زوجه مغتربه بقلم نسمه مالك ج١

…كان نفسى ابدأ حكايتى بأنى صحيت الصبح زى معظم ابطال الروايات على زقزقه العصافير.. بس انا بنام عين مغمضه وعين مفتحه وطبعا صاحب الفضل حماتي وجوزي لأنى تعبت اوى لما اتجوزت وجوزى قالهالى بصراحه انسى الدلع اللى شوفتيه فى حياتك💔 انا متجوزه من سنه.. خلصت اولى كليه بالعافيه بسبب جوازى وحملى طبعا.. والحمد لله ربنا رزقنى بتيام 3شهور ربنا يحميه ويهديه يااااارب.. ومن ساعتها للأسف مروحتش الكليه تانى.. .لما اتجوزت اتصدمت بطبع جوزى وأهله اللى مكنش باين ابدا فى الخطوبه..

رغم انى اتخطبت سنتين بس مروحتش فيهم عند اهل خطيبى غير مرتين بالعدد.. كل سنه مره فى عيد الأم وكان بيبقى معايا ماما وبابا وهما كانو بيظهرو طبعهم الحلو بس.. لكن اكتشفت انهم عايله ابعد ما يكون عن بعض مافيش حوار بنهم.. صمت رهيب كل واحد فى ملكوته وكل واحد فى اوضته.. حتى حمايا وحماتى كل واحد ليه اوضه.. وطبعا انا كنت مزهوله لحد بعد جوازى بكام شهر وجوزى مستحملنيش جنبه تانى وبقى هو فى اوضه وانا فى اوضه طبعه واللى اتعود عليه..

ودى حاجه كانت بتجرحنى اوى وكتير كنت بنام معيطه علشان عايزه انام فى حضنه وهو مش راضى.. ويقولى عندى شغل اصبح ومش عارف انام وانتى جنبى. كنت بتخانق معاه كتير بسبب كده بس فى الأخر استسلمت وسكت لحد ما خلفت نور حياتى ابنى.. وبقيت اخده فى حضنى وانام لكن الحقيقه؟؟ ان انا اللى بنام فى حضنه.. . ادهم جوزى دا بقى ربنا يهديه.. رغم انه كان بيحبنى وبيمو*ت فيا واحنا مخطوبين وعمل المستحيل علشان يتجوزنى وانا كنت بعمله زى الزفت ومطلعه عينه..

فلما اتجوزنى طلع كل عمايلى معاه فى الخطوبه على دماغى ومازال.. مش عارفه بطل يحبنى ولا ايه اللى حصله.. بس اللى اعرفه انى انا حببته بجنون وكنت شيله كل حبى لبعد الجواز بس هو كأنه اتبدل او ظهر على حقيقته.. وأدينى مستحمله كل اللى بيعمله على امل انه يرجع تانى .صاحيه من امبارح كالعاده بتحايل على ابنى يناااام.. الساعه داخله على 8 وابوه زمانه جاى من الشغل شغال محاسب فى شركه كهربه..

والاسبوع دا بيروح بليل ويجى الصبح.. عايزه انام قبل مايجى اصله مخصمنى بقاله اسبوع اه اسبوع متستغربوش.. انا كنت بستغرب كده زيكم فى الأول بس اتعودت مع انى معرفش سبب الخصام ولا اعرف انا عملت ايه بس اللى اعرفه انه مبيكلمنيش ولا بيبص فى وشى حتى…. ..الحمد لله ابو تيام شرف واكيد زى العاده بيدخل مكشر وبوزه عشرين شبر.. خد من ايدى تيام من غير ولا كلمه ودخل بيه الاوضه اللى بينام فيها وسبنى كالعاده لوحدى..

