حسن حاول انه يقنعني انه ندمان علي اللي فات ووعدني انه هيتغير .
قولت لحسن ان الموضوع ده اتقفل خلاص .وان احنا عمرنا ما هنتفق ابدا .
انتهت المكالمة مع حسن وهو لسه بيحاول انه يقنعني نرجع لبعض .
قعدت افكر ……. بعد ما اتطلقت من سنتين وكنت عايشة في هدوء مرة واحدة يتقدملي تاني فارس ابن خالتي واتخطب له وكمان حسن طليقي عاوز يرجعلي وانا اصلا قلبي مشغول بدكتور معتز رغم ان عقلي بيقولي انه مستحيل يفكر فيا .اي الحيرة اللي انا فيها دي ؟
خرج دكتور معتز من غرفته وقالي لما تكوني فاضية يا هالة ابقي تعالي عايزك
بعد شوية دخلت وقعدت عند دكتور معتز وبدأ يسألني عن سبب الجرح اللي في ايدي وانه مش مقتنع انه جرح عادي .
حكيت له عن الراجل اللي اسمه عم مندور واللي عمله وانه كان عاوز يستفرد بيا وازاي اني اتصديت له وهربت منه .
دكتور معتز غضب جدا وقالي ازاي توافقي تروحي للراجل ده لوحدك وانتي عارفه انه نصاب ودجال !! وبعدين انتي مش جاهلة علشان تمشي ورا الناس دي .
قولتله انا كنت عاوزه اخلص من الموضوع ده واوضعله حد وهو كان بيقولي انه هيصرف الجن في المره دي .
دكتور معتز قالي ان اللي انا بعاني منه اضطرابات نفسية بسيطة مش مستاهلة قلق ولا مستهلة اني اروح لدجالين ونصابين .
كلام دكتور معتز كان واضح فيه الاهتمام الزايد وده شجعني اني احكيله علي ان حسن طليقي كلمني علشان يرجع لي تاني .
دكتور معتز : هو مش انتي مخطوبة بردو لابن خالتك ؟؟
: ايوه مخطوبة .
: اومال طليقك ازاي عاوز يرجعلك تاني !! انتي مش بتحبي خطيبك ؟؟
:
حسن طليقي بيقولي انه بيحبني وندمان علي اللي فات وانه هيتغير .بالنسبة لخطيبي مفيش حب ولا غيره لكن ماما هي اللي بتقنعني ييه علشان ابن خالتي وعلشان عاوزه تطمن عليا خصوصا اني مطلقة .
: واضح من كلامك انك مياله انك ترجعي لطليقك .او انه له مكانة في قلبك .
: لا ابدا ولا بحب خطيبي ولا طليقي .
؛ معقول !! يعني قلبك مش بيدق لحد !
بصيت له في كسوف وابتسمت : لو قلبي مش بيدق ابقي ميتة .
رد عليا بابتسامة : بيدق لمين بقه ؟
ضحكت وقولتله :
بيدق علي الفاضي .
وأستأذنت منه اني اروح اشوف شغلي .
بعد ما خرجت من عنده كنت فرحانه اوي باهتمامه وكنت حاسة انه عاوز يتكلم في حاجه بس متردد .
مروة قالتلي مالك يا هالة شكلك مبسوطه اوي وانتي خارجة من عند دكتور معتز !!! هو بيقول نكت جوه ولا ايه ؟
قولتلها لا ابدا بس بعد الجلسة بحس ان حالتي النفسية اتحسنت وبكون مبسوطة .
مروة قالتلي اوعي تكوني يا هالة بتحبي دكتور معتز .اوعي علشان يا حبيبتي انا خايفة عليكي .
كان واضح علي مروة الغيرة .مش عارفة بقه غيرانه عليه ولا غيرانه من ايه ؟ المهم انها كان شكلها مش طبيعي ابدا .
مروة قعدت معايا وحكيت لها كل اللي بيحصل معايا خطيبي وطليقي اللي عاوز يرجعلي تاني .
خلصت شغل وروحت البيت وماما كانت قاعدة مستنياني علشان تطمن عليا وكمان كانت بتتصل بيا وانا في الشغل كل شوية علشان تطمن عليا .
فطرت معاها وبعدين ماما دخلت نامت وانا دخلت انام .
بعد ما غمضت عنيا سمعت باب اوضتي بيخبط قلت ادخلي يا ماما لكن ماما مدخلتش ولا ردت عليا .
قومت من السرير وفتحت الباب مش لقيت حد !!! استغربت اوووي .
روحت اوضة ماما وناديت عليها لكن مش ردت عليا .
