قـ,ـضيه خـ,ـلع

الحلقة التاسعة

عايزاني اخبطه بالعربية؟ ، انتي مجنونة ماهو ممكن يبلغ عني
= انت هتريح نفسك مش احسن ما ييجي ويضـ,ـربك كل شوية كدا
احترمي نفسك يابت أنتي
= يا حبيبي اهدا ماهو انت مش هتدوس بنزين جامد ، خليك على الهادي وهو مش هيحصله حاجة
ولو بلغ عني
= يا روحي انت كنت معايا هنا ساعتها أصلا ، هو انت خرجت امتا يا وائل
ايوا بقا هي دي النسوان
= بس متنساش حلاوتي بقا
حلاوتك دا انتي ليكي الحلاوة كلها
= ” ب دلع ” يا وائل اتلم بقا
وهو انا هعرف امسك نفسي قدامك برضو
= استنا بس ، لو حصل اللي انت عايزه ف انا عايزة المكافأه بتاعتي
كل اللي هتقوليه أوامر
= حيث كدا يبقا ركز معايا بقا عشان اقولك هتعمل ايه بالظبط

هو عايزك تروحله بكرا عشان تطلق الست هانم ، ماشي هتروح وتعمل كل اللي هو عايزه ، هتمشي وتستناه تحت المكتب بتاعه وتمشي وراه وتستنا اللحظة المناسبة وتشيله من على وش الارض
” خلصنا كل إجراءات الطلاق و خرجت من المكتب ، ركبت العربية واستنيته جواها ، بعد شوية نزل معاها و ركبو العربية ، مشيت وراهم لحد ما وققو قدام مطعم ، نزلو و دخلو جوا ، استنيت شوية بس لقيتهم اتأخرو ، نزلت و دخلت اشوفهم ، لمحتهم قاعدين بياكلو وبيضحكو ، اتنرفزت وخرجت قعدت في العربية و الغضب بياكل فيا ، ولعت سيجارة و التانية وفضلت مستنيهم

وانا باكل في نفسي لحد ما عدا ساعة ولقيتهم خارجين ، مشيت وراهم ، فضلو يلفو في الشوارع لحد نص الليل وفي الاخر العربية وقفت قدام عمارة وتقريبا هي دي اللي الهانم قاعدة فيها ، نزلو من العربية وواقفين يتكلمو ، هنا اتأكدت ان دي اللحظة المناسبة ، دوست بنزين وجريت بالعربية وعلى عكس ما توقعت كنت كل ما بقرب منهم بخاف أكتر ، خوفي بيزيد وقدر يتغلب عليا لحد ما لقيت نادية صرخت
حااااسب يا حساااام
” كنت خلاص غيرت اتجاه العربية ولكن ملحقتش اغير الاتجاه بشكل كامل وخبطته بالعربية ، بعدها جريت بسرعة جدا على البيت ،

دخلت الشقة وانا مرعوب وخايف يكون حد جاي ورايا ، انا مش ايه اللي أنا عملته دا ، قعدت على الكنبة وبترعش وباكل في ضوافري ، لا لا اكيد انا مخبطتش حد وكان بيتهيألي ، معرفش ، من كتر التوتر مش فاكر ، ريهام خرجت من الأوضة
ايه يا قلبي قاعد كدا ليه
” مردتش عليها ، حطيت ايدي على دماغي وبصيت في الارض
فرحني وقولي انك نفذت اللي احنا عايزينه

” جت قدامي وقعدت
مالك يا وائل
” بصيتلها وانا عنيا مدمعة ومش عارف اسيطر على نفسي
يالهوي انت بتعيط ، هو حصل ايه بالظبط يا وائل
” رديت عليها وانا لسة بعيط
انا.. ، انا مكنتش عايز اعمل كدا ، انا اه كنت عايز اعلمهم الادب بس مش عايز ادخل السجن
= لا بقولك ايه اهدا كدا وفهمني ، هو انت خبطته جامد؟

معرفش ، وانا بقرب منهم خوفت ف بعدت عنهم بالعربية ، لكن انا كنت دايس بنزين جامد ، انا مش عارف
= طب خلاص اهدا ، طالما بتقول بعدت عنهم يبقا انت مخبطتش حد
انا عايز اروح واطمن بنفسي
= نهار اسود ، انت عايز تروح تسلملهم نفسك و بعدين افرض انك كنت خبطت حد ، ماهو انت لو تفتكر كدا وتقولي ، خبطت حد ولا لا
” سكت ومردتش عليها
طب بص تعالى معايا جوا وانا هغيرلك مزاجك خالص
= سبيني دلوقتي يا ريهام
اسمعني بس ، انت محتاج تفك وتنسا اللي حصل

و دا دوري انا ، تعالى
” مسكت ايدي وشدتني على الأوضة ، لكن طول الليل وانا بفكر في الموضوع ، معرفتش انسا ولا اركز في اي حاجة تانية لدرجة ان ريهام زعلت مني ونامت ، فضلت صاحي لحد الصبح مش عارف انام وقررت اني هتصل على تليفون مكتب حسام عشان اسأل عليه ، الوقت بطئ جدا مش عايز يعدي او يمكن عشان أنا عيني متشالتش من على الساعة من امبارح ، مستني كل دقيقة وكل ثانية تعدي ، الساعة بقت 10 الصبح ، خلاص اكيد دا وقت مناسب وهو هيكون في المكتب ان شاء الله ، اتصلت

صباح الخير
” ردت عليا السكرتيرة بتاعته
صباح النور ، بعد اذنك.. ، كنت عايز احدد معاد عشان محتاج أستاذ حسام في موضوع مهم جدا
= للاسف يا فندم والله ، أستاذ حسام النهاردة مش موجود وحتى مش بيرد على التليفون ، بس انا ممكن اسجل رقم حضرتك و اول ما أستاذ حسام ييجي هكلم حضرتك نحدد معاد
اكيد طبعا مفيش مانع
#بقلم :

#عمرو راشد
” قفلت المكالمة ، بتقولي مجاش ، ياادي المصيبة طب هعمل ايه دلوقتي ، اروح فين ولا اسأل مين ، بس لقيتها ، أم نادية مفيش غيرها ، هكلمها واخليها تروح على عنوان البيت الجديد بتاع نادية تطمن عليها وبالمرة تطمني ، صح كدا ، وفعلا مستنتش وكلمتها علطول
الو
= وائل حبيب قلبي وحشتني ، كدا تقعد كل دا ومتسألش علينا ولا نادية كمان بتسأل ، من ساعة ما اتصالحت انت نادية واحنا اتنسينا خالص
وانتي كمان وحشاني والله ومكنتش ناسيكي بالعكس انا كنت عايز اكلمك اكتر من مرة
= خير يا حبيبي

في ايه
بصي يا حماتي في مشكلة حصلت بيني وبين نادية
= مشاكل تاني يا وائل