#قصه_جديده _صباح الخير يا ست هانم نايمه كل ده ؟ _يا ابني انا عايزه اعرف حاجه انت طالع لي في البخت ولا حاجه كل شويه الاقيك في وشي كده يا في الموبيل سيبني انام خمس دقايق بس _انتي كل ده ما نمتيش خمس دقايق انتي نايمه من المغرب يا رؤى _انت مالك اصلا يا علي بتدخل في حياتي ليه ده انت رخم اتكلم بغيظ وهو بيضغط على أسنانه _والله ما في ارخم منك عشر دقائق وهكون مستنيكي تحت لو منزلتيش يا رؤى هيكون فيه تصرف تاني
_انسان بارد _انسانه تنحه و متخلفه ! “ضحكت وقفلت الموبيل اد ايه ببقى فرحانه لما بشوفوا متعصب أو متضايق ،علي ده انسان تاني خالص و مختلف دايما بيقولوا ولاد العم مش بيطيقوا بعض بس احنا مختلفين شويه هو اه دايما بنتخانق بس بحب اتخانق معاه علاقه متخلفه ! “لبست بسرعه وخدت شنطتي وكنت هنزل ساره وقفت في وشي _صباح الخير رايحه فين بدري كده _هكون رايحه فين يعني رايحه ل قدري
ضحكت _قصدك علي هو تحت _اه يا اختي تحت انا نازله مسكت ايدي _خلاص استني انا نازله معاكي _رايحه فين انتي كمان ؟ _فيه ورق مهم هجيبه فهنزل معاكي _لا ورق ايه انتي لسه ملبستيش وعلي هينفخني انا نازله وانتي انزلي براحتك _بس “مكملتش كلامها ونزلت بسرعه وانا بنهج ووقفت قدامه كان واقف _كل دول عشر دقائق اتكلمت بغيظ _على فكره بقى انا نزلت بسرعه حتى صاحبتي مستنتهاش عشان خاطرك
_اووبا صاحبتك ساره صح طيب كنتي استنيتي وجبتيها معاكي _يا سلام مش كان من شويه هتتاخر و مش عارفه ايه ده انت رخم ضحك_طيب يا ستي يلا امشي قدامي ثواني هوقف تاكسي _لا تاكسي ايه يا عم المكان قريب و بصراحه كده عايزه اتمشى واكل ايس كريم _ما انا عارفك طول عمرك استغلاليه اتكلمت بحزن مصتنع_اخص عليك يا لولي ده انا حتى مش باكل كتير بصلي بدهشه_با كذااابه ده انتي بتاكلي وبتدخلي على اكلي كمان
_انا يا لولي _بت متبصليش البصه دي وبعدين ميه مره اقولك متقوليش يا لولي واه بتاكلي كل ده _ماشي يا لولي يلا بقى “ضحكت فخبطني بالشنطه بغيظ ومشينا شويه وبعدها اتكلم #ايمان_صالح _على فكره احتمال انزل البلد بكره _ليه مش انت قولت هتقضي فتره اللي قبل الامتحانات هنا _لا يستي انا بابا و ماما وحشوني وعايزه اشوفهم وانتي ايه اهلك موحشكيش _انت عارف يا علي هما بيوحشوني ازاي _خلاص خلصي نفسك النهارده وننزل بكره
_لا بكره مينفعش خالص انا عندي محاضرات بكره اقولك عدي بكره وننزل بعد بكره ايه رايك _ماشي يا ستي اي خدمه يلا المحل اهو تعالي ندخل نشوف موبيلك في ايه “خد الموبيل ودخل وقف واتكلم _بعد اذنك محتاجين نصلح الموبيل ده ممكن تشوفوا _تحت امرك يا افندم “خد اللي واقف في المحل الموبيل ووقف يشوفوا وانا وقفت اتفرج على جرابات ،وقفت شويه وبعدها لقيت جاب الموبيل طلعت فلوس ولسه بمد ايدي لقيته بصلي بحده وسحب ايدي وطلع فلوس وحاسبه وقبل ما يمشي مسك الموبيل حط فيه جراب وشاورلي اطلع وطلعت وراه
