غرام العز بقلم فرح وائل ج١

= اسكتت انت…اسكت لاحسن يدب المشرط في كرشك يطلع الكبد والكلاوي… دي تجااره اعضاء انا عرفاها كويس > في اي يا انسه مالك عامله دوشه وبتصوتي ليه = انت ليك عين تتكلم يخربيتك يحراامي يا محتال _ محتاال!!!!! > يا انسه انتي واقفه قدام مشرحه… ومينفعش كده انا لحد دلوقتي مش حابب ارد عليكي = مشرحه!! يعني اي.. يعني انت مش بتاع اعضاء _ انا شغال هنا في المشرحه مساعد دكتور… ف طبيعي يبقي لبسي فيه دم

*يلاااهوي ع الكسفه اللي انت فيها يا واد يا حاااازم.. اصلح العك اللي انا عكيته دا ازااي.. احيه يا كارما علي قله ربايتك احيه* = احم.. انا يعني مكنش قصدي طبعا انتو ربنا يخليكو لمصر ولحم كتافنا من خيركو واا… اي العك اللي انا بقوله دا.. والله يا كابتن مش قصدي فعلا متزعلش > *وهو بيضحك* حصل خير ولا يهمك _ طب يلا يا عسل روح شوف شغلك بدل ما الجثث اللي جوه تزيد واحد

*الولا بصله بأستغراب كده وسابنا ومشي وقومت انا بقا جيت ابصله لقيتني مكلبشه في قميصه بشكل يعر والله..سيبت قمصيه الجامد جموده دا الشهاده تتقال يعني ولسه هاخد وضع الخناق تاني…لقيت الولا هوبا داخل علينا * ~ انتو واقفين كده ليه!! = كنت بجيب قصدي باخده ال اا… _ *بجديه* بتظبط طرحتها في المرايه اللي في الجمب دي.. اظن خلصتي يلا بينا *بصيت جمبي لقيت فعلا في مرايه… يواد يا ابن اللذينه يا زيزو لحقت تشوفها وتخترع حوار امتي يخربيتك..لا منكرش انك ذكي الصراحه..حركات ظباط بقا وهو متعود علي شغل المكيده و الخداع دا..انما انا علي باب الله*

= اا اه اه خلصت يلا بينا ~ طيب يلا بينا عشان اروحك يلا يا كارما = لا يا مهاب انا هبات مع ريهام… انا مينفعش اسيبها تنام لوحدها _ باباها مامتها او اخوها اي حد يقربها ممكن يبات معاها = ريهام اهلها ساكنين في الصعيد وهي عايشه مع خالها ومرات خالها هنا في اسكندريه وهما حاليا عندهم فرح في البلد وقاعدين هناك يومين _ امم فهمت ~ طيب خالتو هترضي!!

= هرن عليها واقولها وهي اكيد مش هترفض يعني ان شاء الله ~ طيب تمام رني عليها يلا وقوليلي هتقولك اي *روحت ورنيت علي ماما وطبعا اتضايقت علي ريهام جداا لانها هي وريهام يمكن يكونو صحاب اكتر مني انا وريهام شخصيا..ف وافقت بس بعد نصايح كتير اوي اني اخلي بالي من نفسي ومنها وكده وقالتلي انها هتجيلنا بكره الصبح* ~ ها قالتلك اي = وافقت ~ تمام انا هسيبك وامشي دلوقتي انا وعز وهجيلك بكره الصبح ان شاء الله اطمن عليها

= تمام ~ خلي بالك من نفسك يا كراميلا و اوعي حد يقولك تعالي اجيبلك حاجه حلوه تروحي معاه = يا ظرريف.. خلي بالك خفه دمك دي هتموتني في يوم من الايام ~ طيب يا كوكو تصبحي علي خير = وانت من اهل الخير.. الا قولي صح عملت اي لما لقيت عادل جاي هو ومامته ~ مكنتش اعرف انه عادل اصلا غير لما ريهام قالتلي انه عادل اللي كان معاها في الجامعه… كنت هجيب لحم وشه في ايدي وهو بيتسهوك كده ومش علي بعضه

