سألت ماما عن سبب انهم قطعوا كلامهم لما خرجت عليهم .قالتلي ان خالتك طلبت ايدك لابنها فارس .
قولت ماما تاني هنعيد الكلام ده ؟!! مش هما طلبوا نفس الطلب قبل كده وانا قولت اني حاساه زي اخويا !!
ماما قالتلي بس الظروف دلوقتي اتغيرت وانتي يا حبيبتي بقيتي مطلقة يعني كويس انه طلب ايدك تاني .وهو مادام طلبك تاني للجواز يبقي بيحبك .
رديت عليها اني لسه عند موقفي زي ما هو .
ماما قالتلي ان خالتك ممكن تقاطعنا العمر كله لو رفضتي تاني .
سكت ومش رضيت ارد عليها ودخلت اوضتي .مسكت التليفون العب فيه شوية .
واثناء لعبي في الموبايل لقيت فارس ابن خالتي بيتصل بيا …
كنت مترددة و مش عاوزة ارد عليه لكن في النهاية رديت عليه .
حاول فارس انه يبين ليا انه بيحبني من زمان وانه مش اتجوز لحد دلوقتي علشاني وعنده استعداد يعمل اي حاجه علشاني .
حاولت افهمه كتير اننا زي الاخوات مفيش فايده وقولتله ان طباعنا وحياتنا مختلفة نهائي واننا مش ممكن نتجح كزوجين .
فارس قالي انه ممكن يغير نفسه وطباعه علشان يرضيني وطلب اننا نعلن خطوبة وفي فترة الخطوبة لو انا مش لاحظت انه اتغير علشاني او زعلني في اي حاجة يبقي من حقي اني افسخ الخطوبة .
حسيت نفسي اني اتحاصرت وان مفيش حجة اتحجج بيها اني مش اوافق عليه .
وافقت علي الخطوبة وفعلا تمت الخطوبة وخالتي وفارس كانوا مش مصدقين نفسهم اني وافقت .
دكتور معتز عملي جلسة تانية في عيادته الخاصة وكانت اطول من الجلسة الاولي .
دكتور معتز سألني فيها عن طفولتي والحاجات اللي كنت بحبها وانا صغيرة والحاجات اللي كنت بخاف منها .
حكيت له كل حاجه وكنت بتكلم معاه وكأني بتكلم فيها مع نفسي .
اتكلمت معاه وحكيت له عن علاقتي بماما وبابا وانا صغيرة واني كنت دايما بلعب لوحدي لان مش عندي اخوات .
وعلاقتي بالمدرسين بتوعي في المدرسة وبزمايلي في المدرسة .
سألني عن اذا ما كنت اتعرضت للتحرش في فترة الطفولة او المراهقة من المدرسين بتوعي او من زمايلي .
اتكلمت معاه بكل صراحة زي ما اكون بتكلم مع نفسي وعدت عليا السنين دي زي ما يكون فيلم وانا قاعدة بتفرج عليه .
انتهت الجلسة وبعدها حسيت اني بتحسن اكتر والاحلام المخيفة انتهت ومش اتبقي الا شوية اصوات كنت بسمعها احيانا وانا قاعدة لوحدي بس .
ماما وخالتي فرحوا اوي بخطوبتي انا وفارس .
وبعد ما كانت خالتي بتشجعني دايما اني اروح لعم مندور قالتلي خلاص مشوار عم مندور مش له لازمة .
بعد الخطوبة لاحظت ان دكتور معتز بعد ما عمل ليا جلستين وكنت بدأت اتحسن والحاجات المخيفة اللي كنت بشوفها في الاحلام وفي الحقيقة مش بقيت اشوفها خالص .
كمان فارس يوم بعد يوم غير من نفسه كتير.
وبطل الخروج والقعدات مع اصحابه وبقه كل اهتمامه بيا انا لوحدي .وبعد ما كان بيشرب وبيعمل حاجات كتير غلط بطل كل ده واتغير بجد او حاول يقنعني بكده علشان يتمم الجوازة .
بعد خطوبتي لاحظت ان دكتور معتز بدأ يتغير معايا او يمكن بيتهيألي مش قادرة اتأكد لدرجة انه بيتهرب من ميعاد الجلسة .
وفي يوم وانا في الشفت بتاعي وبعد ما مريت علي كل المرضي وقبل الفجر بحوالي ساعه تقريبا وكنت قاعدة لوحدي شوفت حد مش ممكن كنت اتوقع اني اشوفه في المستشفي ابداااا.
شوفت عم مندور داخل عليا وانا قاعده لوحدي وبيبتسم ابتسامه خبيثة اوووي .
