حاجة غريبة أوي!
فين الجثة؟ جثة ديمة فين؟
مفيش جثة .. مفيش دم في الشارع، ديمة ملهاش أثر..
الناس هتتجنن .. مفيش حد مقتنع إنها انتـ,ـحرت .. ديمة ملهاش وجود.
_ اهدا يا عم الحاج .. انت متأكد إنها انتـ,ـحرت..
الراجل هيتجنن .. عقله هيطير.
_ اه والله يا ناس .. بنتي نطت من الشباك قدامي، وكانت ماسكة التليفون في إيديها..
_ ممكن تكون اتعلقت في بلكونة حد..
_ مستحيل يا ناااااااس .. مفيش بلكونات للدور الأرضي ع الناصية دي …
الناس كلها بتدور عليها، حاجة غريبة فعلا ..
الجيران معتقدين إن أبو ديمة اتجنن .. الأسرة كلها صعبانة عليهم..
بنت فقدت جمالها فجأة .. عروسة فقدت عريسها .. ضاعت فرحتها .. أب وأم مكسورين علشان بنتهم..
أكيد اتجننوا .. ملهاش غير كده .. أكيد اتجننوا … يعني ايه واحدة تنط من التاسع وملهاش أثر .. فين جثتها؟ فين الدم؟ فين التليفون اللي كان في إيديها..
الناس كلها بتدور ..
_ ديمة .. يا ديمة .. انتي فين ديمة؟
********** ***********
ديمة ملهاش أثر .. ملهاش وجود ..
الخبر انتشر، والناس كلها عرفت اللي حصل ..
أكرم ونسيم والشرطة، ورهف ولميس ورضوى، ومي، مفيش حد عنده تفسير للي حصل ..
الأب والأم بيحكوا للناس اللي حصل، بنتنا شافت صورة واحدة في التليفون، وصرخت وقالت الخاينة أهي .. أكيد حد بعت لها صورة صاحبتها اللي خانتها، واتفقت مع عادل ابن عمها علشان يرشوا عليها مية النار..
الأم بتفوق على فترات، وترجع يغمى عليها، والأب مش قادر يتلم على أعصابه..
عيون الناس بتكذبهم..
ازاي تنط من التاسع وملهاش وجود..
يتبع
الجزء السابع ..
تفاعل تفاعل تفاعل كتير اوى اوى ..
أكرم راجع من شغله، قعد على كافيه، مش مستوعب اللي بيحصل ده..
بس ايه الكائن الغريب ده، معندوش أي احساس بالذنب، بيقول نصيبها كده، خسارة كانت بنت جدعة..
شرب قهوته، ورجع شقته، اللي المفروض كانت هتبقى شقة الزوجية..
الشقة ضلمة سواد..
فتح الباب، بيدوس زرار النور، انفجر في وشه..
اتخض ..
_ أووووف .. مش وقت قفلة كهربا خالص..
طلع موبايله من جيبه، وفتح كشاف النور .. وبيدخل الشقة..
نور الشقة اشتغل عادي..
ايه ده؟ مفيش قفلة كهربا ولا حاجة..
حاجة غريبة..
دخل على أوضة نومه .. فتح النور ..
بدأ يقلع هدومه..
بيفتح الدولاب .. لقى ديمة واقفة في الدولاب .. بنفس الوش اللي اتحرق بمية النار..
أكرم بيصرخ .. رجع لورا بسرعة..
_ ديمة؟ ديمة انتي فين..
_ أنا مش ديمة ..
_ مش ديمة ازاي؟ انتي بتعملي ايه هنا؟
_ أنا مش ديمة .. أنا لاقيس..
_ لاقيس؟ لاقيس مين؟
_ أنا لاقيس بنت إبليس؟
بيغمض عينه .. مش فاهم حاجة .. بيبص عليها! اختفت من قدامه .. بيدور حواليه عليها مش شايفها..
_ ديمة .. ديمة .. انتي فين ياديمة؟
الصوت ظهرله من فوق الدولاب.
_ انت غبي يا أكرم؟ بقول لك أنا لاقيس مش ديمة..
بيبص فوق الدولاب .. جمسه اترعش ..
دي طلعت فوق الدولاب ازاي؟ وبتعمل ايه؟
دي لسة كانت جوة الدولاب من شوية..
بيبص عليها وهو سرحان..
فجأة…
بقت ع السرير وراه .. صرخت بصوت عالي، صراخ عالي..
_ أكرررررررررررررررررررم..
اتفزع .. لف بضهره ناحيتها .. وجسمه بيفرز عرق .. عرق كتير.. بيحاول يستعيذ بالله من الشيطان .. لكن مش عارف يسيطر على أعصابه.
