ليلي بهزار: متقلقيش انا هبقا اجيبه هنا كتير ساره: نورتي البيت يا لولو ليلي بحب: منور بجودك يا قمر تعالي نساعد طنط ونعمل قهوه كريم لنفسه: ليلي سيباني لوحدي مع نور منغير غيره وخناق ومنغير ما تقولي هي بتسلم عليك ليه وبتبصلك ليه؟؟؟ وبتهزر مع ساره كمان!!! نور: اخبارك ايه مع ليلي لسه بتتخانقو كتير بسبب غيرتها عليك واسئلتها الكتير كريم: انا خلاص بقيت متعود علي كده
لاني عارف ان ده نابع من حبها ليا نور: بس دي حاجه تزهق وتقلل الحب دي حتي مبتفكرش تغير اسلوب حياتها وتصحي معاك الصبح كريم: تخيلي انها صحيت بدري انهارده وجت معايا المستشفى!!!! نور: مش معقول ليلي: تشرب قهوه معايا ولا اعملك حاجه تانيه كريم: لا هشرب قهوه طيب التليفون بتاعك بيرن وانت عامله سايلنت قالت كده ودخلت المطبخ منغير تحقيق مين بيرن؟ وعامله سايلنت ليه؟
ومنغير ما تقولي رد قدامي قعدنا واتغدينا وهي بتهزر وتتكلم عادي ومش مركزه معايا ولا مع تصرفاتي زي الاول ليلي: تسلم ايدك يا طنط الاكل تحفه جربت انكشها في الكلام يمكن ترجع تتعصب زي الاول كريم: فعلا الاكل جميل واحلي من الاكل اللي نصه عادم والنص التاني علي ذوقك انتي ليلي بضحك: خلاص ابقي قولي هتاكل ايه وانا اعمله لكن لو قولت اعملي اي حاجة هعمل علي مزاجي بقا
مكنش ده بيكون ردها أبداً…. كل مره كانت تتعصب وتقولي قصدك يعني اني مش بعرف اعمل حاجه كويسه وبجبرك علي اكلي؟؟ ما اكيد فقدان الذاكره مش هياثر علي الشخصيه اوي كده طب هو انا ليه مش مبسوط بالتغير ده؟ الايام بتعدي وهي بتتأقلم وبتهتم بحياتها وبنفسها اكتر مني بتكلم اهلها واهلي وبتخرج لوحدها وبتقرء كتبها وعايشه رايقه كده رغم انها مكنتش بتعمل حاجه منغيري مكنتش تخرج غير معايا وتفضل تتخانق معايا علشان افضي نفسي واخرجها
وطول اليوم تكلمني وتقولي انت فين وبتعمل ايه ولما كنت اقولها انا زهقت بترد وتقولي بحب اطمن عليك واتونس بوجودك بس دلوقتي راح كل ده وحسيت انها مش مضمونه في ايدي حاسس اني لسه متعرف عليها وبحاول الفت نظرها واخد شويه اهتمام في يومها كريم: انا نازل مع صاحبي شويه وبعد كده هعدي علي امي ليلي بغضب: يعني ايه الكلام ده؟؟ فرحت من رد فعلها مش عارف ليه
يمكن عشان حسيت بقيمه وجودي عندها زي زمان كريم بلامبالاه: فيه إيه؟ ليلي: كنت تقولي إنك رايح عند مامتك علشان افضي نفسي واجي معاك كريم بنرفزه: هو ده اللي فرق معاكي ليلي: اه طبعاً اصل انا عندي كورس اون لاين هحضره ف مش هعرف اي معاك ابقي سلملي عليها اتغظت اوي من رد كلامها…. يعني هي مش مضايقه اني خارج ورايح ل امي لوحدي زي زمان ليه؟؟
حبها قل فعلا؟ ولا بقيت مش فارق معاها بس السؤال المهم دلوقتي انا مضايق ليه من تغيرها ده ما انا كنت بتخانق معاها بسبب غيرتها واسئلتها الكتير وبقول ان دي خنقه وزهق دلوقتي لما بقت مش مهتمه بكلامي وبالناس اللي حواليا وبقت شاغله وقتها بقيت عاوز اقعد معاها اكتر والفت نظرها واشغل تفكيرها رجعت جوايا حب الصياد اللي بيدور علي السمكه بكل شغف ليلي: مالك واقف كده ليه
كريم: بصراحه بفكر الغي الخروجه واقعد معاكي ليلي بهزار: مش هدخل في قرارك علشان متقولش اني السبب في قله خروجك مع صحابك كريم بضحك: لا المره دي انا هقعد بمزاجي فعلا كل مره بحس انها بتمنع خروجي وبتحبس حريتي لكن المره دي حسيت بفرحه اني هقعد معاها وهخليها تلغي معاد الكورس علشاني حضرت فشار وعصير وسندوتشات وانا اخترت الفيلم بكل سعاده وكأنها اول سهره لينا
وكل تفكيري ان ازاي إنسان تفكيره واسلوبه وحياته تتغير بالسرعه دي؟؟ فجاءه هي مش فاكره حياتنا وخناقتنا وانا فجاءه بدور علي الاهتمام والخناقات بتاعت الغيره اللي مكنتش بحبها…. بس اكتشفت دلوقتي اني بحب غيرتها وخوفها عليا وتقديرها لوجودي بس انا مكنتش مقدر كل ده وكنت بقول عليه زهق وملل واڤوره ليلي: انا عرفت قيمه المثل اللي بيقول اللي يزيد عن حده يتقلب ضده كريم: ازاي
ليلي: يعني الاهتمام الزياده بيتفسر خنقه والحب منغير عقل بيخنق القلب كريم بتركيز: يعني ايه الحب منغير عقل بيخنق القلب!!! ليلي: يعني لما تدي اللي قدامك مشاعر كتير بدون حكمه ومنغير ما تراعي مشاغله وتفكيره المشاعر دي بتتحول ل تحكم وخنقه رغم ان اساسها كان حب الحب منغير ما نفكر نديره ازاي ومنغير ما نخلي العقل متوزان مع القلب ممكن يتحول ل كره منغير ما نحس كريم: اكتر رد مناسب لكلامك كان في فيلم اسف على الازعاج لما قاله:
“الحُب مش أمنية ياحسن ، الأمنية إن الحب ده يدوم” الايام اللي بعد كده كان مختلفه… كان بيرجع بدري ويحكيلي عن يومه وانا احكيله عن الحاجات اللي عملتها.. اي معلومه جديده اتعلمتها او سمعتها بيقينا نتشارك القرارات وحتي خروجتنا بقت مره علي مزاجه ومره علي مزاجي فيه شعره بين الغيره الحلوه وبين الشك المُنفر