#اسكريبت _كل ده ومنزلتيش ؟ _ خلاص يا يوسف خمس دقايق وهكون عندك اهو _ طيب خلصي يا فرح لما نشوف اخرتها معاكي ايه ! ” قفل الموبيل فكملت لبسي وطلعت عند ماما بره يوسف زميلي معايا في المدرسة والدروس يعتبر اتعرفت عليه من أولى ثانوي ودلوقتي احنا في تالته علمي علوم ،طلعت عند ماما وقفت قصادها _ ماما هاتي المصروف وفلوس الدرس عشان انزل _ خدي لما نشوف هتعملي ايه السنه دي مين هيروح معاكي الدرس
_ هيكون مين غير هنا يعني _ طيب يلا روحي _ سلام يا ماما ” خدت منها فلوس الدرس ونزلت ،مشيت شوية وبعدها لقيته واقف في الشمس بينفخ بضيق وقفت وابتسمت _ اتأخرت عليك ؟ _ لا يا اختي متأخرتيش احنا النهارده هنطرد من الدرس بسببك _ ليه يعني ده باقي ربع ساعه يا يوسف _ فرح انتي عارفه الطريق بياخد نص ساعة _ لا ما احنا هنمشي بسرعه _ والله بمشية البطريق بتاعتك دي !
بصتله بضيق _ انا ا قطعني بسرعه ورفع أيده باستسلام_ خلاص مش هنتجادل يلا عشان نمشي هنتاخر ” رميت الشنطه بتاعتي عليه وضحكت ومشيت وهو بصلي بضيق واحنا ماشيين _ في الاخر انا اللي هشيلك الشنطه _ انا تعبانه خالص يا يوسف النهارده مين هيشيلها يعني ؟ _ خدام الهانم طبعا ضحكت_ لا يا يوسف متقولش على نفسك كده _ المهم عملتي ايه في درس اللي ذاكرتيه _ يا عم ده درس عربي المشكله عندي انه رخم اوي كل ما اذاكر انسى بسرعه
_ عشان مش بتركزي لو بتركزي مش هتقولي كده ! _ لا بركز بس مش بحب العربي ابدا _ على فكره بقى العربي حلو بس انتي اللي واخده فكره غلط عنه _ مين ده العربي قول كلام غير ده _ مش هقول يستي يلا ندخل الدرس وصلنا _ استنى انا عايزه اروح افك الفلوس دي عشان ادي للمستر فلوس الدرس بصلي بغيظ واتكلم بحنق_ طيب ومفكتيش الفلوس ليه واحنا جايين لسه فاكره دلوقتي
_ نسيت والله يا يوسف ادخل انت عشان المستر ميتكلمش معاك وانا هدخل بعدك _ بس انتي كمان هتتاخري كده يا فرح وهيزعقلك _ لا متقلقش يلا بس ادخل ” مشي بتردد دخل الدرس وبعدها روحت فكيت الفلوس ودخلت السنتر ،اول ما دخلت المستر بصلي _ اتأخرتي كده ليه يا فرح _ معلش يا مستر اتأخرت شويه _ كل مره تأخير كده ده مينفعش خالص يا فرح _ والله يا مستر الطريق بس بيأخرني
_ عارفه لو انا مش عارف انك طالبه متفوقه كنت مش دخلتك الدرس ولا دلوقتي ولا بعدين مش كنت خليتك تكملي معايا ابتسمت _ ربنا يخليك يا مستر بعد اذنك ” ابتسم وانا دخلت قعدت قريب من يوسف بس لحظت أنه قاعد مكشر وده مش طبعه ،قعدت والمستر بيشرح الدرس وبعدها وقفني _ قومي يا فرح اعربي الجمله دي رديت بتذمر_ يا مستر مش بحب الإعراب ابدا ضحك _ عارف ولا بتحبي العربي كمان يلا اعربي
” بدأت أعرب وبعدها بصلي بحزم _ انا نفسي اعرف تاء الفاعل بتروح فين فين مكانها في الإعراب ضحكت_ اه معلش نسيت نسيت يا مستر _ نسيتي اهي الحاجات دي اللي بتوقع في الامتحان وترجعوا تعيطوا الدرجات راحت فين ! Eman Saleh. ” ابتسمت وخلصت وبعدها قعدت ،خلصت الحصه وبعدها المستر اتكلم _ الحصه الجايه فيه امتحان على الوحده الاولى و التانيه متنسوش ” كله طالع مخنوق وبيتكلم وبعدها طلعت دفعت حق الدرس ويوسف كان طالع متضايق مش فاهمه ماله مشيت جنبه
_ مالك يا يوسف زعلان ليه اتكلم بضيق _ مية مره اقولك متضحكيش مع المستر ده وبرضوا بتضحكي ! بصتله بذهول _ بتقول ايه يا يوسف ده المدرس بتاعنا وبعدين بيفهمني مش لازم اكشر يعني _ لا كشري ومتعمليش كده تاني _ اعمل ايه يا يوسف ده انا بجاوب على اد السؤال _ والضحك والهزار ده كان ايه _ لا ده انت اتجننت خالص يا يوسف بجد _ خلاص براحتك يا فرح