رجعت اوضتي علشان انام وبعد ما دخلت وقفلت باب اوضتي عليا ورجعت انام علي سريري لقيت ماما نايمة علي السرير !!!!!
بقولها ايه ده انتي جيتي هنا ازاي يا ماما لقيت ست غريبة اوووي شعرها طويل اووي ووشها كله دم قامت من السرير. بتضحك بصوت عالي اوووي وبتهجم عليا .
حاولت اخرج من الاوضة معرفتش .حاولت اصرخ معرفتش !!!
واول ما الست دي لمستني صحيت من النوم مفزوعة .
اتنهدت وقولت الحمد لله انه طلع حلم .
وبعدين قولت لنفسي معقول رجعتلي الكوابيس تاني .
وبعدين بقه هعمل ايه ؟؟
قومت واخدت شاور وبعدين اتصلت بفارس علشان اعرف عمل ايه البارح لما عرف اللي عم مندور عمله .
لما كلمت فارس حسيت انه بيتهرب مني وعاوز يقفل معايا بسرعة .حسيت بقلق اوي .
قررت اني اعدي علي خالتي قبل ما اروح الشغل علشان اشوف فارس بيتهرب مني ليه .
ولما روحت عند خالتي فارس هو اللي فتح الباب .
ولما فارس فتحلي وبصيت في وشه شوفت حاجة خلت اعصابي سابت وجسمي كله اتنفض من الخوف .
لقيت في وشه نفس أثر الجرح اللي حصل في وش عم مندور لما كنت بقاومه بنفس الشكل وكمان شكل الجرح جديد !!!!!!
دخلت وحسيت اني مش فاهمه حاجة .سألته عن سبب الجرح ؟ حسيت انه اتلخبط في الكلام وقالي ان كان في واحد حرامي عاوز يسرقه وانه اشتبك معاه وانجرح اثناءه اشتباكه .
عملت نفسي اني صدقته واتكلمت معاه شوية وسألته عمل اي مع عم مندور قالي انه لسه مش راحله ولكنه هيروح ويبهدله علي اللي عمله ده .
قولتله ملوش لزوم خلاص انا علمته الادب بما فيه الكفاية .
واختصرت الكلام مع فارس ومشيت وانا مذهوله ومش فاهمه .
روحت علي بيت عم مندور ورنيت جرس الباب وعرفت ان مفيش حد جوه.
سألت الجيران عليه قالولي ان الشقة دي اجرها شاب من فترة بسيطة وانه مش بييجي فيها الا كل كام يوم مرة ويقعد شوية ويمشي .
معقول ان فارس بيتنكر في شخصية عم مندور ؟
طيب ازاي انا مش لاحظت ده ؟ !!!!! ومعقول خالتي كانت عارفة وهي اللي بتوديني له !!! طيب هما عملوا كل ده ليه ؟
ولما هو نفسه فارس ليه اتهجم عليا وكان عاوز يغتصبني ؟ رغم اننا مخطوبين .
طيب انا لازم اوقعه واكشفه وافهم كان بيعمل كده ليه ؟
روحت للمستشفي واستلمت شغلي زي كل يوم .
وقابلت مروة زميلتي اللي حسيت انها واخدة مني موقف ومش بتكلمي وتضحك زي كل يوم .
كنت عاوزة احكيلها علي اني اكتشفت ان فارس هو نفسه عم مندور علشان تفكر معايا هو عمل كده ليه واعمل اي بعد كده .
روحت كلمتها وقولتلها مالك يا مروة واخدة مني جنب ليه ؟
حاولت تظهر انها مش متضايقة مني .لما لقيتها مش عاوزه تصارحني متضايقة مني ليه مش رضيت اكلمها في موضوع فارس .
واول ما شوفت دكتور معتز طلبت منه اني اتكلم معاه .
وفعلا بعد شوية دخلت غرفة دكتور معتز وقولتله علي اللي حصل واني شاكه ان فارس هو نفسه عم مندور .
دكتور معتز قالي طيب هو ليه يعمل كده ؟
اكيد في سبب خلاه يعمل كده .
قولتله لاني كنت رفضه الارتباط بيه .
: قالي احنا لازم نتأكد الاول ان دي مش تهيؤات .
: يعني انت فاكرني مجنونة وان التهيؤات وصلت بيا للدرجة دي !!!!
: لا طبعا مش مجنونة .لكن احيانا التهيؤات ممكن تكون اكتر من كده .
: علي فكرة يا دكتور انا مش بيتهيألي وعاوزه حضرتك تساعدني .
