#ماوراء_الجبال🖤الجزء 2 فضلت ماسكه في كف ايده وبنجري وانا مرعوبه وهو كل شويه يتلفت يبص وراه ودا بيوترني اكتر لحد ماوصلنا لـ بيت متكون من دور واحد الباب خشب بلون البني ،فتح الباب ودخلنا كان موجود ترابيزه من الخشب القديم وكراسي كمان من الخشب ،البيت في الوان وانتيكات خشب متعلقه ع الجدران وفي كل حته ورد.. -مين دي يافارس!!! -فوقت من سرحاني فالبيت ع صوت واحده تقريبا عمرها من عمر ماما او اكبر بعيون متكحله بكحل اسود وبشعر اسود طويل عاملاه ضفيرتين وبعبايه مرسومه باللون الازرق السماوي!
فارس بصوت واطي جدا: دي جايه من العالم التاني مهره:يادي البلاوي وجايبها هنا ليه انت مش عارف الملكه او حراسها لو عرفوا هيعملوا فينا اي فارس:يامهره ياحبيبتي محدش هيعرف اهم حاجه نلحق نرجعها! امل بابتسامه:الله هو انتي اسمك مهره دا اسم حلو اوي مهره:الحق يافارس دي سايبه مصيبتها ومركزه في اسمي امل بدموع:انا..انا مش فااهمه حاجه والله ياطنط ومين دول اللي هيخلصوا عليا وليه مهره:تنط!! اسمي الست مهره يااحبيبتي فارس:خلاص يامهره سبيها وانا هقعد اتكلم معاها وانتي روحي جيبلها حاجه تاكلها
امل بدموع:هو انا ممكن معرفش ارجع واموت هنا ياعمو فارس:هو انتي عندك كام سنه امل:عندي 16 سنه! فارس:وانا عندي 20 ياريت تبطلي تقوليلي ياعمو دي وتاني حاجه اهدي وبطلي عياط عشان تفهمي كل حاجه امل :حاضر فارس:بصي عشان تفهمي احنا هنا في مملكه النهار ومتقسمين لـ شعبتين شعبه الشمال اللي احنا فيها دي وشعبه الجنوب،وفي مملكه تانيه اسمها مملكه الليل ودي متقسمه لشعبتين شعبه الشرق وشعبه الغرب امل:طب وليه اسمها ليل ونهار
فارس :انتي شايفه اننا في وقت اي دلوقتي واي اللي طالع امل:احنا في وقت النهار والشمس اللي طالعه..شهقت يعني..يعني انتي عندكم نهار بس وهما عندهم ليل بس !!! فارس:بالظبط كدا والسبب في دا واحد من العالم بتاعكم امل:عالم بتاعنا ازاي!
فارس بحزن:المملكتين كانوا متحدين ،جه واحد من العالم بتاعكم كان واحد مثقف وعارف في الطب وفي كل حاجه ،طبعا الملكتين لما عرفوا استدعوا عشان يستفيدوا من معرفته لكن للاسف مع الوقت الاتنين وقعوا في حبه..ولما هو ساب هنا ومشي كل واحده منهم حملت التانيه انها السبب في انه يمشي فـ انفصلوا وظهر بينا الثلاث جبال وبلغونا امر ان اي حد من العاالم التاني هيجي هنا يتقتل.. امل:طب وانتوا سبتوه يمشي ليه يعني ليه مجبتهوش هنا تاني عشان يحل المشكله دي
فارس:احنا منقدرش نروح العالم بتاعكم امل:طب وانتوا هتفضلوا عايشين كدا فارس:الاهم من دا ان الاقي طريقه ارجعك بيها امل:وديني عند نفس المكان اللي كنت عنده وادخل من مكان ماجيت فارس:المكاندا بوابه انك تدخلي لكن انك تخرجي دا صعب امل:طب الناس اللي كانت بتيجي هنا قبلي خرجوا ازاي فارس:محدش جه غير الراجل العارف اللي قولتلك عليه ومحدش يعرف هو خرج من هنا ازاي امل :يعني اي مش هعرف اخرج واموت هنااا!!!! يارتني ماقريت الكتاب اللي كان في الكلام الغريب دا