قاعده بضحك على صوت لعب ابنى وضحكه مع ابوه.. بس قلبى وجعنى اوى.. معرفش انا عملت ايه علشان يعاملنى كده.. فضلت اعيط كتير بصمت.. قولت لنفسى وحدى الله وقومى ابدأى انتى بالكلام.. مسحت دموعى وقومت روحتله الاوضه قعدت جنبهم على السرير كان هو غير هدومه فضلت بصاله كتير يمكن يرفع عينه ويبصلى حتى.. فضل يلاعب تيام وكأنى مش موجوده.. وبعد شويه من غير ما يرفع عينه و يبصلى او حتى يلمح وشى وبعد شويه لقيته دخل نام على السرير وادانى ظهره وقالى :اطفى النور وانتى خارجه..

صعبت عليا نفسى اوى وثوانى كانت دموعى غرقت وشى.. حاولت أخلى صوتى طبيعى وقولته :طيب اعملك حاجه تاكلها قبل ماتنام.. انا مكلتش حاجه من امبارح قوم ناكل سوا يا ادهم. أدهم:بزعيق.. ومن غير ما يبصلى برضو.. سمعتى قولت ايه اطفى النور واخرجى عايز اتخمد.. مريم:صوت عياطى بدأ يعلى..لا مش هخرج انا عايزه اعرف انا عملتلك ايه علشان تعملنى كده قوم وكلمنى قولى غلطت فى ايه علشان تخصمنى بقالك اسبوع.. أدهم:ببرود واستفزاز.خلصتى؟؟ يله بقى على بره..

مريم:خت نفس واستغفرت فى سرى وحاولت اهدى علشان ابنى اللى على ايدى واتكلمت بعياط يحنن قلب الحجر… طيب يا ادهم لو انا زعلتك فى حاجه من غير ما اقصد حقك عليا.. بقلم نسمه مالك… ادهم:قام اتعدل وطفى النور ورجع نام على السرير وحط المخده على دماغه.. فى اللحظه دى بقيت مش عارفه اتحكم فى غضبى.. خرجت من الاوضه بنهيار حطيط ابنى فى الاوضه اللى انا بنام فيها ورجعتلو وبكل غضب شلت المخده وقولتله..

قوم هنا كلمنى زى ما بكلمك انت مفكرنى الخدامه بتاعتك ولا ايه… قعدت بتعب على السرير وبعيط جامد.. دا حتى لو خدامه هتكلمها وتعملها احسن من كده.. وهو ولا كأنى بكلمه ولا كأنى موجوده فضلت اشد فيه واحاول امسك ايده اللى بيشدها منى بعنف لحد ما قام اخيرا ومن وسط كل دموعى الا انى فرحت وضحكت كمان انه قام اخيرا وهنتكلم مع بعض.. قعدت قصاده ومسكت وشه بين ايدى وبتكلم بدموع مغرقه وشى…

بصلى يا أدهم قولى ايه اللى حصل بنا.. ايه وصلنا لكده.. أدهم:من غير ما يبصلى خالص بعد ايدى عن وشه واتكلم بزهق وشويه قرف.. عايز اتزفت انام اطلعى بره بقى.. وكأنه بيضغط على جرح قلبى وهو بينزف وبيتعمد يفتحه اكتر.. لقتنى بعيط بصراخ ومسكت فى ياقه الترنج اللى لابسه وفضلت اهز فيه وانا بقوله.. مريم:انت بتعمل معايا كده ليييييه حرام عليك انا عملتلك ايه لكل دا انا كأنى مش متجوزه قولى انا غلطت معاك فى ايه علشان تعاملنى كده..

وقبل ما أكمل كلامى كان ض*ربني قلم على وشى بكل قوته ومسكنى من دراعى وقام وشدنى رمانى قدام باب الأوضه وقفل الباب فى وشى… فضلت شويه مش مستوعبه اللى حصل.. انا عمرى ما اض*ربت من اهلى.. ومش هكدب وأقول ان دى اول مره أدهم يضر*بنى.. لا هو ض*ربنى قبل كده.. مرتين فاكرهم كويس اوى وعمرى ما نسيتهم.. قومت روحت لابنى اللى بيعيط.. حبيبى تقريبا حاسس بيا.. شلته وانهارت أكتر وأكتر فى عياطى لحد ما حسيت ان خلاص نفسى بينقطع وجسمى بدأ يتلج ودوخت جامد اوى.. حطيت ابنى على السرير وهو ياحبيبى مفتور من العياط.. وابتديت ارجع جامد..

