معتكف ف محراب قلبي صلِّ على رسول اللّه ..❤ البارت الخامس عشر جايز اكون تقبلت الامر الواقع ، جايز اكون عايز اتعايش معاه ، جايز اكون رضيت بال بيحصل خلاص مش عارف بس حاسس انه كفايه كده ، كفايه رفض مش هيفيد ، كفايه كره لكل ال بيحصل كفايه اني خلاص اخدت الشيك وهعالج ماما ، بتهيألي كده كفايه ، الأفضل اني اتعايش مع الأمر الواقع اوك استغربت من موقفها ، وانها عادي بتبتسم ف وشي ، وانها عادي دخلت غيرت هدومها بهدوء وخرجت
وانها عادي جت تتكلم معايا وتخفف عني حمل هي مش مسؤله عنه ، حمل مكنش ده وقته اصلا ومع ذلك هي حاولت تساعد وعشان كده حاولت انا كمان اتعامل عادي ، صليت بيها ودعيت دعاء اي زوجين عشان ده امر واقع فعلاً ، هي خلاص بقت زوجتي سالتها وانا عارف انه مينفعش بس ده لازم ، طبيعي اتكلمت وانا بحاول اتعامل عادي _ عايزه اسالك سؤال ردت وهي مازلت قاعده مكانها قدامي بالاسدال ، بس عايز اقول حاجه ، شكلها بالحجاب حلو اوي ، شكلها ، شكلها طفولي ، كانها طفله صغيره اول مره تكتشف هدوم مامتها وجربت تلبس حجابها
= اتفضل _ تحبي نتمم جوازنا النهارده؟ ردت بعدم فهم وهي بتبصلي باستغراب = يعني اي مش فاهمه ؟ _ مش فاهمه اي ، بقولك نتمم جوازنا الليله دي ؟! ردت ببراءه وهي بتبصلي باستغراب اكبر = مش فاهمه قصدك والله ، يعني اي ، م احنا اتجوزنا فعلاً ردها خلاني غصب عني ابتسم ف اتكلمت تاني بهدوء _ حوراء ردت وهي سرحانه ف ملامحي بدون م تاخد بالها = نعم
_ انا قصدي تبقي زوجتي قدام ربناا ، تبقي مراتي شرعا للحظه اتصدمت ، قبل م ملامحها تتحول وتقلب للون الأحمر ، قبل م تسيبني وتدخل لاوضه نوم الاطفال بسرعه الحقيقه ومش عارف لي مسبتهاش ، وخرجت وراها ، دخلت لقيتها ضهرها للباب وبتتنفس بعنف وملامحها مازالت خجلانه اتكلمت تاني وانا بلِح عليها ف السؤال _ مردتيش عليا يعني يحوراء = سؤالك غريب والله ، اول مره اسمع عن حاجه زي دي
_ عشان ده حقك ، سواء عايزه ده فحقك ، رافضه ف برضو حقك قاطعتني وهي بتتكلم بحزم ، بطريقه غريبه = لا اتكلمت بعدم فهم للرد _ لا!! لا اي ، لا مش حقك ولا لا مش عايزه اختفي من ملامحها الحزم والتصميم وحل مكانها الخجل تاني وهي بترد = لا مش عايزه _ تمام زي م تحبي هزتلي راسها وسكتت ، قبل م اتوجه انا للسرير التاني واقعد عليه ف مقابل ليها عشان اتكلم معاها
_ طيب انا عايز اتكلم معاكي ف شويه حجات كده ، عشان تبقي حياتنا ان شاء الله مستقره = اتفضل _ بصي عشان بس تاخدي بالك ، هو مش امر ، ولا انا ليا اني اامرك بحاجه ، احنا بس هنوضح شويه امور ، تمام ؟ = تمام _ انا عارف اني كده هتقل عليكي بس احنا هنسافر بماما الأسبوع الجاي = تمام مفيش مشكله ، كده كده انا هبقي مع ماما
_ انا عارف انه حقك تبقي زي اي عروس… قاطعتني وهي بترد بتصميم وحب لماما = مفيش حاجه اسمها كده ، انا هبقي مبسوطه وانا جمبها ف وقت زي ده انا بس عايزه اسأل ع حاجه _ اتفضلي طبعاً = هو كلنا هنسافر ، قصدي يعني واميره كمان _ ايوه ، عشان مش هينفع تقعد هنا لوحدها ردت بعدم رضا ، مش كرها ف اميره ، انما كرها ف افعال اميره معاها