فارس:كتاب اي دا امل بدموع:كتاب كان وسط كتب بابا كان مكتوب فيه معلومات عن العالم بتاعكم و.. مهره:فاارس ياافارس فارس:نعم يامهره مهره:خد يابني خليها تاكل لحد مانشوف هنعمل اي فالمشكله دي امل:هو انت ليه بتقولها يامهره مش ياماما فارس:فضولك لكل حاجه دا هو السبب في اللي انتي في دا دلوقتي
كنت واقفه في الشباك ببص ع المكان اللي بطريقه او تانيه بقيت فيه..كان كل الناس لابسه زي لبس فارس والشمس طالعه مش بتغيب،ناس بسيطه كل واحد منهم بيشتغل ومشغول..بصيت ع نفسي بقيت اشبهلهم بعد مامهره لابستني عبايه صحيح كانت اطول مني واكبر بكتير لكنها حاول تخليها ع مقاسي وكحلت عيوني بالكحل الاسود وعملت شعري زي شعرها مهره:هتفضلي واقفه عندك كتير امل:هو فارس هيتاخر برا مهره:ع مايخلص شغل ويحاول يوصل لحد يخلصك من مشكلتك دي
امل:هو فارس بيشتغل اي مهره:بيشتغل في الزراعه فضلت واقفه اراقب الناس من ورا الشباك وبالي بيدور في كل اللي حصل بين وقت قليل بقيت في عالم تاني ووسط ناس تانيه ولوحدي ومهدده بالقتل..ضحكت انا اللي اقصي طموحي ان اخلص مذاكرتي واقعد اتفرج ع الكرتون اللي بحبه لاقيت الباب بيخبط ..وفارس بيدخل في ايده واحد تقريبا سنه اكبر من سنه فارس بشويه وملامحه تشبهه ملامح فارس..بلون بشرتهم الاسمر الخفيف وبغمازه الخد اللي تقريبا عندهم كلهم ستات ورجاله وملامح وشهم اللي منحوته وبعيونهم اللي بلون العسل
فارس:هي دي ياماهر اللي قولتلك عليها ماهر:انتي كنتي بتقولي انك وصلتي هنا عن طريق كتاب صح فارس:متخافيش دا ماهر صحبي وهو بيحب القرايه وبيقرأ الكتب اللي في المكتبه عندنا وعارف حاجات كتير امل بتوتر:اه..اه كان كتاب وسط كتب بابا ماهر:طب هاتي الكتاب امل:ماهو انا سيبت الكتاب في البيت ع المكتب ماهر باستغراب:ازاي!!!! انا قريت ان اللي بيجي هنا الكتاب اللي وصله لـ هنا بيجي معاه امل:بس..بس انا سيباه هناك فارس بسرعه:ممكن يكون وقع فالمكان اللي وقعتي فيه
ماهر:اكيد طبعا وقع هناك لازم نروح ونجيبه فارس:بس دلوقتي معاد راحه واكيد حرس الملكه بيمروا دلوقتي ماهر:لازم نوصل للكتاب ياافارس قبل مااحد تاني يوصله وهيتعرف ان في غريبه وسطنا فارس:طب يبقا يلا بينا نروح امل:طب ماانا كمان اجي معاكوا ماهر:لا طبعا انتي تخليكي هنا..اوصفيلي الكتاب دا امل:هو كتاب ضخم وجلده قديم جدا وملوش غلاف فارس:يلا بينا ياماهر بسرعه
الوقت بيفوت وهما لسه موصلوش ..انا لو رجعت وحكيت اللي حصل دا لـ اي حد اكيد هيقولوا عليا مجنونه دا اكيد طبعا انا نفسي مش مصدقه اللي بيحصل ممكن اكون بحلم..لا لا انا صاحيه ومتاكده!!! يبقا انا بتفرج ع كرتون وسرحت ..لا طبعاا انا حاسه بكل حاجه! مهره:هاا ياافارس يابني عملتوا اي اول ماسمعت اسم فاارس جربت من مكاني روحت عليهم امل:جبتوا الكتاب.. فارس:للاسف لا ماهر:في واحد قالنا ان شاف واحد بياخد الكتاب دا ولما وصفلنا مكانه روحنا بيته وعياله قاله ان تاجر وراح شعبه الجنوب لازم نستني ع مايرجع..
