غرام العز بقلم فرح وائل ج١

~ طب بس يجماعه اهدوا…كارما مش انتي جايه عشان تخلي سبيل المتهم!! = اه ~ طب يلا اتكلمي = ما هو موترني مش عارفه اتكلم خالص ~ طيب يستي متتكلميش معاه خالص..قوليلي انا *وراح مهاب جه وقعد ع الكرسي اللي قدامي وقالي يلا اتكلمي وفعلا بدأت اتكلم وقولت كل الكلام اللي كنت محضراه وبطريقه كويسه* ~ هاايل يا كارما براڤو عليكي _ خلاص بعد كده لما تجيلك قضيه ابقي قوليلهم لا معلش مش بعرف اترافع مع حد غير ابن خالتي..او خديه معاكي في الشنطه اسهل..ابقي روح معاها يا مهاب عشان مش بتعرف تتكلم غير معاك

= تصدق انت بني ادم مستفز بجد..وبعدين دا دليل انك شخص مرعب اصلا و الواحد ميعرفش يتكلم معاك كلمتين علي بعض _ اممم انا مرعب اه.. دا علي اساس ان ابن خالتك سو كيوت مش كده..بصي مش فايقلك يلا روحي = اه ما انا هروح اكيد مش هبات هنا…بس براءه المتهم!! _ امم ماشي *المهم انه ادي فعلا براءه للمتهم وانا كنت فرحانه فرحه الاهبل والله وبعدها خرجت من عنده انا ومهاب*

= وانت بقا بتشتغل في القسم دا انت كمان!! ~ اممم انا ظابط هنا = بس انت مش زي الغول اللي جوه دا.. دا عامل شبه البوبع يا مهاب دا انا خوفت منه ~ لا لا دا عشان انا ابن خالتك لكن انتي مش بتشوفيني مع المتهمين ببقا عامل ازاي = بتبقي عامل ازاي ~ زي السكر في الشاي.. يلا شوفي انتي رايحه فين = يا شربات.. رايحه المكتب ~ طب تعالي اوصلك يلا

= وشغلك!! ~ هخلي عز يغطي عليا في الشغل = البوبع!!! ~ اه ويلا اخرسي بقا وامشي قدامي = بس ا…. _ ما بقولك ايه يا مهاب ما تعيش الجو الاسري دا في البيت انت فاكر نفسك عند خالتك يلا ~ انا كده كده كنت ماشي..بس عايزاك تغطي عليا ساعه واحده واصلها وارجع _ لا يا راجل؟! دا مقابل ايه بقا ~لما تعوز تزوغ هغطي عليك _ ليه وانا مزوغاتي زيك ولا ايه..روح روح

~ اشطا هخش اجيب الفون والمفاتيح من مكتبي واجي *مهاب راح مكتبه يجيب المفاتيح وانا فضلت واقفه مستنياه وفجأه لقيت البوبع ااا قصدي عز دا قرب مني وجه قالي بصوت واطي جمب ودني* _ بعد كده لما تيجي تتكلمي عن عز الدين عبد البارئ تتكلمي عدل..وانا ع فكره ممكن اوريكي البوبع دا ممكن يعمل فيكي ايه *قال كده وسابني ومش وهو حاطط ايديه في جيبه ومبتسم ولا اكنه قال حاجه… وانا طبعا كنت مرعوبه وميته في جلدي..وبعدها قعدت اكلم نفسي شبه المجانين*

= هو سمعني فين بس..انا مني لله انا مبعرفش امسك لساني خمس دقايق دايما سابق تفكيري…هو ممكن يقتلني ولا ايه..والله ظابط ويعملها ~ انتي بتكلمي نفسك يا كارما انتي اتجننتي ولا ايه = والله يا اخويا طول ما انا في الشغلانه السوده دي احتمال تودوني العباسيه قريب ~ طب يلا اركبي.. دا انتي لحستي خاالص *ركبنا عربيته ووصلني لحد المكتب وعملتله باي باي المهم يعني عشان مدخلكوش في تفاصيل ملهاش لازمه عزيزي القارئ..دخلت المكتب لقيت استاذ الرؤوف في وشي*

~ ها عملتي ايه = كل خير طبعا وطلعته بكفاله ~ بجد!! لالا انا مش مصدق = لا صدق يا متر دا افحمت الظابط دلائل بقا وبراهين وبما ان واذن بص كان فاضل شويه واقلبله مدرسه رياضه ~ انا مش عارف ليه انا مش بفهم كلامك = عشان انت نرم يا استاذ رؤوف ~ يعني ايه = دي حاجه حلوه..يعني انت محامي كفؤ ~ اممم شكرا ليكي = العفو..اخش اروح مكتبي بقا!!