= تمام _ نتكلم ف اهم حاجه بقا ، ممكن ؟ = اتفضل _ انتي مش محجبه صح ؟ = صح _ وعارفه انه ده حرام صح ؟ = احم ، صح _ حلو ، اي ال مانع انك تتحجبي بقا ؟ ردت براحتها وانا فضلت مركز مع ردود افعالها = مش فكره مانع بس انا مكنتش قريبه من ربناا ، معرفش لي بس مكنش ف حد يقربني ، ماما اتوفت وانا صغيره وبابا طول عمره مشغول ، فمحستش انه ف حد ياخد بأيدي ويخليني اقرب
ردها الحقيقه خلاني اتكلم معاها براحتي _ بس ده مش مبرر ي حوراء ، انتي كبيره بما يكفي عشان تعرفي الصح والغلط والحلال والحرام سكتت بدون م ترد فكملت كلام = بصي ي حوراء ، عشان افهمك حاجه ، الرسول عليه الصلاه والسلام قال ” كلكم راعٍ وكلٌ مسؤلٍ عن رعيته ” يعني بمعني اصح انتي ف وشي قدام ربنا ، مسؤليتي قدامه وال هتسال عنها يوم القيامه _ يعني اي
= يعني يستي لبسك ، لو شرعي ويرضي ربنا فانا هاخد حسنات عليكي وع كل خطوه بتخطيها وانتي لبسك تمام زي زيك بالظبط ، ولو لبسك مش شرعي فانا هاخد سيئات ع كل خطوه بتخطيها ، زي زيك بالظبط برضو فهمتي ؟! _ خلاص هلبس حجاب = بس الحجاب مش طرحه بتغطي الشعر بس يحوراء ردت بعدم فهم وهي بتبصلي ف انتظار اني اوضحلها _ اومال اي ؟ = الحجاب معناه لبسك كله ، بمعني متلبسيش طرحه وانتي بتلبسي بنطلون ضيق او واسع حتي ، متلبسيش طرحه وانتي لابسه بلوزه شفافه مثلا ، متلبسيش طرحه وانتي لابسه قصير
الرسول عليه الصلاه والسلام قال ” نساء كاسيات عاريات مائلات مميلات رؤسهن كاسنمه البخت لا يدخلون الجنه ولا يجدون ريحها ” اتكلمت بتوتر وهي بتبصلي بخوف _ يعني اي ؟! = يعني نساء لابسين الطرح ولبسهم واصف جسمهم ، دول مش هيدخلو الجنه ولا هيشمو ريحها ، ده غير انه دول متبرجات ، وعد الله صاحبتهم بجهنم ، والجنه حلوه ي حوراء ، حلوه اوي مينفعش نبيعها بالرخيص اوي كده ، ميبنفعش نبيعها عشان شويه بناطيل ، عشان حاجه متسواش
_ يعني اعمل اي ؟! اتكلمت معاها بالراحه وانا بشوف انها متقبله الكلام = يعني نلبس ال يرضي ربناا ، ال يخلينا ندخل جنته ، نلبس اللبس ال مناخدش عليه ذنوب ف كل خطوه نخطوها اتكلمت وهي بتبصلي بدموع ، وبتتكلم بخوف ، قبل م الاحظ رعشه ف جسمها _ بس انا خايفه رديت وانا بقرب عليها عشان اقعد جمبها ، وغصب عني الاقي ايد بتتمد عشان تمسك ايديها = خايفه من اي
ردت وهي بتشد ع ايدي بعنف وبدات بالبكا فعلاً _ خايفه البس كده ومحبش شكلي ، خايفه ال حواليا ينتقدوني ، خايفه البسه ومحبوش ف ارجع اقلعه تاني ، خايفه ، خايفه من ربناا خلصت كلام وبدات تعيط بعنف اشد معرفش لي ، او اي ال حصل ، بس مشوفتهاش غير طفله ، طفله خايفه ، طفله بدون باباها ولوحدها هتقابل حد غريب عنها ومعرفش ازاي ده حصل بس لقيتني غصب عني لتاني مره ف دقيقه واحده بضمها لحضني