امل:طب خلاص يبقا كدا اطمنا ع الكتاب نستني ع مايرجع ماهر وفارس بتوتر وخوف:ماهو اصل في مشكله امل :مشكله اي!! فارس:عيد ميلاد الملكه قرب امل:طب وفيها اي …اي علاقته بالكتاب تعالي معايا وهعرفك لاقيته بيفتح باب البيت وبيشاور ع ورقه متعلقه لكن الورق بتاعها تقيل وعليظ جدا ومنحوت عليه اسامي..مهره وفارس!! امل بعدم فهم:دا معناه اي!!! ماهر:قصاد كل بيت ورقه متعلقه زي دي مكتوب عليها اسامي اللي في البيت…بيجي حرس الملكه ياخدوا اللي فالبيت وبنروح الرحب دا مكان واسع وبينادوا ع كل عيله بـ افرادها وياخدوا قمح وشعير وفاكهه كـ هديه من الملكه
فـ اكيد لما يلاقوكي مش هيلاقوا اسمك وبكدا اكيد..اكيد هيقتلوكي! يتبع.. #ماوراء_الجبال🖤الجزء3 تخيل تبقا مستني اللحظه اللي هتتقتل فيها بعد ماكان اقصي طموحاتك هتخلص مذاكرتك قبل الاكل ولا بعده!! ماهر:طب كفايه عياط بقا هنلاقي حل ياصغنونه امل بدموع وعصبيه:بطل تقولي ياصغنونه مهره بتاثر:ياحبيبتي يابنتي ربنا يصبرك وكيد مامتك زمانها قلقانه عليكي سرحت في الكلمه امي وقلقانه عليا..ياتري لاحظت اني مختفيه اصلا ولا لسه! ماهر:طب بطلي عياط وهخدك تلفي هنا فالبلد
امل بابتسامه:بجد بجد هتخليني الف واتفرج ع المكان هنا فارس بعصبيه:انت اتجننت ياماهر ماهر:وفيها اي بس فارس بغضب:فيها ان دا خطر كبير امل بعصبيه:لا مش خطر ولا حاجه انا عايزه انزل يمكن لو كان للقفل اسم كان هيبقا فارس علطول عصبي ومتوتر وبيوترني معاه وكمان بيزعقلي كتير ..
كنت ماشيه فالنص بين ماهر وفارس وحاسه اني ماشيه بين جبلين كل شويه ارفع وشي ابصلهم وانزله تاني وراقب المكان لو كان للبهجه عنوان فـ هو المكان دا الناس مبتسمه ديما وكل واحد بيشتغل الاطفال بتلعب مع بعضها ستات واقفه بتساعد الكل ورد في كل مكان والبيوت الوانها مبهجه وتفرح ونهر طويل وع ضفافه ورد كتير..لحد ماوصلنا لمكان يشبهه السوق امل:ناس بتبيع وبتشتري من قماش لـ لبس لعطور لكل حاجه
امل بانبهاار:اللله اول ما لمحته طلعت جريت عليه..كان خاتم ولكن الفص بتاعه عباره عن برعم ورده صغيره بتلمع .. امل بسعاده:شااايف يا فاارس دا حلو اووي ماهر:اه فعلا حلو اوي فارس:لا مش اوي ياماهر البياع:دا بـ تلات قطع نحاسيه فارس:انت بتعمل اي!! ماهر:هكون بعمل اي بطلع عشان ادفع فارس بعصبيه:مااهر!! انا اللي جايبها وانا اللي اتحمل مسئوليتها وطلع قطع من النحاس كبيره ولكن مختومه بختم غريب وعليها رسمه لواحده وغالبا دي الملكه..
