هحكيلكم النهاردة قصة حقيقية حصلت في احدى قرى الصعيد.. اللي حكالي القصة بيقول ان كان في بنت جارتنا .. هي صغيره في السن اتخطبت لجارنا.. ومن يوم ما اتخطبت وبدا يحصل لها حاجات غريبة ويحصل لخاطبها حاجات اغرب!..
جارنا كان دايما بيشتكي من اول ما خطب البنت دي انه بيحلم بكوابيس مفزعة جدا .. وديما كان بيسمع اصوات غريبة بتصحيه مفزوع في نص الليل.. وخطيبته برضه كانت بتحلم بكوابيس وتسمع اصوات صريخ ستات واطفال ف نص الليل.. كانت بتصحيها ف نص الليل! الموضوع موقفش على الاصوات الغريبة اللي البنت دي بتسمعها.. دي بدات تشتكي بان بطنها بتتقطع ! مغص قوي جدا كان بيجلها فجاة وفي مواعيد مش مظبوطه؟ يعني ممكن تكون قاعده عادي مع اهلها وبتاكل وفجاة المغص ده يقطع بطنها ومتقدرش تحط لقمه في بطنها! فضلت ع كده اسابيع ومكانتش بتقدر تاكل..
اي لقمة تحطها ف بقها كانت بترجعها ع طول بمجرد ما تبلعها!.. وخطبها فضل مستمر معاه الكوابيس اللي بتصحيه ف نص الليل والاصوات اللي بيسمعها بليل وتصحيه من عز نومه!.. البنت اهلها ودوها لدكتور واتنين وعشره وكلهم قالو ان بنتكم سليمة مفهاش حاجة! بس برضه لسه بتشتكي من بطنها ومحدش عارف ايه السبب وكل الدكاترة بيقولوا انها سليمة! في دكتور من الدكاترة قال لاهلها بنتكم سليمة ودوها لشيخ يشوفها لان اللي عندها مش عضوي!..
فعلا ودوها لشيخ وفضلت البنت دي تروح له وكان بيعملها جلسات علاج بالقران لحد ما البنت فعلا بدات حالتها تتحسن.. مبقتش تشتكي من بطنها وكمان الكوابيس مبقتش تشوفها.. ونفس الحكاية في خطبها الكوابيس وقفت ومبقاش يصحي ع اصوات مفزعة ف نص الليل.. جه وقت جوازهم.. اتعمل فرح كبير ف القرية وخلاص اتلمو ف بيت واحد .. ومن هنا بدات معاناة جديدة!..
في اول يوم جواز دخل العريس مع عروسته لاوضتهم.. العروسة قعدت مع عرسها ع السرير وفضلو يتكلمو مع بعض شوية.. فجاة العروسة مسكت بطنها وهي بتصرخ من الالم! العريس خاف وبص عليها ومش عارف يتصرف! فضل يقولها بخوف: – مالك ف ايه؟ = بطني بتتقطع مش قادرة!
العروسة قالت الجملة دي وراحت مرمية ع الارض وهي بتتمرمغ ! جالها حالة صرع غريبة.. بقها بينزل مادة بيضه .. بتتلوه ع الارض زي التعابين! جسمها فجاة اتخشب وعنيها جحظت! العريس واقف مش عارف يتصرف من الخوف اللي شل تفكيرة! العروسة هديت وراح العريس شايلها وحاطتها ع السرير! هو مرديش يبلغ اهله ولا اهل العروسة عشان ميكبرش الموضوع لان حاجة زي كده تعمل مشكلة كبيرة وممكن الموضوع يخلص بطلاق لان كده العروسة ف نظرهم هتكون متصابه ! او ملبوسة!..
العروسة فاقت بعدها بس للاسف كانت مشلولة مش بتحرك رجليها وايديها كمان مبتتحركش ! بس حالة الشلل دي مستمرتش كتير بعد اقل من نص ساعة جسمها فك وبقت تتحرك عادي! اليوم ده عدى وفضلت اسبوع ميجلهاش حالة الصرع والشلل الغريبة اللي جت لها اول يوم جوازها… بس بعد الاسبوع جتلها تاني نفس الحالة.. بدات بصرع وانتهت بشلل! هنا الزوج مكنش عندو خيار غير انه يبلغ اهلها ويبلغ اهله لان كده الوضع مايتسكتش عليه!..
بلغهم فعلا وبدأو اهل الزوجه وجوزها يودوها لشيوخ عشان يعالجو البنت المسكينة دي! لان كان بيجلها حالات غضب غريبة وتفضل ضربت ف الكل وتاذي نفسها! دي قطعت شعرها باديها!