قبل م احس بيها بتبكي لقيتني بطبطب عليها وبكلمها بالراحه زي طفله فعلاً ، ممكن صعبانه عليا ، ممكن شفقه ، مش عارف = مين قالك هيبقي شكلك وحش ، طول م بتعملي ال يرضي ربنا هيبقي شكلك حلو ، وبعدين حتي لو حد انتقدك ، اصبري واثبتي وربنا هيديكي اجر صبرك ، انا مش طالب منك حاجه ي حوراء ، مش هقولك من بكره البسي خمار ونقاب وجو التكفريين ده
ردت وهي مازالت ف حضني مخرجتش بس بكاها هدي = اومال ؟! _ كل الحكايه انه انتي هتقومي دلوقتي تلبسي دريس من ال جايبهم ليكي ، ومع طرحه هنطولها شويه ، وشوفي شكلك فيهم عامل ازاي ، ماشي ؟! ردت وهي بتخرج من حضني بخجل ومازالت بالاسدال وطرحته _ ماشي قامت فعلاً وانا قومت معاها ، دخلنا اوضه النوم ، طلعتلها من اوضه اللبس الدريس والطرحه ،وسبتها وخرجت عشان تلبس براحتها
قعدت ف الركنه وانا بفكر ف ال حصل وضمي ليها ، أكيد محبتهاش بالسرعه دي اكيد مميلتش ليها برضو ، بس أكيد ف حاجه غلط ، ممكن صعبانه عليا ، ممكن شوفتها اميره اختي ههه شايف مراتي زي اميره اختي ؟! انا بضحك ع نفسي والله فوقت من سرحاني لما لقيتها بتفتح باب الاوضه وخارجه وهي بتبص حواليها تدور عليا بتوتر قومتلها وانا ببصلها بهدوء ، ملامحها حلوه ، لايق عليها الحجاب ، محليها ، مخليها طفله فعلاً ،
وشها صغير وملفوف حواليه الحجاب ، قبل م الاحظ أنه فك فبدات هي تبصله وهي بتبكي قربت عليها وانا مستغرب من ردود افعالها _ بتعيطي لي = عشان فك ضحكت بهدوء وانا برد عليها بالراحه عشان تبطل عياط _ طب متعيطيش ، بكره ان شآءالله ننزل لاميره تعلمك تلفيه ازاي عيطت اكتر وهي بتشيله من ع دماغها = لااا _ طب اهدي بس ، لا لى _ عشان اميره مش بتحبني
هي ازاي طفله كده بجد ، حقيقي ازاي ، انا اول مره اخد بالي من طفولتها الشديده ، طفله ف جسم شابه = طب خلاص متعيطيش ، هبقي اعلمك انا ردت وهي بتمسح عنيها بضهر ايدها زي الاطفال _ بجد ؟! هزيتلها راسي بدون م ارد ، لقيتها بتبتسم وهي بتدور حوالين نفسها ، زي طفله بتجرب فستان العيد وتواريه لباباها = شوفت الدريس _ اها = انا خلاص حبيته ، شكله حلو اوي ، وكمان حاسه اني مرتاحه فيه ، انا خلاص هلبس زيه ع طول
_ شطوره ابتسمت بهدوء وانا ردتلها الابتسامة قبل م اسيبها عشان ادخل انام من تعب اليوم اتوجهت للاوضه قبل م اقف مكاني بعد م سمعتها بتنادي بهدوء _ نوح ………. #يتبع #Mai_Sayed #معتكف_ف_محراب_قلبي استغفرو آلله لعلها تصادف ساعة استجابه ..💙معتكف ف محراب قلبي صلِّ علي رسول الله 💙 البارت السادس عشر التفتلها بهدوء وانا برد عليها _ نعم اتكلمت بخجل وهي بتلعب بايديها وموطيه رأسها ، قبل م شعرها ينزل ويخبي وشها
= أنا … شكراً معرفش لي حسيت انها كانت هتقول حاجه تانيه ، حقيقي حسيت بكده لوهله ، كانها غيرت رايها رديت عليها بلامبالاه ” مصطنعه ” _ العفو ، انا داخل انام ، تصبحي ع خير = وانت من أهله قومت عشان ادخل الاوضه قبل م تنادي عليا تاني _ نوح = نعم سألت وهي بتفرك ف ايديها بتوتر _ هو مين ال اشترالي الهدوم دي = انا _لوحدك ؟!