= هو عادل طول عمره كده..بالذات مع ريهام ~ لا علي نفسه دا انا هصتنعله القرف اليومين الجاين دول لحد ما يكره اليوم اللي اتولدت فيه ريهام = عاااش يبن خالتي..هو دا هوبا اللي انا اعرفه ~ يختي اتنيلي انتي كمان _ طيب يلا بينا ولا ايه ~ تمام يلا بينا _ طيب روح انت بقا قول ل ريهام ان كارما هتبات معاها وبالمره تقولها تصبحي علي خير ~ والله يا ولا يا عزوو انت بتفهم

_ حبيبي *مشي الولا هوبا واستنيته يمشي هو كمان بس لقيته واقف* = خير واقف ليه _ اتعودي لما حد يسألك متقعديش تتهتهي وتردي رد منطقي..لان مهاب ظابط واكيد بيلاحظ ف توترك دا كان ممكن يودكي في داهيه = اعمل ايه انا اتفاجأت بالسؤال وانا اصلا مبعرفش اكدب..مليش انا في مكر التعالب بتاعكو دا _ معلش يا قطه بكره تتعودي = طب وسع كده عشان انا دقيقه كمان وهولع فيك

_ رايحه فين = رايحه الاستقبال اقولهم ان انا اللي هبات مع ريهام _ تمام يلا بينا كده كده انا كنت نازل عشان استني مهاب تحت *مردتش عليه وبصيتله بقرف كده وسيبته ومشيت..وهو جه ورايا..ووقفت عند الاستقبال وقولت للبنت اللي واقفه ان انا اللي هبات مع الحاله وكده وانا بتكلم معاها لقيت الدكتور السئيل اللي عز هزأه فوق من شويه جاي علينا* ~ ايه دا هو حضرتك هتباتي مع الحاله!!

= اه ~ يا سبحاان الله انا كمان عندي شيفت اضافي النهارده وهبات في المستشفي..لو احتاجتي اي حاجه ارجوكي متتردديش انك تكلميني _ لا والنبي!! وحياه امك ~ انا مكلمتكش انت يا استاذ بترد ليه _ لا انت كلمه كمان وانا اللي هردك ع البارد شبه السمكري ما بيعمل في العربيه كده بالظبط = خلاص بقا يا عز بلاش فضايح واسكت _ اسكت ايه اقعدي علي جمب انتي دلوقتي..ولا لو عرفت انك هوبت من ناحيه الدور اللي هي قاعده فيه هبلعك يلا

~ انا دكتور علي فكره وممكن ابلغ عنك بتهمه السب والقذف وفي شهود كمان _ معاك رقم البوليس ولا امليهولك يا عسل ~ انت مش خايف بقا _ هخاف منك انت يا هفأ ~ لا تخاف من الحكومه *قام عز طلع من جيبه البطاقه التعريفيه بتاعته بكل غرور وثقه كده* » اه اه.. تمام عن اذنك *وفجأه لقيت الدكتور كش كده وبقي عامل شبهه الكتكوت المبلول وقام مكشكش ومشي (ايه مكشكش دي كمان… عُذرا عزيزي القارئ بس انا بتعامل معاك اكننا قاعدين علي المسطبه اللي هو سيد عيب متقولش كده احنا اهل)*

_ خلصتي = ايه اللي انت عملته دا _ خلصتي = اه _ طيب اتفضلي اطلعي ل ريهام وناديلي مهاب *سيبته وطلعت ل ريهام فعلا وبعتله مهاب وقعدت انا وريهام نحكي عن حاجات كتير اوي وفضلنا لحد الساعه 11 كده بنتكلم لحد ما ريهام اخدت دواها ونامت وانا فضلت قاعده زهقانه مش جايلي نوم واقعدت بقا اجلد في ذاتي شويه* عقلي:- فاكره يابت يا كارما لما خلود اللي في ابتدائي غشت منك الاجابه وقالتها والمستر اداها نجمه

