طليق اختى بقلم اسراء ابراهيم

  قامت شرين وهي بتقول بهزار وبتبص لعزة بغمزة : جرا ايه يا زوزو انتي عايزة تاخدي مكاني ولا ايه ،، قفص جوافة انا يعني ،، مش عاجباكي   ضحكت عزة وقالت بهزار هي كمان وهي بتبص لشرين : منا قولت احفزك واخليكي تقومي تجري ،، يلا روحي بقي واعمليلي معاكي شاي   ضيقت شرين عنيها وردت بغيظ وهي بتبص لعزة : اهااااا، قولي كدة بقي ،، انتي كنت عاملالي كمين وطمعانة في كوباية شاي ،، ماشي يا زوزو مردودة

  قالت شرين اللي قالته وباست عزة من خدها وسابتها وجريت عالمطبخ وكان متابعها عمرو بابتسامة وهو مش عارف يفسر احساسه بس هو فرحان بوجودها في حياته ،، هو ده اللي هو متأكد منه ،، انتبه عمرو لصوت عزة وهي بتقول بقصد : بنت حلال شرين ،، وتستاهل كل خير ،، اهي دي الزوجة اللي بجد يابني ،، هي دي اللي تستاهل انك تفتح قلبك عشانها   اتنهد عمرو وقعد جمب عزة وهو بيرمي مفاتيحه عالترابيزة :

انتي قصدك ايه يا ام عمرو ،، قولي عايزة تقولي ايه علطول   عزة بصت لعمرو بقصد وقالتله بجدية : انت عارف انا قصدي ايه يا عمرو ،، صوابعك مش زي بعضيها ،، ومش عيب لما نحب تاني ونفتح قلبنا تاني لحد يستاهل ،، ادي شرين فرصة وحاول تقرب منها ،، البت غلبانة وتستاهل كل خير   كشر عمرو وهو بينفخ بضيق ورد علي عزة بسخرية :

وانتي ايه اللي مخليكي متأكدة انها ممكن تضحي باحساسها بالامومة عشاني وايه اللي يجبرها انها تكمل معايا علي عيبي حتي لو كنت ميال ليها ،، واضمن منين انها مترجعش تندم وتسيبني وتمشي ،، الله يخليكي يا امي بلاش نتكلم في الموضوع ده تاني   قال عمرو اخر كلامه وهو بيقوم يقف وهنا لحقته عزة وهي بتقوله بسرعة : متحكمش عليها وانت متعرفش ايه رد فعلها يا عمرو،، شرين مش سها يابني ،، صدقني بتفرق ،، فمتظلمش البنية بسوء النية

  اتنهد عمرو وبعدين دخل اوضته يغير هدومه وهو بيفكر في كلام امه وخرج بعد شوية ولقي نفسه بيروح ناحية المطبخ ووقف علي باب المطبخ وهو بيبص علي شرين وهي مشغولة في تحضير الاكل فقاطعها بصوته وهو بيقولها بابتسامة : لسة كتير ولا ايه ،، احسن،انا واقع   ردت شرين بسرعة وهي بترص الاطباق علي الصنية : حالا والله انا اسفة معلش بس كنت بسخنهولك عشان متاكلوش بارد   قرب عمرو من شرين واتفاجأت بيه بيمسك ايديها وبيقربها من شفايفه وبيبو*سها وبعدين بص في عيونها وقالها :

تسلم ايديكي يا حبيبتي   شرين قلبها دق وحست برعشة في جس*مها واستغربت اللي عمرو عمله وقاله في نفس الوقت واتوترت وردت عليه بخجل وهي بتسحب ايديها : الاكل جاهز ،، شيل انت بقي الصنية عشان تقيلة عليا   عمرو ابتسم علي توترها وكان لسة هيتكلم بس اتفاجأ بجرس الباب وشوية وسمعو هما الاتنين صوت راجل غريب واول ما سمعته شرين قالت بسرعة : يا نهاري ،، ده صوت رامي

  ملامح عمرو اتغيرت وكشر ومن غير ما يرد علي شرين وسابها وكان هيخرج بس شرين لحقته وهي بتمسكه من ايديه فلف تاني وبصلها فقالتله بلهفة : ارجوك متتخا*نقش معاه عشان خاطري   عمرو بص لشرين بغضب وقالها بغيرة وهو بيشد ايديها منه : اايه ،، خايفة عليه مني ولا ايه   ىدت شرين بخوف والدموع في عنيها : انا خايفة عليك انت منه ،، انا مبقاش ليا غيرك  

عمرو ملامحه لانت واتنهد براحة وقرب من شرين وضم وشها بين ايديه وقالها بحنية وهو بيبص في عنيها: مش عايزك تخافي طول ما انا جمبك ماشي ؟   حركت شرين راسها بتفهم فكمل عمرو كلامه وقالها بتحذير : تحطي طرحة علي شعرك ماشي ،، اياكي تطلعي بشعرك كدة   قال عمرو كلامه وخرج وشرين متابعاه بقلق وشالت طرحتها من علي كتفها وغطت شعرها وخرجت وراه واتفاجأت بامها ومعاها رامي اللي كان بيتكلم مع عمرو واول ما شافها بصلها بشوق جنن عمرو وخلاه اتعصب وقال بحد*ة لرامي :

