_ تصدقي بالله إنك معندكيش دم ولا إحساس أنا شايطة وبولع وإنتي قاعدة تضحكي عليا ، أنا إللي غلطانه إني جيت أشتكي لك أوجاعي وانتي عارفه إنك الوحيدة إللي بحكي لها كل اللي يخصني ، وبنظرات لوم أكملت وهي تسحب حقيبتها : _ أنا ماشية ومش عايزة منك حاجة . انتفضت الأخري وأمسكتها من يدها وهي تبدي علي وجهها وبعباراتها علامات الندم والأسف: _ خلاص اقعدي ماتزعليش ومتبقيش أفوشة كدة ،
والله طريقة كلامك وأمثلتك إللي بتقوليها هي إللي مـ,ـوتتني من الضحك ، نزعت هند يدها وهي تزجرها : _ بردوا تاني ! إنتي عايزة تنقطيني يابنتي والله العظيم. هدأتها صديقتها وتحدثت بجدية تلك المرة : _ يعني أعمل لك ايه !
ياما نصحتك وقلت لك ملكيش دعوة بيها واستري عليها من باب لاتجسسوا وانتي دايما حاطاها في دماغك ومصممة تركيبها الغلط قدام الكل من زمان ،
أهي اتقفلت عليكي زي الضمنة وريم بتخاف علي سمعتها جداً وبتخاف علي ولادها وبصراحة جوزك وحماتك مسكوها من ايديها إللي بتوجعها وكنتي إنتي الحبل إللي قعدتي تشدي فيه بكل عزمك علشان يخنقها فخنقك إنتي قبلها . تشعب الغضب برأسها وتكاثر بلا رادع وهي تتوعد بأيمانها اللامتناهية لغوا وخرج من حلقها كلمات لاتبشر بالخير أبداً:
_لا والله ماهيحصل طول مانا عايشة علي وش الدنيا ومش هسيبه يتجوزها وتخلف منه الواد وتلم الليلة هي وولادها ولو وصل الأمر إني أخفيها من علي وش الدنيا هخفيها كله إلا تعب السنين في النكد إللي انا عايشاه معاه وملامات أمه وكيدها ليا بأني أم البنات وإن الماعون بتاعي مش علي كيفها . نظرت لها صديقتها بعيون ممتلئه بالاندهاش من حديثها ورددت باستنكار: _ هو الأمر وصل معاكي لحد القـ,ـتل وتمـ,ـوتي نفس وتضيعي وتضيعي بناتك معاكي!
هو إللي في دماغك ده ايه مخ ولا لأ مؤاخذة يعني فردة بلغة ، وتابعت عتابها وهي تحاول إرهابها: _ والله ياهند لو عملتي اللي في دماغك لاهتخسري بيتك وبناتك وفوقيهم عمرك ، فوقي ياهند أنا والله العظيم خايفة عليكي وبنصحك لله إنتي كدة بترمي نفسك في التهلكة بكامل إرادتك . ضربت هند بكلتا يديها علي المنضدة بعنف شديد وبعيون تشعلل حقداً وكرها أردفت : _ يعني عايزاني أعمل إيه أسيبه يتجوزها وتخلف منه .
نظرت لها باستنكار واجابتها باستخفاف: _تصدقي وتؤمني بالله يا هند انتي تنفعي تطلعي تعملي برنامج اسهل طريقه لعمل من الحبة قبة ، واسترسلت حديثها وهي تلوي فمها اعتراضا على طريقتها : _يا ماما شيلي الموضوع من دماغك وركزي في بيتك وفي بناتك وازاي ترجعي جوزك لحضنك وسيبيك انك تركزي في حياه غيرك الكلمتين اللي بغنيهم لك كل يوم ، ولما تعملي كده ربنا هيصرف عنك كل شر يا اما كده يا اما النار هتلسعك الأول قبل ما تحرقي بيها غيرك .
حديثها لم يجدي نفعا فرأسها يابسا متيبسا والغل والحقد متصاعد على وجهها يراه الاعمى، ورأت ان الكلام معها سيشتتها عما تفعله فقررت انهاء الحديث في ذاك الموضوع ولتخطط وتعيد حساباتها ولكن تواعدت في داخلها ان تلك المره ستنالها فوزا وبالتاكيد ولن تستسلم .