قلبي:- لالالا طب فاكره لما كنتي بتكراشي علي الولا علاء اللي كان معاكي في اعدادي وفي الاخر قالك ظبطيلي اسماء معدتي:- لالالا فاكره انتي لما اشتريتي ب قبضك كله اكل واتسرق منك وانتي مروحه..وقعدتي طول الشهر فقيره وجعانه عقلي:- طيب هي ليه كلمه اربعه من خمس حروف وكلمه خمسه من اربع حروف كارما:- هو كده.. ربنا خلقها كده قلبي:- طب ليه القلب يحب مره ميحبش مرتين وهل دا مبني علي اثبتات علميه ولا شيرين كانت بتهبد…ارجو التوضيح

كارما:- لما ربنا ياخدك ابقي اسأله بقي ومتقرفنييش معدتي:- طب ليه مينفعش نشرب لبن ورا سمك..! كارما:- عشان القطط متزعلش عقلي:- طب العربيه اسرع ولا البحر اوسع كارما:- خيبتي اكبر.. قلبي:- طيب ا.. *قطع تفكيري المهزأ دا صوت باب بيتفتح براحه اوووي وبهدوء مرعب خلاني افتكر كل افلام الرعب اللي اتفرجت عليها في حياتي دلوقتي…وتخيلت ان في رجل كلها دم هتخش عليا وهتاكلني ولسه هرقع بالصوت لقيت عز داخل* = عز!! الله يخربيتك انت ايه اللي جابك هنا؟!

_…….. يتبع…. #بقلمي_فرح_وائل 🦋. #غرام_العز ♥. #محاميه_ومحتاجه_ترقيه #غرام_العز ❤ = عز!! الله يخربيتك انت ايه اللي جابك هنا؟! _ ششش وطي صوتك = اوطي صوتي ليه.. وانت ايه اللي جابك اصلا _ ما اكيد مش هسيبك تباتي لوحدك مع نحنوح دكتور البهايم دا = ع فكره هو في دور وانا في دور تاني خالص ثم انت مالك اصلا كنت ولي امري _ *بأبتسامه مستفزه* لا خطيبك…انتي نسيتي!! = تعالالي هنا صحيح انا افتكرت… خطيبتك منين يا عسل هاا.. ليه اتعميت ولا خلصت رجاله البلد كلها ف اتزنقت فيك

*قولت كده وانا متعصبه وعروقي بارزه وتوقعت ان الكلام دا هيضايقه ويجرحه ويخليه يحس علي دمه شويه ويسيبني في حالي… بصو هو مش في حالي اوي يعني عشان اكون صادقه بس لالا خليه يغور مش ناقصه انتفاخ قولون هي.. بس المشكله ان متعصبش ولقيته بيبصلي ببرود كده…* _ وانتي تطولي اصلا اسمك يتحط جمب اسمي = ولما انا مطولش قولت كده ل عادل ليه… ولا هي هرمونات وانت بتفرغها يعني ولا ايه عشان افهم بس

_ يارب نخف استظراف شويه عشان المراره يدوبك = *بهدوء* عز _ نعم = لو سمحت ممكن اعرف انت قولت كده ليه _ ………. *سكت كتير ومردش وسكوته كان كفيل يخليني اولع منه حرفيا وهاين عليا اكسر جهاز النفس ع نفوخه اللهي يجيله ضيق تنفس ما يعرف ياخد نفسه حتي ( بعد الشر طبعا..ههه بهزر معاكو يارب يموت ويريحنا من الشغلانه اللي مش جايبه همها دي..”سمعاكي ياللي بتقولي بعد الشر عليه يا كلبوبه.. اتلمي الواد خاطب”..)… المهم اخدت بعضي وكنت خلاص خارجه بره الاوضه عشان كفايه استفزاز لحد كده بس لقيته بيقولي*

