_اصحي يا روز خالتك وابن خالتك على وصول .. صحيت وانا بحاول استوعب كلام ماما _خالتي مين وابنها مين يا ماما وجايين فين؟ _يالهوي منك عايزلك ١٥ ساعه عشان تفوقي خالتك زيزي يا ستي وابنها ياسين .. سمعت وسكت .. المفروض إني كنت مرتبطه ب ياسين من ٧ شهور وسابني من غير اي سبب ومبقاش بيجي ولا بنروح عندهم ياترى جايين ليه؟ قومت رتبت الشقه وكنت متحمسه اعرف جايين ليه وقرارت اني هعمل اكتر اكله مش بيحبها ورق العنب .. مش عارفه إزاي في بني ادم في الدنيا مبيحبش ورق العنب
دخلت المطبخ جهزت الاكل وخرجت ب الصنيه اللي عليها ورق العنب والرز وقعدة اللف ورق العنب بمزاج مش يمكن جاي يصالحني هو اه الكرامه مهمه لاكن انا هتصالح عادي مش يمكن عايز يعمل زاي أبطال الروايات ويقولي حبيت اجيلك وانا جاهز كذا سيناريو في دماغي خلصت وقومت احضر نفسي لبست ميني دريس احمر فيه دوريات بيضه ووقفت منتظره في البلكونه كان فيه اغنيه ل صباح شغاله في الراديو بتقول:
|| إن كنت واخد على خاطرك قولي اصالحك .. وإن كنت مش عارف عذرك قلبي مسامحك .. تهجرني ليه عملت اي ؟ قصدك انسى حبك برضو لاء…|| خلصت الاغنيه وانا بفكر في كلماتها هو فعلآ لو مش عارف عذره قلبي مسامحو ولو كان زعلان مني هصالحو .. قطع تفكيري صوت العربيه كان بيركنها تحت البيت وطلع العماره هو وخالتو ودقيقتين وبقو عندنا في الشقه سلمت عليهم بس سلامي عليه مكنش ب ألايد سلام عبيط كدا من بعيد لبعيد إزيك؟ الله يسلمك
ودخلو وقعدو في الصالون وهو بيحاول يبعد نظراته عني مش عايز يبصلي حضرت الغدا وخلصنا اكل ولسه مش عارفه جاي ليه اكيد مش زياره عاديه قطع تفكيري صوت خالتو وهي بتقول: _امال فين صحبتك سلمى يا روز _سلمى في مشوار مع مامتها لو كانت هنا كان زمانها قاعده مخلصه الاكل أصلها بتحب ورق العنب اوي _طب اي رايك فيها؟ _من ناحية اي يا خالتو؟
_من ناحية اني هجوزها ل ياسين احنا جايين انهارده عشان نطلبها ليه .. _ااه سلمى صحبتي دي مفيش احسن منها ومش هيلاقي زايها تربيه وأخلاق وخفة دم دي تتحط على الجرح يطيب مش عشان صحبتي والله بس هي فعلآ تستاهل ياسين وياسين يستاهلها عن إذنكم هشوف فين العروسه
قولتها وسيبتهم ودخلت اوضتي وانا مش مستوعبه اللي حصل جاي عشان يخطب صحبتي وانا اللي فكرت اني وحشته مقدرش اعمل حاجه غير اني ابان عاديه مينفعش اعيط وانهار عشان هو بعيد من ٧ شهور اصلآ وكان متوقع انه هيخطب اي واحده غيري مينفعش احقد على سلمى عشان هتكون خطيبتو ربنا يهنيهم ببعض وعدت الايام وانا بقنع سلمى توافق عليه هي متعرفش انه كان حبيبي لاكن فاكره اني معجبه بيه محدش كان يعرف ب علاقتي انا وهو غير ماما وكانت جنبي طول الفتره اللي فاتت وقدرة تقنعني انه مش نصيبي وربنا مش كتبه ليا واني هلاقي اللي يستاهلني
