_انتِ بقيتي مُقرفة!
=مادام أنا مابقيتش عجباك طلقني!
_بزعيق: انتِ طالق!…
13/10 الساعة 10 مساءً…
خناقة جديدة و تكسير تاني في البيت بفضله و قهرة قلب بسببه حتى النهاردة كمان..
أيها المتفرجون و المستمعون؛ جوزي طلقني في يوم عيد جوازنا…
مضحكة مش كدا!
قعدت على الأرض و جسمي اتنفض مع رزعة الباب و هو خارج، و عيني بدأت تدور في الشقة و على الحاجات اللي ك*سرها، مهو لما بيتعصب بيبقي حد تاني و بيك*سر و يزعق و يقول كلام كتير يوجع و زود عليهم النهاردة كمان إنه بينسى أي حاجة حلوة ما بينا أو ليا…
الدموع بتنزل من عيني و عقلي لا إرادي بيفتكره زمان…
*******
18/1 من تلات سنين أول مرة اقابله، و أول مرة اروح بيت عيلة بابا، لان بابا كان عايش بعيد عنهم و العيلة اصلا كلهم بعيد عن بعض، يا حسرة عيلة كبيرة و بيت كبير و
بيتمنو الشر لبعض و مش بيطيقوا بعض، وقتها اضطر بابا يرجع شقته في بيت العيلة عشان حصلتله مشاكل في شغله و اضطر يبيع البيت اللي كنا عايشين فيه، بابا على قد مهو كان على اخره منهم و مش عايز يدخل البيت بس ظهر في عينه حنين، خاصة لجدو و تيتا اللي الحنين و الحب باين في عنيهم على رغم من قسوة جدي و سلبية تيتا اللي سمعت عنها…
يومها كنت سايبة الدنيا تضــ,,ـرب تقلب و كلهم بياكلوا في بعض جوة و بابا و ماما مشغولين بفض الاشتباك و خرجت اقعد في الجلسة اللي في جنينة البيت، و متابعة المطر و
مشغلة اغنية لمحمد عبد الوهاب و بشرب شاي بلبن في اكبر مج في البيت و مندمجة مع الأغنية و فجأة لقيته بيقرب ناحيتي…
***********
مش عارف طلع مني ازاي ارمي اليمين عليها!
و الله مقصدتش انا في عصبيتي غبي أوي
خرجت عشان مقدرتش ابص في عنيها بعد مافوقت على كلمة طالق
بعترف اني مليان عيوب و غبي؛ بس والله بحبها…
مش عارف إيه اللي حصل من ساعة م*اتجوزنا!
فين السحر!
فين الحلم!
طب هو انا بحبها بس هو فين دلوقتي! فين الحجات اللي واعدنا بيها بعض و الدنيا اللي قولنا هانبنيها سوا!
إيه اللي حصل يا بنت عمي! خديجة…
اغرب بنت عرفتها و اكتر بني آدم رايق في الدنيا…
يومها كنت بقطّع انا و ابني عمي في بعض عشان ضايق أختي-للملحوظة، احنا عيلة اسم بس- و كله بيزعق و اللي يعيط و اللي و اللي حتى عمي اللي أول مرة اشوفه كان بيحاول يبعدني عن ابن عمي.
و بعد وقت سيبتهم بيصدروا قررات مابتتنفزش و بيتكلموا كلام مابيحصلش و لا من جواهم، لقيت الدنيا بتمطر قررت اروح الجلسة اللي في الجنينة، و لقيتها…
قاعدة بتغني مع الأغنية اللي مشغلاها و بتمثلها كأن حد قدامها و مندمجة و شوية تمد ايديها تحت المطر و عايشة مكبرة للدنيا، قربت منها بصتلي لحظة و كأنها بتفتكر أسمى:
_أنت حسن صح!
=قاعدة هنا ليه!
_بستمتع
=ب إيه!