عنيك في الارض ومتترفعش في مراتي ،، انت فاهم ؟   رامي بص لعمرو بحد*ة وقاله وهو بيقف وكأنه كان جاي وناوي علي الش*ر : مراتك دي كانت ليا وانت اللي خدتها مني ولولا سفري انا كان زماني لحقتها قبل ما تبقي مراتك   عمرو وشه احمر من الغضب و كان هيه*جم علي رامي بعد اللي قاله بس لحقته شرين وهي بتمسك فيه جامد وفي نفس الوقت اتكلمت عزة بحد*ة وهي بتبص لسيدة ام شرين :

عيب اللي ابن اختك بيقوله ده يا سيدة ،، البت اتجوزت وخلاص اللي حصل حصل   ردت سيدة بضيق وهي بتبص لشرين اللي كانت منهارة من العياط والخوف : احنا كنا جاين نبارك يا ام عمرو بس ابنك اللي عايز مشاكل وبيتلكك وبعدين انا كدة كدة مطمنة انها مش هتكمل عشان عارفة انها مش هترضي بعيب ابنك هي بس وافقت عليه عشان تهرب من جوازها من ابن خالها   عمرو ملامحه بهتت وقبل ما يتكلم كانت ردت عليها شرين بثقة :

وانا بقولك يا ماما ان جوازي من عمرو كان بالنسبالي احسن حاجة حصلتلي في حياتي ،، واللي حضرتك متعرفيهوش اني بحب عمرو وعشان كدة وافقت اتجوزه،، مش عشان اهرب زي ما قولتي وانتي اكتر واحدة عارفة ان كان ممكن اعمل اي حاجة تانية عشان امنع جوازي من ابن اختك اللي انتي عارفة برضه ومتأكدة انه مينفعنيش،، بس كنتي عايزة تراضي اختك علي حسابي انا ،، حساب بنتك ،، ودلوقتي ياريت متخ*ربيش عليا لاني محبش اشوفك في الصورة دي

  بصتلها سيدة بغضب ومشيت ورامي رمي نظرة اخيرة عليها فاتجاهلته شرين ومسكت ايد عمرو ووقتها رامي اخد بعضه ومشي واتكلمت عزة بفرحة وقالت لشرين بفخر : والله انا كان عندي حق لما قولت انك بنت حلال وتستاهلي كل خير   شرين اكتفت انها ترد علي عزة بابتسامة باهتة وبصت لعمرو وهي بتسحب ايديها منه وقالتله بحزن : انا اسفة يا عمرو علي كل اللي حصل واللي سمعته بسببي  

قالت كدة وسابتهم ودخلت اوضتها وقعدت عالسرير وهي بتعيط وصعبان عليها اللي حصل من امها وانها توصل بيها انها تجيبلها ابن خالتها لحد بيت جوزها عشان تجر*حها بالشكل ده ،،   انتبهت شرين لصوت عمرو اللي كان واقف علي باب القوضة وبيقولها بهدوء: ممكن اعرف انتي بتعيطي ليه دلوقتي ،، عشان ندمانة علي الكلام االي قولتيه لامك بخصوصي انا وانتي مش كدة ؟   ردت شرين بلهفة وهي بتلف وشها وبتبص لعمرو بحزن :

ابدا والله ،، انا بس صعبان عليا انها تعمل كل ده ومتراعيش اني بنتها ،، اوقات بحس انها بتكر*هني   عمرو قرب من شرين ووقف قدامها وهو بيقولها بهدوء: مفيش ام بتكر*ه عيالها ،، هي بس كانت مختلفة معاكي في الرأي وشايفة انك كتير عليا وده اللي مخليها مش شايفة اي حاجة تانية،، بس اعتقد ان الكلام اللي قولتيهولها هيخليها تعيد تفكير في الموضوع   شرين افتكرت كلامها اللي قالته وبصت في الارض بتوتر فرفع عمرو وشها ليه تاني وبص في عيونها وقالها بتوهان :

ممكن اعرف الكلام اللي قولتيه ده كان حقيقي ولا بس قولتي كدة عشان مامتك وشكلي قدامها   شرين كان باصة في عيون عمرو وقالتله بحزن: هتفرق معاك لو عرفت ؟   عمرو ابتسم وقرب منها اكتر وهو بيقول ثقة : طبعا ،، وقتها كل حاجة هتختلف ،، بس جاوبيني يا شرين وريحي قلبي   شرين كانت خايفة ومترددة بس استجمعت شجاعتها وجاوبته بصوت ضعيف : ايوة يا عمرو صح ،، بس انا والله مش

  قاطعها عمرو وهو بيحط ايديه علي شفاي*فها وقالها بتردد وقلق كان باين في عيونه : بحبك يا شرين بس خايف تندمي في يوم من الايام ،، خايف يجي يوم وتجر*حيني وتسيبيني وتمشي   ردت شرين بثقة وحب شافها عمرو في عنيها : عمري ما هندم يا عمرو،، اوعدك اني عمري ما هتخلي عنك وافضل جمبك عمري كله   عمرو ابتسم بعشق وهو مركز في تفاصيلها وهي بتتكلم وقالها بهمس وهو بيضمها ليه :

بحبك اوي ومكنتش متخيل اني هتعلق بيكي اوي كدة   ابتسمت شرين وغمضت عنيها براحة بعد ما سمعت كلامه واتأكدت من مشاعره وقالته بحب : وانا كمان بحبك يا عمرو   تمت بقلمي اسراء ابراهيم   رأيكم يهمني جداااا واستنوني في اسكربت جديد هيعجبكم اوي باذن الله