بس كل ما كانوا يودوها لشيخ .. الشيخ ده يحصل له مصيبة! يعني اول شيخ راحوا له بيته اتحرق! والشيخ التاني ابنه وقع من الدور التاني ورجليه اتكسرت! كل شيخ يروحوا له يحصل له مصيبة! ف للسبب ده كل الشيوخ امتنعو انهم يقابلو الحالة دي ! يعني اهل البنت لما كانوا يكلمو شيخ ع حالة بنتهم.. وطبعا الشيخ من دول عارفين المصايب اللي حصلت للشيوخ اللي قبلهم فيرفضو انهم يستقبلو الحالة!..
فهنا جوز البنت المسكينة قرر انه هو اللي هيعالج حالة مراته بنفسه! .. جاب كتب سحر وبدا يقرا عشان يعرف ازاي يعالجها من اللي صايبها! بس هو مكنش يعرف ان باللي عمله هيجيب لمراته الاذى! ف يوم بليل بعد العشا مراته قررت انها تصلي وده كان اول مرة تقرر القرار ده من يوم ما صابها اللي صابها! راحت ووقفت ع سجادت الصلى عشان تصلي العشا .. واول ما عملت كده اختفت! اختفت ف اللحظة اللي كانت واقفه ع سجادت الصلى! ..
جوزها سمع صوت صرخة مراته بره ف الصالة وهو كالعادة قاعد يقرا كتب السحر.. طلع بره لقي سجادت الصلى مفروشة ومراته مش ف الشقة كلها! اختفت!… دور عليها جوزها واهلها ف كل حته.. حتى اهل القرية كانوا بيدوروا لحد ما جه واحد من اهل القرية قال انا لقيت حته من حجاب البنت عند الترعة! الترعة دي بتعدي ع القرية بس مكانها بعيد عنهم ويعتبر مهجور وسط الاراضي الزراعية ومحدش بيقرب للمكان ده بليل! المهم هما راحوا للترعة عشان هناك يشوفوا…. البنت كانت هناك بس كانت حالتها متتصدقش ؟!
يتبع…. بكرة الجزء التاني من حكاية معاناة روحاني وزوجته…. الحكاية حقيقية مش من تاليفي … #محمد_مهني #معاناة_روحاني_وزوجتهالجزء التاني من قصة #معاناة_روحاني_وزوجته
رحنا للترعة وكان معايا كام راجل من اهل القرية وابو مراتي.. الجو هناك كان مضلم ومفيش حد غيرنا هناك.. هي الحته دي بذات مبيكونش فيها حد لان معروف ان الترعة والارض اللي جنبها مسكونة! فمحدش كان بيهوب ناحيتها بليل.. هناك لقينا جسم بني ادم مرمي ع طرف الترعة ومكنش باين مين هو بسبب الضلمة.. كنا جايبين كشفات زيت الكبيرة .. في الاول معرفنهاش لان جسمها مليان طين.. ولما انا شلت الطين من وشها اتضح لي وش مراتي! مكانتش بتطنق بس كانت بتتنفس.. شلتها ورحت بيها ع البيت انا وابوها ورجالة القرية كل واحد روح بيته..
فضلت انا اقرا عليها اللي اتعلمته من الكتب اللي كنت بقراها.. ورشيت عليها مايه مخلوطه بالزعفران وماء وارد وفضلت اقرا عليه كلمات اتعلمتها من الكتب.. وبعدها مراتي فاقت.. فاقمت ومكانتش فاكرة اي حاجة من اللي حصلتلها ولما سالتها ايه اللي حصلك وايه وداكي للترعة؟ كان ردها انها مش فاكره انها راحت هناك وكل اللي فكراه انها كانت بتصلي العشا!..