~ اه يلا اتفضلي *دخلت مكتبي وانا مش طيقاه اصلا جتك نيله وانت شبه استاذ ابو عنكبوت اللي في شركه المرعبين المحدوده دا..المهم دخلت مكتبي وقعدت خلصت شغلي وخرجت من المكتب* *المهم ركبت نفس المكروباص الفاخر وخلي بالكو المكروباص دا هيفضل معانا فتره طويله لحد ما اشتري عربيه زي الواد مهاب كده..المهم روحت البيت اتغديت ودخلت اوضتي* *قاعده بقا في الاوضه بسمع عمرو دياب والدنيا حلوه وراح الفون رن برقم غريب..طبعا انا الفضول اكلني عشان اعرف مين ف رديت*

= الو _ الو = ايوه مين _ انتي مش عرفاني ولا ايه = لا والله محصليش الشرف!!خير _ انا عز الدين عبد البارئ = ايه!! ♡♡♡♡♡♡♡♡♡♡♡♡♡♡♡♡♡♡♡ #بقلمي_فرح_وائل 🦋. #سلسله_محاميه_ومحتاجه_ترقيه #غرام_العز ♥✨ #غرام_العز _ انا عز الدين عبد البارئ = الظابط؟ _ اه هو = اه نعم يعني عايز ايه _ هعوز ايه من محاميه فاشله زيك!! = اولا انا مش محاميه فاشله انت اللي مخيف..ثانيا ولما انت مش عايز مني حاجه بترن ليه!!

_ اكيد مش برن عشان اسمع جمال صوتك مثلا = ايوه مجاوبتش برضه ع السؤال بترن ليه _ نسيتي الكارنيه بتاعك في المكتب عندي يحلوه = اه طيب بسيطه ابقي اديه لمهاب وانا هبقي اخده منه _ لا بقولك ايه انا مش فاضيلك انتي وابن خالتك الكارنيه في مكتبي لما تحبي تاخديه ابقي تعالي و خديه = اه بس ان…. *وهوب طااخ وانا بتكلم لقيتت تيت تيت!! تيت تيت ايه؟! دا قفل السكه في وشي!..حسبي الله ونعم الوكيل فيه نكد عليا وانا كنت مفرفشه*

*طبعا روحت رنيت علي مهاب زفت الطين دا* _ الو..ايه يا كرمله عامله ايه = بطل زفت كرمله دا بكرهه الدلع دا _ هو في حد يكرهه الكرمله برضه = ملكش دعوه دا اولا ثانيا عيزاك في خدمه _ خييير = البوبع _ البوبع؟! قصدك عز!! = ايوا _ ماله!! = نسيت الكارنيه بتاعي عنده قولتله ابقي اديه لمهاب وانا هبقي اخده منه..قالي لا انا مش فاضيلك انا وابن خالتك الاهبل دا

_ اهبل!! = يعني انت مسكت في اهبل وسبت باقي اللي قالو عليك _ ليه هو قال ايه = عايز الصراحه!! _ طبعا = بس انا خايفه اكون فتانه!! _ لا مش فتانه = خايفه لوقع بينكم _ لا متخافيش..ها قال ايه = قال انك مش بتعرف تشتغل وداخلها بالواسطه وهو اللي شايل الشغل كله وبصراحه بصراحه قال انك ملكش اي تلاتين لازمه وبتيجي تتطفح وتروح لامواخدذه _ انا!! انا بروح انا؟! دا ساعات ببات في المكتب

= هي دي اللي مسكت فيها يبن العبيطه انا مش عارفه خالتي كانت بتتوحم فيك علي زيت عربيات ولا ايه _ بطلي هزار بقا واتكلمي جد = وهو انا هتصل بيك عشان اهزر برضه..بص انا عيزاك تروح تقلب المكتب عليه بكره عيزاك تخليه يقولك يا مهاب باشا يا عمي وعم عيالي ويبوس ايدك وراسك كمان _ متسخننيش يا كارما = يسطا كرااامتك فيين.. اللي تضيع منه كرامته اكنه ضاع منه شرفه