_ كارما حقيقي انا مش عارف انا عملت كده ليه ولا لاقي مبرر للي حصل عشان اقولهولك بس انا و لاول مره احس اني عايز اعمل حاجه واعملها علطول من غير ما افكر…انا بطبعي بفكر كتير اوي قبل ما اعمل الحاجه ومش بخطي خطوه غير وانا عارف ابعادها ونتيجتها من الاخر مش متسرع او همجي في تصرفاتي ودي اول مره اتصرف بتسرع وهمجيه… عشان كده مش قادر اديكي سبب مقنع ل اللي انا عملته دا

= كلام جميل… بس المفروض انا دلوقتي اعمل اي قولي سبب..انت عارف؟! عادل دا اكتر واحد خباص ونمام في الدنيا وزمانه قال لكل الناس اللي انا اعرفهم او معرفهمش ومش بعيد الكلام دا يوصل ل بابا وماما.. عز انت مش متخيل نتيجه المصيبه اللي انت عملتها واللي انا مش متخيلاه اكتر هو برودي المتناهي اللي انا بكلمك بيه دا…يعني بدل ما اقوم انفضك لا بكلمك بهدوء _ مشوفتش واحده بوء قدك بأمانه..يبنتي انا لو سندت عليكي هتقعي اتنيلي

= اه فاكر نفسك هولاكو وماله الطموح حلو.. بس انا بتكلم جد.. انا المفروض اعمل ايه في موقف زي دا _ متقلقيش انا هتصرف = تتصرف هتعمل ايه…انت فاكر ان كل حاجه هتيجي بلوي الدراع وشويه العضلات النفخ اللي انت فرحانلي بيهم دول هيحلو الموضوع…عز الله يستر اهلك قولي هتعمل اي عشان انت مبيجيش من تحت راسك غير المصايب _ بعيدا عن لسانك اللي هقطعه قريب دا ان شاء الله.. بس انا هتصرف فعلا متقلقيش

= انا كده خوفت اكتر _ بقولك اي ما تفكك من الهري بقا دا وشوفيلي حاجه في ام المستشفي دي اكلها عشان انا جعاان = ما طفحتش في بيتكو ليه… انت جاي تقرفني _ طب بس عشان ههينك… وريني ايه الكيس اللي وراكي دا = دي بطاطس سوري بس دي بتاعتي انا ومش هديك منها لا انسي _ كارما = بلا كارما بلا بتاع… لو وقفت علي شعر رموشك كده مش هديك برضه.. اكلي خط احمر انا ممكن اكلك انت شخصيا لو قربت ناحيته

_ هاتيه طيب وهديكي فلوسه = فلوس ايه يا ابو فلوس انت.. كفي نفسك يابابا _ يعني مش هتديني!! = استحاله شوف استحاله ~بعد نصف ساعه~ = عز ما تاخد حته بطاطس انت كان نفسك فيها _ لا مش عايز = خلص بقا يا عز متبقاش قموصه كده دي عليها توميه _ قولت لا مش عايز..هو بالعافيه = بقا كده!! طب انشالله عنك ما طفحت انا غلطانه _ طيب ماشي

*بعد دقيقه واحده بس* = ما توريني البيتزا دي بتقول اي كده _ مبتقولش وخليكي في حالك = طيب يا عز مش عايزه منك حاجه شكرا…خليهالك *وكنت لسه هطلع من الاوضه لقيته بينادي عليا بضحك* _ خلاص تعالي تعالي وهعمل بأصلي وابقي احسن منك وهخليكي تاكلي معايا = مش عايزه منك حاجه _ انا اكيد مش هاكل الاتنين لوحدي يعني انا كنت عامل حسابك معايا بس حبيت ازاولك شويه = ارخم منك ماشوفتش بأمانه يعني كوكتيل رخامه علي سخافه علي استظراف بص انت عايز تاخد بوكسين في وشك عشان انا ارتاح