حقيقي مش عارفه فارس ليه ديما اسلوبه جد وعصبي وعلطول بيزعق كدا بالله لو مااتلم هعيط امل:هو ليه في هنا عندكم ورد كتير ماهر بلفسفه:لان هنا ديما شمس والجو دافي وربيع ودا جو مناسب جدا للورد..فتلاقي ديما هنا اغلب زرعنا ورد امل:واو يابختكم ماهر:بتحبي الورد امل:ااه جدا ماهر:طب تعالي معايا فارس:انت اتجننت ولا اي ياماهر ماتهدي شويه وانتي ماتعقلي شويه احنا مش جايبين طفله معانا انتي هنا في مصيبه! ماهر:ياعم القفل خليك واقف مش هنتاخر
وماهر مسك كف ايدي وكان بيمشي بسرعه..ضحكت لما قال لفارس قفل..هو فعلا قفل! وقفت بانبهار قصاد المكان اللي وصلتله..ورد كتير باللون الازرق لكن اوراقه بتلمع ولون الورد بيتدرج لحد ماتوصل جواها بيبقا بلون الازرق الغامق فارس:وهو دا المكان المبهر كنت متوقعه ان فارس هيجي ..بيحسسني اني بنت اخته اللي هتوه! بصتله بانبهار وعيوني هتطلع فراشات من الحلاوه امل:بص حلوه اوي ازاي ياافارس فارس:طب يلا عشان نلحق نرجع
كنت ماشيه طول الطريق بهزر انا وماهر ونضحك..وكل شويه ابص ع فارس اللي سابقنا بخطوات الاقيه بيبص علينا من فتره للتانيه ويتلفت لحد ماعيني وقعت ع عينه…لو كان النظرات رصاص كانت نظرته اخترقتني من حدتها فعلا! رجعت من برا روحت ع اقرب مكان ونمت..كنت هلكانه من التعب! حتي فكريا كنت حاسه اني استهلكت كل طاقتي فعلا..كان اصحابي بيقولولي انتي ذكيه! انا بعد اللي انا فيه دا متاكده ان هبقا غبيه ومخي هيقف من الصدمه!
مهره:صعبانه عليا دي صغيره اوي ع البهدله دي فارس بتعب:من وقت ماشوفتها وانا بالي مرتحش مهره:هتحل مشكلتها وترجع بسرعه من غير مشاكل متقلقش فجأه ظهرت في حياتي شقلبتها،طفله لكنها مش طفله لا..مفيش طفله تشقلب كياني وحالي كدا..حاسس بالمسئوليه اتجاهها وكأنها بنتي! وهي مطنشه كل دا وبتستمع عادي! يالله كتله من الشقاوه واللماضه والفضول ظهر في حياتي فجأه..وحقيقي مش عارف اخر الشقلبه دي اي! بصتلها وهي نايمه ببرائه وابتسمت مهره:فارس يابني سرحت في اي
فارس :هااا لا ابدا يامهره روحي نامي انتي شويه مهره: حاضر وانت كمان قوم نام شويه ..! ………… مش عارفه نمت قد اي..لكن كنت مستمتعه وكأن اللي بيحصلي دا طبيعي جدا امل بابتسامه:صباح الفل يامهره فارس فين مهره باستغراب شديد:هااا..فارس بيشوف الكتاب بتاعك امل:ماشي يامهره مهره:انا يابنتي مش فهماكي واحده غيرك كان زمانها بتعيط وخايفه ولا انتي مش عايزه ترجعي وتموتي هنا امل بتفكير:صحيح انا عايزه اسالك الراجل اللي من عالم بتاعي وجه هنا والسبب في اللي حصلكم كان شكله اي والكلام دا حصل امتا
مهره:الكلام دا حصل يجي من عشر سنين،شكله اي بقا معرفش امل:طب واشمعنا دا الوحيد اللي قدر يوصل هنا مهره بصوت واطي:مش هو الوحيد في ناس وسطنا من عالمكم شهقت بصدمه..بجد!!! طب ازاي!!!! من سنين طويله اكتشفنا ان في ناس غريبه بيتجي عالمنا مش شبهناا..لكنهم بيقدموا تضحيه ولو نفذوها بيتختموا بختمنا ويعشيوا معانا هنا زيهم زينا امل باستغراب:ختمكم !!!! وهو اي ختمكم داا لاقيتها بتشاور ع غمزه خدها ياانهاار!!!!!! يعني غمزه الخد دي علامتكم عشان كدا موجوده فيكم كلكم ستات ورجاله ..عشان كدا فارس كان مخليني مداريه نص وشي لما كنا ماشيين!!