= اها ، اومال مين هيبقا معايا يعني _ عادي بسأل هزيتلها راسي بدون م اتكلم وانا بتحرك عشان انام ، قبل م تنادي عليا تالت _ نوح رديت بنفاذ صبر وانا بقعد تاني ، اما نشوف اخر الليله دي = نععععم _ هو انت اتجوزتني لي ؟ رديت باستغراب وانا مش مستوعب انها ممكن تكون عرفت حاجه ، ولو عرفت لي واقفت تكمل = مش فاهم السؤال _ قصدي انه انت انجبرت تتجوزني ؟!
= لي بتقولي كده ؟ _ عادي حاسه كده = انتي ممكن تنجبري ع كده ؟ _ لا = يبقي اذا كان انتي ك بنت متجبرتيش ، انا هتجبر هزت رأسها باقتناع بدون م ترد قبل م اسالها انا نفس سؤالها وانا تقريباً شاكك ف الإجابة _ انتي بقا اتجوزتيني لي ؟ ردت بثبات وهي بتنزل راسها بتوتر = عايزه احتفظ بالاجابه لنفسي ، ممكن ؟! هزيت راسي بدون م ارد قبل م تردهالي وتعيد السؤال
= بس انت برضو مردتش ع سؤالي _ حابب برضو احتفظ بالاجابه لنفسي ، لحد م يجي وقت واقولك هزت راسها بشرود وسكتت قبل م اقوم انا عشان انام قبل ن اسالها _ هو انتي مش هتنامي ؟! = احم ، لا هنام طبعاً هزيتلها راسي وسبتها ودخلت نمت بدون م اتكلم تاني ، الحقيقه مش فاهم ف اي بس انا متأكد اني بعمل الصح ، مش لازم تعرف حاجه لحد م يجي وقتها ، ولحد الوقت ده لو معرفتش اكون ليها زوج بيحبها فممكن اكون اخ كويس ، لحد م هي تزهق وتقرر تبعد
غير كده الحقيقه معنديش استعداد لأي حاجه تانيه دخلت الاوضه صليت القيام وقرات قران وطفيت النور عشان انام قبل م اروح ف النوم حسيت بيها بتدخل الاوضه ، اتوجهت لاوضه اللبس ، وبعد كده محستش بحاجه تاني ——————————————— هو حضني بجد !! ، بجد والله حضني !! معرفش اخد رياكشن بس مبسوطه ، مبسوطه من كل النواحي ، مبسوطه بحجات كتير اوي مبسوطه عشان عايز يلبسني الطرحه ، مبسوطه عشان عايز يسترني ، مش عارفه ممكن عشان الدين وكده
بس طول عمري شايفه انه ال بيحبك هيداريك عن عيون الناس كلها ، هيخبيك كانك كنزه الأوحد هو اوك انا مش كده بالنسبه لنوح ، ومش كنزه وكل الكلام ده برضو بس طول عمري بستغرب ، بجد والله ، ازاي ممكن مثلا شخص يسيب مراته تلبس ضيق او قصير او مفتوح ، حقيقي ازاي بجد ، مفيش حاجه اسمها سايبني ع راحتي ، اصل مهو لو بيحبني هيغير عليا ، مش هيخلي حد يبصلي نظره واحده
اوك برضو نوح مش بيغير عليا ، وجايز اكون دماغي تعبانه بسبب ال هقوله ده بس عمري م كنت هتجوز واحد ميحاولش يغير طريقه لبسي هو باختصار شديد انا مش بحب الراجل الديوث ، ال يسيب مراته تلبس براحتها ، هو ممكن تلبس براحتها عادي ، بس يكون مخبيها حقيقي عندي اقتناع شديد انه ال بيحبني هيغير عليا من كل حاجه ، غير كده فهو مش بيحبني ، انما عايزني امشي جمبه يفرج الناس عليا
وانا عمري م كنت هقبل بكده انا عارفه انه عامل كده عشان ميتحاسبش عني ، وميبقاش ديوث ، بس مش مشكله ، معنديش مشكله والله غير كده هو م اجبرنيش بالعكس ، ده اتكلم معايا بطريقه الطف من اللطف ، مسك ايدي عشان يطمني ، و وحضني ، حضني بجد ، ضمني لحضنه مش عارفه اعمل skip للحظه دي ، ومعتقدش اني هعرف اعمل عمري لحظه محتاجه تتخلد ف التاريخ ، لحظه حلوه جت بعد سؤال غريب