_ طب تعالي اطفحي بدل ما اديكي انا البوكسين دول في خلقتك = *اقتربت وهي تضحك* متفاهمين اوي ماشاء الله ربنا يحمينا بجد *اول ما قولت كده فك عز تكشيرته وضحك جامد وانا قعدت قصاده وبدأت اكل بنفس مفتوحه وربنا ما يوريك يا عزيزي القارئ وانا نفسي مفتوحه بقا ببقي عامله شبه الزومبي اللي لسه طالع من تربته وبيشق طريقه في عالم الاشباح والاجرام ودا التشبيه الاقرب لقلبي الصراحه يعني بس مش موضوعنا ..المهم كنت باكل بقلب جامد الصراحه اكني قاعده مع جوز اختي مش مع واحد غريب بس دا اكل يعني مفيهوش رسميات..*

= ما انت لو تقولي اي اللي بيضحك هضحك انا وانت وماما وناهد وكلنا _ لالا مفيش كملي اكل انتي = ولما هو مفيش بتضحك علي اي… بص شاورلي بس انت ع الحته اللي بتضحك وانا بص هبهرك هفرفص في الارض من كتر الضحك..لكن شغل الهبل دا مبحبوش _ مبتحبهوش!! متقوليش ع نفسك كده يا كارما دا انتي والهبل راضعين علي بعض = يخبرر ع خفه دمك يا محمد يا هنيدي مش معقول خفه الدم المطلقه دي هتموتنا من الضحك في مره

*نظر لها وابتسم.. ف هي محقه هو لا يملك خفه الظل تلك ولكن هي!!

فهي تمتلكها وبشده حيث انها قادره علي ان تجعله يضحك رغما عنه حتي وهو في نوبه غضبه … وهذا الامر غير اعتيادي بالمره بالنسبه له ف هو شخص عملي جداا بينما هي كما انتم تشاهدوا ليس للجد مكان في حياتها..* ( بصوا الشهاده لله انا كنت ناويه اخلي السرد بالعاميه لحد الاخر بس مش قادره الصراحه وصوباعي بتاكلني … ف نستحمل بعض يا جماعه..ثم اني مش بكتب بالفصحي عشان حابه كده تؤتؤ ابسبوتلي انا بكتب كده عشان انمي فكرك ك قارئ وتبقي قارئ مثقف ومحندق كده ولا عايزين الناس تاكل وشي ويقولو اللي الفانزات بتوعها مش مثقفين اهي… واسفه ع الاطاله..

ههه بهزر معاكو انا اطول براحتي ..) = الحمد لله شبعت _ بالف هنا = شكرا .. الواحد بقا عايز بعد البيتزا دي يشرب واحد كانز ويبقي فل اوي كده *ضحك عز بخفه ثم وضع علي قدمها حقيبه بلاستيكيه…بينما هي فتحتها وملامح التعجب علي وجهها ولكن تحولت ملامحها فورًا الي ابتسامه عريضه بعد ما رأت ما بداخل الحقيبه وكان عباره عن بعض من الشكولاته والبيبسي والمقرمشات وغيرها من الاشياء الاخري*

= اي دا انت كنت جايبه ليك!! _ لا ليكي انتي انا مش باكل الحاجات دي = ليا انا!! وانت مين قالك اني بحب الشكولاته *ابتسم عز واجاب بثقه* _ ظابط بقا وكده…ههه بهزر معاكي عرفت لما كنا عند مهاب امبارح واكلتي كل الشكولاته لوحدك = امممم…طيب يعني ا شكرا _ *بأبتسامه وهو يرجع ظهره للخلف* العفو *اكلت كارما بعض الاشياء الموجوده بداخل الحقيبه وتطرقت الي عده موضوعات مختلفه معه واكتشفت للتو ب ان عز متفتح كثيرا ومثقف كفايه علي عكس ما كانت قد تعتقده عنه وعن معظم الضباط ولكن ها هي تغير فكرتها عنه..*