@ بطلي اڤوره = اڤوره ايه يلااا بقولك هزأك… جتك خيبه دا انا خالتي لو كانت جابت دكر بط كان نفعها عنك _ هروح اطربق المكتب علي نفوخه..خلاص ارتاحتي = ايوه كده هو دا هوبا اللي انا اعرفه، جدع يولا _ خلاص اسكتي بقا = بس والنبي خدمه صغننه قد كده. _ خييير = قبل ما تطربق المكتب ع نفوخه وتقلب الرجل الاخضر مع اني اشك الصراحه.. هاتلي الكارنيه بتاعي منه وبعدها طلع روح جون سينا اللي جواك

_طيب سلام بقا = سلام يا اخويا *يااا انا كده ارتحت نفسيا والله عشان تبقي تبرطم ب اسمك كتير، قال عز الدين عبد البارئ قال، اومال لو كان عز الدين ايبك كان عمل اي* *طبعا دخلت نمت زي الفسيخه بالظبط وصحيت تاني يوم ع صوت ماما..عايزه اقولكم يا جماعه ماما دي ارق ام في العالم والله ساعات بستغرب اني ازاي بنتها* _ انتي يا زفته يا متخلفه مش لو كنت خلفت بغله كانت نفعتني قومي قامت قيامتك يا بعيده جتك القرف فيكي وفي نومك اللي عامل شبه اللي ضاربين مخدرات دا

*اووف نسيت اقولكم يجماعه انتي كنت بألش مفيش حوار الرقه دا خالص في عليتنا اللي بيطلع رقيق بنقتلوه ونحرقوه زي الهنود ونعبيه في بطرمان كده عشان ميجبليناش العاار..* = في ايه يا ماما في ايه حد يصحي كائن كيوت بالشكل دا _كيوووت!!! قومي قومي يلا روقي اوضتك الزريبه دي وبعدها ابقي اتكلمي يلا = تصدقي بالله..هتصدقي ان شالله انا لو اتجوزت بعد الشر يعني هيبقي لسبب واحد بس انتي اهرب من شغل البيت اللي بتدبسيني فيه دا كل شويه

_دا علي اساس انك مش هتعملي حاجه في بيت جوزك!! = لا طبعا هو فاكرني غساله ولا طباخه ولا ايه انا هجيب خدامه طبعا _ والنبي اتوكسي في الاخر هترسي ع ابن عم محمد البواب *ماما عندها حق والله هفضل اقول هجيب خدامه هجيب خدامه وفي الاخر هيخوني مع الخدامه ويخليني انا الخدامه..ما انا عارفه اني هتدبس في شغل البيت كله بس عمري ما اروح اقول طبعا*

*المهم روقت اوضتي وانا مشغله الاغنيه المفضله لقلبي اغنيه. “والله يا زمن ما بأدينا زرعنا الشوك ” بتاعت الفنانه شاديه وكنت واخده نفس رأكشنيها البائس وهي بتمسح وطبعا كنت بحسبن بصمت..المهم خلصت ولبست ونزلت الشغل دا استاذ رؤوف هينفخني* *طبعا صبحت ع عم محمد البواب عشان لو بقي حمايا في يوم من الايام ولا حاجه تبقي علاقتنا كويسه ببعض..ركبت المكروباص الفاخر واخيرا وصلت المكتب* = صباح الخير ازيك يا استاذ رؤوف

_ زي الزفت = يارب دايما _ ايه!!! = يختااي ااا قصدي حضرتك مالك شكلك متضايق _ اه فعلا = احسن _ احسن!! = اا محسن يا متر محسن انت متعرفوش _ لا معرفوش = دا واحد غلبان كده بساعده _ اممم ربنا يكتر من حسناتك يستي = ربنا يخليك يارب..المهم ايه اللي مضايقك يمتر _ قضيه خسرتها = حضرتك اللي كنت بتترافع!! _ اه =*بصوت واطي* ما لازم تخسرها

_ انتي بتتوشوشي بتقولي ايه = لا متاخدتش في بالك يا متر انا دماغي مسلياني كده _ طيب يلا استلمي قضيتك جوه ع المكتب = هي سيره بقا ولا ايه سكتناله دخل بحماره ~ بنتتتت!!! حماره ايه اتأدبي = اا انا اسفه يا متر والله بس الجلاله خدتني كده ونسيت انك مديري في المكتب وكده _ انا مش عارف انا صابر عليكي ليه ومطردكيش من المكتب دا من زمان = عشان انا اللي ممشيه المكتب دا وشايله الشغل كله دا انتو لولايا كان زمنكم غرقتوا في شبر مايه والنبي يا رؤوف خليني ساكته

