اخذت زهره البوكس ودخلت على اوضتها وفتحته وقعدت تطلع اللي فيه واحده واحده وكان عباره عن : _دريس في منتهى الشياكه وعليه الحجاب بتاعه وكذا نوع من الشيكولاتات وايفون هديه ، واول ما طلعت الايفون وبتقلب فيه بصه لقيت رساله جت عليه فتحتها ولقيتها رساله منه مكتوب فيها : _احلى هديه لاحلى زهره في البستان يا ريت ذوقي يعجبك واتمنى تلبسي الفستان ده في الحفله، وانا واثق ومتاكد انك هتبقي السندريلا اللي هتيجي الحفله واول الامير ما يشوفها هيدوب في هواها ،
اعتبريني انا الامير وإنتي السندريلا . قلبها دق جدا من كلامه ما كانتش متصوره ان هو اعجب بيها بالسرعه دي وانصدمت من تصريحه وجراءته الزايدة ، وفضلت في السرحان ده مع نفسها وبعدين عدى اليوم ده، وبعد اسبوع وفي يوم الحفله بالتحديد لبست زهره الدريس اللي هو جايبه لها والحجاب وكانت في منتهى الجمال والرقه ، ووصلت الحفله وهو كان مستنيهم على نار وهو اول ما شافها ما نزلش عينه من عليها وقال لها بعد ما سلم على باباها ومامتها :
_ ايه الجمال ده كله يازهرتي ، وجه جنب ودانها وكمل : _انا كده هدوب اكتر ما انا دايب وكده خطر . ردت زهره بابتسامه على كلامه لانها مكسوفه جدا من طريقته ، ودخلوا الحفلة وراحت زهره سلمت على مامه كريم وهي اول ما شافتها قالت لها وهي بتبص لها بانبهار : _الله اكبر عليك يا حبيبتي ايه من الجمال يا زوزو كبرتي امتى كده وبقيتي حلوه تعالي اقعدي جنبي .
سلمت عليها زهره وقعدوا يتكلموا مع بعض شويه، واثناء ما هي ما بتتكلم معاها سمعت زهره صوت الموبايل بتاعها جاله رساله، طلعت الموبايل لقيت الرساله من كريم وكان محتواها : _القمر اللي نورت الدنيا بحالها بصي انا موجود دلوقتي في الجنينه الخلفيه للفيلا عايزك تيجي لي دلوقتي حالا والا هاجي اخدك من وسطهم وانتي حره ، اتصرفي بقى وقولي لهم ان إنتي داخله الحمام او بتظبطي الميك اب بتاعك او اي حاجه ،
قعدت خمس دقائق وقالت فيها ايه يعني لما تروح تشوفه عايز ايه هي بتثق فيه جدا ، واول ما خرجت من الباب وبتبص حواليها للمكان اللي قال لها عليه لقيت حد بيشدها من ايديها واتخضت لكن استريحت لما لقيته هو، هو اول ما شافها قال لها : _بحبك وعايزك تكوني ليا ،
أنا من ساعه ما كنت عندكم في البيت وانا قايم نايم بحلم بيكي ومش قادر اشيلك من دماغي،
اوعي تكوني ما بتفكريش فيا زي ما انا ما بفكر فيكي بالظبط ازعل جدا . اتكسفت زهره جدا وقالت له بخجل : _ايه الكلام اللي انت بتقوله ده يا ابيه انت عارف فرق السن اللي بينا قد ايه ، وحتى لو انا وافقت بابا وماما عمرهم ما يوافقوا لاني لسه في الدراسه وكمان علشان فرق السن . بصلها بعشق وقال لها : _ما لكيش دعوه بعم سيد هو عمره ما يرفض لي طلب وبيحبني زي ابنه بالظبط انا عايز موافقتك إنتي وبس .
اتكسفت جدا وقالت له بتوتر : _انا مش عارفه ارد بإيه بس كل اللي حاساه إني بفكر كتير فيك زيك بالظبط ، قالت له الكلمتين دول وهو مكنش مصدق نفسه ، وابتسمت له وجريت من قدامه وهو قال لنفسه بعد مامشيت : _ ضحكت يعني قلبها مال وخلاص الفرق مابينا اتشال ، ورجع للحفلة تاني وكل شويه يغمز لها بشقاوه ، وهي راحت قعدت علي الترابيزه مع والدتها ، فجه واحد من الناس اللي في الحفله كان متابع زهره بعينيه اول ما دخلت ،
وقال لهم السلام وبص على زهره وقال لها : _تسمحي لي بالرقصه دي يا انسه .