: انا فعلا هساعدك .لكن محتاج انك تقوليلي عنوان الشيخ مندور ده .
.وفعلا اديت لدكتور معتز العنوان .خرجت من عنده لقيت مروة قاعدة مستنياني .
سألت مروة هي مستنياني ليه ؟
مروة قالتلي انها حاسة ان انا بحب دكتور معتز .
: انا مش انكر ان دكتور معتز انا معجبه بيه لكن مش حب .
: علي فكرة عيب عليكي كده لانك مخطوبة .عاوزة منه اي؟
: انا مش عاوزه منه حاجه ومش بعمل حاجة غلط انا معجبة باخلاقه واسلوبه مش اكتر .
: اوعي تكوني فاكره انه ممكن يحبك .ولو هو بيعاملك كويس ده بس علشان ظروف مرضك .
: انتي عاوزة توصلي لايه يا مروة ؟ وايه اللي مزعلك اوي كده ؟
:
انا عاوزة مصلحتك يا هالة ومش عاوزاكي تعيشي في وهم .
: متخافيش عليا يا مروة انا مفيش حاجة بيني وبينه ولا بفكر فيه .
حسيت من كلام مروة انها غيرانة اني معجبة بيه .بدأ يرجعلي الشك تاني ان اللي شوفته بين دكتور معتز وبين مروة كان حقيقي مش تهيؤات .
ولما خلصت شغل وخرجت علشان اروح البيت لقيت دكتور معتز مستنيني بعربيته علشان يوصلني .
فرحت اوي وركبت معاه وطلب مني انه قبل ما يوصلني اني اعرفه بيت عم مندور .
وفعلا عرفت معتز بيت عم مندور وبعدها وصلني البيت .واثناء ما كنت راكبة معاه قعدنا نتكلم كتير .
مش هنكر ان كل مرة كنت بتكلم فيها معاه كنت بحس بأنجذاب له اكتر .
لكن دلوقتي انا مش عارفه ايه من اللي انا شوفته تهيؤات وايه منها حقيقة .
دكتور معتز راح لبيت عم مندور في نفس اليوم وسأل عليه ولما عرف ان فعلا الشقة دي اجرها شاب وبييجي فيها كل كام يوم يقعد شوية ويمشي بدأ يتأكد ان كلامي صح .
دكتور معتز بدأ يراقب بيت الراجل ده لحد ما شافه وهو داخل وبعدها راحله ورن جرس الباب .
لما فتحله عم مندور ( فارس )قاله : اهلا وسهلا .اؤمر ؟حضرتك مين ؟
دكتور معتز لاحظ فعلا اثر جرح في وش فارس وقاله : انا جايلك علشان بتحصل معايا حاجات مش طبيعية وعاوز اعرف اذا كان ده سحر ولا مس ولا ايه بالظبط ؟
: ومين اللي دلك عليا ؟
: ولاد الحلال كتير .
فارس بص في عنيه بتركيز وقاله :
انت كداب .انت اسمك معتز ومفيش عندك سحر ولا مس .وانت مش جاي علشان بتشتكي من حاجه .انت جاي علشان هالة .
دكتور معتز خاف من فارس لكن محبش يظهر ده قدامه .وقاله : ايوه انا جاي علشان هالة .
فارس : وانت مالك ومالها .ابعد عنها خالص .وكل اللي في دماغك من ناحيتها الغيه من تفكيرك نهائي .
: لما اطمن عليها الاول وبعدين اقرر ابعد عنها ولا لا .
: لا انت هتبعد عنها دلوقتي علشان انا ممكن أذيك .
: مش هتأذيني ومش هبعد عنها الا لما اطمن انك انت بعدت عنها .
: هالة دي خطيبتي وحبيبتي وعمري ما هبعد عنها واللي هيقرب منها انا هأذيه .ابعد عنها احسنلك .انت متعرفش انا ممكن اعمل فيك ايه .
: انت اللي هتبعد عنها لانك كداب ومخادع ودجال .ومتعرفش تعمل معايا حاجه .
: يا معتز انا بنصحك للمرة الاخيرة ملكش دعوة بهالة والا هسخطك .انت متعرفش انا ممكن اعمل فيك ايه واخليك عبرة لاي حد يفكر انه يقرب منها .
:
انت مش هتقدر تعملي حاجة طول ما ربنا معايا وسحرك ده مش هتأذيني بيه الا باللي ربنا كاتبهولي غير كده مش هيفيدك في شئ بالعكس ممكن سحرك ده ينقلب عليك .