ومن المفروض إن انهارده كانت الخطوبه بعد ما لبست سلمى الفستان وخلصنا الميكب واتصورنا كنا متجهين للقاعه اللي هيكون فيها الخطوبه مكنش فيه حاجه في دماغي غير هل انا جبروت؟ عشان البس صحبتي فستان خطوبتها على حبيبي . . فوقي يا روز كان حبيبك مينفعش تقولي حبيبي هو خلاص بقا محرم عليكي افرحي ليهم انتي مش وحشه عشان تحقدي عليهم قطع كلامي مع نفسي حد خبط فيا
_مش تفتح يا أعمى _انا برضو اللي اعمى؟ _اي امال انا أعمى وبجح كمان _هو انتي عشان حلوه وعينك خضره هتشوفي نفسك ولا اي مش كدا يا حلوه قطع كلامي مع الشاب ده صوت ياسين وهو بيقول: _حصل اي يا يوسف حصل اي يا روز؟ _الكائن ده خبطني وجاي يتخانق معايا يا ياسين مش هتبطل تعرف ناس طبيعيه بقا
قولتها وسبتهم ومشيت دخلت ل سلمى وبدأت الخطوبه الاغاني والزغاريط كنت فرحنلهم من قلبي واللي فرحانه منو اكتر اني نضيفه من جوايا وبعرف احب لغيري الخير كان طول الوقت صاحب ياسين عينو عليا اكيد متغاظ مني قطع تفكيري فيه وجوده جنبي وهو بيقول: _انا اسف يا انسه روز _يالهوي بيطلعوا امتا دول انت مش لسه كنت واقف الناحيه التانيه _اصلي بطير _ههه خفه _طيب اقدر اقول كدا انك قبلتي الاعتذار؟
_لاء _حرام ده انا حتى من الفانز بتوعك _بجد انت متابعني على الفيسبوك؟ _اه وبقراء كل حواديتك _لاكن .. لاكن دي مش مهمه _انا بحب اقراء حواديتك اللي مش مهمه _خلاص سامحتك ابتسم ليا ولسه هيرد اصحابو شدو يرقص معاهم كان لذيذ جميل بيعرف يعقب صايع ومحترم في نفس الوقت خلصت الخطوبه وعدا شهور وكل حاجه رجعت زاي الاول مع اختلاف اني شيلتو من قلبي فعلآ ونزلت شغل عشان اشغل وقتي وعلاقتي ب صحبتي زاي الفل الحمدلله
خلصت الاسكريبت اللي كتبته على الفيسبوك ونمت وانا بفكر في جزء تاني قطع نومي صوت ماما وهي بتقول: _اصحي يا روز خالتك وابن خالتك على وصول . . الجمله دي انا عارفها كويس ياترى جايين يخطبو مين تاني؟ قومت رتبت البيت وعملت الاكل اللي مبيحبوش ورق العنب وعزمت سلمى وانتظرتهم وبعد دقايق كانو وصلو الغير متوقع بقا إن كان معاهم يوسف صاحب ياسين معقول يكونو جايين يخطبوني ليه؟
معقول اكون انا العروسه؟ يتبع .. “الجزء التاني من اصحي يا روز” رحبت ب خالتو طبعآ و ب ياسين ابنها ويوسف صحبو حضرنا الغدا وانا هموت من الفضول واعرف يوسف جيه ليه وعملنا الشاي ولسه محدش نطق بس غالبآ ماما كانت عارفه لأنها مستغربتش من وجوده كان جميل لابس بنطلون جينز اسود على تيشرت ابيض وجاكت جلد اسود الطقم ده بيدوبني لو جاي عشان يتقدملي هوافق عليه عشان خاطر الطقم الجامد اللي هو لبسو قطع تفكيري صوت خالتو وهي بتهمس جنبي بتقول:
_قوليلي يا روز اي رايك في يوسف _من ناحية اي يا خالتو _انتي فاهمه قصدي _لاء مش فاهمه _طيب لو رديتي بكل صراحه وقولتي اي رايك فيه هجبلك عروسه _عروسه اي يا خالتي انا عايزه عريس عايزه اتجوز قولتها بصوت عالي كلهم ضحكو على كلامي رد ياسين وقال: _واحنا منقدرش نخليكي نفسك في حاجه ومن غير لف ودوران احنا جايين نطلب إيدك ل يوسف صحبي ..
