كانت ماشية في شارع ضلمة لقيت مطوة محطوطة في وسطها – من غير همس ولمز طلعي كل اللي في جيبك
– اية دا، انا بتثبت!
– مش وقت تفاجئ، طلعي اللي معاكي وخلصي
– يعني انا مثبتة من مجرم فعلًا
– متقوليش مجرم
– الكلمة جرحاك؟ نقول بلطجي؟
– متقوليش حاجة وطلعي اللي معاكي من غير صوت
– طيب ممكن ناخد سلفي سوا؟
– طلعي بس التليفون وبعدها نتصافي
– لا.. توعدني قبل ما تاخده نتصور وتبعتهالي وبعدها ادهولك
– اوعدك
– استني هطلعه..
لحظة انت بتضحك عليا مفيش بلطجي عنده وعد
– لا انا اصدار جديد وبنفذ وعودي طلعي انتي العدة بس
– طيب وريني المطوة اللي انت مثبتني بيها كدا
– لا
– ارجوك، انا همــ,,ـــــوت واشوف مطوة اوي، وعايزة اتصور بيها كمان
– وتديني التليفون؟
– ومعايا متين جنية وكيسين اندومي
– بالخضار؟
– بالخضار..
– مجيباش فيروز
– مبحبوش معايا شويبس
– اوعي يكون بالاناناس بيقولوا فيه مكون حرام
– لا وانت تقي اوي ياض، عمومًا متخفش دا رمان
– خليهم تولتومياية وهعملك بتتفتح وتتقفل ازاي
– معاك موس؟
– تحت لساني
– تعملني بتطلعه ازاي وبتحطه ازاي
– ربعمية وخمسين كدا
– نقفلهم خمسمية علشان انت صعبان عليا بس
– والله انتي اول زبون انهاردة
– كمان؟ كدا هعيط.. طيب لو مكنتش ثبتني كنت هتعمل اية؟
– كنت هنام من غير عشا بقي واصحي من الصبح القط رزقي
– واو بتثبت الصبح كمان؟
– لا حرامي
– كمان منوع وظايفك والله انت كريتيف عن ناس كتير اعرفها وبتجاهد اكتر منهم، بعد العصر عندك نشاط تالت؟
– لا دا وقت العبادة
– ما شاء الله، ما شاء الله، كمان بتصلي
– بصلي والله بس النفس امره بالسوء، ببقي طالع في امان الله بلاقيني قلبت نص الجامع
– بس بتندم بعدين؟
– وضميري بيوجعني اوي
– ياقلب امك، صعبت عليا والله، خلاص صلي في البيت
– من بكرة، طلعي بس يلا الحاجة
– شكلك مستعجل
– علشانك بس، مينفعش تتأخري اكتر من كدا
– يادكري، علشان الكلمتين الحلوين دول هزودهم مية كمان
– شالله يكرم اصلك، وبعد انهاردة مترجعيش البيت بعد عشرة علشان الدنيا بقيت خطر
– ياحبيبي.. انت خايف عليا؟ والله لأزود مية كمان
– وهديكِ نمرتي تتصرفي بعد ما توصلي بيتك وتكلميني من اي تليفون تتطمنيني عليكي
– اي تليفون لية؟ وبتاعي؟
– مش انا هاخده!
– اها صح..
ميغلاش عليك، حظك اني معايا الشاحن كمان
– دا انا ربنا بيحبني بقي
– ماذا بينك وبين الله ياض؟
– صلاة عصر، وصيام خميس وجمعة
– كمان بتصوم! هزودهم مية كمان
– طيب طلعيهم بقي
– استني نتكلم شوية انت مستعجل لية؟
– عيب اتكلم مع ستات غريبة
– محترم.. كمان محترم وعندك مبادئ، مية كمان
– طلعي طيب
– انت مستعجل وعايز تمشيني لية؟ للدرجادي الكلام معايا وحش!
– والله ابدًا، دا الكلام معاكي ميتشبعش منه بس الوقت اتأخر وانا خايف عليكي
– خايف عليا؟ يادكري..
استني هطلعلك الفلوس علشان انت دخلت قلبي خلاص
طلعت الفلوس – خد، اوعي تنساني
– لا.. انساكِ اية؟ انتِ بقيتي في المفضلة خلاص، بتعدي هنا كل يوم؟
– اها، هتيجي تشوفني؟
– ان شاء الله بس قبل عشرة؟
– قبل عشرة..
***
تاني يوم – طلعي كل اللي في جيبك..
– حبيب قلبي عاملة حسابي وجيبالك كمان حتتين مكرونة باشميل ماما عملاهم انهاردة علشان حساك هفتان..
– اللي حاسة بيا
زينب – سمير