– أنت عارف طبعًا أنت هنا لية..
– أمثل إني خطيبك؟
– لمدة شهر
– السبب؟
– ملكش دعوة بالسبب، المهم تعمل اللي عليك وتقبض فلوسك اللي متفقين عليها
– تمام
– مفيش وقت معين للشغل، اي وقت هتصل بيك أقولك انا فين وتجيلي، وخد دول.. اشتريلك بدل وهدوم كاجول، تكون ماركات، عايزة اللي يشوفك يقول اية الواد النضيف دا
– علي فكرة انا نضيف، انا لسة مستحي بصابونة لوكس قبل ما اجيلك
– التجاهل أفضل فن للرد، ومتنساش أنت مين
– يونس!
– يونس الوالي، رجل اعمال عاش عمره كله في انجلترا وكل شغله هنا، وجاي هنا يستثمر في مشروع جديد ويجرب حظه في السوق العربي، اتقابلنا مرة في نيويورك وانت في رحلة عمل واعجبت بيا، ومن اسباب تصميمك علي انك تجرب حظك في شغل مصر انك كمان هتكون قريب مني
– ا..
– بتحب تشرب قهوة
– مبحبهاش
– اكلتك المفضلة السوشي
– اية الشوشي دا؟! ولا عمري شوفته!
– بتتمرن تلت ساعات يوميًا، وبتجري قبل الفطار نص ساعة لازم
– انا مبجريش غير من اولاد الحارة علشان ميفزروش عليا بلالين الماية!
– لغتك الام الانجليزية
– لا اسمعي ياست انتي، متجبيش الملوحة وتقوليلها ابقي جنبري، انا الكلام دا ميمشيش معايا، رياضة اية اللي العبها تلت ساعات! بذمتك هيصدقوكي ازاي بكرشي المدلدل دا! وانجليزي اية اللي اتكلمه؟ انا بنطق العربي بالعافية، والقهوة انا ولا عمري دقتها احنا متربين علي حب بابا وماما وخربوش الشاي، اي مشروب تاني متحرم علينا.. صلي علي النبي كدا وخلي البساط احمدي..
شوفي غيري
– تعالي هنا، مفيش وقت وانت اكتر حد مناسب، ملامحك اجنبية
– وراثة والله مش اجتهاد شخصي، لكن كل اللي انتي بتقولي عليه دا هيجيب فرهدة
– التمن مش قليل، عشرين باكو
– انتي عايزة تخلي المخلل مربى، وتقوليلي عشرين باكو! دا اقل من مياية ما اقبلش حتي افكر في كلامك
– وانا موافقة
– موافقة بجد!
– بس وقتها الغلطة بحساب، طالاما هدفع تلتزم
– مياية مع العشرين باكو وبصي my name is يونس، شوفتي بدأت ابرطم ازاي من دلوقتي؟
– لما نشوف اخرتها، مية وعشرين الف..
شاورت بصباعها – بس خلال عشر ايام تكون جاهز..
– عارفة فيديو شاهد تحول عصير الجوافة الي ايفون اللي بيخلص في تلت دقايق دا، انا هتحول اسرع منه..
***
– اول خطوة، تتعلم ازاي تاكل
– حتي دي فيها علام؟
– الشورة بالمعلقة، براحة كدا وعلي مهلك، شايف بعمل اية؟ الرز بالشوكة يا تاكل بضهرها او بالسكينة تطلع عليها
لا رد..
– الملوخية بتتشرب بالمعلقة، كل الفواكة تتقطع بالشوكة والسكينة.. شايف الموز تعمل كدا.. انت بتعمل اية؟
يونس وطبق الشوربة علي بقه – بأكل!
– واللي انا قولته؟!
– هو الكلام دا ليا؟
– اومال لأمي!
– رز اية اللي بالشوكة؟ دا انا باكل بمغرفة ياست الكل، والموز! اسهل فاكهة موجودة في حياتنا، اسهل حاجة بنعملها، تصعبيها علينا ليةةةة.. لية تختاري التعب والراحة في ايدك
– الاتيكت..
