وأخيراً شُفت النور… والسما من فوقي صافية وأخيراً شُفت النور والسما مليانة نجوم كنت قاعدة في المرسم بتاعي هو زي محل كده بحب أرسم فيه وبعمل شغلي كله فيه كنت بردد أغنية من كرتون روبانزل ما تيجو اعرفكم بنفسي أنا مريم متخرجة من كلية فنون جميلة بحب الرسم جداً معروف عني إني بحب أحول شخصيات الكرتون لأشخاص وأرسمهم بشكل دقيق جداً كأنسان حقيقي كانت سعيدة الحظ في رسمتي انهاردة هي”روبانزل
كنت مندمجة في الرسم وكنت مشغلة أغاني كرتون عارفه إني ٢٣ سنة وإني كبيرة بس ميحصلش حاجة لما أعيش أجواء زي كده كنت بشرب عصير مانجو”المفضل ليا” التفت بصيت علي الشخص اللي دخل بسبب الجرس الصغنن اللي محطوط علي الباب لقيت شاب شكله لطيف أبتسم_مساء الخير أبتسمت_مساء النور _أتقالي أن حضرتك بترسمي بورتريهات لشخصيات الكرتون =بالظبط مد ايده عطاني كارت_أنا چون مأسس شركة بنصنع افلام كرتون ومحتاج حضرتك في شغل معايا
خدت الكارت_زي ايه _بصمم فيلم كرتون ومحتاج شكل أو رسم واقعي للشخصيات مش حابب أحط صورة كرتونية عايز أعمل حاجة تكون جديدة ودقيقة ولما سألت اتقالي أنك أحسن حد ممكن يساعدني أبتسمت بهدوء وعطيته الكارت بتاعي_ده الكارت بتاعي وفيه رقمي بتاع الشغل تقدر تتواصل معايا وتقولي التفاصيل أبتسم بلطف_تمام هتكون عندك التفاصيل في أقرب وقت خرج بهدوء أبتسمت وكملت اللي بعمله خرجت من المرسم علي ٨ بليل قفلت المرسم وبدأت اتمشي لغاية ما وصلت عند مكتبة قديمة دخلت لقيت راجل كبير قاعد
أبتسمت_عامل ايه يا عبدو بصلي وابتسم_مريوم حبيبة بابا تعالي قربت منه وبوست راسه_عامل ايه يا حبيبي باسني في خدي_الحمدلله يا حبيبتي _ايه مش يلا بينا بقي عشان نروح ابتسم_يلا يا حبيبتي قفلت معاه المكتبة وروحنا البيت مشي لأن بيتنا قريب ـــــــــــــــــــــــــــــــــــــــــــــــــــــــــــــــ روحنا البيت واتعشينا وبابا دخل البلكونة وأنا دخلت المطبخ أعمل شاي لبابا وعملت عصير مانجو ليا _يلا يا حبيبي اشرب بالهنا والشفا ـ حبيبتي تسلم ايدك….يلا تعالي اقعدي في حضني بقي
ضحكت وقربت قعدت جنبه ودخلت في حضنه _عايزة احكيلك علي حاجة يا عبدو ـ احكي يا قلب عبدو حكيتله علي الشاب اللي جالي المرسم انهاردة _وبس كده المفروض يبعتلي التفاصيل علي الواتساب طبطب علي ضهري بحنان_مبروح يا حبيبتي بابا دخل ينام وأنا فضلت صاحيه شوية كنت بقرأ رواية اتبعتلي مسدچ علي الفون ففتحته لقيتها من رقم غريب عرفت أنه چون لما لقيته باعتلي التفاصيل _تمام نقدر نبدأ شغل من أمتي
ـ من بكرا لو حابب _حابب جدا..هبعتلك لوكيشن الشركة عشان تيجي بكرة ـ تمام قفلت معاه وأنا كنت مبسوطه شوية لأن أي حاجة بتحصل معايا تخص الرسم ببقي فرحانه أوي صحيت تاني يوم علي الساعة ٩ فطرت أنا وبابا وبدأت اجهز لبست بنطلون أسود وبلوزة بيبي بلو بنُص كُم وفردت شعري الكيرلي وحطيت مرطب علي وشي وايلاينر وجلوس نزلت مع بابا وصلته المكتبة وأنا اتجهت لعربيتي اللي مش بستخدمها غير للمشاوير البعيده
اتجهت علي اللوكيشن اللي هو بعتهولي وطبعاً انا موافقتش كده بسرعة غير لما اتأكدت فعلا من وجود الشركة دي وطلعت مشهورة شوية نزلت من العربية ودخلت الشركة كان شكلها جميل وكل مكان فيها لطيف قربت من مكان الاستقبال ـ لو سمحتي أستاذ چون موجود *اه يا فندم موجود..في معاد مسبق؟ ـ اه قوليله انسه مريم وهو هيعرف بالفعل كلمته وقالها تطلعني لمكتبه *اتفضلي يا فندم ده مكتب أستاذ چون خبطت علي الباب ودخلت لما سمحلي بالدخول
أبتسمت_صباح الخير أبتسم_صباح النور أتفضلي اقعدي قعدت_تشربي ايه أبتسمت_شكرا مش عايزة محتاجة بس نتكلم في الشغل ضحك_شكلك متحمسة شوية أبتسمت_أي حاجة تخص الرسم ببقي متحمسة ليها أبتسم بعدين أتكلم بجدية_بصي بقي أنا الأول محتاجك معايا في الشركة استغربت_محتاجني ازاي يعني _يعني إحنا علي طول بننتج أفلام كرتون وببقي محتاج حد يكون بيرفكت عشان يصمم معايا الشخصيات يعني حاليا إحنا بنعمل فيلم كرتون مأخوذ من رواية أطفال الصراحة محبتش يكون شكل الشخصيات تقليدي زي ما متعودين نشوف لاء حابب أني أقولك مواصفات الشخصية بشكل دقيق وهسيب ليكي الحرية في الباقي
_تمام نقدر نمضي العقود بعدين نبدأ شغل بالفعل مضيت العقد وبدأ يشرحلي كل شخصية وشكلها عايز يبقي عامل ازاي وكان طبعا محضر ورق وعطاهولي بكل الكلام ده وقفت_خلاص تمام هبدأ شغل فيهم وهبلغك لو في أي حاجه….عن إذنك طلعت برا الشركة واتجهت للمرسم بتاعي وبدأت شغل هو بالنسبالي مش شغل أوي لأني يعتبر بعمل حاجة بحبها وبعملها كل يوم بس الفرق إني رسمت علي التاب مش علي ورق بعد مرور اسبوعين بالظبط كنت الحمدلله خلصت الشغل وبعت لچون علي الواتساب_كله تمام والشغل خلص
وبعتله كل الرسومات مرت دقايق ولقيت ڤويس منه_بجد مش مصدق السرعة دي دول خلصو في اسبوعين بس عموماً شكراً جدا يا أستاذة مريم وشكراً لمجهودك _العفو يا أستاذ چون