_ رؤوف اه!! وايه كمان ما تيجي تقعدي وتمشي الشغل بدالي!! = لا العفو يا فندم مش قصدي _ غوري يا كارما علي مكتبك يلا وشوفي قضيتك = يا متر والله انت لو شوفتني دا انا جبت البراءه دي بالبركه كده..وبعدين انت هتستحلاها ولا ايه هي مره واحده وقولت اجااملك فيها وكده _ تجامليني اه لا شكرا لافضال سعتك والله..كاارما غوري من قدااامي = اووف حاضر حاااضر *دخلت المكتب وانا مش طيقاه..هو ليه مصمم يعاملني اكني محاميه بجد..خلاص المحامين خلصوا يعني مش فاضل غيري*

*فتحت القضيه المرادي وكانت قضيه مخدرات…يختااي انا ناقصه يربي دا انا بشرب كوبايه الشاي بعمل دماغ…معالينا انتي قدها يبت يا كارما..بس المشكله انها في نفس القسم اللي فات..بس ان شالله مش هطلع معاه هو وهطلع مع هوبا مثلا..يارب يارب* *وصلت دخلت وسألت علي المكان اللي فيه المتهم وقالولي للاسف في مكتب عز الدين عبد البارئ..حسبي الله ونعم الوكيل فييك يا رؤوف..اعمل ايه دا ممكن ياكلني المرادي..لالا بس انا هلاقيه متكسر اصلا زمان هوبا روقه..المهم دخلت وكانت المفجاه*

*دخلت ولقيت مهاب قاعد مع عز في المكتب ودراعه مكسور* = ينهااار اسود يا مهاب ايه اللي عمل فيك كده ~ لا دي اصابه ملاعب متاخديش في بالك _ لا مش ملاعب ولا حاجه انا اللي ضربته = يخربيت سنينك، هو اللي ضربك يا مهاااب هو!! وقال ايه هكسر وادغدغ وهولع الدنيا وابقي غمي عينك عشان متشوفيش الدم اللي هيترطش انا قولت هخش الاقي الولا هرقليز بقا جتك وكسه يا مهاب

~ انتي تخرسي خالص عشان انتي السبب اصلا الراجل مقالش حاجه..خلتيني اروحله بالليل واضربه وفي الاخر طلع ميعرفش حاجه عن الموضوع اصلا ما استفدتش حاجه غير ان دراعي اتكسر = انت بتكذبني وبتصدقه..قلبي وركبي غضبانين عليك ليوم الدين يمهاب الكلب ~ امنيه يا رزق كفايه تمثييل..كنتي جايه ليه = قضيه مخدرات ~ طيب اسيبك انا بقا تشوفي هتحليها ازاي واروح مكتبي..عايز حاجه يا زيزو = حبيبي تسلم *ومهاب خرج عادي جدا ومبسوط ولا اكنه متخربش حتي المهم لقيت البيه بيقوم وبيقرب مني وانا برجع وهو بيقرب وانا ارجع وهو بيقرب*

= *بتوتر* ايه يا عم الحج ما تثبت في ايه هتخبط في الحيطه كده _ *وقف* بقا انا شتمت ابن خالتك = الواد هوبا دا كان فاهم غلط اصلا _ اسمه مهاب مش هوبا = ما انا متعوده اقوله كده و… _ متعوده دا في بيتكوا هنا اسمه مهاب فاهمه!! = *هزيت راسي بمعني اه* _ ايه بقا اللي خلاكي تقوليله اني شتمته = عشان يضربك _ *ضحك* واديكي شوفتي مين اللي ضرب التاني متخيله انه كان ممكن يعملي ايه مثلا

= ما انت مفتري بقا وعضلاتك مقويه قلبك _ برضه مفهمتش كنتي عيزاه يضربني ليه = عشان انت مستفز ورخم وبتخوف عامل شبه البوبع وانا مكدبتش لما قولت عليك بوبع علي فكره _*بيقرب* والله!! = لا اا اه..ابعد كده انت مالك بتقرب ليه هتاكلني _ طب خلي بالك عشان انتي بتلعبي بالنار!! = يعم ابعد الله يهديك كده بدل ما انا جايه اخرج واحد من مخدرات نتمسك احنا اداب..ابعد الله يخليك