استغربت جدا لما شوفته !!!!! معرفش هو ظهر ازاي ولا منين ومعرفش اي اللي جابه هنا وخصوصا في الوقت الغريب ده .
عم مندور سلم عليا وقالي ازيك يا بنتي عاملة اي ومش جيتي تاني ليه ؟
قولتله الحمد لله بقيت احسن .
:
ده بيتهيألك بس لسه القرين العاشق حواليكي ومش هيسيبك .
استغربت اوي من كلامه وقولتله ازاي ؟انا مش بقيت اشوف الحاجات اللي كنت بشوفها قبل كده لا احلام ولا حقيقة .
: ده علشان انتي قربتي منه لكن خطره عليكي لسه موجود واكتر من الاول .
: باندهاش قربت منه ازاي اذا كنت انا معرفوش .
: هو حواليكي في شخصية بشر علشان يكون قريب منك .
: هو مين ؟؟
: الدكتور معتز هو نفسه القرين العاشق ليكي ومتخفي في صورة انسان .
مكنتش قادرة استوعب كلامه وحسيت ان الدنيا بتلف بيا .
.قولتله وانت عرفت ازاي ؟
: اللي عرفني اسمك وشكوتك وتعبك من اول ما شوفتك هو اللي عرفني الكلام ده .
: لا مش ممكن دكتور معتز ده انسان كويس جدا .
: صدقيني يا بنتي زي ما بقولك انا يهمني مصلحتك مش اكتر .
للكاتب عادل عبد الله
: وانت جاي بقه مخصوص علشان تقولي كده ؟ !!!
: انا جاي علشان احذرك منه وعلشان عاوزك تيجي زي ما قولتلك قبل كده علشان ابعده عنك خالص وتعيشي حياتك بشكل طبيعي .
: ماشي يا عم مندور هجيلك قريب ان شاء الله .
: تعالي بكره بس بشرط انك تيجي لوحدك من غير امك او خالتك علشان هو يحضر واقدر ابعده عنك .
: حاضر ان شاء الله هجيلك .
: طيب انا همشي بقه دلوقتي وهستني تيجي علشان ابعد عنك الشر ده يابنتي
مشي عم مندور وانا قعدت لوحدي افكر في كلامه .معقول دكتور معتز فعلا زي ما الراجل ده بيقول يكون هو القرين العاشق ليا ومتخفي في شكل انسان !!!!
بقيت محتارة مش عارفه اصدق عم مندور ده ؟ انا اول مره اشوف او اسمع عن جن بيتخفي في صورة بشر !!!
ولا اصدق احساسي اللي بيقولي ان عم مندور ده مش كويس ونيته سودا وكداب وان دكتور معتز انسان محترم جدا ومش ممكن يكون زي ما بيقول .
دكتور معتز بعد شوية لقيته خرج و بيسألني عامله ايه دلوقتي ؟
وقفت اتكلمت معاه شوية وكنت ببص عليه وهو بيتكلم وافتكر كلام عم مندور لحد ما خلصنا كلام ومشي وفتح باب اوضته وقبل ما يقفل باب اوضته بص لي وضحك وقفل الباب .
الحركة اللي عملها دي زودت حيرتي اكتر .
المهم اني بعد ما خلصت شغل روحت البيت ونمت .
بعد ما صحيت من النوم قعدت افكر اروح لعم مندور ولا لا وفي الاخر قررت اني اروح له علشان اخلص من حيرتي وخوفي ان ترجعلي الحاجات الغريبة اللي كنت بشوفها .
قولت لماما ان عم مندور جالي المستشفي بالليل وقولتلها علي الكلام اللي قاله .
ماما كمان اتعجبت اوي انه راح لي المستشفي وخصوصا في الوقت ده وبعدين قالتلي لازم اروح معاكي .
قولتلها بلاش يا ماما انا هروح لوحدي زي ما هو قال علشان نخلص بقه من الموضوع ده وبعدين انتي اللي كنتي بتطمنيني وبتقوليلي ده راجل في سن ابوكي .
متخافيش عليا يا ماما انا هخلي بالي من نفسي كويس .
ماما نزلت معايا ووصلنا عند خالتي .ماما طلعت عند خالتي وانا روحت لوحدي لبيت عم مندور .
رنيت جرس الباب فتح لي عم مندور وقالي اتفضلي يا بنتي .
دخلت وقعدت وهو قعد قدامي وعزم عليا اني اشرب عصير لكني رفضت لاني خوفت يكون فيه منوم لاني مش مرتحاله و قلقانه منه .