_انت حاسبت ليه يا علي كنت سبتني احاسب _ليه انت واقفه مع سواسن ولا حاجه يا ست رؤى اياك بعد كده يبقى واقفين وطلعي فلوس _بس انت يا علي محتاج كل فلوس تصرفها عليا ليه _ملكيش دعوه يا ستي وبعدين مين قالك اني محتاج انا الحمدلله بشتغل كويس وبصرف على نفسي يبقى تسكتي ها يلا “مشيت معاه وروحنا المدينه علي اقرب حد ليا تقريبا يمكن عشان مليش اخ ولد فحاسه انه وجوده ليه اهميه في حياتي ،وصلنا المدينه وكنت هطلع بعدها بصلي
_استني _نعم يا علي _ خلي بالك من نفسك ولو احتاجتي حاجه كلميني ومتتردديش _ااه زي ما قولتلك على الايس كريم ومجبتليش صح ؟ _انتي لسه فاكره _هو انا هنسى يعني ابتسم ومد أيده _خدي يستي الايس كريم اهو جبتهولك وانتي في المحل ابتسمت بفرحه _ربنا يخليك ليا يا علي _يلا اطلعي فوق ويبقى كلميني “سابني ومشي وانا طلعت وانا ماسكه الايس كريم والموبايل وفرحانه اوي ،طلعت فوق وكانت ساره واقفه
_واخيرا جيتي كنت فين كل ده _كنت مع علي انتي عارفه _بس اتأخرتي اوي يا رؤى _عقبال ما عملت الموبيل _ايه ده حلو اوي الجراب ده جبتيه منين _من محل كده علي جابهولي _ايه ده شوفتي مكتوب عليه ايه يا رؤى كان نفسي يكون اخويا زي علي كده “بصيت على الجراب وابتسمت لما لقيت مكتوب “الطف بنوته وجنبها قلب “دخلت بعد ما عطتها من الآيس كريم ،قعدت على السرير وكنت بفكر وبعدها طلعت الموبيل وبعدت رساله
_ميرسي اوي يا علي على الجراب زوقك لطيف “قفلت الموبيل وطلعت روايه اقراها عجبتني واندمجت فيها بعد شويه لقيت موبايلي رن وكانت اختي سما ابتسمت وفتحت عليها _اختي حبيبتي يا اغلى الناس صوتت _بتفتحي عليا ليه انتي عارفه مش معايا رصيد “بصيت على الموبيل بذهول لما لقيتها قفلت ضحكت ورنيت عليها بعد شويه ردت _تصدقي انك رخمه بتفحي عليا ليه _وفيها ايه يعني يا رنا هو انا فتحتي عليكي باب الحمام
_لا ده انتي متربتيش كمان ضحكت _انتي عارفه أن امك نسيت تربيني اساسا المهم انتي عامله ايه _الحمدلله بخير انتي اخبارك ايه في السكن _الحمدلله والولا ابنك عامل ايه _مغلبني ومطلع عيني والله ضحكت _يا عيني هي العيال كده متزعليش _اضحكي يا اختي اضحكي بكره تتجوزي ويطلع على عينك _لا يا اختي السنجله چنتله _اه چنتله بكره نشوف المهم هتنزلي البلد امتى عايزه اشوفك _بكره عندي محاضرات وهننزل انا وعلي بعد بكره إن شاءالله
_طيب سلميلي عليه ولما تنزلي قوليلي عشان نتقابل عند ماما _من عيوني حاضر “كلمتها شويه وبعدها قفلت معاها وكملت الروايه ،كنت مندمجه في احداث الروايه وسمعت خبط في الشباك طلعت فتحت الشباك وانا مستغربه هو في ايه ،بصيت لقيت في واحد واقف قصادي عند مدينه الولاد بيبستم وحط أيده على شعره وبيغمزلي ! “كنت هدخل فسمعت صوته _متقفليش عايز اتكلم معاكي _نعم حضرتك في حاجه _لا بس ممكن رقمك عايز اتعرف عليكي
_وتتعرف عليا ليه إن شاءالله _يعني أصحاب وكده _لا انا مش بصاحب ومترميش حاجه على الشباك تاني سلام “قفلت في وشه الشباك ايه البرود والتناحه دي ! “في بيت سما بعد ما قفلت مع اختها سمعت صوت بره سابت ه وخرجت تشوف في ايه ،فتحت الباب ولقيت سلفتها بتبتسم _اهلا تعالي ادخلي _شكرا يا ام احمد انا بس كنت عايزاكي في موضوع _طيب يعني هنقف على الباب تعالي ادخلي _حاضر