= طيب انا هخش انام بقا _ تصبحي علي خير = طيب وانت هتنام فين _ مش هنام = ليه!! ماتروح تبات في بيتكو يعم _ انتي مال اهلك انتي هو انا بايت علي راسك..خشي اتخمدي يا كارما وخليكي في حالك = انا غلطانه ياكش تولع مطرح ما انت قاعد ولا تلج من البرد دا واطرافك تجمد وتبقي عامل شبه اللوليتا _ *بضحك* اللوليتا..!!! لا انا كده اخاف علي نفسي وانام في بيتنا بقا

= بطل استخفاف بكلامي يا حضره الظابط _ حاضر يا سياده المستشاره… ممكن بقا تخشي تنامي عشان انتي وجودك بيعملي صداع = انت لسه شوفت صداع!! تصدق بالله لولا اننا في مستشفي محترمه كان زماني زرغطت في ودنك جبتلك صرع *قالت جملتها تلك وتركته ودخلت الي الغرفه التي توجد بها ريهام لكي تنام بجوارها…بينما هو ظل يضحك علي تلك الفتاه التي لا تفتح فمها سوا لتسخر او تغضب منه فقط.. مرت تلك الليله سريعا ومن ثم بدأ يومًا جديد واستيقظت كارما علي صوت خبطت متتالي علي الباب.. وفوجئت ب ممرضه تدخل وتبتسم لها ول ريهام المتسطحه بجانبها ثم قالت..*

~ صباح الخير = صباح النور..هي الساعه كام ~ الساعه 9 الصبح… احنا محتاجين نغير المحلول للانسه ريهام = طيب اصحيهالك؟! ~ ياريت معلش = تمام *ثم استدارت ل ريهام النائمه بجانبها قائله وهي تضربها بخفه علي وجهها* = ريهام..انتي يبت..قومي يعسل يلا عشان هيغيرولك البامبرز..قصدي المحلول ريهااام انتي يا جحشه قومي قامت قيامتك ~ *بصوت نائم* اووف في اي يا كارما بس = قومي يلا عشان هيحللولك دم… دا لو لقوا عندك دم اصلا

~ هيحللولي!! *اجابت الممرضه وهي تحاول كتم ضحكتها* ~ احم..لا يا انسه احنا هنغيرلك المحلول بس ~ اه تمام تعالي اتفضلي *ثم وجهت نظرها الي كارما بغضب* ~ هتبطلي تفتي تهبدي ف اي حاجه لحد امتي = *بلامبالاه* لما اكبر لما اكبر *ثم تركتها ودخلت الي الحمام الملاحق بالغرفه لكي تغسل وجهها..ثم خرجت ف وجدت الممرضه قد انتهت وخرجت من الغرفه* = الوليه اللي كانت بتغيرلك ع الجرح دي خرجت

~ *بضحك* جرح اي ياللي منك لله…اه يستي خرجت = طيب بقولك ايه.. الواد عز عمال يتقرب مني وانا حاسه بكده بس مش عارفه اعمل ايه انا حقيقي مهزوزه ومتوتره ~ والله انا شايفه ان مفيش مشكله انك تديله فرصه = فرصه ايه انتي كمان…انتي نسيتي دا مين..دا البوبع ~ اظن انه مبقاش بوبع اوي اليومين دول = *بأبتسامه* بصراحه مش اوي *ثم عاد غضبها* بس هيفضل بوبع ومخيف وبياكل العيال الصغيره لالا عز لا استحاله

