_ده انت تؤمر من العين دي قبل العين دي يا حبيبي ، استريح براحتك وخد نفسك وهتلاقيني جاي اخدك بالعربيه واعمل لك احلى ملوخيه على بط . وركبوا الاتنين العربيه وطول الطريق عمالين يتكلموا مع بعض ده عمل ايه في حياته وده عمل ايه في سفره كانهم اب وابنه وحشين بعض مش حضره البيه والسواق اللي شغال عنده ، وصل كريم الفيلا وقابلته والدته بفرحه وابتسامه اي نعم هي كانت بتسافر له كل سنه بس برده اخيرا رجع ويستقر هنا ،
وقالت له بفرحه وهي بتبـ,ـوسه من كل حته : _حمد لله على السلامه يا روحي نورت بيتك وحياتي واظن بقى ما فيش سفر تاني كفايه غربه بقى وانسى اللي فات وعيش حياتك يا حبيبي مراتك الله يرحمها ماتت من زمان وانت سنك دلوقتي تسعة وتلاتين وداخل على الاربعين نفسي افرح بيك واشيل عيالك بايدي يا نور عيني . باسها كريم من راسها واتنهد بحزن لما فكرته بمراته اللي ماتت بعد اول سنه جواز ،
ولسه لحد دلوقتي لابس دبلتها في ايديه ما خلعهاش وقال لها وهو متاثر : _ليه يا امي تفكريني وانا بحاول انسى بالعافيه قلوبنا مش بايدينا نغيرها زي ما احنا ما عايزين كل ده باراده ربنا سبحانه وتعالى وانا مش قادر انساها ولا تخطاها رغم ان سافرت السنين دي كلها علشان ابعد عن الاماكن اللي كانت بتجمعنا ، لان كل لما ادخل مكان بشوفها فيه وبحسها موجوده حواليا وبيطلع في الاخر خيال واصحى منه على واقع سيء بيدمرني .
زعلت أمه عليه جدا وقالت له وهي بتصبره : _يا حبيبي راحت عند اللي خلقها وما تتعزش عليه وهي دلوقتي في مكان احسن من هنا افتكرها دايما بالرحمه واتصدق على روحها على طول لكن في نفس الوقت ما تدفـ,ـنش نفسك بالحياه ، انا مش هتكلم معاك دلوقتي لانك انت لسه راجع من سفر هسيبك تستريح شويه وبعدين محضره لك حبه صور لبنات من معارفنا تختار منهم والمره دي اجباري كريم مش اختياري .
قال لها كريم برفض على كلامها : _مش انا يا امي اللي يتجوز بالطريقه دي وانت عارفه انا هفكر في الخطوه دي اوكي بس سيبيني بقى اختار اللي تريحني وتناسبني واكون انا مستريح لها دي اهم حاجه بالنسبه لي لكن موضوع الصور ده ما ينفعش فتوكلي على الله وسيبيها على اللي خلقها وهيبعت لي نصيبي الحلو باذن الله . بصت له أمه بملامة وقالت له بعتاب :
_يعني انت كده يا كريم بتضحك على عقلي وبتمطوحني في الكلام يعني ايه اسيبك لما نصيبك الحلو يجي لك وانت اصلا مش في دماغك اعمل حسابك يا كريم انا مش هستنى اكتر من كده . رد عليها كريم علشان يخلص من الحوار ده وقال لها وهو بيقدم المشيئه : _ ان شاء الله يا امي اللي فيه الخير يقدمه ربنا وعلى الله التساهيل ، وبعدين مسك ايديها وباسها وقال لها :
_انا ميت من الجوع ونفسي اكل من ايديك الحلوين دول ما تتصوريش واحشني اكلك قد ايه من ساعه ما كنتي عندي اخر مره في كندا ، قالت له والدته بحب : _من عيوني يا حبيبي اطلع انت بس غير هدومك وانزل هتلاقيني جهزت لك السفره . وفعلا طلع غير هدومه واخد شاور ونزل لقي والدته محضره له الاكل ،
اكل كثير لحد ما بطنه اتملت وبعدين قال لها ان هو هيستريح شويه ،
وعدى اليوم ده على كريم وكمان تلت ايام وبعدين اتصل بيه عم سيد وعزمه على العشا وهو وافق ان هو يروح لهم بالليل ، اما عند عم سيد فمراته هي وزهره بينضفوا الشقه وبيوضبوها علشان خاطر الضيف اللي جاي عندهم واللي هم مش بيعتبروه ضيف بيعتبروه واحد من البيت، وجهزوا كل حاجه وزهره دخلت عشان تذاكر شويه لأن التمريض بيحتاج مذاكره وما فيش ساعتين وجه كريم بكل شياكه تخطف الانظار ،
واول ما وصل سلم على ام زهره وقال لها بابتسامه : _ ازيك يا اطيب ست في الدنيا بحالها يا اللي وحشاني قد البحر وسمكاته . طبطبت ام زهره على ضهره وقالت له : _والله انت اللي واحشني يا حبيبي حمد لله على سلامتك نورت بيتنا الصغنون ، ده انا عامله لك ملوخيه بالبط تاكل صوابعك وراها تعالي يا حبيبي يلا خش اوضه السفره عقبال مانده زهره ونحط الاكل .
ابتسم كريم ورد بشقاوه : _ياه ما تتصوريش زوزو واحشاني قد ايه ما شفتهاش من ساعه ما كانت في الابتدائي تقريبا كانت لسه مخلصاه . ابتسمت له ام زهرة وقالت له بتباهي: _لا دي زهره دلوقتي كبرت وبقت عروسه زي القمر ، واستاذنت ودخلت تنادي على زهره اللي كانت لابسه دريس باللون اللافندر شيك جدا ومخليها ولا نجوم السينما ، زهره من النوع اللي بيحب يهتم بنفسها وبلبسها وانيقه جدا وذوقها عالي ،
خرجت زهره بترص مع مامتها الاكل ودخلت باستئذان وقالت : _السلام عليكم ازيك يا أبيه كريم عامل ايه ؟ وحمد لله على سلامتك. رفع كريم وشه يشوف مين الصوت الانثوي الرقيق ده وبص وسهم لما شاف ايه من الجمال واقفه قدامه والهدوء والبراءه وقال وهو تايه في جمالها ومصدوم : _وعليكم السلام إنتي مين يا انسه ؟ حزنت زهرة جدا لانه ما اعرفهاش وقالت له بعتاب : _هو انت مش عارف انا مين يا أبيه ما تهرجش علشان ما ازعلش منك زي زمان ولا انت نسيت زوزو وزعلها الوحش .
انصدم من اللي سمعوا وقال لها بدهشة : _معقول إنتي زوزو الطفله الصغيره اللي انا كنت شايفها من سنين ، ما شاء الله كبرتي وبقيتي عروسه زي القمر كمان . اتحرجت زهره جدا كأي بنوته بيتقال لها كلام حلو وقالت له وهي منزله عينيها في الارض : _تسلم يا أبيه. وسابته وخرجت تكمل الأكل مع مامتها وقلبها بيدق من ساعه ما شافته ، اما هو من ساعه ما شافها فبقى في دنيا غير الدنيا مش مصدق ان دي الطفله اللي كان بيلعب معاها وبيشيلها على كتفه كبرت كده وبقت عروسه خطفت نظره وخلت قلبه يدق ،
ورصوا الأكل وقعدوا كلهم اتجمعوا على سفره واحده ،