والدوخه تتملك منى أكتر.. فضلت شويه أرجع وابنى على صرعه واحده وانا مش قادره اشيله خالص.. لحد ما سمعت صوت جوزى بعد ما فتح الباب وبيتكلم وهو جاى للاوضه عندى.. ادهم :انتى يا هانم يا عديمه الدم ياللى سيبه ابنك ينفطر من العياط.. قطع كلامه وجرى عليا وانا واقعه فى الأرض وأخيرا سمعته بينادينى بأسمى اللى بقالو فتره مبينتقهوش.. مريم مالك؟؟!!.. سندنى ودخلنى الحمام غسلى وشى وانا مش مبطله عياط وابنى حبيبى كمان مفتور ياقلبى..

اتملك منى الزعل وبقيت بعيط بنهيار صعبانه عليا نفسى وكل اللى جوزى بيعمله معايا من غير ما اعمله اى حاجه.. قعدنى على السرير اللى كان بتاعنا انا وهو فى اول جوازنا.. وهو محتاس بينى وبين ابنه.. شال تيام اللى مش راضى يبطل عياط واتصل بمامته قالها… ادهم:تعالى يا ماما مريم تعبانه اوى.. قفل معاها وعملى ميه بسكر وبدأت اهدى شويه ووقف قصادى شايل تيام لحد ما جرس الباب رن وطبعا دى كانت حماتى..

حط تيام جنبى..وراح فتحلها.. واول ما فتح دخلت هى تدور عليا.. بانت على ملامحها الصدمه لما لقتنى فى اوضه النوم.. ما هى عارفه انه بينام لوحده وانا بنام فى اوضه الاطفال.. دخلتلى وخطفت ابنى من جنبى وهو لسه بيزن وقالتلى.. شاديه:عاملتى ايه فى الواد.. ادهم:دى مريم اللى تعبت يا ماما.. شاديه:بتريقه..تعبت اه!! وتعبتى من ايه ان شاء الله؟؟ جعانه مش لقيه تاكلى؟؟ ولا عايزه تاكلى كل يوم لحمه ولا ايه حكايتك بالظبط…

قربت منى وخبطتنى على كتفى بغل وكملت.. عيشى وارضى ياختى متشمتيش فيكى حد.. مريم:بتعب وزهول..انتى بتقولى ايه يا ماما لحمه ايه واكل ايه انا تعبت ودوخت شويه.. شاديه:وايه بقى اللى تعبك ودوخك اكيد من كتر نومك بالنهار.. وتفضلى مقفله الشقه ولا بيدخلها شمس ولا بتهويها لازم تتعبى .. بصتلى بقرف وكملت بتحذير.. اتعدلى كده وعيشى وخلى بالك من بيتك وابنك وجوزك اللى شقيان دا… خلصت كلامها وانا اتفجأت بجوزى اللى خد هدومه ودخل لبس فى الحمام وجه قالى..

ادهم:قومى البسى ولبسى الواد علشان اوديكى عند أهلك؟؟؟؟؟ رأيكم وتوقعتكم اي ؟ لو لقيت التفاعل حلو هنزل بارت تاني حالا 🍂🍂 #البارت_الاول حكايات ادهم ومريمالبارت التانى💔 مريم:بستغراب ودهشه..انت قولت ايه يا ادهم؟؟!! ادهم:بزهق وزعيق..قولت قومى البسى ولبسى الواد علشان اوديكى عند اهلك سمعتى كده؟ مريم:بضحكه وجع..وانت من امتى بتودينى ما انا من ساعه ما اتجوزتك وانا بروح وبجى لوحدى… كملت بتجاهل لمقصد كلامه… عموما شكرا انا مش هروح عند ماما انهارده..