“دخلوا مع بعض وقعدت فبصتلها _بصي يا يمنى ثواني بس هجيب عصير واجي ولا اجهز الغدا _ولا حاجه يا اختي انا بس كنت عايزاكي في موضوع كده _ثواني هجيب عصير ولا انتي مش عايزه تشربي حاجه عندنا _لا والله بس انتي عارفه أكلك مش غريب عليا ولا حاجتك بس انا كنت عايزه اتكلم معاكي في موضوع كده “قعدت قصادها واتكلمت بطيبه _في اي يا اختي حصل حاجه ولا بناتك فيهم حاجه
_لا يا اختي احنا كويسين بس _بس فيه ايه قلقتيني بصتلها شويه وبعدها اتكلمت_انا كنت عايزه منك مبلغ كده سلفه لحد ما ابو يمنى يلاقي شغل وهرجعهالك على طول _والله يا ام يمنى انتي عارفه الظروف وظروف البلد بس اقولك انا هديكي اللي انتي عايزاه اول ما خالد جوزي يرجع هقوله وهديهملك اتكلمت بلهفه _لا والنبي يا اختي متقوليش لخالد _ليه بس كده _اصل اصل يا اختي جوزي ميعرفش اني هاخد منك فلوس وخالد هيقوله وهيحصل مشاكل يرضيكي يحصل مشاكل بينا
_لا ميرضنيش بس انتي عارفه اني مينفعش اتصرف من ورا ولو عرف هيزعل مني اتكلمت بسرعه_هو مش هيعرف وانا إن شاءالله هرجعلك الفلوس دي بعد يومين على طول بس والنبي يا اختي ما تقوليله اتنهدت_لا إله إلا الله من عيوني هجبهملك قامت حضنتها وباستها_ربنا يخليكي يا حبيبتي ويخليلك احمد وتفرحي بيه يارب “قامت جابت الفلوس وعطتهالها وهي خدتها ومشيت وقفلت سما الباب وام يمنى ضحكت بخبث _قال خايفه يزعل قال انا هوريكي إن ما خربت عليكي ونكدت عليكي بجوزك وابنك اللي فرحانه بيه ده !
#ايمان_صالح عند رؤى “بعد ما قفلت الموبيل طلعت بره وقعدت مع ساره وانا متضايقه بصتلي وضحكت _نفسي في مره اشوفك بتضحكي لله بس اتكلمت بضيق_يا ستي واحد بارد من المدينه اللي جنبنا بتاعت الولاد لقيته خبط الشباك بحاجه طلعت اشوف مين لقيته بيغمزلي وبيضحك قال إيه عايز يتعرف بصتلي بذهول وغمزتلي _طيب ما تتعرفي عليه ونلبس بعداها سواريه _ياستي اتنيلي ده واد تنح _ياستي اديله فرصه _فرصه ايه وزفت ايه بقولك عملتي ايه في المحاضره الفاتت
ضحكت_ولا حاجه _يا بنتي مش حضرتيها _على أساس بفهم يعني مفهمتش اي حاجه خالص _الله يخربيتك هتسقطينا “خبطها ودخلت مسكت الكتاب وقعدت أحاول اذاكر حاجه انا مش فاهمه اي حاجه طالما محضرتش المحاضره يبقى مش هفهم اي حاجه ،بعد شويه لقيت علي بيرن عليا رديت بسرعه _ايه يا رؤى انتي قاعده على الزرار ولا ايه _تعرف ان دمك تقيل _على فكره بقى كلهم بيقولوا اني دمي خفيف _بيكذبوا عليك _لا انتي اللي منفسنا مني عشان كده مش معترفه اني دمي خفيف
_لا انت فعلا دمك تقيل المهم متصل بيا ليه _لا انا كنت هقولك حاجه مهمه بس خلاص طالما دمي تقيل كده _مش عايزه حاجه مهمه منك _متأكده ؟ _اممم _ولا حتى تعرفي اني جبتلك ملزمه ملخصه المحاضره الفاتت اتكلمت بلهفه _احلف بالله