كانت لسه هترد لقيت كريم دخل فيه زي المدفع وقال له : _ترقص مع مين يا بني ادم انت اتجننت في دماغك!
انت مش شايف الحجاب إللي على شعرها ، وراح باصص لوالدتها ونده علي والدها وقال له : _ بعد إذنك ياعمي سيد أنا بطلب منك إيد الآنسة زهرة علي سنة الله ورسوله ، قالها بفخر قدام الناس كلها إللي انصدموا من طلبه وفي منهم إللي حاقد وفي منهم إللي شايف أنها كبيرة عليه ،وفي منهم إللي غيران وهو شايف زهره وجمالها ،
ووالدته أول ماسمعت راحت مزغرطة بعلو صوتها بفرحة ،
أما والدتها لما سمعت انصدمت وقالت بتعجب : _ إزاي يابني الكلام ده! ده انت اكبر منها بسنين كتير جداً ، رد والدها بابتسامه والفرحة مش سايعاه : _ اسكتي ياأم زهرة هو أنا هلاقي عريس لبنتي في الدنيا دي كلها أحسن من كريم ، وراح واخد كريم في حضنه وقال له : _ موافق طبعاً ياحبيبي بس ناخد رأي العروسه الأول ، وبص سيد لبنته وقال لها بتساؤل: _ إيه رأيك يازهرة .
اتكسفت زهره جدا ووشها قلب ألوان الطيف وقالت له بخجل : _ إللي تشوفه يابابا ، راحت أم كريم حضنتها وفضلت تزغرط وكله بقي فرحان ، أما كريم فأخد زهرة علي جنب وبص جوة عيونها وقال لها بحب : _ أنا مش بس بحبك يازهرتي أنا بعشقك ياقلب كريم وروح كريم ، انا قبل كده كنت مفكر إللي أنا عشته حب ، لكن لما شفتك حبيتك لأ ده أنا اتخطيت الحب بمراحل قولي لي يا زهرة أيامي إنك بتحبيني زي مابحبك ،
قولي لي إنك فرحانه زيي وأكتر ، قولي لي إنك مش عايزة من الدنيا دي غيري. ابتسمت له زهرة وقالت له بهمس ورقة : _ بحبك ياأحلي حاجة حصلت لي في حياتي ربنا يخليك لقلبي ياقلبي. فرح جداً من كلمه بحبك إللي قالتها له وبقي عايز يحضنها ويلف بيها قدام الناس كلها ، لكن مينفعش وقرر إن هو هيعجل بكتب الكتاب والجواز لأنه مش هيقدر يستني كتيير ، هو خلاص لقي نصه التاني إللي مبقاش عايز من الدنيا غيره وقال لها بعشق:
_ وأنا بحبك قد روحي قد عمري حبي ليكي فاق المشاعر والحدود . وتوته توته خلصت الحدوته
#اسكريبت
#أيوه_انا_حبيتها
#بقلمي_فاطيما_يوسف