عم مندور قام قفل الشبابيك و قعد قدامي وولع بخور كتير اوي لدرجة ان الاوضة اتملت دخان وبدأت احس ان نفسي بيضيق وبدات احس بدوخة .
قولتله من فضلك افتح الشباك انا كده اتخنقت مش قادرة .
قالي مينفعش لازم كده علشان يحضر واعرف اصرفه وابعده عنك .
عم مندور قرب ليا وكان عاوز يحط ايده علي راسي وهو بيقرا .
قولتله لا كده مينفعش من فضلك اقرا وانت بعيد .
بدأت شكوكي تجاه الراجل ده تزيد ان نيته مش كويسه .
فكرت اني اتظاهر قدامه اني اغمي عليا من الدخان علشان اشوفه هيتصرف ازاي .
عملت نفسي اني بدأت ادوخ وغمضت عنيا وكأن اغمي عليا .
شوية وحسيت بايده علي وشي بيحاول يشوفني صاحية ولا اغمي عليا وبعدين حسيت بايديه نازله علي رقبتي وبعدين علي صدري ..
فتحت عنيا وروحت ض*رباه بالقلم علي وشه .
قالي انا كنت بحاول افوقك .
قولتله انت كداب يا راجل يا قليل الادب كنت عاوز تستفرد بيا !!!!!!.وجريت علي الباب علشان اخرج لكني لقيت الباب مقفول ومش عاوز يتفتح .
جه من ورايا ومسكني وبقه بيحاول انه يقلعني هدومي بالعافية وانا بحاول اقاومه بكل قوتي .
ولكن قوته غلبتني وحسيت اني خلاص هبقي فريسه في ايديه .
عملت نفسي اني استسلمت له .وبعدين روحت ض*رباه تاني بكل قوتي في بطنه علشان يسيبني .
جريت منه ناحية الشباك علشان اخرج منه لانه في الدور الارضي لكن الشباك كمان كان مقفول ومش عاوز يتفتح .كسرت ازاز الشباك بايدي والازاز جرح ايدي ونزل دم كتير من ايدي .
حاول يمسكني تاني ويمنعني اني اخرج من الشباك ض*ربته في وشه واثناء ما بض*ربه في وشه ضوافري جرحوا وشه لدرجة انهم عملوا جرحين جامدين جدا في خده وشوفت الدم نازل من وشه .
قدرت والحمد لله اني اخرج من الشباك .خرجت من البيت ووقفت توكتوك وروحت عند خالتي .
اول ما طلعت عند خالتي ماما شافتني كده …. صرخت ايه ده !!! مالك ايه اللي حصل يا بنتي ؟؟
عيطت جامد و قولتلها شوفتي الحيوان اللي اسمه مندور ده كان عاوز يغتصبني
امي ض*ربت علي صدرها وقالت وبعدين عملتي ايه يا هالة ؟
قولتلها هو انتي مش عارفة بنتك ولا ايه . علمته الادب ض*ربته وهربت منه .
ماما قالت الحمد لله .وبصيت لخالتي وقالت بقه معقول الراجل ده يطلع منه كل ده ؟!!!!
خالتي قالت انا مستغربة مش عارفة ازاي يعمل كده !!! ده كل الناس بتقول عليه راجل كويس وسمعته زي الفل .
ماما قالت احنا لازم نروح نعمله محضر ونحبسه علشان يبطل يعمل كده في بنات الناس .
ردت خالتي بلاش شوشرة علشان سمعة بنتنا .سبيه لربنا ينتقم منه .
ماما قالتلها مالها سمعة بنتنا دي زي الفل .خالتي قالتلها انا هبعتله فارس يعلمه الادب .
انا قولتلها ملوش لزوم انا علمته الادب خلاص .
ماما قالت لخالتي هو فين فارس من ساعة ما جيت وانا مش شايفاه ؟!!
خالتلي اتلخبطت في الكلام وقالتلها معرفش هو اتصل بيا وقالي انا هتأخر علشان ورايا مشوار .
خرجنا من عند خالتي ونزلنا روحنا عيادة وعملت خياطة للجرح اللي في ايدي وبعدين روحنا البيت .
دخلنا البيت وانا بقول لماما شوفتي احساسي مش خدعني ابدا انا كنت حاسه من اول ما شوفته ان الراجل ده نصاب وانتي وخالتي كنتوا بتقولولي ده راجل كويس ومبروك .
لما قعدت وفكرت في كل اللي حصل قولت لنفسي بعد ما طلع عم مندور ده قليل الادب وسافل يبقي اكيد كلامه كله كدب وخصوصا عن دكتور معتز .