ادهم:بغضب..قومى يامريم انا على أخرى.. انا قولت هتروحى عند اهلك يعنى هتروحى.. مريم:قومت من مكانى واتحركت ناحيه ابنى اللى حماتى شيلاه وبتبصلى ببسمه شماته معرفش ايه سببها.. خت ابنى من على ايديها واتكلمت وانا خرجه من الاوضه… انا مش هروح فى حته يا ادهم امى لسه قايمه من دور تعب جامد ولما تشوفنى كده هتحس ان فيا حاجه وتتعب زياده.. ادهم:بنرفزه ونفاذ صبر..والله العظيم ما انتى بايته فيها يامريم.. مريم:كميه وجع فى قلبى ربى وحده اللى عالم بيها..

رديت بكل هدوء عكس الانفجار اللى جوايا.. من امتى وانت بتسبنى ابات بره بتنا؟؟!! بصيت لمامته اللى باين على وشها وابتسامتها الشماته اكتر.. ما تقولى حاجه يا ماما.. شاديه:هقول ايه يعنى قومى البسى ومشى حلفان جوزك وابقى تعالى بكره… مريم:ببتسامه وجع..دا اللى قدرتى عليه تقوليه اروح عند اهلى وابنك ض*ربنى بالشكل دا وانا كمان اللى اجى بكره؟؟ بدل ما تقولى انا هخدها عندى يابنى على ما النفوس تهدى.. بس هتقولى كده ازاى ما انا مش بنتك..

بصيت لجوزى.. انا هروح عند اهلى ياادهم بس ليا طلب واحد عندك.. متقولش اللى حصل بنا لحد من اهلى علشان خاطر تعب أمى..خ ت نفس وكملت.. وبأمر الله انا هجى بكره.. لبست انا وابنى.. وخت غيارات تكفى يوم واحد.. وعملت ميكب خفيف ادارى بيه القلم اللى خته.. وصلنى أدهم لحد البيت وطلع معايا كمان ودا مش بعادته ابدا.. من ساعه ما اتجوزنى وهو مبقاش يجى عند اهلى خااالص.. عكس الخطوبه كان بيجى صبح وليل وبيبقى لازق مش عايز يمشى..

سبحان مغير الأحوال.. وقفت قدام بيت ابويا ورسمت احلى ابتسامه على وشى وخبطت خبطتى المعهوده.. ماما يا ماما ماما ياماما ياماما ماما يا ماما ماما.. سمعت صوت فرحه أمى بوصولى.. جيهان:بنوتى حبيبه قلبى.. حضنتى كتييير وباستنى انا وابنى كتييير.. كنت نفسى انفجر من العياط فى حضنها واقولها انا اد ايه زعلانه وتعبانه.. بس مقدرتش خوفى عليها منعنى… مريم:واحشتينى يا قلب بنوتك… جيهان:تعالى ادخلى واقفه بره كده ليه؟؟! مريم:أدهومى معايا ياست الكل واقف على السلم ادخلى البسى الخمار علشان اندهلو…

جيهان:وهى بتلبس الخمار..اتفضل يا ادهم ياابنى دا نورك هل علينا اخيرا شوفناك.. ادهم:ببتسامه..دا نورك انتى يا ماما عامله ايه وصحتك عامله ايه دلوقتى.. جيهان:الف حمد وشكر لله يابنى خفيت لما شفتكم ربنا ما يحرمنى من دخلتكم عليا… بت يامريم هاتى الواد تيمو مدام نايم انيمه فى سريره.. مريم:اه يا ماما خدى والنبى دا معاد نومنا اصلا الاستاذ صاحى من امبارح وبينام الساعه 10اصبح.. ادهم:بهزار..واد سهيييير زى ابوه.. مريم:بوجع حاولت اخفاءه.هههههههههه فعلا..

