– عرفت منين ان انا هنا ؟ – مامتك قالتلى انك نزلتى تشمى شوية هوا فقولت اكيد هتكونى هنا ابتسمت فقال : – مش كفاية بعد بقا – معلش .. كنت عايزة ابقى لوحدى – طب و انا .. مفكرتيش فيا هكون عامل ازاى ونتى مش موجودة بصتله بأسف : عارفة انى زودتها شوية بس .. – هو انا موحشتكيش ؟
موحشتهوش .. لو يعرف انا جيت على نفسى ازاى عشان ابعد و مكلمهوش المدة اللى فاتت مكانش هيسأل سؤال زى ده .. جوايا حنين كبير ليه و المشكلة ان عيونى باين فيها ده و مش عارفة اخبيه و المشكلة الاكبر بقا انه فهم ده و ابتسم – مفيش بعد تانى .. انا مش هسمح بده – ايه الثقة دى – الله هو انا مقولتلكيش .. مش انا هاخدك دلوقتى و نروح على بيت ابوكى عشان اطلب ايدك منه مرة تانية
بصتله بصدمة : – انت بتقول ايه ؟
– بقول انى كنت غلط يا كاميليا .. الايام اللى كنتى بعيدة فيها عنى كنت بتعذب حرفيا .. كنت بلف و ادور حوالين نفسى حاسس بحاجة ناقصانى و ببساطة الحاجة دى كانت انتى .. الفترة اللى فاتت كنت تايه بطريقة مكنتش اتخيلها .. كنت بتجنن لما الاقيكى بتتهربى منى و بتتجاهلينى .. بعد الحادثة قررت انى مش هضيعك من ايدى و مش هسمح بحاجة تبعدنا عن بعض .. انا بخير و انا معاكى .. خلينا نرجع و نحاول تانى و تالت و عاشر .. و اوعدك انى المرة دى هبذل اقصى جهدى .. مش هسمح انى اخسرك
دموعى نازلة على وشى و انا لسة مش مستوعبة اللى بيقوله – اسف انى رميت كل حاجة ورا ضهرى و استسلمت .. عارفة انا ليه كنت بضحك لما قلتى ان بكرة اتجوز و اخلف .. لانى ببساطة كنت واثق ان ده مش هيحصل عشان مش هلاقى حد زيك مهما لفيت و دورت .. مش هلاقى حد احس انه جزء منى بالطريقة دى .. ادينى فرصة اعوضك و احاول عشان تفضلى جمبى طول العمر .. ممكن ؟
متلغبطة مش عارفة ارد .. لسانى وقف و الصدمة محتلانى .. بس منكرش انى فرحانة .. انا لسة بحبه و هفضل احبه .. حاولت ابطل احبه معرفتش .. خايفة بس عيونه كانت مليانة دفا و أمان طمنونى – كاميليا .. لا ما انتى هتوافقى عشان مش هتلاقى حد عنده العضلات دى كلها .. و اصلا اللى هيقربلك هرقده فى المستشفى ضحكت من بين دموعى فابتسم و قال :
– ها .. موافقة ندى بعض فرصة تانية ؟ – موافقة ابتسامته وسعت و جه يمسك ايدى فبعدت عنه و بصتله بتحذير فرفع ايده باستسلام – خلاص خلاص .. يلا بقا نلحق ابوكى لاحسن ده بينام بدرى
ضحكت و قومت معاه ، مشيت جمبه و انا بصاله بحب معرفتش اداريه و مش عايزة اداريه .. مش مصدقة اللى بيحصل .. وافقت لانى مش هقدر ابعد اكتر من كدة ..انا فى بعده مش كويسة .. يمكن اكون خايفة يتكرر اللى حصل قبل كدة .. بس لمعة عينيه و الدفا اللى جواهم خلونى مستسلمش لخوفى .. انا كمان مش هسمح انى اخسره .. همشى ورا قلبى تانى .. بس المرة دى عندى احساس انه مش هيخذلنى .. ساعات لازم نتعب عشان نحافظ ع الحاجات الحلوة اللى فى حياتنا … لازم نواجه و نحارب و نحاول عشان الناس اللى بنحبهم ..
من بين البعد و اليأس بيجى الأمل و الذكريات و اللحظات الحلوة اللى متتعوضش .. بيجى العوض و الحب و الأمان .. بتيجى الفرص الجديدة .. احنا بس نستنى .. نفس الراجل كان قاعد على الكورنيش و مشغل الست .. بحر و ليل و شتا و هو .. لازم معاهم أم كلثوم .. أملي حياتي عينيّ يا أغلى مني، يا أغلى مني عليّ يا حبيب امبارح وحبيب دلوقتِي يا حبيبي لبكرة ولآخر وقتي
تمت .. 🍒 _________________ مستنية رأيكم فى الكومنتات يا حلوين ❤