ساعتها ادركت اللي قلته ولفيت ادور علي شنطتي وكملت كلامي وانا مش مهتمه
= يعني اصلي اتفاجئت اول مرة اشوفك بحاجة غير الجلبية معرفش انك بتلبس زي الشباب كدا عادي
_انتي لسه متعرفيش حاجات كتير بس مقلتليش اي الحلاوة دي
بصتله كأني بتاكد انه يقصدني انا لاقيته بيكمل
_ انتي حلوة علطول مش هنكر بس بجد شكلك حلو اوي
ابتسمت في هدوء ولاقيته بيقرب عليا وبيبوس راسي
= شكرا انك قدرتيني واحترمتي كلامي
بصتله كتير اوي بحاول استوعب هو بجد حلو كدا ولا هو
بيحاول يبان انه حلو ماهو مش معقول انسان مفيهوش
غلطه يعني ..خرجت من افكاري علي صوته وهو مادد ايده ليا عشان نمشي ..مديت ايدي بتوتر لحد محضن ايدي بين كفوفه ونزلنا تحت لاقينا كله متجمع وحقيقي كلهم حبو شكلي اوي ودا بسطني وريحني نفسيا اوي لحد مالاقيت مريم الحرباية جاية من ورايا
_ اي دا يا غنوة دا انا معرفتكيش واصل كويس والله انك داريتي شعرك المنكوش
= اسمه كيرلي متسمعيش عنه ولا اه سوري دي حاجات يعرفوها البنات وبس
لمحت مروة ونغم وهما بيضحكو وهي كانت لسه هترد بس زين قاطعهم اننا هنتاخر ولازم نمشي ..
لقيتها مسكت زين من ايده بتوقفه وحقيقي ساعتها كان هاين عليا اجيبها من رقبتها
_ انت هتخرج يازين دا انا كنت جايه اجعد معاك موحشكش جعادنا ولا اي
قاطعنا صوت مرات عمي وهي بتقول
* متاخدها معاكو يازين ياولدي دا حتي زوج مريم حلو جوي خليها تنجيلك بدلة زين وتشتريلها كام حاجة
زين حاوط ايدي بين كفوفه وهو بيقول
_ بيعجبني زوج مرتي اكتر ياما ومعلش احنا متاخرين اما نعاود نبجي نجعد مع مريم هي كدا كدا فاضية وموراهاش حاجة بالاذن
كمل كلامه وهو شاددني وخارجين علي برا وورانا مروة ونغم وحقيقي كان قلبي بيرقص
علي انه كبسها مريم الحرباية دي.. خرجنا وركبت جمبه في العربية وورا مروة ونغم واتمشينا في البلد فتحت ازاز العربية وقعدت اتفرج علي البلد بجد حلوة اوي ازاي مجتش هنا قبل كدا الشوارع نضيفة والزرع ف كل مكان وبجد انا كنت ظالمة المكان بابا كان عنده حق .. وصلنا عند مول كبير اوي متوقعتش اني الاقي زيه هنا وقالو اننا هنلف جوا ولو معجبناش هنشوف مكان تاني زين قال انه هيسبنا براحتنا ويخلص كام مشوار شغل ويرجعلنا تاني وسجل رقمه عندي وقالي لو احتاجت حاجة ارن عليه وقفته علي جمب وسالته وانا بفرك في ايدي
_ اعمل اي ؟
بصلي ياستغراب
= تعملي اي في اي ؟
_ يعني بص انا مش عاوزة اكلفك فقولي ميزانيه امشي عليها عشان الموضوع ميوسعش مني اوي مبحبش اكلف حد
بصلي وابتسم
= مش متعود عليكي مكسوفه كدا ؟
_ متعودتش اطلب من حد فلوس حتي بابا بطلب في الضروري وبس وهو قال انك قايله ميدنيش
= عشان ملزومة مني انا بصي هاتي اللي نفسك فيه وملكيش دعوة بفلوس خير ربنا كتير والحمد لله ومروة زي متجيب هاتي لنغم وملكيش دعوة
_ نغم بابا اداها فلوس تجيب اللي هي عوزاه متخافش
= لا نغم زيها زي مروة اسمعي الكلام وبلاش غلبة وانا ليا كلام مع عمي
كمل كلامه وهو بيطلع محفظة من جيبه وبيديني فيزا بتاعته
= بصي الفيزا معاكي اهي هبعتلك الباسورد علي الواتس حاسبي منها وهاتي اللي تحبيه
بصتله وبصيت للفيزا باستغراب
_ انت غني وانا معرفش ولا اي
ضحك من قلبه بطريقه خدت قلبي معاه وكمل وهو بيقول
= مفيش حاجة تغلي عليكي يلا انا هجيلكو تاني مش هتاخر
ودعنا وسابنا انا والبنات دخلنا المول ولفينا كل حته فيه واشترينا حاجات كتير اوي مكنتش اعرف ان حاجات الفرح كتير اوي كدا واختارنا لنغم ومروة فساتين بسيطه وجالنا زين خدنا وغدانا برا واما لقانا اتاخرنا قرر يجيب بدلته في وقت تاني ورجعنا البيت وبجد كنت مبسوطة اوي ومش فاهمة سبب انبساطي رجعنا البيت لقيناه هادي طلعت اوضتي ادخل حاجتي عشان اجيب ماما تتفرج علي حاجتي … خرجت من اوضتي وفجاه
مفهمتش اي اللي حصل محستش غير وانا بصرخ وبقع علي السلم كله وزين مسكني في اخره وبعدين غبت عن الوعي واخر حاجة سمعتها صوت صراخ زين باسمي
_ غنووووة !!!! رواية غنوة الزين غنوة الحب الفصل الخامس والسادس بقلم ندي زايد