خدت امى منى تيام ودخلت الاوضه بصيت لجوزى وقولتله.. قوم امشى من قدامى انا ماسكه نفسى بالعافيه لحظه كمان وهمسك فى زماره رقبتك واض*ربك القلم اللى ض*ربتهولى.. ادهم:بهزار واستفزاز..بتتشطرى عليا فى بيت اهلك.. متنسيش هترجعيلى بكره وساعتها هنفخك.. خرجت امى لقتنا بنبص لبعض بشرار من عنينا.. جيهان:الله مالكم ياولاد بتبصو لبعض زى الديوك كده ليه اوعى تكونو متخنقين؟؟ مريم:حضنتها جامد وببتسامه..ربنا ما يجيب خناق ياست الكل.. جيهان:بطيبه ولانها بتصدقنى فى كل حاجه..

طيب ياحبيبتى ربنا يهدى سركم.. انا هحضرلكم الفطار تاكلى وتدخلى تنامى شويه جنب ابنك.. أدهم:يقف ويستعد للذهاب..طيب استأذن انا بقى وسلمى على عمى انا عارف انه بيروح الشغل بدرى اشوفه مره تانيه ان شاء الله.. جيهان:اقعد يابنى كل لقمه مع مراتك الاول مستعجل على ايه؟؟ مريم:سبيه ياماما أدهم مش بياكل اصبح كده.. اصله جاى من الشغل اصبح وعايز ينام هو كمان.. جيهان:الله يعينك ويقويك يابنى.. ادهم:يارب يسمع منك يا ماما يله سلام انا..

مريم لو احتاجتى حاجه كلمينى.. مريم:وهى تصله للباب وبنظره وجع.. لو احتجت حاجه لا متقلقش روح نام انت… خرج ومشى ناحيه السلم وقبل ما ينزل ناديت عليه بصوت هامس… أدهم؟؟ التفت من غير ما يرفع عينه فى عينى كالعاده… استنى بوس تيام قبل ما تمشى.. أدهم:خليه نايم متقلقهوش وكده كده انتو جاين بكره.. مريم:بأصرار..لا معلش مش هيجرى حاجه برضو خدو فى حضنك وبوسو.. يمكن يفكرك تحافظ على اللى بنا.. دخلت جبت ابنى وفعلا باسه ومشى وسبنى بمثل دور الزوجه السعيده قدام امى…

جيهان:تعالى يا مريومه عملتلك الطعميه مقرمشه زى ما بتحبيها تعالى يا حبيبتى كلى الاول وبعدين نامى.. مريم:حبيبتى يا مامتى تسلم ايدك… قعدت أكل وانا بغصب على نفسى وسرحت فى حنيه امى وهى قعده تقشرلى البيض وتقطعلى خصار وفاكهه وبتأكلنى فى بوقى كمان وبطبطب على ضهرى.. وبتتكلم بكل الحنان اللى فى الدنيا.. جيهان:كلى يا ضنايا بألف هنا وشفا.. مريم:بحب شديد..حبيتى متحرمش منك ومن رضاكى وحنيتك عليا ابدا.. جيهان:ولا انحرم منك يا قلب ونن عين أمك..

مالك يا مريم فيكى ايه قلبى بيقولى انك متخانقه مع جوزك صح.. مريم:بهزار..فعلا انا متخانقه معاه وض*ربته حته علقه وقولتله على بيت اهلك هههههه.. جيهان:ههههه يابت يا شقيه انتى.. على امك برضو وحياه امك تلاقيه هو اللى عمل فيكى كده واتنى بتدارى عليه بنتى تربيتى وعرفاكى وحفظاكى.. مريم:ببتسامه بتخفى بيها دموعها اللى هتخونها وتنزل.. فاكره يا أمى لما كنتى تتخانقى مع بابا وافضل انا اقولك انتى ازاى تسمحيلو يزعقلك كده وأزاى يكلمك بالاسلوب دا..

رغم ان بابا حبيبى معلش يعنى يا ماما كان بيزعق على حق.. بس عمرى ما شوفته بيمد ايدو عليكى… وانا افضل اقومك عليه علشان تقولى لتيته وجدو وتقولى كمان لأخواتك… قربت وحضنتها..