_ابتسمت:
بوقتي المستقطع بعيد عن قرف الدنيا، بصوت المطر اللي زي السنفونية و المطر نفسه و ريحته اللي تنعش و نسمة البرد و الهوا اللي ترد الروح و الاغنية و سلطنتها و اخيرا و ليس اخرا شوب اعظم مشروب في التاريخ الشاي بلبن…
ابتسمت على طريقتها و قعدت قدامها و سكتنا شوية أو بمعنى اصح انا اللي ساكت لكن هي و لا كأني موجود مكملة في استمتاعها بالاغنية و الشاي بلبن لحد ماقولتلها:
_عرفتيني إزاي!
=مش محتاجة ذكاء تيتا عرفتني على العيلة واحد واحد
_طب وانتي اسمك إيه يا ذكية؟
=محسوبتك و بنت عمك خديجة..
_انتي مبسوطة هنا؟
=حاليا الانبساط بالقاعدة اللي هنا دي و بس
_و العيلة و البيت و كله؟
=يا عزيزي انتو عيلة عايزة الحــ,,ـرق…
و عدا وقت و هي زي اول مرة شوفتها بعيد عن الوَش اللي بيحصل في البيت و لا همها أي حاجة و لا مشاكل و جدي و تيتا و اختي زينب هما بس اللي بتتعامل معاهم و الباقي سلام و خلاص، حتى الكل لاحظ انعازلها و عدم اهتمامها لدرجة أنهم مابقوش يحسبوها معانا او يدخلوها في صراعتنا او يفتكروها أصلا..
و انا!..
كنت ملاحظها مانكرش إنها لفتت نظري من اول مرة، ليها هالة كدا و حضور خاص بيها هي و شوية شوية بقيت اتعامل معاها و نقعد مع بعض و نعرف بعض اكتر و أنا من جوايا مبسوط، خاصة إنها الوحيدة اللي برتاح معاها في الكلام و بتخرجني عن مود العصبية و لو شايل هم الدنيا بكلامها تفصلني و تريحني، طبعا غير إنها برده اكتر حد ممكن يعصبني…
_مابترديش عليا ليه!
=مش عايزة أرد…
_ ليه إن شاء الله!
=عشان دلوقتي وقتي مع نفسي..
_يا سلام!
=أومال
_عليكِ برود بيخليني عايز ارميكي من الشباك..
=ابتسمت:
الله يكرم اصلك..
***********
_مش عارف روقانك دا إزاي!
=ابتسمت:قدرات يا افندي
_لا بجد بستغرب، الدنيا جوة قايدة حريــ,,ـقة و برة مصيبة و انتِ قاعدة كدا
= ابتسمت:اشتري دماغك و بيع الناس..
*********
_زينب قالتلي انك مش طايق حد!
=امشي يا خديجة عشان مش فايقلك!
_انت بتكلمني كدا ليه ياض انت!
=بغضــ,,ـب و عصبية: قولتلك غوري من وشي انتِ غبية!
_ابتسمت: لو بعنيك العسلية دي و نظرتك دي متخيل إنك هاتخوفني، فأحب اقولك إنه بالعكس…
سكتت شوية و كملت و هو بيبصلها:
_مهو طبقاً للخجل أنا ماينفعش اقول كدا، بس طبقا للاقرار بجمال الطبيعة و نعمة ربنا و صنعه احب اقولك عينك و انت مبرق تحت الشمس كدا قمر و جميلة…
ابتسم غصب عنه، و قالت هي بسرعة و هي بتمشي:
_و طبقاً للخجل و الرقة للفتاة، أنا لازم أمشي عشان اتكسفت…
*************
_زينب بتقولى إن كلامك مابينزلش الارض و كمان اللي بتعوزيه مهما كان بيتحقق
=ابتسمت: هذا من فضلي ربي، إنه السلكان يا استاذ..
_لا ياشيخة!
=اقولك على السر!
_سامع..
=قيام اليل…
**********
_عجبك كدا!
=لو على اللي عاملته في آه، إنما انك تتعور كدا فمبسوطة انبساط يكفي العالم
_انتي قليلة الادب و محتاجة تتربي!
=من بعض ما عندكم يا محترم
_انتِ عايزة قلم يفوقك!