_اا احم الرأي راي ماما قولتها وسبتهم ودخلت البلكونه وانا مش عارفه اعمل اي أوافق ولا موافقش بس طريقة لبسو شيك جدآ هوافق عشان البس معاه هدومه وكمان بيقراء روايات هعوز اي تاني وكمان بيعرف يعقب يعني جود بوي وباد بوي في نفس الوقت قطع تفكيري صوت وهو بيقول: _اي يا عروسه _ياخربيتك خضتني ازاي دخلت من غير ما احس ؟ _قولتلك قبل كدا اني بطير
_واستأذنت منهم يا عم خفه انك تيجي تتكلم معايا؟ _اكيد امال هقوم من نفسي يعني _امم طيب انت عايز تتجوزني ليه؟ _عشان هبقا عبيط اوي لو سبتك لحد غيري يتجوزك _امم طيب هسألك كام سؤال اعتبرهم اختبار _بعون الله انا قد اي اختبار اسألي يا جوهرتي _جوهرتك؟؟ ما علينا السؤال الأول من يسكن البحر ويحبو الناس؟ _اسبونج بوب بس مش عارف اسمه ثلاثي بصراحه
_برافو عليك شاطر هعديها وندخل على السؤال اللي بعده مين اللي موفاسا ابو سيمبا؟ _عم سيمبا اسمه سكار باين؟ _ايوا برافو عليك انت ازاي شطور كدا _طيب اعتبر كدا اني كسبت؟ _لاء لسه اكمل الجمله الاتيه قالها يا بيبي؟ _تلت مرات يا سيد تلت مرات _امم طيب احلى مسا عليكي يا اي ؟ _يا صفرا تعالي اشربي بيبس
ضحكنا انا وهو على اسالتي العبيطة على قد ما كان باين إنه شخص غامق وعميق على قد ما شخصيته عكس شكله خالص حسيتو شبهي تافه بيحب الهزار متابع الميمز عارف افيهات الأفلام حافظ لقطات من الكرتون وافقت عليه وقولت لنفسي هو ده اللي لما يبقا الماتش شغال هروح اقولو تنه ورنه شغال يقوم مغير الماتش وجايب تنه ورنه ويعملنا حلة فشار ونقعد نتفرج سوا وفعلآ فعلآ لكل قلب حبيب مكتوب علية يلقاه
_وتوته توته وخلصت الحدوته اي رايك فيها يا حبيبتي؟ _جميله اوي يا طنط بس بعدين ااي اللي حصل _عمو ياسين اتجوز طنط سلمى وعاشوا في تبات ونبات وعمو يوسف اتجوزني وعيشنا في تبات ونبات _هيييه جميله اوي اوي قالتها بنت صحبتي وقربت مني باستني من خدي وراحت ل مامتها وقت الشغل كان خلص خدت حاجاتي وروحت البيت وانا بفكر في موضوع الخلفه عدا على جوازنا سنه ولسه مخلفتش ويمكن ده اللي مخليني بحب كل الأطفال لدرجة اني قاعده بقالي ساعه ونص بحكي ل بنت صحبتي على حكايتي
روحت على بيتي غيرت هدومي ونمت وانا بتخيل نفسي لما اكون مامي قطع أحلامي السعيده صوت عارفاه كويس بيقول: _اصحي يا روز فيه مصيبه صحيت من النوم مفزوعه وانا بقول: _مين تاني هيتجوز؟ _جواز اي يا روز الحقيني ياسين بيخوني استوعبت الموقف كانت سلمى اللي عندي وبتعيط _حصل اي طيب بيخونك ازاي؟ طلعت تيلفونها وريتني رساله من رقم غريب مكتوب فيها
“هاي يا عمري أنا ضرتك اتمنى نكون صحاب” _مايمكن حد بيهزر معاكي يابت يا عبيطه انتي _مش عارفه مش عارفه _طب استني هاتي الرقم وانا هسأل حد من عندي في الشركه الخط ده بتاع مين _وهما هيعرفو منين؟ _انتي عبيطه هي شركه ل تجارة البلح ما هي شركة فودافون يا سلمى _ااه ااه طيب فتحت موبايلي عشان ابعت الرقم ل حد من صحابي وكانت المفاجأه إن جالي نفس المسدج بس من رقم غير الرقم اللي بعت ل سلمى
تفكري اتشتت مش عارفه اركز من عياط سلمى وتوتري من كلام المسدج وبعد دقايق كان حد من زمايلي رد وعرفت إن الأرقام جديده ومش متسجله ب اسم حد لاكن في نفس الوقت مقدرش احكم عليه من حاجه زاي دي اكيد حد عايز يوقع بينا وده اللي فهمتو ل سلمى وفعلآ اقتعنت ب كلامي وقامت تعمل كيكه خرجت ب الكيكه والشاي وجالي مسدج من تيلفوني وهي برضو جالها مسدج ولما فتحناهم كانو ..