بصراحه انا كنت ومازلت معجبة بشخصية دكتور معتز اوي .مش هقدر اقول اني بحبه لان هو صعب يبادلني نفس الحب لان مستواه الاجتماعي اعلي مني بكتير لكن ده مش هيمنع اعجابي الشديد به .
دخلت غيرت هدومي وخرجت علشان اروح شغلي .ماما قالتلي بلاش تروحي الشغل النهارده علشان الجرح اللي في ايدك وكمان اكيد اعصابك تعبانه من اللي حصل .
قولتلها بالعكس ده انا لازم اروح شغلي واعيش حياتي طبيعي جدا والموقف ده مش هو اللي هقف عنده .ده انسان سافل وانا علمته الادب وخلاص .
وفعلا نزلت وروحت المستشفي عادي واول لما زمايلي شافوا ايدي عليها رباط مكان الجرح بقوا سألوني واطمنوا عليا .واول ما دكتور معتز شافني ظهر عليه الخوف وسألني عن ايدي .رديت عليه انها حاجه بسيطة جرح بسيط حصلي وانا في المطبخ في البيت .
كنت سعيده لاهتمام دكتور معتز رغم اني عارفه ان بيني وبينه مسافة زي ما بين السما والارض .
واثناء ما كنت في المستشفي سمعت نغمة الموبايل واول ما مسكته شوفت اخر رقم كنت اتوقع اشوفه يتصل بيا .
شوفت رقم حسن طليقي بيتصل بيا !!! استغربت جدا مش عارفه سبب اتصاله الغريب ده .اول مره يتصل بيا من ساعة ما اتطلقت منه .
اترددت اني ارد عليه لحد ما خلصت الرنة .
بعدها بثواني اتصل تاني !!!! رديت عليه …..
سألت حسن عن سبب اتصاله قالي انه عرف اني اتخطبت وهتجوز ابن خالتي وان هو عارف اني مش بحب فارس وانه هو عاوز يرجعلي .
قولتله اني مسنحيل ارجعله بعد ما اتهمني في شرفي .
حسن طلب مني اني اسامحه وقالي انه وصله الشك ده بسبب جوابات واتصالات كانت بتوصله بتحذره اني بخونه وان انا لما طلبت منه الطلاق ده خلاه يشك فيا .
.لكن هو دلوقتي ندمان علي اللي حصل وبيتمني نرجع لبعض .
قولتله انه غير انه شك فيا انه كمان كان مفيش اهتمام بيا خالص ومش شوفت منه الا الاهمال وكان البيت بالنسباله مكان للنوم والاكل وبس .
حسن حاول انه يقنعني انه ندمان علي اللي فات ووعدني انه هيتغير .
قولت لحسن ان الموضوع ده اتقفل خلاص .وان احنا عمرنا ما هنتفق ابدا .
انتهت المكالمة مع حسن وهو لسه بيحاول انه يقنعني نرجع لبعض .
قعدت افكر ……. بعد ما اتطلقت من سنتين وكنت عايشة في هدوء مرة واحدة يتقدملي تاني فارس ابن خالتي واتخطب له وكمان حسن طليقي عاوز يرجعلي وانا اصلا قلبي مشغول بدكتور معتز رغم ان عقلي بيقولي انه مستحيل يفكر فيا .اي الحيرة اللي انا فيها دي ؟
خرج دكتور معتز من غرفته وقالي لما تكوني فاضية يا هالة ابقي تعالي عايزك
بعد شوية دخلت وقعدت عند دكتور معتز وبدأ يسألني عن سبب الجرح اللي في ايدي وانه مش مقتنع انه جرح عادي .
حكيت له عن الراجل اللي اسمه عم مندور واللي عمله وانه كان عاوز يستفرد بيا وازاي اني اتصديت له وهربت منه .
دكتور معتز غضب جدا وقالي ازاي توافقي تروحي للراجل ده لوحدك وانتي عارفه انه نصاب ودجال !! وبعدين انتي مش جاهلة علشان تمشي ورا الناس دي .
قولتله انا كنت عاوزه اخلص من الموضوع ده واوضعله حد وهو كان بيقولي انه هيصرف الجن في المره دي .
دكتور معتز قالي ان اللي انا بعاني منه اضطرابات نفسية بسيطة مش مستاهلة قلق ولا مستهلة اني اروح لدجالين ونصابين .
كلام دكتور معتز كان واضح فيه الاهتمام الزايد وده شجعني اني احكيله علي ان حسن طليقي كلمني علشان يرجع لي تاني .
دكتور معتز : هو مش انتي مخطوبة بردو لابن خالتك ؟؟
: ايوه مخطوبة .