مهره:دي صفه في اجدادنا واتوارثت لينا كلنا ودا اللي بيميزنا..والغريب بيتعرف وسطنا واللي بيختار يبقا مننا وبيقدم تضحيته.. بنلاقيها ظهرتله علطول! مهره:اهو فارس جه..عملت اي يافارس فارس بتعب:لسه التاجر مرجعش ..لازم نلحق نخبي امل قبل ماالحرس يجوا ماهر:الحرس بدأو يلفوا ع البيت فارس:بتيجي بالاخبار الزفت …….. كانوا مخبيني ورا باب وتقريبا بيحطوا فيه التوابل بتاعتهم! فارس:اياكِ اسمعلك نفس انتي فاهمه امل بخوف:حاضر حاضر كنت سامعه كل الخطوات والكلام اللي برا
الحرس:فارس شعيب ومهره شعيب الريحه جوا المكان هنا مكنتش قادره اخد نفسي منها…حاولت وحاولت وحاولت…لحد ماعطست بقوه الحرس بعصبيه:اي الصوت دا فتشوا المكان فارس بتوتر:دا دا تلاقي صوت من برا كنت سامعه فارس بيتكلم وبيحاول يقنع الحرس ان الصوت من برا…وفجاه عطست تاني للمره التانيه وقتها غمضت عيني واتشهدت وانا حاسه بالباب اللي انا مستخبيه وراه بيتفتح.. يتبع.. #ماوراء_الجبال🖤الجزء 4 كنت قاعده في ركن لوحدي متكومه ع نفسي وبعيط بقوه..وبيتردد في بالي صوت فارس وهو بيتحايل عليهم يسيبوني ومهره وهي بتعيط…قلبي وجعني وبيتحرق..هينفذوا فيا الاعدام بعد عيد ميلاد الملكه…يارتني ماكنت جيت هنا ولا قريت الكتاب
مش عارفه فات عليا كام ساعه وانا بعيط..لحد ماسمعت صوت بيهمس باسمي امل بدموع:فااارس فاارس انت..انت جيت تطلعني فارس بصوت واطي:هششش اسكتي ،خدي البسي اللبس داا في دقيقه يلاااا بعدها لاقيت فارس في ايده مفتاح فتحلي بيه ولا لبس زي..زي لبس الحرس! امل بدموع:هنعمل اي دلوقتي ياافارس فارس بحنيه وحزن:متخافيش انا جبت الكتاب هترجعي تاني كنا بنجري عشان نطلع من مبني خشبي كبيره جدا …طلعنا لاقينا ماهر واقف مستنينا وفي ايده الكتاب ولابس زي لبس فارس وانا لبسي تقريبا مش باين فيا حاجه غير عيني
كنا بنجري واحنا طالعين من البلد وكل شويه اتلفت ابص عليها عشان اودعها ودموعي بتنزل غصب عني..حتي مهره ملحقتش اشوفها عشان اشكرها اني لاقيتها منها حنيه ملاقتهاش في امي…بصيت ع فارس اللي مش هشوفه تاني وانا قلبي ف نغزه شديده ودموعي بتزيد عايزه اقوله انه الوحيد بعد موت بابا حسيت معاه بالامان..اني محتاجه اشكره لاي حاجه قدمهالي وانه هيوحشني..حتي عصبيته وزعقيه كل شويه هيوحشني…بصيت ع ماهر اللي ورانا بيراقب عشان لو حد شافنا وابتسمت..شخص متهور ومجنون…هيوحشني خفه دمه…وخناقه هو وفارس كل شويه
فارس:وصلناا اتلفت لقيتنا عند اكبر جبل من االثلاث جبال الموجوده امل :مين قالك ان هرجع من هنا فارس:لو كملتي قرايه الكتاب هتعرفي مسكت من ايده الكتاب وقعدت اقرا فيه ..بيوصف المكان وناسه والملكه وكل شبر فالبلد لحد ماوقفت عند جمله رغم مثاليه المكان العظيمه..الا انك هتختار ترجع لمكانك تاني..لاسباب مختلفه يمكن لانك سايب حته من روحك في العالم بتاعك عند اكبر جبل من الثلاث جبال اعبر المضيق..وكرر للمره الثانيه ماوراء الجبال…واهلا بعودتك للديار!
بصيت لاقيت فارس في نظرته حزن شديد وماهر واقف جنبه بيبتسملي ماهر:هتوحشيني ياصغنونه امل بعصبيه:بردو تااني ماهر بضحك:خلاص ياستي لاحسن تاكليني فارس:امل..خلي بالك من نفسك..وبلاش جنان وتهور تاني وقللي فضولك شويه..هت..هتوحشيني اول مااقال هتوحشيني دموعي زادت اكتر