انت مين وبتقرب

_انت مين وبتقرب مني كدة ليه ابعد عني لو سمحت   _ متقربش بقولك لو مبعدتش هصوت وألم ع…..   قبل ما اكمل رش ف وشي بخاخة ساعتها صورته لغوشت ومحستش بنفسي بعدها..   فتحت عيني ببطء حسيت اني متكتفة بصيت ع ايدي لقتها مربوطة ف الباب اللي جنبي ولقيت رجالة ضخمة واقفين جنب الباب افتكرت الشخص اللي رش ف وشي مخدر وعليت صوتي بزعيق : انتم عملتوووا فيا اييييه انا مخطوفة صح؟

واحد منهم قرب واتكلم : متعليش صوتك عشان منضطرش نعاملك بأسلوب مش هيعجبك، ايوا مخطوفة يختي اومال جايبينك دريم بارك هنا، ومسمعش نفسك بقى لحد ما الباشا يقولنا هنعمل ايه   عيطت : ب.. باشا م.. مين   _ متسأليش ف حاجة متخصكيش   زعقت : اا.. ع.. علفكرة بقى لو عرفتوا بابا يبقى مين مكنتوش هتخطفوني   خدت نفس عميق ووطيت صوتي : طب بص لو هربتني من هنا اوعدك هخلي بابا يديك اللي انت عايزه هو غني ومعروف حتى اسأل عليه

  بصوت عالي : والدك غني عن التعريف يا آنسة عليااا ولا ايه بصيت ناحية الصوت كان شاب لابس بدلة سودا نفس لون شعره اللي متسرح بطريقة عشوائية ، عيونه واسعة وعنده دقن عاطياه هيبة وجاذبية ابتسم بخبث وكمل : دا احنا جايبينك هنا مخصوص عشان خاطر ابوكِ قلبي دق م الخوف وبلعت ريقي، صوتي طلع مهزوز : م.. مش فاهمة ت.. ت.. تقصد ايه   – مالك خُفتِ كدة ليه، متخافيش مشكلتنا مع ابوكِ مش معاكِ

دموعي نزلت غصب عني مكنتش عايزة اعيط قدامه عشان مبينش اني ضعيفة وخايفة بس انا فعلا خايفة ع بابا، هو بحكم انه رجل أعمال غني وناجح اكيد ليه أعداء واكيد هيبتزوه بيا انا، مكنتش عايزة بابا يتحط ف مشكلة زي دي بسببي، بابا يبقى كل حاجة ليا دايما كان مدلعني انا بنته الوحيدة، ماما ماتت وهي بتولدني فكان هو اللي قايم بالدورين ومش بعد كل دا ابقى انا سبب اذاه ف شغله

سرحت وفقت ع صوته : خايفة عليه ولا ايه   بصتله بتوسل : ارجوك متأذيش بابا لو في مشاكل بينكم ف الشغل بلاش تدخلوني ضمن حساباتكم، حلوا مشاكل الشغل داخل الشغل بلاش اللعب اللي تحت الترابيزة دا لان كدة كدة انتم اللي هتتأذوا وبابا هيعرف مكاني وهيجبني بصلي بسخرية وانا كملت : طب قولي ايه المشكلة وانا هحاول اشوف حل يرضى الطرفين ضحك بصوت عالي : انتِ لسه صغيرة يا آنسة عليا ومش فاهمة حاجة

بصتله بعصبية : انا مش صغيرة عندي 23 سنة وخريجة تجارة انجلش يعني افهم جدا ف البزنس وكنت بساعد بابا ف كل حاجة فلو في مشكلة معينة قولي عليها وانا ممكن أحلها   طلع سجارة وولعها وبص الناحية التانية وهو بينفخ دخانها: ومين قالك ان المشكلة اللي بينا مشكلة شغل رديت بخوف : انا مش فاهمة حاجة موبايله رن، رد وبعد عني شوية : الو يا باشا _ ايوا هي فاقت من شوية