غريبه انه يسالني عايزاه ولا لا ، مين ممكن يكون عندها الجراه وتتسال السؤال ده وتقول ايوه وحتي لو كنت جريئه بما يكفي مكنتش هوافق ، عشان عارفه انه لسه محبنيش مينفعش حاجه زي دي تبقي لمجرد الروتين ، لمجرد انه لازم يحصل ، لمجرد اني مراته وده حقي او حقه ده بيبقي خيط بيربط بين اتنين ، ازاي يبقي خيط مربوط بحُب من طرف واحد بس هيبقي ضعيف ، هيبقي هايش ، مش هيبقي له معني ولا طعم
ومش عارفه صح ال انا هعمله ده او لا بس انا مش هنام معاه ف نفس الاوضه بيسالني اتجوزته لي ، مش عارف اني واقعه فيه ، للدرجادي مش واخد باله بس عادي انا وياه ومعاه للاخر ومن دلوقتي بقا نبدا مشوارنا ف اننا نوقع سي نوح ومش باللبس العريان والجو ده ، اصل اللبس العريان ميوقعش راجل ، يوقع حيوان ماشي ورا غريزته ، خاصه لو مش بيحب الست دي
انما الراجل ميوقعوش الجو ده ، ونوح راجل دخلت انام وانا عماله ارتب هعمل اي او هتصرف ازاي ، وف كل دقيقه بفتكر لحظه م مسك ايدي وطمني ، لحظه م حضني لما بكيت ، وحقيقي حقيقي الفرحه كانت غمراني الليله دي ———————————— من تعب اليوم نمت ، مقدرتش أصحى لصلاه الفجر ع غير العاده ، مش عارف صحيت الساعه كام بس قومت دخلت الحمام واتوضيت وصليت الفجر والضحي وخرجت برا
خرجت وانا اصلا ناسي اني اتجوزت ، ناسي انه ف حد معايا ف نفس البيت ناسي لدرجه اني كنت هنادي ع ماما واميره ، او ال ساعدني اكتر اني انسي اني ملقتهاش جمبي ف نفس الاوضه بس لمحتها وهي بترص الفطار ع السفره ، واول م شفاتني ابتسمت وهي بتتوجهلي _ صباح الخير رديت بصوت مغلوش من اثر النوم ، بس ده ممنعهاش انها تبتسم اكتر ، وعنيها تطلع قلوب بدون م تحس
=احم ، صباح النور اتكلمت وهي مازالت بنفس الواقفه _ نمت كويس امبارح ؟! = اه الحمدلله اتكلمت وهي بتتوجه للمطبخ مره تانيه بعد م مسكت ايدي قعدتني ع السفره _ طب اتفضل يلا عشان تفطر حطيت ايدي ع خدي وانا براقبها مستنيها تجيب الفطار ، بس لما لقيتها محتاسه لوحدها ف المطبخ دخلتلها لقيتها بتلتفتلي بسرعه وبنفس السرعه رجعت وشها للاكل ال ع النار تاني _ انت اي ال جابك ؟
= هساعدِك _ لا لا خليك انا هعرف اعمل لوحدي رديت وانا بمد ايدي جمبها عشان اطفي النار ال هي واقفه قدامها ومش واخده بالها من الأكل ال هيتحرق = ااه طبعاً ، مهو باين ردت وهى بتقاوح واحنا مازلنا بنفس الوقفه _ ع فكره كنت واخده بالي وكنت هطفي لوحدى رديت عليها بسخريه وانا ببصلها وباخد بالي لاول مره من فرق الطول بحكم انى كنت موطي عشان ابصلها = اها بدليل انه اتحرق ، كنتي هتستنى لامتى ، لما يولع فينا بقا !!
التفتلي بسرعه وبعنف ، كانى غلطت فيها واتكلمت بدون م تبصلي ، دماغها يدوب عند صدري _ ع فكره متحرقش بصيتلها وانا رافع حاجبي بدون م اتكلم اتكلمت هي وهي بتتنحنح بخفوت = احم تمام ، كان هيتحرق ابتسمت ع كلامها بدون م ارد وهى كمان مردتش بس رفعتلي راسها وهي خجلانه ، وقبل م استغرب من سبب خجلها لاحظت القرب الشديد ال بينا ، وال يكاد يكون خطوه وف نفس الثانيه لقيتني بعدت ، كاني كنت خايف ، بس خايف من اي ؟ معرفش ..
