اسكريبت جديد 🌸 صحيت من النوم مخضوضة ، كابوس تانى بس انا اتعودت ، شربت مية من الازازة اللى جمبى و فضلت استعيذ بالله من الشيطان الرجيم حوالى دقيقة كدة و بعدين قمت من ع السرير و خرجت من الاوضة ، و لقيت بابا قاعد على الترابيزة – صباح الخير يا حجيجة – صباح الخير يا ريم قعدت جمبه و قلت : – اومال ماما فين مش سامعة صوتها
سكت شوية و بعدين بصلى : – انتى عارفة هى فين بصتله بهدوء و انا لسة مش مستوعبة و بعدين بصيت على النتيجة عشان اشوف التاريخ و فهمت – اه .. تمام ماشى ، انا .. هروح اخد شاور بقا عشان الحق الشغل – ماشى قبل ما اطلع من الاوضة نادى عليا و قال : – انا رايح لماما بعد ما افطر مش حابة تيجى معايا ؟
عضيت شفايفى بتوتر و بعدين قلت : – مرة تانية … مش عايزة اتأخر على الشغل
و هو فهمنى زى كل مرة و هز راسه بابتسامة صغيرة ، دخلت الحمام و نزلت تحت الماية و انا مغمضة عينى بحاول استرخى .. بحاول اطرد الاصوات العالية اللى فى دماغى .. الكوابيس .. نفس سؤال كل مرة و نفس توترى و رفضى بردو كل مرة ، نفس الدوامة اللى مش عارفة اخرج منها بقالى سنين ، خرجت من الحمام و لبست و روحت الشغل ، شركة استيراد و تصدير و انا بشتغل فى قسم الحسابات ، دخلت المكتب و قعدت اودام الكمبيوتر بتاعى و بدأت اطلع شوية اوراق من الشنطة
– صباح الخير كان صوت احمد زميلى اللى مكتبه جمب مكتبى بالظبط ، ابتسمت و قلتله : – صباح النور – طبعا انا مش حابب ارخم عليكى من اول اليوم كدة بس الملفات دى مستر هشام ادهالى الصبح و قالى اننا لازم نخلصها خلال يومين اخدت منه الملفات و انا ببصلها بحسرة و لقيته بيضحك .. غالبا بيضحك على شكلى – هو انت كدة و مش حابب ترخم اومال لو كنت حابب كنت عملت ايه
– يستى متقلقيش ما احنا هنقسمهم مع بعض – لا شكرا .. عوضنا على الله نشوف شغلانة غيرها ضحك و بعدين قام من مكانه – هجيب قهوة اجيبلك معايا ؟ – ياريت
مشى و انا بدأت اشتغل ، بحاول اركز اوى فى الورق اللى اودامى بس غصب عنى كل شوية دماغى بتسرح فى حاجات تانية ، اصوات مش عايزة تهدى و مشهد واحد بس بيروح و يجى اودام عينى ، طبيعى ان كل ده يحصل النهاردة بالذات مش مستغربة ، برجع تانى و احاول اركز فى شغلى عشان الهى نفسى و خلاص .. مش عايزة افكر .. مش عايزة افتكر الوقت عدا و جه معاد المرواح ، احمد كان واقف باصص على الملفات و هو بيقولى :
– لسة فاضل كتير – مش هنلحق نخلصهم بكرة – طب آآآ .. ايه رأيك لو نتقابل انا ونتى النهاردة بالليل ف اى كافيه و نخلص فيهم شوية و انا هجيب اللاب بتاعى اتوترت لما قال كدة ، مخرجتش قبل كدة مع راجل غير بابا ، اه احنا هنتكلم فى شغل بس بردو – و الله يا احمد مش عارفة – هعزمك على تشيز كيك ضحكت و قلتله :
– لازم استأذنهم ف البيت الاول – طبعا مفيش مشكلة .. ابقى كلمينى ع الواتس – تمام روحت البيت لقيت ماما قاعدة بتتفرج على التلفزيون و بابا مش موجود ، قعدت جمبها بتعب و قلتلها : – عاملة ايه – الحمدلله قالتها بابتسامة باهتة و رجعت بصت للتلفزيون تانى – آآ .. اتغديتى ؟ انا واقعة من الجوع لو مأكلتيش كلى معايا – انا شبعانة كلى انتى
اخدت نفس عميق و قمت غيرت هدومى و قعدت أكل اودامها ، ببصلها كل دقيقة و التانية لكن هى مركزة مع التلفزيون او بمعنى أدق هى بصاله بس لكن مش مركزة معاه اصلا ، تعبيرات وشها جامدة .. مرهقة .. هى سرحانة و انا عارفة هى سرحانة فى ايه .. و دى المصيبة اصلا – ماما .. ممكن اقابل احمد بالليل فى اى كافيه قريب .. عشان فى شغل متراكم علينا و عايزين نخلصه
بصتلى بهدوء لثوانى و بعدين قالت : – ماشى .. متتأخريش – حاضر
قامت من مكانها و دخلت اوضتها و انا فضلت باصة على المكان اللى كانت قاعدة فيه ، كنت عايزة اتكلم معاها .. عايزة اقولها حاجة بس مش عارفة ، مبعرفش غير انى ابصلها و اسكت .. لسانى بيقف ساعتها ، اتنفست بعمق و قمت من مكانى و دخلت انام شوية ، و على الساعة سبعة بالليل كدة كنت جهزت و نزلت اقابل احمد ، كان واقف مستنينى اودام كافيه قريب من بيتى .. دخلنا و قعدنا و طلعنا الملفات و طبعا طلبلى التشيز كيك اللى بحبه
– احمد ابعد الطبق بتاعك عن الورق – حاضر يا انسة موسوسة – لا مش كدة بس لو حاجة وقعت عليه مستر هشام هيودينا ف داهية – طب تعرفى ان احلى حاجة مستر هشام عملها انه زنقنا زنقة الكلاب دى ضحكت باستغراب و قلتله : – اشمعنا ؟؟ – يعنى آآ … الشغل فى الكافيه احلى بكتير من الشركة .. الجو هنا يفتح النفس ضحكت جامد فبصلى باستغراب و قال:
– على فكرة عندى حق