فارس كشر عن انيابه وبدأ يقرأ تعاويذ غريبه ويقول كلام مش مفهوم وبدأ معتز يسمع صوت خبط علي الحيطان والابواب والشبابيك .
معتز بدأ يقرا قران ويستعيذ بالله لحد ما قدر يخرج من عند فارس .
معتز ركب عربيته علشان يروح بيته واتصل بهالة علشان يقولها اللي حصل ويحذرها انها تقابل فارس تاني لحد ما يشوف هيتصرف معاه ازاي .لكن للاسف معتز عمل حادثة بعربيته .
اول ما هالة عرفت ان معتز حصلت له حادثة جريت علي المستشفي تتطمن عليه .
معتز قالها ان الحمد لله الحادثة بسيطة وحذرها تاني من فارس وقالها انه اكيد شغال بالسحر فعلا لان الحادثة حصلت بشكل عجيب ملوش تفسير منطقي ولكن ارادة الله هي اللي نجته .وحكي ليها علي الحاجات الغريبة اللي حصلت هناك عند فارس .
هالة : طب وبعدين انا هعمل معاه ايه علشان يبعد عني ؟انت كده خوفتني اوي .
معتز : متخافيش هو بيحبك ومش هيقدر يأذيكي الا في حالة واحدة بس وهي انه يحس انك بعدتي عنه فعلا .
:
طيب ما انا فعلا هبعد عنه .ولا انت عاوزني اكمل معاه .
: لا طبعا انتي مش هتكملي معاه .انتي هتكملي معايا انا .
بصيت له في خجل : قصدك ايه ؟
: قصدي اني بحبك وعاوزك تكملي حياتك معايا .
بابتسامة خجل : انت فاجئتني .
: لا مش فاجئتك .انا عارف انك بتحبيني .باين اوي في عنيكي من زمان .
: لكن انا مكنتش متخيلة انك ممكن تلاحظ او انك تكون انت كمان …
: انا كمان بحبك .
: بس ظروفك هتمنعك انك تتجوزني .
:
قصدك علشان اني متجوز ؟
: ايوه .
: انا فعلا متجوز لكن وحيد ومش سعيد في حياتي .ووجودك في حياتي وحبي ليكي خلاني احس اني لسه عايش وقلبي بيدق بعد ما كنت حسيت اني بقيت انسان ميت .بسبب تعاستي مع مراتي .
: واكون انا السبب في هدم بيتك ؟
: لا ابدا بيتي مش هيهدم انا بردو هراعي بيتي وولادي .
: وبالنسبة لمراتك ؟
: انا وهي نعتبر منفصلين ولو هي مش وافقت علي اني اتجوز يبقي اطلقها وبردو هراعي اولادي زي دلوقتي واكتر .
:
طيب دلوقتي هنعمل ايه مع فارس ؟
: احنا عاوزين دليل انه بيمارس السحر والشعوذة علشان يدخل السجن .هو ده الحل الوحيد .
: وهنجيب الدليل ده منين !
: انا عندي طريقة ممكن بيها نوصل للدليل ده .
: ايه هي الطريقة دي ؟
: انتي تقابليه بس يكون بعيد عن بيته وتحاولي تاخدي منه اعتراف بانه بيمارس السحر وتسجليه .
وفعلا مشيت من عند معتز بعد ما اطمنت عليه وروحت البيت وعملت نفسي اني عيانه قدام ماما .
ولما خالتي اتصلت بماما قالتلها اني عيانه .
واخر النهار لقيت خالتي وفارس جايين يزورونا ..
ماما وخالتي قعدوا بعيد عني انا وفارس .
فارس سألني عن دكتور معتز وسألني اذا كان اعترفلي انه معجب بيا ولا لا .
انا قولت لفارس ان ده محصلش وان انا قلبي مش حاسس الا بيه هو .
فارس كان مبسوط اوي بكلامي واعترافي اني بحبه .
سألت فارس هو عرف ازاي ان ليا زميل في الشغل اسمه دكتور معتز .
فارس قالي انه يقدر يعرف كل حاجه .وبدأ يعترفلي ان حبه ليا خلاه يعمل حاجات مش اتخيلها .
سألته زي ايه ؟
قالي ان هو اللي كان بيتصل بحسن طليقي وبيبعتله رسايل علشان يطلقني بسبب حبه ليا . وان هو اتعلم السحر علشان يقربني منه وانه ممكن يعمل اكتر من كده علشان اكون قريبه منه .
سألته اذا كان هو نفسه عم مندور ولا لا .
قالي ان هو اتنكر في شخصية عم مندور علشان يقرب مني .