شالت الطبق وهي بتتلفت عشان تخرج ، ومازالت ملامحها محتل عليها اللون الأحمر قعدنا ع الأكل وهي بدأت تاكل وبتبصلي بترقب عشان تشوف ردت فعلي ع الاكل فبدات اكل بهدوء اتكلمت وانا بحاول اعمل مش فاهم بتبصلي لي _ اي بتبصيلي كده لي اتكلمت بتوتر وهي بتبصلي ببراءه = الاكل طعمه حلو ؟ _ م تدوقي كده وشوفي = لا لا قول انت معلش _ اممم ، اول مره تطبخي
= احم ، يعني تقريباً اتكلمت بمصداقيه فعلاً _ يبقي حلو اتكلمت بفرحه وهي بتبصلي بعدم تصديق = بجد ؟! _ اها ، بما انك اول مره يعني فهو حلو بس ممكن يتحسن عن كده ردت بفرحه باينه ع ملامحها وهي بتهزر راسها بسرعه = حاضر خلصنا اكل وهي قامت عشان تلم الاطباق وانا قومت عشان اساعدها دخلت عليها المطبخ بالاطباق ، اخدتهم مني وهي بتحاول تمنعني اعمل حاجه وبتطلب اني اقعد مجبش حاجه تاني
_ انت بتعمل اي ، اقعد = هساعدك ردت بطفوله مفرطه وهي بتاخد مني الاطباق ، زي ، زي طفله بتتسابق عشان تعمل حاجه جديده لأول مره = لا لا خليك انا هعرف اعمل لوحدي رديت بمشاكسه وانا ببصلها بهدوء = اها زي البيض كده بصيتلي بغيظ وهي بترد بطفوله _ ع فكره متحرقش ، وبعدين هعرف الم الاكل لوحدي = بس انا فعلاً عايز اساعدك _ ده لي يعني
= عشان الرسول عليه الصلاة والسلام كان بيساعد زوجاته ، فانا مين بقا عشان مساعدكيش _ طيب جبتلها الاطباق ال ع السفره كلهم وهي وقفت تغسلهم ، قبل م ادخلها الاقيها محتاسه ومش عارفه تغسلم ازاي ، او مش عارفه تمسك سلك المواعين اصلا قبل م الاحظ الصابون ال مبهدل وشها والميه ال غرقت شعرها ، والحقيقه مش عارف اي ال عمل فيها كده وقبل م احاول امنع نفسي لقيتني بضحك علي شكلها ، بصوت عالي ، ع غير المعتاد وانا عمال بيتردد ف ودني صوتها وهي بترفض اساعدها ع اساس انها بتعرف تعمل لوحدها
التفتتلي بسرعه لما سمعت صوت ضحكتي ، بصتلي باستغراب قبل م تسرح فيها بدون م تتكلم حاولت امسك نفسي عشان اتكلم انا بدون م اضحك عشان متتضايقش اتكلمت وانا ماسك بطني من كُتر الضحك _ انتي اي ال عامل فيكي كده ؟ بصيتلي باستغراب وهي بتبص لهدومها بتفحص = عامل فيا اي ؟ ضحكت تاني غصب عني وانا بشاور لوشها ال كله صابون قبل م امسك نفسي واحاول ابطل ضحك لقيتها بتحط ايدها – ال بالمناسبه مليانه صابون – ع وشها
ضحكت تاني بصوت اعلي وانا بسند ع الرخامه ، والحقيقه مش عارف ف اي ، او لي بضحك كده ، بس شكلها مازال طفولي ، مش حاسسها والله غير طفله دخلت المطبخ تلعب ف الصابون الموجود بطلت ضحك وانا مازلت مبتسم لما لقيتها بتبصلي وهي بتبتسم بخفوت قبل م الاحظ نظره عنيها ال متوجهالي مش عارف ف اي ، ومش عارف هقول كده ازاي ، بس نظره عنيها خطفتني ..
نظرتها لي خطفتني ، خلتني افضل مبتسم ليها وانا ساكت قبل م هي تنزل عنيها وتحاول تمسح وشها باديها ال مازالت كلها صابون قبل م اتوجه ليها بهدوء واشيل ايديها عشان امسحلها وشها وهي رفعالي راسها ومازالت بصالي بدون م تتكلم ……. #يتبع