– ماله دا كمان؟ لية طريقة اكل خاصة
– انت غير طبيعي
– وانا اقول انتي لية عصاية، طبيعي واحدة بتاكل الرز بالشوكة هتتخن ازاي! دا انتي لو كلتي عشرين حباية تبقي كلتي
– انت كدا مينفعش يجمعني بيك اي معاد فيه اكل!
– مش لازم ناكل سوا ياستي، انا معايزش يبقي بينا عيش وملح، أوبس قصدي bread and salt
– ايوة الانجليزي، احنا نهتم باللغة..
***
– عرفني عن نفسك كدا بالانجلش
– اا my name ia yones، I’m fifteen years
– اا fifteen! امتي عمرك بقي 15؟
– من دلوقتي..
– يابني ادم عمرك 27
– الرقم دا الوحيد اللي سهل علي لساني
– سيبنا من السن، كمل..
– بس..
– بس! هواياتك شغلك دراستك كليتك
– انا ساقط ثانوي
– ياحبيبي
– ياريت..
تجاهلته – انا مبتكلمش عن يونس انت، انت دلوقتي يونس الوالي.. متربطش دي ب دي وركز بقي
– الحقيقة بقي باقي الكلام كلام كفار
– طيب سيبنا من التعريف بالانجليزي، قولي كام كلمة من اللي حفظتهم
– اكتبهملك؟
– نعم؟
– اتهجي الحروف طيب! اصلي مبعرفش انطق عدل
– ياصبر ايوب.. لا في اكل نافع ولا في لغة، اومال انا مدياك فلوس لية!
انجز الوقت بيخلص
– قولتلك مفيش رجا، بصي انتي روحي سوق العبيد هتلاقي الموديل اللي عايزاه وسيبني والله يسهلك في الفلوس مش عايز
– لا ياحبيبي انت هتتعلم يعني هتتعلم، قول I Love you ياض
***
– طيب ما تجربها.. مش يمكن تعجبك؟
– انا رايح اتجوزها! انا مبحبش القهوة اغنيهالك! مبطيقاش ياست، لازم يعني تبقي المشروب المفضل خلي يونس الوالي الوهمي دا يتغير شوية، فيها اية لما يحب الشاي!
– القهوة المشروب المفضل للعظماء
– بدليل ان المكان الوحيد اللي متسمي بيها مبيتجمعش عليه غير العواطلية
– اللي لو اخدوا فرصتهم هيغيروا العالم
– احنا مش جايين نغير العالم هنا، احنا بنلاقي حل..
– بص، اي انسان منتظم عملي، يابيحب القهوة يا اي حاجة فيها افوكادو
– واية اللي يخلي انسان يحب يشرب الحاجة في وجود محامي!
– محامي اية يخربيتك!
– افوكادو دا مش اسم محامي؟!
– انا فقدت الامل خلاص
– ما قولتلك من الاول.. عن اذنك ياابلة، متحوليش بعد كدا تحولي..
– خلاص حفظت، محولش الملوحة لجنبري، قصدي جمبري يخربيتك انت طفحت عليا ولا اية!
– لا كنت هقولك، متحوليش العنب لخمرة
– بس العنب بيتحول لخمرة فعلًا!
– علشان يناسب فئة قليلة، هو مخلوق بصورة واحنا بنغيرها لصورة تانية علشان يناسب البعض، انتوا كدا عايزين تحولوا الحاجة اللي معروفة لكل الناس لحاجة خاصة بيكم وبس، وبتحاولوا تحسسونا كلنا اللي من توب واحد اننا غلط واننا مننفعلكمش، مع ان دي الطبيعة بتاعتنا والسائد بتاعنا.. هاتي حد من توبك يمثل علي توبك ياابلة..
انا اخري اتفرج علشان مهما حاولت اتعمل مش هعرف اكون يونس الوالي، معرفش اكون حاجة معشتهاش..
مع السلامة زينب – سمير