بعد ما اخدت من فارس تسجيل باعترافه روحت بالتسجيل ده لمعتز وهو راح قدم بلاغ في فارس .
فارس بعدها اتقبض عليه ودخل السجن .
دكتور معتز جه اتقدم لماما علشان نتجوز .لكن ماما لما عرفت ان دكتور معتز متجوز كان ليها رأي تاني .
خالتي بعد سجن فارس زعلت مع ماما وقاطعتها وقالتلها ان هالة بنتك هي سبب سجن ابنها فارس .
وبسبب كده ماما كمان زعلت مني .حسيت وقتها ان مليش حد في الدنيا الا معتز .
معتز جه لماما علشان يتقدملي لكن ماما لما عرفت انه متجوز رفضت اني اكون زوجة تانية وقالتله انها مش هتكون مطمنة عليا لان ممكن يرميني في اي وقت ويرجع لمراته الاولي .
معتز حاول انه يطمن ماما وقالها انه ممكن يديها اي ضمانات لكن ماما بردو رفضت وقالت ان شرطها انه يكون مش متجوز .
حاولت اني اقنع ماما بأني موافقة ولكن ماما رفضت المناقشة معايا لانها كانت عارفة ان معتز هو السبب في سجن ابن اختها وكانت بتحاول انها تحط موانع وعراقيل علشان ترفض جوازي من معتز .
لدرجة ان ماما قالتلي اني لازم اسيب الشغل علشان مش اقابل معتز تاني .
لكن كلمت خالي وعمي علشان يقنعوها اني استمر في الشغل لحد ما اقتنعت .لكنها كانت كل شوية تتصل بيا في الشغل علشان تطمن عليا وكل بوم تحذرني من معتز .وقالتلي لو عرفت انك بتكلميه لا انتي بنتي ولا اعرفك .
معتز لما حبيته حسيت وقتها اني مش حبيت قبل كده وانه اول حب في حياتي وعلشان كده كنت متمسكة بيه .حسيت بمشاعر جميلة خلتني احس اني انسانه بجد .قبل كده مكنتش عايشة ومعرفش يعني ايه حب .
لكن اللغز الوحيد اللي كنت مش عارفة انه حقيقة ولا تهيؤات هو لما شوفته مع مروة في المستشفي .وكنت خايفة اسأله .
وفي يوم وانا بتكلم مع معتز اتشجعت وسألته اذا كان في حاجه بينه وبين مروة واني شوفتهم في وضع جنسي مع بعض .
معتز قالي انه ممكن يضحك عليا ويخدعني ويقولي انها كانت تهيؤات .واني وقتها هصدق كلامه لاني كنت مريضة لكن هو هيصارحني بكل حاجة .
معتز قالي ان مروة من فترة وكانت بترمي شباكها عليه وعاوزه توقعه في حبها وهو كان متجاهلها لحد ما في يوم كان وقتها مخنوق اوي وزعلان مع مراته من فترة طويلة وهي دخلت اوضته وفضلت تتدلع عليه لحد ما وقع معاها في الغلط .
وان الموضوع ده اتكرر مرتين او تلاته لكن ضميره انبه وقرر انه يوقف العلاقة دي وانه بعدها صدها اكتر من مرة لحد ما بعدت عنه وانتهي الموضوع علي كده .
زعلت طبعا من جوايا لما عرفت الموضوع ده وهو اقسم ان دي مش اخلاقه ولا تصرفاته ولكنها غلطة وانه بعدها حس بغلطه ومش كررها .
عرفت وقتها ليه مروة كانت بتحاول تعرف اذا كان في حاجه بيني وبين معتز وبتحاول انها تبعدني عنه .وانها كانت بتغير مني .
وفي يوم بعد ما رجعت من الشغل ونمت وصحيت ماما قالتلي بلاش النهارده تروحي الشغل .قولتلها ليه يا ماما قالتلي علشان حسن طليقك كلمني وهو جاي النهارده عندنا .
استغربت اوي و سألتها عن السبب قالتلي انه عاوز يرجعك تاني وكام خالك وهما جايين يقعدوا النهارده .
طبعا انا ثورت جدا وزعلت اوي وقولتلها وانتوا هتقعدوا وهتتكلموا وتتفقوا وانا مليش رأي !!! مش المفروض انا اول حد اقول رايي واقول اذا كنا نقعد ونتكلم ولا لا .
ماما قالتلي الكلام هيبقي قدامك وابقي قولي اللي في نفسك .
قولتلها مبدأ اننا نتكلم اصلا مرفوض لاني مستحيل ارجل للبني ادم ده .