_ حاضر متخافش كله تحت السيطرة   قفل معاه ووجه كلامه للرجالة اللي واقفة : خدوا بالكم من أكلها ولو عايزة اي حاجة هاتوهالها والباب دا ميتقفلش خليكم واقفين بس الباب مفتوح مفهوم   _ استنى هنا انت رايح فين فهمني الاول انت جايبني هنا ليه   اتكلم وهو ماشي ناحية الباب : هتفهمي كل حاجة ف وقتها  

مشي وسابني وانا دماغي هينفجر م التفكير مش مستوعبة اللي حصل وكلمته بترن ف وداني “ومين قالك ان المشكلة اللي بينا مشكلة شغل” وبعدين مين الشخص اللي كان بيكلمه دا وبيقول يا باشا اكيد دا اللي ورا كل الموضوع، يارب ساعدني انا خايفة ***************************** _ يعني ايه مش لاقينها بنتي عمرها ما اتأخرت لحد الوقتي برا البيت اكيد جرالها حاجة   – اهدي يا باشا رجالتنا بيدوروا عليها ف كل حتة ومش ساكتين

  بزعيق : اهدي ازاااي وانا عارف ان بنتي مش كويسة انا لازم ابلغ البوليس ف اسرع وقت   – لازم يعدي 24 ساعة ع اختفاءها   _ مش مع مجدي ابو العزم الكلام دا شوف حد من معارفنا يا خالد اتصرررف   -ح.. حاضر يا باشا حاضر ************************** كنت قاعدة بعيط مش عارفة اتصرف خايفة من كل حاجة بحاول افك الحبل بس مش عارفة واحد منهم بصلي بزهق: ما تهدي بقى زهقتينا من ساعة ما جيتي وانتِ بتعيطي ومش ثابتة ف مكانك

  – ملكش دعوة بيا يعني مخطوفة وعايزني معيطش كمان يا شيخ حسبي الله ونعم الوكيل فيك   -لا حول ولا قوة إلا بالله متطوليش لسانك انتِ مش قدي   _ ما انت مش عايز تقبل بعرضي وتوافق ان بابا يديك فلوس ف مقابل انك تخرجني من هنا صدقني هديك ضعف اللي هتاخده – حسين القصري ميخونش يا آنسة   قلدته بتريقة : حصيين القوصري ميخونش يا انصة دا ع اساس ان انت بتعمل هنا عمرة يعني! تخطفني عادي مقابل الفلوس لكن تخون الباشا بتاعك ف مقابل فلوس اكتر ليه معندكش ضمير!

  على صوته : بت انتِ متوجعيش دماغي   _ طب اخر سؤال انت بتحب مراتك؟   – هي دي ولية تتحب دي اهي ست نكدية شبهك   _ نعم – قصدي نكدية وخلاص بس اديني مستحمل عشان خاطر العيال   _ حلو يعني عندك عيال اسمهم ايه وعندهم كام سنة بقى   بزهق: اشمعنا   _ يا عم متبقاش خنيق بقى وجاوب السؤال   – ندى ف ستة ابتدائي وملك ف الحضانة

  _ مش نفسك تخليهم يعيشوا عيشة احسن من كدة لان شكلك ع قدك صح   – اهي مستورة والحمدلله ادينا راضين   _ طب انا مستعدة ادخلهملك مدارس انترناشونال واديك راتب شهري كل شهر يكفيك وزيادة وتعمل مشروع منه كمان ايه رأيك   – بصي يا آنسة انا اه ع قد حالي بس مش معنى كدة اني اخون الراجل اللي بيأكلني عيش وبقالي عمر بشتغل معاه   – انت أصيل اوي يا عم ابراهيم

  _ الله يخليك بس انا مسميش ابراهيم مين اللي قالك ان اسمي ابراهيم   – هما دايما الناس الطيبة بيبقى اسمهم كدة   _ يا صبر أيوب   – خلاص يا عم متزعلش يلا تعالي احكيلي بقيت قصتك بدل ما ارجع اعيطلك تاني ع الاقل حاجة تسليني   _ انا عملت ايه ف حياتي عشان اخطف واحدة زيك   -نفس الشعور يا عمو والله يلا قوم اعملنا كوبايتين شاي واحكيلي مراتك مزعلاك ف ايه