~ هو مهاب متصلش بيكي!! = شوف انا بتكلم في ايه وانتي بتتنيلي في ايه…بس مالك مهتميه كده يعني؟! تكونشي السناره غمزت ~ سناره لما تبقي تخزق عينك..انا بسأل من باب الفضول = فضول!! امك اسمها زعلول… فضول مين يا انطوائيه يا كدابه من امتي يعني وانتي عندك فضول تجاهه الاشياء ~ اووف عادي يا كارما يعني هو تحقيق… دا انتي نيله خالص جتك القرف = امم ماشي.. اما نشوف اخرتها معاكي انتي وسي روميو

*لم تجيبها ريهام واكتفت بأن تنظر لها بغضب بينما الاخري ضحكت بأستفزاز ومسكت هاتفها لتري ما الجديد ولكن فوجئت برساله من رقم هي تعرفه جيدا…وبالطبع كان عز وكان محتوي الرساله عباره عن* ” صباح الخير انا مشيت الصبح عشان كان عندي شغل… بس هخلص واجي اطمن علي ريهام يعني.. وبخصوص الحوار اللي انا عكيت فيه امبارح دا وقولت انك خطيبتي وكده ف انا صلحت كل حاجه.. واتمنالك يوم سعيد ❤ ”

*ابتسمت تلقائيا وهي تقرأ الرساله واخذت تقرأها مره واثنين وثلاثه… حتي تداركت نفسها ثم اغلقت هاتفها وابتسمت وهي تقول بخفوت..* = هو الجو ماله بقا حر كده ليه *ردت عليها ريهام بسخريه* ~ دي نار الحب يا عسل = ايه دا في ايه…حد طلب منك تتكلمي يا كائن انتي ~ ايوا اهربي يختي اهربي = احم..لا مش كده..وبعدين انتي عرفتي منين انه عز ~ وشك باين عليه..الجواب بيبان من عنوانه يا قطه

= طب اخرسي بقا عشان مكسرلكيش الرجل التانيه *طلبت كارما الافطار لها ولصديقتها ثم تناولا الفطور مع بعض المزحات والمشاجرات القصيره التي تنتهي بضحكه من كلاهما…ومن ثم استأذنت كارما انها سترحل لتحضر ل ريهام ملابس وتغير ملابسها هي الاخري وتأتي مره اخري مع والدتها… وبالفعل غادرت كارما وما ان ترجلت باب المنزل حتي سمعت امها وهي تطلق زرغوطه* = في ايه يا ماما ابويا اخيرا سمع كلامي وهيتجوز عليكي ولا ايه

~ اتلمي يا مقصوفه الرقبه انتي.. وبعدين بس متعكريش مزاجي انا مبسوطه = خير اي اللي مفرحك اوي كده…اتطلقتي صح!! قولي والله كده ~ شش بس بقا كفايه هزار = اومال في ايه حيرتيني ~ جالك عريس يابت يا كرمله = يوووو تاني..!! يا ماما يا حبيبتي انتي مبتزهقيش انا اتخنقت من الاشكال اللي بتيجي دي اخر مره جالي اسلام صموله الميكانيكي..انا علي اخر الزمن اتجوز صاموله!! ولا احمد طراوه.. انتي متخيله اتجوز واحد اسمه احمد طرواه..يعني دا بعد ما اتجوزه مش بعيد يبقي اسمي كارما رحرحه… ماما ارجوكي قفلي ع السيره دي الله يكرمك

~ لالا المرادي غير كل مره… دا انتي جايلك ظاابط = ويا ترا ظابط ايه بقا…ظابط ايقاع ولا ظابط وقته ولا ايه مش فاهمه ~ لا ظابط بجد ياروح امك من اللي بيعلقو ضبابير علي كتافهم دول = طب يرضيكي اتجوز واحد بضابور!! وبعدين مين الشملول دا كمان ~ ابوكي قالي انه اسمه عز الدين…بس ربنا يكمل الحوار دا علي خير وميطفش منك زي كل مره = الله يخربيت امك يا عز..!!!

يتبع….. #بقلمي_فرح_وائل 🦋. ‏ #غرام_العز ♥. #محاميه_ومحتاجه_ترقيه