_ طب ياريت تخلي بالك بعد كده عشان انا حطيتك في دماغي يا كوكو *قالها بصوت واطي كده وبعدها مشي وقعد ع مكتبه* _ ها قولي جايه لمين المرادي = جايه للمتهم احمد علي ابراهيم _ اممم وبعدين = هو جاي في قضيه مخدرات و… _ هتعرفي تتكلمي وتخرجيه ولا هتهبلي زي المره اللي فاتت = عيب علييك هبهرك ~بعد عشر دقايق~ = يابني الله يهديك يبني افتح ام الزنزانه دي

_ ششش اخرسي = مينفعش كده انا محاميه محترمه ازاي تحطني في زنزانه وتقفل عليا _ مينفعش احبسك بس ينفع حضرتك تقوليلي تاخد كام وتخلص الحوار دا من غير شوشره!! بترشيييني = والله ابداا انا بشوف كده في الافلام _ طب ابقي خلي المخرج بتاع الافلام بقا يجي يخرجك = والنبي افتح خلاص مش هرشيك تاني _ يبنتي انتي معجونه ب مايه صراصير ولا مجنونه ولا ايه نظامك = خلاص بقا انا اسفه والله مش هتتكرر خالص

_ انا مش عاارف انتي اتحدفتي عليا من انهي داهيه = اسمع بس والله انا ما ليا في الشغل دا مخدرات ايه اللي اخرجه منها دي..دا انا بتسطل من كوبايه قهوه صدقني انا اتفهه من كده بكتيير _ ما انتي مش هتخرجي من هنا غير لما تتكلمي عدل شبه البني ادمين وتخرجي الراجل يا كده يا اما هتتسجني انتي وهو = الله!! دا في انهي شرع دا يعم _ شرع المخرج

= مخرج ايه _ مخرج الافلام ما هبل ب هبل بقا = يعني لو قولتلك اسباب مقنعه هتخرجه _ وهخرجك = استعنا ع الشقا بالله _ يا مسهل = بص يا حضره الظابط..الب. اي دا انت بتبصلي كده ليه _ ببصلك عادي كملي = لا بتخوفني دور وشك _ افندم!! = بقولك دور وشك عشان اتكلم فيها ايه _ معلش ثانيه هي الهانم هتتكلم ولا هتغير هدومها عشان اعرف بس

= لو سمحت متتريقش _ لا ازاي مش بتريق طبعا..تحبي اجيبلك ابن خالتك يمكن تتفك عقده لسانك وتنطقي = هو ينفع!! _ كااارمااا انجزي = *بتوتر* ااا متزعقليش والنبي والله اعيييط _ طيب يا كارما اتفضلي اتكلمي = اا طيب ب بص هو يعني مش الشرطه في خدمه الشعب _ اه = طيب وهو عيل وغلط يعني معلش عديها المرادي _ هتشلييني يا كارماا = الله!! انت اللي خلقك قد غطا الازازه اعملك ايه

_ كارما انا اخر مره هقولك قولي اللي انتي محضراه وانا هادي جداا اهو ياريت انتي كمان تهدي عشان تعرفي تتكلمي = طيب بس ا.. _ متخافيش انا معاكي ولو اي حاجه وقعت منك هساعدك متقلقيش *ابتسمت بثقه كده وبدأت اقول اللي انا كنت محضراه وقولت كلام زي العسل وكنت كل اما اقع في حاجه هو يصلحها ويساعدني فيها واخيرا خلصت وابتسملي كده* _ اممم مش بطال كويس = مش بطال!! طيب احسن من مفيش ع الاقل يلا افتحلي وطلعني بقا

_ *بأبتسامه* ماشي *طلعني من الزنزانه وبالمناسبه مكنش فيه حد موجود فيها غيري..طلعت وخرج المتهم بكفاله* = اخر مره يا استاذ يا محترم تعمل فيا كده تاني. _ *بضحك* اللي يشوفك وانتي نافشه ريشك كده ميشوفكيش وانتي كنتي عامله شبه الكتكوت المبلول جوه = بقولك ايه انت فاكرني هخاف منك ولا ايه لا لو فاكرني خايفه منك احب اقولك.. _ *قام فجأه* ايه!! = احب اقولك اني خايفه فعلا *ضحك ورجع قعد مكانه*

= جتك القرف وانت فرحان بعضلاتك اللي عامله شبه الكوتشات دي.