يتبع.. “الجزء التالت والاخير من اصحي يا روز” فتحنا المسدجات وكانو صور ل يوسف مع بنت وصور ل ياسين مع بنت تانيه _جالك كلامي مش قولتلك بيخوني اااه يا ياسين يا ابن زيزي وحياتي امي ل اوريك معرفتش انطق مش عارفه اتصرف طب أصدق ولا مصدقش اخر كنت اتوقعها حوار الخيانه ده معملتش حسابي اني اتحط فيه ومن المفروض عقاب الخاين إننا نسيبو وانا مش هقدر اسيب يوسف مش هقدر قطع تفكيري صوت سلمى وهي بتقول:
_مش قادره يا روز مش قادره حاسه انه هيغمى عليا _اهدي يا سلمى هنلاقي حل سبيني افكر بس _لاء مش قصدي على حوار الخيانه انا قصدي هيغمى عليا من الكيكه طعمها جامد دوقي كدا بس كان ناقصلها سوس الشكولاته _يابت انتي عايزه تجلطيني اجوزاتنا مع بنات تانيه وانتي تقوليلي كيكه وشكولاته احنا في أي ولا في اي يا سلمى _طيب ماليش دعوه شوفيلي حل اروح ارفع عليه محضر؟ والله اعملها
_لاء طبعآ هتحبسي جوزيك حبيبك .. احنا لازم نتأكد اكتر واكتر عشان البنات دول في نيتهم اننا نعرف ونطلب الطلاق عشان لو بيحبوهم كانو هيخافو اننا نعرف ومش هيقولوا حاجه غير لما يتجوزو _صح انتي صح _يبقا نحافظ على بيتنا ونتعامل بهدوء يا سلمى اوعي تعرفيه إننا عرفنا حاجه اتعاملي عادي _مش هقدر هموت واتخانق معاه وانكد عليه _لاء حاولي عشان خاطري وانا هفكر في كذا حاجه نعملها ونتأكد منها
_خلاص ماشي قومي اعمليلي شوية سندوتشات بقا عشان الكيكه جزعت نفسي وحاسه اني عايزه اكل حاجه حادقه _عندك المطبخ يا أخر صبري وقامت سلمى عملت سندوتشات وعصير ورجعت قعدة معايا وشويه وكان يوسف وياسين جم ياسين خد سلمى ومشيو وانا حضرت الاكل ل يوسف واتحججت اني هعمل حاجه ب موبايلو وفتحتو عشان اتأكد من الرقم اللي بعتلي ولقيتو عنده فعلآ كان نفسي يكون شكي صح ويطلع حد بيوقع بينا كان نفسي ميكونش خاين ..
عدا كذا يوم وانا متجنبه يوسف بس في نفس الوقت بتعامل عادي بنسبه ل سلمى فا كانت كل يوم تحكي حدوته ل ياسين عن الست اللي دبحت جوزها وحطتو في أكياس زباله ورمتو في الصحرا قطع إندماجي مع التيلفزيون صوت يوسف وهو بيقول: _بقالك كام يوم مش على بعضك كدا انتي كويسه؟ _ااه يا حبيبي انا تمام بس واحده صحبتي حصل معاها حاجه بشعه يا يوسف ومش قادره ابطل تفكير فيها
_اي حصلها اي؟ _أبدآ جوزها حب عمرها طلع بيخونها _امم وبعدين ؟ _مفيش خليتها تطلب الطلاق ماشيين في إجرات الطلاق _وليه خراب البيوت يا روز ما كان ممكن يبقا في أي حل غير الطلاق _وهو يبص ل غيرها وتسامحه؟ تبقا مأمنه نفسها معاه ويخون ثقتها وتسامحو؟يبين ليها انها مش مليه عينو وتسامحو؟ لاء يا حبيبي ده يغور ويجي بداله طابور وانا كدا كدا صحبتي حلوه واي حد يتمناها هتعيش حياتها من بعده مع واحد يصونها
_طب خلاص خلاص سيبك من سيرة صحبتك اي رايك نروح بكرا النادي انا وانتي وياسين وسلمى؟ _خلاص ماشي اهو نغير جو ودلوقتي هدخل انام تصبح على خير قولتها وسيبته وقومت ونزل من عيني دمعه غصب عني محسبتهاش الحظه دي حاولت ادور على اي خطه ولقيت خطه وقولت هحكي عليها بكرا ل سلمى وفي آخر اليل مسكت تيلفونو ولقيته عامل بلوك للبنت دي ياترى حس بالذنب؟ نمت وانا زعلانه من اللي وصلنا ليه بقيت بستنى ينام عشان افتش في تيلفونو بس هو السبب هو اللي وصلنا ل كدا