فضلت يومين اقرا عليها واعملها جلسات كتير لحد ما بدات تستعيد صحتها من تاني.. لكن بعد اليومين دول حصل حاجة غريبة اوي! كنت فوق السطح بليل قاعد بقرا الكتب اللي دايما بقراها عن العلاج الروحاني واسرار الحروف .. فجاة وانا مندمج في القرايا سمعت صوت قطة بتنونو .. بصيت ع القطه لقيتها قط اسود كبير بشكل غريب جدا كان في حجم الكلب! ميدلش خالص انه قط بحجمه الغريب ده.. عينه كانت باصه عليا ب تحدي.. وقام فجاة جه عند رجلي وقعد بكل هدوء ولقيته بيبص عليها وبيتكلم! ايوة كان بيتكلم زينا واول جملة قالهالي:
– انا خادمك.. وانت طلبت حضروي عشان اسعدك؟ هساعدك وهعرفك من اللي السبب ف اللي صاب مراتك.. بس بشرط واحد؟ رديت عليه من غير خوف: – اشرط؟ = مش مسموح لك انك تكشف عن اللي عمل السحر ف مراتك كل المطلوب ان مراتك تشفى من اللي صايبها.. – موافق على الشرط
= مراتك كان ف حد بيحبها وطلبها من ابوها بس ابوها ماوفقش لان سمعت اهله مش كويسة ف البلد.. الشاب ده حلف ان محدش هيتجوزها غيره.. فضل يجي لابوها كل يوم ويهدد فيه لان اهله ناس شغاله مع المطاريد اللي ف الجبل.. وسبب رفض ابو مراتك عشان كده.. هو فضل يهدد.. وابوها اصر على رافضه للشاب.. وانت جيت خطبتها ووافق.. واول ما حصلت الخطوبة الشاب ده عمل سحر تفرقه بينكم ومدفون في المقابر.. القبر الشاهد هتلاقي مكتوب عليه مقابر ال…. العمل مدفون جواه روح خرجو ويتحرق بعد ما تحط عليه مايه بالزعفران ويتحرق والفجر بياذن …
القط قال الكلام ده واختفى! ..
انا رحت لابويا وحكيت له كل حاجة.. مصدقش.. فقلت له مش مهم تصدق احنا لازم نروح المقابر وهناك هثبت لك.. قالي هنروح بس نعدي ع حماك يجي معانا.. انا قلت له مش عايز حد يعرف.. قالي لا لازم يعرف كل حاجة احنا مش هنكذب عليه لانه ابوها ومن حقه يعرف ايه اللي صاب بنته.. مقدرتش امنع ابويا وراح لحمايا وحكاله اللي حكيته وحكاله كمان ع الشاب اللي كان متقدم لها .. وعاتبه ازاي ميقولناش ع الحوار ده.. هو قاله مكنش مهم انكم تعرفو لانه موضوع وخلص وبنتي مش اول وحده يتقدملها ناس وتترفض..
وقال كمان انه هينتقم من اللي عمل كده ف بنته!… فعلا روحنا وخرجنا العمل.. واخدته وحرقته زي ما قالي القط اللي ظهرلي.. وع الليل القط ظهرلي تاني فوق السطح بس كان غضبان وقالي ازاي افشي السر واقول ع اللي عمل كده! قلت له كان لازم يتعرف عشان ياخد جزاءه.. بس القط او الخادم اتضايق جدا وقال لازم تفادي غضبنا بوليمة هتعملها عشان نسامحك ع الغلطة دي.. ولازم تعرف ان افشاء الاسرار ف علمنا جريمة.. انت بتعالج .. والمعالج ما يقولش ع مين اللي عمل السحر المهم انه يتبطل..
قلت للقط ايه هي الوليمة اللي عايزنها ؟ قالي عايزين عضم جمال مقري عليه وتحطهولنا ف المكان ده قبل الفجر وامشي.. الجمل لازم يكون لسه مدبوح.. هتفرقو منه للناس والعضم تجيبو الفجر فوق السطح وتمشي…
فعلا عملت كده.. اخدت جمل من الزريبة اللي عندها ودبحته.. قلت لابوها هدبحه لله عشان مراتي ربنا يشفيها.. دبحت الجمل وفرقت منه للناس .. والعضم جبته ورشيت عليه زعفران وقرات عليه وحطيته فوق السطح قبل ما الفجر ياذن بساعه.. اول ما عملت كده لقيت قطط كتير بنفس شكل القط اللي ظهر لي.. اتلمو حوالين العضم وفضلو ياكلو من اللحم اللي كان عليه! القطط كانت كتير وظهرت فجاة!..
انا كنت ببص من بعيد لان القط قالي ان انزل بس انا بصيت للفضول! وبعد ما خلصو اكل لقيتهم اختفوا! او بالتحديد حرفيا لقيتهم طاروا عن الارض واختفو! .. من اليوم ده مراتي رجعت احسن من الاول وعشنا حياتنا وخلفت كمان 3 اولاد وبنت.. حكايتي اشتهرت ف القرية اني المعالج الوحيد اللي قدرت اشفي مراتي .. والناس بقو يجولي من كل حته .. من اهل القرية والقرى اللي جنبنا… وانا فعلا بقيت حد متمكن من العلاج الروحاني بسبب اللي اتعلمته من الكتب واسرار الحروف وسر اسم الله الاعظم اللي اخدته من الخادم واللي بقيت اطلع اي جن مهما كان قوته!…