أيوا يابنتي فاكر بس خدي نفسك وإمسك إشربي كوباية ميا إهدي. شربت شوية من الميا ورجعت أتكلم بتوتر وإستعجال وقولت _ حضرتك وقتها قولت إني لازم أحضر ولكن طارق وقتها قالي أخلص شوية شغل في الشركة ومعرفتش آجي. بصلي بإستغراب وصدمة وقال لأ يابنتي اللي إتقالي مش كدا اللي إتقالي يومها لما جه طارق إنك إنت اللي رافضة تيجي وقافلة على نفسك ف هو جه والمفروض بلغك باللي كان في الوصية!
بصتله بحذر وإنصات وأنا بسأل بتساؤل _ مش مهم السبب المختلف دا المهم إي اللي كان في الوصية يا أستاذ حسين بصلي بشك وإستغراب على إني مش عارفة فعلا أو متبلغتش باللي كان المفروض أسمعه وقال بهدوء يابنتي كان أستاذ خالد الله يرحمه كاتب الشركة بإسمك لإنه كان شايف إنك أكفأ واحدة تستحق المكان دا وعشان شغلك الجاد فيها وكمان لإنه مربيك من صغرك حس إنه لازم يوزع عليك جزء من الورث زي طارق ف أداك الشركة قصاد باقي أملاكه ل طارق!
غمضت عيني بقوة وأنا حاسة المكان بيلف بيا ودماغي مصدعة جدا وقلبي اللي بدأ صوت دقاته تظهر وحاسة إنه هيطلع من مكانه كنت حاسة إن كل حاجة في حياتي كدبة في الوقت دا. قومت وقفت وأنا مش قادرة أسند طولي وقولت بهدوء _ شكرا يا أستاذ حسين تعبتك معايا. إتكلم أستاذ حسين بعد ما قام وقف وقال بقلق إستني يابنتي شكلك مش قادرة تقفي وتمشي. إتكلمت برفض وقولت _ لأ لأ أنا بخير تسلم بس طارق بالله عليك ميعرفش حاجة بقعدتي معاك دي خالص ولا كإنها حصلت لحد ما أشوف هعمل إي.
إتكلم أستاذ حسين وهو بيتحرك ناحية الخزنة بتاعته وقال إستني يابنتي خدي دي. بصيت للورقة اللي في إيده وقولت بتساؤل _ إي دي يا أستاذ حسين جاوبني بهدوء وحزن على حالتي وقال مش عارف بس كنت حاسس إن طارق مش هيبلغك وهيعمل حركة زي دي ف شيلت معايا نسخة من العقد اللي بيثبت إن الشركة بتاعتك وبإسمك بيع وشړا من خالد الله يرحمه. بصيت للورقة وبعدين بصيتله وقولت بإبتسامة ضعيفة
_ خليها معاك يا أستاذ حسين دا أأمن مكان ليها لإن أنا دلوقتي مش عارفة مين معايا ومين عليا ف عشان خاطري خليها معاك لحد ما أعرف أميز يميني من شمالي وأعرف هعمل إي بعد كدا. ودعته وسيبته ومشيت ركبت تاكسي للبيت وأنا دموعي بتنزل لإني حاسة كل حاجة في حياتي كانت كدبة وسبب جواز طارق مني كدبة أكيد مقاليش الموضوع دا وأكيد طلب مني الجواز بعد ۏفاة والده بشهرين بس على طول مش عشان بيحبني لأ دا عشان الشركة!