جيه تاني يوم وكنا في النادي متجمعين زاي ما اتفقنا وحكيت ل سلمى على خططي بس معجبتهاش وهي كان عندها خطه ومعجبتنيش برضو اليوم خلص وكل واحد رجع للبيت على قد ما انا حاسه انه اتغير وحاسس بالذنب على قد مانا حاسه اني لازم اعاقبه عقاب قاسي زاي احساسي اللي حسيته لما شفت صورو مع غيري محستش بنفسي غير وانا بتصل على ماما احكيلها هي اللي هتساعدني ازاي مفكرتش فيها من زمان بعتلها الصور واتساب وحكيتلها الحكايه من اولها ورنيت عليها اسمع رأيها
_أنتي عبيطه يا بت ماهو باين في الصور ان البنات دي مرميين عليهم والجحش ابن خالتك وجوزيك عرف يضحك عليهم _طب نعمل اي يا ماما سلمى قالت على خطه نعملها بس هي شريره شويه _قالت اي قوليلي _قالت إننا نعمل نفس اللي عملوه بس كدا وكدا نتصور مع رجاله غريبه ونبعت الصور من خط جديد ونقولو مراتتكم بتخونكم ويجو على المكان اللي هنقولو في العنوان ونتفق مع ناس يضربوهم
_الخايبه العبيطة دي هتخرب بيتها ب إيديها جتك نيله انتي وهي وعلى تفكيركم _وانا مالي يا ماما دي فكرتها هي انا موافقتش مهانش عليا يوسف يضرب بصراحه _ااه يعني عادي يشوفك مع راجل غريب في صوره وعادي تحطي لنفسك لقب الخاينه لاكن مش عادي انه يضرب _طب قولي انتي يا ماما نعمل اي ؟ _بصي يا روز هما بيحاولوا يخلوكم تطلقو عشان يخلى ليهم الجو وهيبعتو تاني وتالت وهيتصلو بس في الاول والاخر هما آخرهم كلام صوره لاكن انتي مراتو يعني انتي ليكي الأفعال
_يعني اي وضحي يا ماما _يعني هما آخرهم مع جوزيك ولا جوز الخايبه سلمى خروجه ضحكه حلوه كلمتين حلوين لاكن انتو مالكوش اخر ينفع ليكم الأفعال ما هو جوزيك حلالك _ااه هو تقريبآ فهمتك تقريبآ مش اكيد يعني _فتحي دماغك دي شويه واللي اقولو ليكي تقولي ل سلمى تقضي معاه اسبوع من غير نكد من غير زعل هزار وضحك وكل يوم استايل وشكل جديد وريلو اهتمامك بيه وب اهلو وعند اليوم الساتت في الأسبوع قولي إنك حامل اليوم السابع بقا تختفو من البيت وتيجو عندي وانا اقولكم تعملو اي
_ماشي يا ماما اللي انتي عايزاه حاضر وبالفعل بدان ننفذ كلام ماما حتى هما خده بالهم من التغير مش فاهمه اي وجهة نظرها ما كنا ندخل في الخطه على طول بس ادينا بنسمع الكلام وخلاص وانهارده كان اليوم الساتت في الأسبوع جهزت اكل بيحبو مع ورود وشموع ولبست دريس اسود وميكب خفيف واستنيتو يجي عشان اقولو اني حامل .. كان هيطير من الفرحه خاف عليا وشالني قعدني على السرير وهو بيقولي:
_ممنوع تقومي من مكانك طول ال٩ شهور الجايين انتي فاهمه؟ كان نفسي الخبر يكون حقيقي على عيني فرحته دي تكون كدا وكدا ونفس اللي عملتو انا سلمى عملتو وجيه اليوم السابع ومشيت من بيتي روحت عند ماما وسلمى نفس الكلام _ها نعمل اي تاني يا ماما _هاتو موبايلوتكو هبعت رساله خدت الموبايلات وبعتت ل يوسف وياسين الصور اللي اتبعتت من البنات وكتبت: “انا عرفت حقيقتك يا خاين انا همشي من حياتك كلها هختفي عشان ابني ميجيش يلاقي ابوه خاين ومدورش عليا عند اهلي عشان هما ميعرفوش حاجه وخلي السنيورة بتاعتك تنفعك سلام”