=اجري و النبي شوف الكدم*ات اللي ف وشك دي و تعالى اتكلم، الواد علّم عليك
_اتعصب اكتر: أنا طحنته انتِ عامية!
=شيل ايدك من وسطك و أنت بتكلمني يا بيه!
_ اقسم بالله مستفزة، تعرفي عقلي بيصورلي و انا بجيبك من شعرك على الأرض
=ابتسمت: جرب تعمل كدا و أنا مش هاسكتلك..
_هاتعملي إيه يعني!
=ابتسمت:ولا حاجة… يلا بقا تعالى نشوف حل في التعويرة دي يا سبعي…
************
_انا مخنوق أوي
=ولا يهمك
_مش عارف افكر
=أهدى و اتكل على ربك و ادعيه و هو هايساعدك
_تفتكري!
=ربك مابيسبش عبده يا بيه، استغفر ربك..
_بس… انا بعيد عنه
=ابتسمت:ارجعله و قربله، بسيطة
_هايسمعلي
=ابتسمت: و بيحبك
_تفتكري هايتصلح حالي!
=اللي مع ربنا مابيخسرش ابدا، قوم و صليله و هاتعرف بنفسك….
*************
_بقولك بحبك!
=ايوة اعمل إيه يعني!
_بحبك يا أغبى واحدة في الدنيا
=هي دي الرومانسية عندك يعني!
_مانتي بتعصبيني!
=دي الحجة
_اقسم بالله بحبك
=ادخلوا البيوت من ابوابها يا أفندى
_يعني…
=قاطعته بابتسامة: م*اتنساش تجيب ورد مع الشكولاتة و انت بتتقدم لبابا يا أبو علي…
**************
و اتجوزنا شهر و اتنين و فجأة مشاكل و حوارات و حجات مكنتش عاملالها حساب، فين حسن اللي بحبه!
فين الحياة اللي رسمتها!
فين الحلم!
بيتحول لشخص تاني و السحر انتهى و الواقع بيفرض سيطرة و حياتنا مابقتش زي ماكنت متوقعة و كأن الدنيا بتديك قلم و تقولك بطّل حلم يا مسكــ,,ـين الحياة الزوجية مش شوية لبس و خروجات و لا نصك التاني مثالي زي في خيالك، بطّل سذاجة يا مسكــ,,ـين….
13/10 الساعة12:30صباحاً بيقولولي إنه في المستشفي عمل حــ,,ـادثة!
جريت و مافكرتش، دموعوي مش راضية تقف و قلبي حاسة بألم شديد.
يارب م*اتوجعنيش عليه يارب قلبي مش هايستحمل…
دخلت الاوضة اللي قالولي عليها بعد ماطمنوني إنه كويس يادوب ك*سر في الرجل و شوية كدم*ات و الحمد لله إنها جات على قد كدا، دخلت بخطوات بطيئة و مش قادرة ابطّل عياط و مش قادرة ابص ناحيته هاتألم لألمه بس بشكر ربنا في سري إنها جات على قد كدا…
سكتنا شوية و انا لسة على حالتي لحد مالقيته بيقول:
_مش بقولك إنك بركة، حقك اتاخد مني تالت و متلّت أهو زي كل مرة
مش قادرة اتكلم و مش قادرة ابطّل عياط و لا قادرة ابصله، لقيته بيقول تاني:
_أنا آسف والله ماكنت أقصد
و هنا بصيتله وسط عياطي، كان متجبس و وشه مجروح عيط اكتر وقولت:
_أنت بتتوجع جامد… حاسس ب إيه…
=ابتسم :بحبك
سكتنا تاني و بعدها هو قال:
_سامحيني على غبوتي اللي كل مرة بتتكرر و المرة دي كانت زايدة…
=من ساعة ماخرجت من البيت و انا سامحتك،قوملي بالسلامة
_م*اتسبينيش
=انت اللي أوعى تبعد عني انا مقدرش من غيرك…
_انا آسف
=ابتسمت بشقاوة وسط عياطي: عيشت و شوفتك أخيراً بتعتذر…
#غادة_عادل