد اذنك ياطنط عايده انا حخرج انا وهما لوحدنا ولو إللى جبناه معجابكيش ابقي غيريه
عايده بغضب:ازاى ده حتحرمنى افرح بشبكة بنتى
الجد:فرحتك حتجيلك لغاية عندك ياعايده كفايه مناقشه بقي واول ماتخلص يا جسور بلغني علشان احدد معاد الحفله وكتب الكتاب
حاتم
ابو جسور:تقصد ياباشا حتحدد يومين