_يابنت ال اي يا طنط ده انتي مطلعتيش قليله والله المهم هنروح فين الفتره اللي هنختفي فيها _هتبقو عندي هنا وهما هيتجننو عليكن وبالذات انكم حوامل _ماما انا ممكن ازود حاجه على رسالتك؟ _خدي راحتك ياختي اهو جوزيك خدت الموبيل وبعتلو: “انا هكون بره البلد هعمل زاي ساره اللي في عشق الزين لما مراد الألفي خانها هرجع بعد ٢٠ سنه تكون بنتنا كبرت هحرمك منها ٢٠ سنه يا يوسف”
هو عارف إني بحب الروايه دي ونفسي اعمل اي حاجه حصلت في الروايه وده هيخوفو اكتر قطع تفكيري صوت ماما وهي بتقول: _جتك نيله الروايات لحست نفوخك _سيبك منها يا طنط عندك اكل اي تيجو نجيب رينجه مع شوية بصل اخضر ولمون وبيبس ؟ _يا سلمى انتي هتشليني ال ٢٤ ساعه اكل _واي دخل الزعل ب الاكل بس بطني مالها ومال الحوار؟ _سيبك منها يا سلمى انا هاكل معاكي بس انتي اللي تعملي الرينجه
_اتغقنا يا طنط وفعلآ نزلت سلمى جابت الاكل ودخلت عملتو وقعدو ياكلو وانا مكنش قلقانه من حاجه غير حالة يوسف ياترى عامل اي ولا هيعمل اي شميت ريحة الرينجه مقدرتش اتمالك نفسي رجعت وقرفت منها _تكونيش حامل يا بت روز _ياماما انتي هتكدبي الكدبه وتصدقيها _اخرسي انا هطلب ليكم تيست الحمل انتو التنين وتقومو تعملو وبالفعل طلبت تيست الحمل من الصيدليه وشويه وكان جيه مكنتش مهتمه بيه عملتو وانا عارفه النتيجه
وبعد خناقه كبيره بين ماما وسلمى عشان سلمى تسيب الاكل وتقوم تعمل التيست اخيرآ عملتو ورجعت تكمل اكل عادي بعد دقايق مفيش اي ردة فعل وثواني ولقينا ماما بتزعرط _اي يا ماما حامل بجد؟ _اه يا موكوسه منك ليها _طب ليه انا قرفت من الرينجه وسلمى لاء _عادي مش كل الحوامل نفس الشيء _طب ازاي انا وهي حامل؟ _انتو مش متجوزين مع بعض عادي اهو حملتو مع بعض
_طيب كويس كدا الكدبه بقت حقيقه _ااه عن اذنك بقا يا طنط اعملي اي غدا حلو كدا عشان انا دلوقتي بقيت اتنين هاكل ليا وللنونو _على قد مانا متغاظه منك بس كلامك كله صح لازم تاكلو عشان العيل ميطلعش ناقص وزن هروح اعملكم حاجه تاكلوها عدا اسبوعين ويوسف وياسين هيتجننو علينا وانهارده جرز الباب رن جيت افتح شوفتهم من العين السحريه قولت ل ماما ودخلت استخبيت انا وسلمى
كنا سامعينهم وهما بيحكو ل ماما عن الي عملو وعن ردة فعلنا _بس كدا يا حماتي هو ده اللي حصل _امم وجاين ليا اساعدكم؟ ده انا لو أطول اطلع زمارة رقبتك انت وهو وأفضل ازمر فيها لحد ما تفرقع هعملها يا مغفلين يا بغل منك ليه _حقك تقولي اللي انتي عايزاه يا خالتي بس ماليش دعوه هاتولي المفجوعه بتاعتي ماليش دعوه _وانا كمان عايز المجنونه بتاعت الروايات بتاعتي ماليش دعوه
سمعنا انا وسلمى كلامهم ومستحملناش نستنى اكتر من كدا خرجنا ليهم جريو علينا حضنونه _كنتي كل الفتره دي هنا يا روز؟ ردت ماما وقالت: _امال هيروحو فين وانت يا ياسين لسه عقابك من زيزي اتقل ومتفرحش اوي يا يوسف عشان انت كمان هتتعاقب معاه _توبه يا حماتي والله توبه دي كانت خروجه في وسط يوم زحمه من الشغل مش خيانه اوي يعني _امال كنت عاوزها توصل ل اي يا عم يوسف
_ولا حاجه انا خلاص عرفت غلطتي وهحافظ على بيتي ومراتي وبكدا اقدر اقول اني رجعت ليه عشان مش هلاقي واحد دمه خفيف وبيصلي وريحة البرفيوم بتاعته حلوه وبيعرف يصورني وبيبحبني زاي يوسف وتوته توته وخلصت الحدوته #ة