” مشي متضايق وكنت ماشيه جنبه ماله ده ! Eman Saleh . _ تعالي اقعدي هنا هنطلب اكل ونراجع عشان ميعاد درس الأحياء ولا ايه _ انا مش عارفه كل الدروس مع بعض كده ليه _ عشان يا اذكى اخواتك المواد كتير ف لازم نقسمهم عشان يوم الجمعه يكون اجازه _ ما فيه مدرسين برضوا بيدوا امتحان يوم الجمعه _ اوقات بس يا فرح لو مفيش بيكون اجازه حتى لو كده الامتحان بيبقى ساعه وتروحي
” هزيت راسي وطلب الاكل وبعدها قعدنا نراجع النهارده عندنا امتحان احياء وحرفيا الدنيا جايه علينا اوي كل يوم امتحانات او امتحانين مع بعض ايه كل ده ! ” الاكل وصل وكلنا وبعدها طلعت فلوس فبصلي وهز رأسه _ بتعملي ايه ! _ بدفع حق الاكل هعمل ايه يعني _ طيب رجعي فلوسك _ ليه يعني ده اكل مشترك يا يوسف احنا طلب وانت لسه مش بتشتغل اتكلم بضيق _ رجعي فلوسك انا معايا فلوس يا فرح
” دفع وبعدها طلعنا دخلنا درس الأحياء قعدنا مستنين المستر ،كنت قاعده متوتره وهو قاعد واثق من نفسه _ انت مش خايف يا يوسف ! _هخاف من ايه ده مجرد امتحان خليكي واثقه من نفسك ده امتحان في درس واي غلط هنتعلم منه عشان اخر السنه اهدي يا فرح متخافيش الامتحان هيكون حلو ” بعد شويه المستر جه وبدانا نمتحن ،كنت قاعده بتوتر وبحل بعد فتره يوسف طلع يصحح الامتحان وبعدها خد الورقه وخرج ،وقف قصادي بيحاول يطمني ،خلصت و خرجت و المستر بدأ يصحح ورقتي وبعدها بصلي
_ السؤال ده مش كده يا فرح ده حله زي ما انتي شايفه كده ” بدأ يفهمني وبعدها اتكلم _ كده لحد دلوقتي يوسف صاحبكم مقفل الماده و فرح ناقصه درجه كل واحد هيقفل او ينقص درجه وقتها هيكون ليه هدية عندي ” خدت ورقتي وطلعت بضيق وهو طلع مشي جنبي _ وريني ورقتك كده ! ” خدها مني وبعدها بصلي _ انتي سيبتي كل الصعب يا فرح وجيتي للسؤال ده
_ خلاص بقى يا يوسف انا متضايقه دلوقتي ابتسم ومسك ايدي _ خلاص يا ستي اتعلمي من غلطك وبعدين كده كده هتاخدي هديه من المستر اهو متزعليش يا فرح ” كل يوم كنا بنروح الدروس مع بعض ودايما بيشجعني على المذاكره ،وفي يوم كنت جايه من الدرس ودخلت البيت لقيت اخويا في وشي قرب مني بغضب وضربني زعقت _ انت ازاي تمد ايدك عليا كده مسك شعري وشده_ وانتي من امتى قليلة الادب كده
صوت _ اه سيب شعري يا احمد انت اتجننت ولا ايه _ اه وهبقى مجنون اكتر لو سيبتك كده من غير ما اخلص عليكي ” ماما و بابا طلعوا وبعدونا عن بعض وانا بصتله بكرهه بابا زعق_ انت ازاي تمد ايدك على اختك كده _ عشان هي بنت قليلة الادب ومش محترم وجودنا _ انت بتقول ايه على اختك يا احمد _ الهانم ماشيه مع واد ملوش لازمه رايحه جايه معاه
#ايمان_صالح ماما ضربت على صدرها _ يا مصيبتي ازاي تقول على اختك كده _ انا مش بتبلى عليها اسألوا الهانم كانت مع مين وكانت ماشيه مع مين انا كنت نازل بس هي طلعت انا شايفها من البلكونه ماما قربت بحذر _ انتي فعلا عملتي كده ” سكت ومردتش عليها فكررت تاني _ انتي فعلا عملتي كده يا فرح _ يا ماما يوسف زميلي ومعايا في الدرس هو ولد كويس بيشجعني و
” مكملتش كلامي لأنها ضربتني على وشي بالقلم _ اخرسي يا قليلة الادب من بكره مفيش دروس انتي فاهمه _ لا مش فاهمه انا معملتش حاجه غلط ده زميلي يا ماما