_ أعو .. أعو … أعوعو .. عوذ عوذ .. أعا .. عوذوو .. ذو..
_ ايه؟
مش عارف تنطقها؟ ولا خايف؟ أنا عارفة انك جبان ومش هتقدر تكملها..
لاقيس بتصرخ في وشه .. صرخة قوية..
_ يا جبان ..
أكرم فقد اتزانه ووقع ع الأرض، وبقى يراقبها..
_ هسيبك تتلم على أعصابك .. خمس دقايق وهرجع لك .. إياك تتحرك من مكانك
********** #سيد_داود_المطعني ***********
في شقة أم ديمة وأبوها ..
لاقيس واقفة قدامهم، بتتفرج على أم ديمة اللي بتبكي وبتضحك عليها..
بتضحك عليها ليه دي؟
اتمشت شوية في الشقة، وراحت فتحت أوضة ديمة، اتجولت فيها شوية، وبصت عليها بنظرة بانودرامية.
وجريت لحد الشباك اللي نطت منه ديمة، ونطت هي كمان.
************ #سيد_داود_المطعني ********
أوضة نوم لميس في بيت أهلها .. لميس نايمة في سابع نومة..
لاقيس فتحت النور .. لمست وش لميس بإيديها .. بدأت تصحيها بصرخة قوية..
_ لميس..
لميس قامت من النوم مفزوعة .. شافت وش لاقيس المحروق .. نفس وش ديمة.. اتخضت
_ ديمة!
لاقيس ض*ربتها على وشها .. أغمى عليها ونامت تاني..
*********** #سيد_داود_المطعني ***********
لاقيس راحت أوضة نوم رضوى ورهف .. وعملت معاهم نفس اللي حصل مع لميس..
هي بتعمل كده ليه؟
بتعمل كده ليه؟
بتختار أصحاب ديمة كلهم ليه؟
******** # **************
أكرم بسرعة رهيبة .. بيجمع كل هدومه .. وبيشيل الشنطة..
وماسك الفون في يده..
اتصل بأخوه .. يقول له أنا جاي أبات في البيت .. إياك تنام..
إياك تنام .. جاي أنام في البيت النهاردة..
خرج أكرم بسرعة قبل ما لاقيس ترجع..
لاقيس رجعت البيت ..
دخلت أوضة النوم .. ولاحظت إن الدولاب مفتوح ومتبهدل ..
بدأت تضحك بصوت عالي..
هاهاهاهاهاهاها .. هاهاهاهاهاهاهاهاهاهاهاها
_ هرب الجبان.. بس هتروح مني فين .. ده أنا لاقيس بنت إبليس .. وانت شغلتي من النهاردة يا أكرم..
هتروح بيت أهلك هتلاقينا هناك يا مغفل..
يتبع
الجزء الثامن ..
أكرم وصل بيت أهله، مرعوب .. بيترعش .. أخوه عمر فتح له الباب..أمه كانت نايمة، متعرفش إنه جاي .. بس عمر مستغرب .. هو أكرم ماله؟ إيه اللي خلاه ياخد قرار إنه ينام عندهم النهاردة .. ويقطع مسافة سبعين كيلو بالعربية..
_ أنا هنام معاك في أوضتك يا عمر..
_ يا ابني سلم الأول .. خد نفسك .. اسأل عن أمك .. اسألني عامل ايه..
_ معلش يا عمر سامحني .. أنا مش عارف أتلم على أعصابي.
.دخلوا أوضة عمر .. وبدأ أكرم يحكي له عن اللي حصل .. وعمر بيضحك عليه بصوت عالي..
_ هاهاهاهاهاهاها .. لاقيس مين وإبليس مين يا أكرم .. انت راجل متعلم عيب عليك .. وتظهر في شكل ديمة ليه؟
_ مش هستحمل أي تريقة يا عمر .. أنا فيا اللي مكفيني ..
_ معلش يا أكرم بس انت بتقول كلام غريب..
_ هو أنا هكدب عليك يا عمر؟ متعصبنيش..
_ مش بتكدب .. بس ممكن تكون حاسس بالذنب ناحية ديمة .. أو هي صعبانة عليك .. أو بتفكر فيها..
_ أنا فعلا زعلان علشانها .. دي كانت هتبقى مراتي..
_ يا آخي بطل الجحود اللي فيك ده ..
دي بقت مراتك فعلا يا أكرم..
_ مش عايز فلسفة يا عمر .. أنا فاصل ومش شايف قدامي .. أنا هنام جنبك هنا ع السرير..
أكرم نام بهدومه على السرير من شدة التعب .. وعمر كان طالع برة .. أكرم اتخض لما شافه طالع..
_ انت رايح فين يا عمر ..