انت مين وبتقرب

– اما نشوف اخرتها ايه خمس دقايق هولع ع الميا واجي   ساعتها كان صاحبه اللي معاه ف الحمام وميعرفش اني لوحدي ما صدقت اني عرفت استعبط الراجل التاني دا وقدرت افك رباط ايدي اللي بحاول افكه من ساعة ما فوقت

قمت بسرعة وانا بتسحب، المكان اللي كنت فيه عبارة عن أوضة بس والباب اللي بيطلع لبرا قريب فرحت ان مفيش حد تاني موجود وفتحت الباب بس زي ما توقعت كان مقفول بس كان في شباك جنبه واحنا ف الدور الأول فتحته ودعيت ربنا ميحصليش حاجة م النطة دي لام بردو الدور عالي شوية قعدت ع الشباك عشان انط وبصيت للارتفاع وقرأت اية الكرسي قبل ما انط وانا مغمضة عيني _اااااه

صوت لما لقيت ايدين اتلفوا حواليا وحسيت بوقعة ع الارض فضلت مغمضة عيني وانا مش عارفة انا وقعت تحت ولا فين _يعني ينفع الهبل اللي كنت هتعمليه دا   فتحت عيني لقتني واقعة ع الارض لسه ف المكان اللي كنت فيه والشاب اللي شفته الصبح كان ماسكني وهو اللي شدني كدة بصتله بغيظ وهو بصلي بغضب ونادى بزعيق : يا حسسيييين يا بدررر   طلعوا يجروا بسرعة ولما شافوني كانوا متوترين وهو كمل : عارفين لو مكنتش جيت ف اخر لحظة ولحقتها كان ممكن يحصل اييييه

بدر : انا دخلت الحمام وهي كانت مع حسين يا عمر بيه والله   حسين بتوتر : والله يا بيه انا دخلت اعمل كوبايتين شاي عشان هي طلبت وكانت مربوطة وقلت هما خمس دقايق وهاجي مجاش ف بالي انها ممكن تهرب ابدا   _ لا عاااش يا رجالة عذر أقبح من ذنب واحدة مخطوفة اكيد هتحاول تفك نفسها مينفعش تتساب لوحدها مهما حصل مفيش ذرة ذكاء عندكمممم   – ايوا قولهم

بصلي بغضب وزعق : مسمعش صوتك نفخت بضيق وبصيت الناحية تانية : معرفش ايه اللي جابه كان زماني خلصت منهم لولا انه طب عليا   _ بتقولي ايه   – مبقولش   قام من ع الارض واتكلم بنفس النبرة : هتقومي ولا محتاجة مساعدة بصتله بتحدي : انا مبحتاجش حد واللي عايزه اعمله بعمله يا استاذ عمر كنت راحة اقوم بس حسيت بوجع غير طبيعي ف رجلي وصرخت فوقعت تاني

بصلي وضحك بسخرية:ايه يا استرونج اندبدنت ومن مقومتيش ليه بصتله بغضب: الأرض اللي زحلقتني بس   _ الأرض اللي زحلقتك يعني مش انتِ اللي رجلك واجعاكِ م الواقعة ومش قادرة تقومي؟   حاولت اضغط ع نفسي واقوم بس الوجع زاد الضعف ودموعي نزلت غصب عني قبل ما اتكلم شالني زعقت: نزلني لو سمحت انا هعرف امشي لوحدي بقلة صبر : بطلي عناد بقى   سكت لان رجلي كانت بتم-وتني حاسة انها اتكسرت او اكيد اتكسرت

دخلنا الأوضة اللي كنت محبوسة فيها وهو بينزلني ع الارض عيونه جت ف عيني اول مرة اخد بالي منها كانت لون سواد الليل فيها نظرة وراها الف حكاية ارتبكت وانا ببصله ودورت وشي بعيد عنه وقف ونده ع حسين وبدر : اللي حصل دا مبيتكررش تاني وانا كنت جاي ومعايا الكاميرات اللي هنحطها هنا عشان اراقبها حتى وانا مش موجود وعشان كمان متفضلش مربوطة علطول كدة راحتك تهمنا بردو يا آنسة عليا

ابتسم بسذاجة وانا كنت بتألم من رجلي فهو لاحظ وكمل : انا هروح اجيب دكتور واجي عشان رجلك احتمال تكون اتكسرت م الوقعة، عشان تبطلي شغل العيال دا   _ انت شمتان فيا   – وانا اقدر بس بقولك عشان متكررهاش تاني   بتحدي : هكررها   بادلني نفس النظرة :وف كل مرة هجيبك قبل ما تهربي طلع من عندي وعم حسين بصلي بغيظ _ انت واخد ع خاطرك مني ولا ايه يا عم حسين اوعي تكون زعلان

– اسكتي مش عايز اسمع صوتك تاني كنتِ هتودينا ف داهية   _ ما هو يا عم حسين انت مرضتش تهربني الله وبعدين اهو ربنا خدلك حقك ورجلي اتكسرت   – لأ يا ستي اللهم لا شماتة   _ أصيل يا عم حسين   – متقوليش الكلمة دي تاني   _ يووه حاضر   بعد شوية عمر جه ومعاه الدكتور الرجالة طلعوا برا بس عمر اصر يفضل واقف الدكتور : طيب يا عمر لازم نعمل أشعة X_ray الاول

  عمر : مينفعش يا طارق ما انت عارف اللي فيها   الدكتور : لازم يا عمر عشان اعرف الكسر فين دا لو في كسر اصلا لان ممكن يبقى شرخ بس   عمر مسح ع شعره وانا بصتله بنصر فبصلي واتكلم : مبسوطة انتِ كدة   مثلت اني زعلانة : سبني بقى ام-وت عشان ترتاح   الدكتور : بص انا عندي فكرة بص العيادة بتاعتي جنبها معمل تحاليل واشعة بتاع واحد صاحبي وهو قفل دلوقتي ممكن اكلمه ونعدي عليه هاخد المفاتيح ونطلع نعمل الأشعة واكشف عليها

  عمر بتفكير : يعني متأكد مفيش حد هناك   – ايوا متأكد   _ يبقى توكلنا ع الله …………………. مشينا ف العربية بتاعت عمر وعدينا ع الدكتور صاحب دكتور طارق اخد المفاتيح ورحنا هناك